’Ia ’ore rā…

Dennis E. Simmons

Nō te pupu piti nō te Hitu ’Ahuru

E rave te mau tāne i te mau mea fa’ahiahia nā roto i te ti’aturira’a i te Fatu ’e te ha’apa’ora’a i tāna mau fa’auera’a—nā roto i te fa’a’ohipara’a i te fa’aro’o noa atu ē, ’aita rātou e ’ite ra ē tē ha’apa’ari nei te Fatu ia rātou.

I tō’u taure’are’ara’a, ’ua ho’i au i te fare i muri a’e i te hō’ē ha’utira’a tāora pōpō i roto i te ’ete, nō te matahiti va’u, ma te pe’ape’a, te ’ino’ino, ’e te tāfifi te mana’o. ’Ua parau vau i tō’u metua vahine : « ’Aita vau i ’ite nō te aha mātou i pau ai—e fa’aro’o ho’i tō’u ē, e upo’oti’a mātou ! »

Tē ’ite nei au i teienei ē, ’aita vau i ’ite e aha te fa’aro’o.

E ’ere te fa’aro’o i te fa’a’itera’a i te ri’ari’a ’ore, e ’ere i te hina’aro noa, e ’ere i te hō’ē noa tīa’ira’a. Te fa’aro’o mau, ’o te fa’aro’o ïa i te Fatu ia Iesu Mesia—’o te ti’aturira’a ia Iesu Mesia ’o tē arata’i i te hō’ē ta’ata ’ia pe’e iāna.¹

E rave rahi tenetere i ma’iri a’e nei, ’ua tūra’i-tā’ue-hia ’o Daniela ’e tōna mau hoa taure’are’a mai te hō’ē vāhi pāruruhia i roto atu i te ao nei, hō’ē ao ’e’ē ’e te ri’ari’a. I tō Sadaraka, Meseka ’e Obede-nego pāto’ira’a i te pi’o i raro a’e i te ha’amori i te hōho’a ’auro i fa’ati’ahia e te ari’i, ’ua parau mai ra ’o Nebukanesa ma te hae ia rātou ē, mai te mea ē, ’aita rātou e ha’amori mai tei fa’auehia, e hurihia ïa rātou i roto i te umu auahi ura i reira ra. « ’E ’o vai te Atua e fa’aora ia ’outou i tō’u nei rima ? »²

’Ua pahono ’oi’oi atura nā taure’are’a e toru ma te ti’aturi : « ’Ia hina’aro ’oia iho, [Mai te mea ē, e tu’u ’oe ia mātou i roto i te umu], e ti’a ïa i tō māou Atua tā mātou e tāvini nei ’ia fa’aora ia mātou i te umu auahi ura ra, ’e e ti’a ïa iāna ’ia fa’aora ia mātou i tō rima. » E au teie i tō’u huru fa’aro’o i te fāito ha’api’ira’a va’u. ’Ei reira rā rātou i te fa’a’itera’a ē, ’ua māramarama hope roa rātou e aha te fa’aro’o. ’Ua parau fa’ahou rātou, « ’Ia ’ore rā… e ’ore ā mātou e ha’amori i tō ’oe ra mau atua, ’ia ’ite mai ’oe, e te ari’i, e ’ore ho’i e ha’amori i te ti’i ’auro i fa’ati’ahia e ’oe ra ».³ E fa’ahitira’a parau teie nō te fa’aro’o mau.

’Ua ’ite rātou ē, e nehenehe tā rātou e ti’aturi i te Atua—noa atu ē, ’aita te mau mea e tupu ra mai te huru tā rātou i ti’aturi.⁴ ’Ua ’ite rātou ē, ’ua hau atu te fa’aro’o i te mana’o fāri’i, hau atu i te fā’ira’a ē, tē ora nei te Atua. Te fa’aro’o ’o te ti’aturira’a hope ïa iāna.

