ஆனால் இல்லையெனில் …

டென்னிஸ் ஈ. சிம்மன்ஸ்

எழுபதின்மரின் தலைமை

கர்த்தர் மீது நம்பிக்கை வைத்து, அவருடைய கட்டளைகளைக் கடைப்பிடிப்பதன் மூலம்—கர்த்தர் எவ்வாறு தங்களை வடிவமைக்கிறார் என்று தெரியாவிட்டாலும் கூட, விசுவாசத்தைப் பிரயோகப்படுத்துவதன் மூலம் மனிதர்கள் அற்புதங்களைச் சாதிக்கிறார்கள்.

ஒரு இளைஞனாக, நான் எட்டாம் வகுப்பு கூடைப்பந்து போட்டியில் இருந்து மனமுடைந்து, ஏமாற்றமடைந்து, குழப்பத்துடன் வீடு திரும்பினேன். நான் என் அம்மாவிடம் நம்பிக்கையிழந்து சொன்னேன், “நாங்கள் ஏன் தோற்றோம் என்று தெரியவில்லை—நாங்கள் வெல்வோம் என்று எனக்கு நம்பிக்கை இருந்தது!”

நம்பிக்கை என்றால் என்னவென்று அப்போது எனக்குத் தெரியாது என்பதை இப்போது நான் உணர்கிறேன்.

விசுவாசம் என்பது துணிச்சல் அல்ல, வெறும் ஆசை மட்டுமல்ல, நம்பிக்கை மட்டுமல்ல. உண்மையான விசுவாசம் என்பது கர்த்தராகிய இயேசு கிறிஸ்து மீதான விசுவாசம்—இயேசு கிறிஸ்துவின் மீதான தன்னம்பிக்கையும் நம்பிக்கையும் ஒரு நபரை அவரைப் பின்பற்ற வழிவகுக்கிறது.¹

பல நூற்றாண்டுகளுக்கு முன்பு, தானியேல் மற்றும் அவனது இளம் கூட்டாளிகள் திடீரென்று பாதுகாப்பிலிருந்து உலகினுள் தள்ளப்பட்டனர்—அன்னிய மற்றும் மிரட்டலான உலகு. சாத்ராக், மேஷாக் மற்றும் ஆபேத்-நேகோ ஆகியோர் ராஜாவால் அமைக்கப்பட்ட தங்க விக்கிரகத்தை தலைகுனிந்து வணங்க மறுத்தபோது, கோபமடைந்த நேபுகாத்நேச்சார், அவர்கள் கட்டளையிடப்பட்டபடி வழிபடாவிட்டால், அவர்கள் எரியும் நெருப்பு உலைக்குள் தள்ளப்படுவார்கள் என்று அவர்களிடம் சொன்னான். “உங்களை என் கைக்குத் தப்புவிக்கப் போகிற தேவன் யார்?”²

அந்த மூன்று இளைஞர்களும் உடனே, தன்னம்பிக்கையோடு பதிலளித்தனர்,” [நீர் எங்களை சூளையிலே போடுவதானால்] நாங்கள் ஆராதிக்கிற தேவன் எங்களைத் தப்புவிக்க வல்லவராயிருக்கிறார்; அவர் எரிகிற அக்கினிச்சூளைக்கும், ராஜாவாகிய உம்முடைய கைக்கும் நீங்கலாக்கி விடுவிப்பார்.” அது என் எட்டாம் வகுப்பு பையன் நம்பிக்கை போல் தெரிகிறது. ஆனால் விசுவாசம் என்றால் என்ன என்பதை அவர்கள் முழுமையாக புரிந்துகொண்டார்கள் என்பதை அவர்கள் நிரூபித்தனர். அவர்கள் தொடர்ந்து கூறினர், “ஆனால் இல்லையென்றாலும், … விடுவிக்காமற்போனாலும், நாங்கள் உம்முடைய தேவர்களுக்கு ஆராதனை செய்வதுமில்லை, நீர் நிறுத்தின பொற்சிலையைப் பணிந்துகொள்வதுமில்லை.”³ அது உண்மையான விசுவாசத்தின் அறிக்கை.