Te fa’aro’o ’o te ti’aturira’a ïa ē, noa atu ’aita tātou e hāro’aro’a ra i te mau mea ato’a, ’ōna rā, ’oia ïa. Te fa’aro’o ’o te ’itera’a ïa ē, noa atu ē, e ’ōti’a tō tō tātou mana, ’aita tōna. Te fa’aro’o ia Iesu Mesia ’o te ti’aturi-hope-roa-ra’a ïa iāna.

’Ua ’ite Sadaraka, Meseka ’e Obede-nego ē, e nehenehe tā rātou e ti’aturi i ni’a iāna i te mau taime ato’a nō te mea ’ua ’ite rātou i tāna fa’anahora’a, ’e ’ua ’ite rātou ē, e’ita ’oia e taui.⁵ ’Ua ’ite rātou, mai ia tātou i ’ite ē, e ’ere te orara’a tāhuti i te hō’ē mea tupu noa nō te nātura. E tuha’a poto roa te reira nō te fa’anahora’a rahi⁶ a tō tātou Metua here i te ao ra nō te fa’ati’a ia tātou, tāna mau tamaiti ’e tāna mau tamāhine, ’ia fa’atupu ato’a i taua mau ha’amaita’ira’a ra tāna e fāna’o nei, mai te mea ē, ’ua ineine tātou.

’Ua ’ite rāua mai tā tātou e ’ite nei ē, i roto i tō tātou orara’a hou te tāhuti nei, ’ua ha’api’ihia mai tātou e ana nō ni’a i te tumu nō te tāhuti nei : « E hāmani tātou i te hō’ē ao ’ei pārahira’a nō rātou ; ’e e tamata tātou ia rātou i reira, ’ia ’ite tātou ē, e ha’apa’o ānei rātou i te mau mea ato’a tā te Fatu tō rātou Atua e fa’aue ia rātou ra ».⁷

Nō reira terā ïa—e tāmatara’a teie. ’Ua riro te ao nei ’ei vahi tāmatara’a nō te mau tāne ’e te mau vahine tāhuti nei. ’Ia ’ite ana’e tātou ē, e tāmatara’a teie, i tu’uhia mai e tō tātou Metua i te ao ra, ’o tē hina’aro nei ’ia ti’aturi tātou iāna ’e ’ia fa’ati’a iāna ’ia tauturu ia tātou, e nehenehe ïa tātou e ’ite pāpū atu ā i te mau mea ato’a.

Tāna ’ohipa ’e tōna hanahana, tāna i parau ia tātou, ’o te « fa’atupura’a [ïa] i te tāhuti ’ore ’e te ora mure ’ore o te ta’ata nei ».⁸ ’Ua noa’a a’ena iāna te huru Atua. I teienei tāna fā hō’ē roa ’o te tauturura’a ïa ia tātou—’ia fa’ati’a ia tātou ’ia ho’i fa’ahou iāna ra ’e ’ia riro mai iāna te huru ’e ’ia ora i tōna huru orara’a ē a muri noa atu.

Nō tō rātou ’itera’a i teie mau mea ato’a, ’aita atu ra i te mea fifi nō teie nā taure’are’a Hebera e toru ’ia rave i tā rātou fa’aotira’a. E pe’e rātou i te Atua ; e fa’a’ohipa rātou i te fa’aro’o iāna. E fa’aora ’oia ia rātou, ’ia ’ore rā—’e ’ua ’ite tātou i te toe’a o te ’ā’amu.

’Ua hōro’a mai te Fatu ia tātou i te ti’amāra’a nō te mā’iti, te ti’ara’a ’e te hōpoi’a nō te rave i te fa’aotira’a.⁹ E tāmata ’oia ia tātou nā roto i te vaiihora’a ia tātou i mua i te tāmatara’a. Tē ha’apāpū nei ’oia ia tātou ē, e’ita ’oia e vaiiho ia tātou ’ia fa’ahemahia i’ō atu i tō tātou ti’ara’a ’ia pāto’i.¹⁰ Tītauhia rā ia tātou ’ia māramarama ē, e fa’atupu te mau tāmatara’a rarahi i te mau ta’ata rarahi. ’Aita tātou e ’imi nei i te ’ati, mai te mea rā e pāhono tātou ma te fa’aro’o, e ha’apūai te Fatu ia tātou. E nehenehe te mau ’ia ’ore rā e riro ’ei mau ha’amaita’ira’a fa’ahiahia.

’Ua ’apo mai te ’āpōsetolo Paulo i teie ha’api’ira’a rahi ’e ’ua parau a’era, i muri a’e e rave rahi ’ahuru matahiti ’ohipa misiōnare ha’apa’o maita’i : « Tē ’oa’oa ato’a nei rā tātou i te mau ’āti nei ; ’ua ’ite ho’i tātou ē, nā te pohe e fa’atupu i te fa’a’oroma’i ; ’e nā te fa’a’oroma’i, e fa’atupu i te ’ite ; ’e nā te ’ite e fa’atupu i te tīa’i : e ’ore ho’i te tīa’i e fa’aha’amā mai ».¹¹

’Ua ha’apāpū mai te Fa’aora iāna ē : « Tō’u nei maita’i ’ātīrē ïa tā ’oe : ’ei te paruparu e ta’a maita’i roa ai tō’u pūai ».¹²

’Ua pāhono atu Paulo : « ’E teienei, e mea ’oa’oa ïa iā’u te ’ārue i tō’u nei paruparu ’ia vai māite te pūai о te Mesia i ni’a iā’u nei… E teienei, e mea ti’a iā’u te paruparu, ’e te fa’a’ino, ’e te ati, ’e te hāmani ’ino, ’e te ahoaho i te Mesia nei : ’ia paruparu ho’i au га, tē pūai га ïa vau i reira ».¹³ I te fa’arurura’a Paulo i tāna mau tāmatara’a i te haere’a o te Fatu ra, ’ua rahi atu tōna fa’aro’o.

« Nō te fa’aro’o i pūpū ai Aberahama ia Isaaka, ’a tāmatahia ai ’oia ra ».¹⁴ Nō tōna fa’aro’o rahi, ’ua fafauhia ia Aberahama ē, e rahi a’e tōna huā’ai i te mau feti’a i te ra’i ra, ’e e tae mai tāua huā’ai ra nā roto ia Isaaka. ’Ua ha’apa’o ’oi’oi rā Aberahama i te fa’auera’a a te Fatu. E tape’a te Atua i tāna parau fafau, ’ia ’ore rā mai te au i tā Aberahama i ti’aturi ra, e ti’aturi hope noa atu ā ’oia iāna.

« Nō te fa’aro’o i ’ore i ti’a ai ia Mose… ’ia ma’irihia ’o te tamaiti a te tamahine a Pharao ra ;

« E mea maita’i iāna te rave ato’a i te pohe i te ’āmuira’a i te ta’ata nō te Atua ra, ’ia rave i te navenave poto noa o te parau ’ino ra ;

« E tao’a rahi ho’i iāna te fa’a’ino i te Mesia nei, i te mau tao’a ato’a o ’Aiphiti ra…

« Nō te fa’aro’o i fa’aru’e ai ’oia i ’Aiphiti, ’aore i mata’u i te riri o te ari’i ra…

« Nō te fa’aro’o i tae ai ai rātou nā raro i te miti ’ute’ute mai te mea ē e fenua pāpāmarō…

« Nō te fa’aro’o i hi’a ai te ’āua i leriho ra i raro ».¹⁵

Tē tahi ato’a atu « ’o tei pau ia rātou te mau bāsileia i te fa’aro’o… ’e ’ua noa’a tei parauhia maira, ’ua ’ōpani i te vaha o te liona,