அவர்கள் எதிர்பார்த்தபடி விஷயங்கள் நடக்கவில்லை என்றாலும்—அவர்கள் தேவனை நம்ப முடியும் என்று அவர்களுக்குத் தெரியும்.⁴ நம்பிக்கை என்பது மன ஒப்புதலை விட, தேவன் வாழ்கிறார் என்பதை ஒப்புக்கொள்வதை விட அதிகம் என்பதை அவர்கள் அறிந்திருந்தனர். விசுவாசம் என்பது அவர் மேல் முழுமையான நம்பிக்கையாயிருப்பதாகும்.

விசுவாசம் என்பது அவர் செய்கிற அனைத்துக் காரியங்களையும் நாம் புரிந்துகொள்ளாவிட்டாலும் அதை நம்புதல் ஆகும். விசுவாசம் என்பது நமது வல்லமை குறைவாக இருந்தாலும், அவருடைய வல்லமை குறைவானது அல்ல என்பதை அறிவதாகும். இயேசு கிறிஸ்துவின் மீதான விசுவாசம் அவரை முழுமையாக சார்ந்திருப்பதை அடக்கியுள்ளது.

ஷாத்ராக், மேஷாக் மற்றும் ஆபேத்-நேகோ தாங்கள் எப்போதும் அவரை சார்ந்திருக்க முடியும் என்று அறிந்திருந்தார்கள், ஏனென்றால் அவர்கள் அவருடைய திட்டத்தை அறிந்திருந்தார்கள், மேலும் அவர் மாறுவதில்லை என்பதை அவர்கள் அறிந்திருந்தனர்.⁵ நாம் அறிவதுபோல, அவர்களுக்கு தெரியும், அநித்தியம் என்பது இயற்கையின் விபத்து அல்ல. நாம் விரும்பினால், அவருடைய மகன்கள் மற்றும் மகள்கள், அவர் விரும்பும் அதே ஆசீர்வாதங்களை அடையும்படிக்கு, பரலோகத்தில் உள்ள நமது அன்பான பிதாவின், மாபெரும் திட்டத்தின் ஒரு சுருக்கமான பகுதியாகும்.⁶

நமக்குத் தெரிந்தபடி, நம்முடைய அநித்தியத்துக்கு முந்தய வாழ்க்கையில், அநித்தியத்தின் நோக்கம் குறித்து அவரால் எங்களுக்கு அறிவுறுத்தப்பட்டது என்பது அவர்களுக்குத் தெரியும்: “இவர்கள் வாழ பூமியை நாம் உருவாக்குவோம்; அவர்களுடைய தேவனாகிய கர்த்தர் அவர்களுக்குக் கட்டளையிடும் அனைத்தையும் அவர்கள் செய்வார்களா என்பதைப் பார்க்க நாம் அவர்களை பரீட்சிப்போம்.”⁷

எனவே நாம் அதைப் பெற்றிருக்கிறோம்—இது ஒரு சோதனை. உலகம் ஆண்களுக்கும் பெண்களுக்கும் ஒரு சோதிக்கப்படும் இடம். அவர் மீது நம்பிக்கை வைத்து அவர் நமக்கு உதவ அனுமதிக்க வேண்டும், என விரும்புகிற நம் பரலோக பிதாவால் நடத்தப்படும் ஒரு சோதனை என்பதை நாம் புரிந்து கொள்ளும்போது, பின்னர் நாம் எல்லாவற்றையும் தெளிவாக பார்க்க முடியும்.

அவருடைய பணி மற்றும் அவருடைய மகிமை, “மனிதனின் அழியாமையையும் நித்திய ஜீவனையும் கொண்டுவருவது” என்று அவர் நம்மிடம் கூறினார்.⁸ அவர் ஏற்கனவே தேவத்துவம் அடைந்துவிட்டார். இப்போது அவருடைய ஒரே குறிக்கோள் நமக்கு உதவுவதாகும்—நாம் அவரிடம் திரும்பவும் அவரைப் போல ஆகவும் மற்றும் அவரைப்போல நித்தியமாக வாழ்க்கை வாழவும் உதவுவதாகும்.