« ’Ua tinai ho’i i te pūai o te auahi, ’ua ora i te mata ’o’e ra, ’ua fa’a’eta’etahia i te paruparura’a ra, ’aito roa atu ra ho’i i te tama’i ».¹⁶

Terā rā, i roto i taua mau hope’ara’a hanahana ra i ti’aturihia ’e i tīa’ihia e rātou, tē vai noa ra ā te ’ia ’ore rā :

« ’E e ati rahi tō te tahi pae i te tāhitohito, ’e te papa’i ; ’e te ru’uru’u ’e te tāpe’a i roto i te fare :

« I pehihia rātou i te ’ōfa’i, i ’o’ehia rōpū ia rātou ’e ta’a ’ē atu ra, i ha’avarehia, i taparahi-pohe-roa-hia i te ’o’e ; i ori haere noa rātou… ma te faufa’a ’ore, ’e te ’ati rahi, ’e te hāmani-’ino-rahi-hia ra…¹⁷

« Nā te Atua i hōro’a mai i te tahi mau mea maita’i a’e nō rātou nā roto i tō rātou mau māuiui, nō te mea ma te māuiui ’ore e ’ore rātou e maita’i roa ».¹⁸

’Ua ī tā tātou mau pāpa’ira’a mo’a ’e tō tātou ā’amu i te mau ’ā’amu nō te mau tāne ’e te mau vahine rahi o te Atua tei ti’aturi ē, e fa’aora ’oia ia rātou, ’ia ’ore rā, ’ua fa’a’ite mai rātou ē, e ti’aturi noa rātou ’e e ha’apa’o noa.

E mana tōna, terā rā, nō tātou te tāmatara’a.

E aha tā te Fatu e tīa’i nei ia tātou nō ni’a i tō tātou mau tāmatara’a ? Tē tīa’i nei ’oia ’ia rave tātou i te mau mea ato’a e nehenehe ia tātou ’ia rave. Nāna e rave i te toe’a. ’Ua parau ’o Nephi : « ’Ua ’ite ho’i tātou ē, nā roto i te maita’i e fa’aorahia ai tātou, hope noa atu ā te mau mea ato’a ’o tē mara’a ia tātou ’ia rave. »¹⁹

Tītauhia ia tātou ’ia fāri’i i te hō’ē ā fa’aro’o mai ia Sadaraka, Meseka, ’e Obede-nego.

E fa’aora tō tātou Atua ia tātou i te tāhitohitora’a ’e te hāmani-’ino-ra’a, ’ia ’ore rā… E fa’aora tō tātou Atua ia tātou i te mau ma’i ’ia ’ore rā… E fa’aora ’oia ia tātou i te vai-’ōtahi-ra’a, te fa’aturumara’a ’e aore rā, i te mata’u ’ia ’ore rā… E fa’aora tō tātou Atua ia tātou i te mau ha’amata’ura’a, te mau parira’a, ’e te pāruru ’ore, ’ia ’ore rā… E fa’aora ’oia ia tātou i te pohe ’e ’aore rā, i te paruparu o tei herehia, ’ia ’ore rā… e ti’aturi ïa tātou i te Fatu.

E hi’o tō tātou Atua ē e fāri’i tātou i te parauti’a ’e te maita’i, ’ia ’ore rā… E ha’apāpū ’oia ē ’ua herehia tātou ’e ’ua ’itehia tātou, ’ia ’ore rā… E fāri’i tātou i te hō’ē hoa maita’i ’e te mau tamari’i parauti’a ’e te ha’apa’o, ’ia ’ore rā… e fa’aro’o ïa tātou i te Fatu Iesu Mesia, ma te ’ite ē, mai te mea e rave tātou i te mau mea ato’a e mara’a ia tātou ’ia rave, e fa’aorahia mai ïa tātou ’e e fāri’i ho’i i te mau mea ato’a nāna ra, i tōna taime ’e i tāna ravera’a.²⁰ Tē faʼaʼite pāpū atu nei au i te reira i te i’oa o Iesu Mesia, ’āmene.