இதையெல்லாம் தெரிந்தும், அந்த மூன்று இளம் எபிரேயர்களுக்கும் தங்கள் முடிவை எடுப்பது கடினமாக இருக்கவில்லை. அவர்கள் தேவனைப் பின்பற்றுவார்கள்; அவர்கள் அவர் மீது விசுவாசத்தைப் பிரயோகிப்பார்கள். அவர் அவர்களை விடுவிப்பார், ஆனால் இல்லையென்றால்—மீதமுள்ள கதை நமக்குத் தெரியும்.

உரிமை மற்றும் முடிவு செய்யும் பொறுப்பாகிய சுயாதீனத்தை கர்த்தர் நமக்கு வழங்கியுள்ளார்.⁹ அவர் நமக்கு சவால் விடப்பட அனுமதிப்பதன் மூலம் நம்மை சோதிக்கிறார். தாங்கிக்கொள்ளும் திறனுக்கு அப்பாற்பட்டு சோதிக்கப்பட அவர் நம்மை அனுமதிக்க மாட்டார் என்று அவர் நமக்கு உறுதியளிக்கிறார்.¹⁰ ஆனால் பெரிய சவால்கள் பெரிய மனிதர்களை உருவாக்குகின்றன என்பதை நாம் புரிந்து கொள்ள வேண்டும். நாம் உபத்திரவத்தை நாடவில்லை, ஆனால் நாம் விசுவாசத்தில் பதிலளித்தால், கர்த்தர் நம்மை பலப்படுத்துகிறார். ஆனால் இல்லை என்பவை குறிப்பிடத்தக்க ஆசீர்வாதங்களாக மாறக்கூடும்.

அப்போஸ்தலனாகிய பவுல் இந்த குறிப்பிடத்தக்க பாடத்தைக் கற்று, அறிவித்தான், பல தசாப்தங்களாக அர்ப்பணிக்கப்பட்ட ஊழியப்பணிக்குப் பிறகு, “உபத்திரவம் பொறுமையையும், பொறுமை, அனுபவத்தையும் அனுபவம் நம்பிக்கையையும் உண்டாக்குகிறதென்று நாங்கள் அறிந்து, … உபத்திரவங்களிலேயும் மேன்மை பாராட்டுகிறோம். நம்பிக்கை நம்மை வெட்கப்படுத்தாது.”¹¹

அவன் இரட்சகரால் உறுதியளிக்கப்பட்டான், “என் கிருபை உனக்குப்போதும்; பலவீனத்திலே என் பலம் பூரணமாய் விளங்கும்.”¹²

பவுல் பதிலளித்தான்: “கிறிஸ்துவின் வல்லமை என்மேல் தங்கும்படி, என் பலவீனங்களைக் குறித்து நான் மிகவும் சந்தோஷமாய் மேன்மை பாராட்டுவேன். … கிறிஸ்துவினிமித்தம் எனக்குவரும் பலவீனங்களிலும், நிந்தைகளிலும், நெருக்கங்களிலும், துன்பங்களிலும், இடுக்கண்களிலும் நான் பிரியப்படுகிறேன் … ”¹³ பவுல் தனது சவால்களை கர்த்தரின் வழியில் சந்தித்தபோது, அவனுடைய நம்பிக்கை அதிகரித்தது.

“விசுவாசத்தினாலே ஆபிரகாம் தான் சோதிக்கப்பட்டபோது, ஈசாக்கைப் பலியாக ஒப்புக்கொடுத்தான்.”¹⁴ ஆபிரகாம், அவனுடைய மிகுந்த நம்பிக்கையின் காரணமாக, பரலோகத்தில் உள்ள நட்சத்திரங்களை விட அதிக எண்ணிக்கையிலான சந்ததி வாக்குத்தத்தம் அளிக்கப்பட்டான், மேலும் அந்த சந்ததி ஈசாக்கு மூலம் வரும். ஆனால் ஆபிரகாம் உடனடியாக கர்த்தரின் கட்டளைக்கு இணங்கினான். தேவன் தனது வாக்குறுதியை காத்துக் கொள்வார், ஆனால் ஆபிரகாம் எதிர்பார்த்த விதத்தில் இல்லையென்றாலும், அவன் இன்னும் அவரை முழுமையாக நம்பினான்.

கர்த்தர் மீது நம்பிக்கை வைத்து, அவருடைய கட்டளைகளைக் கடைப்பிடிப்பதன் மூலம்—கர்த்தர் எவ்வாறு தங்களை வடிவமைக்கிறார் என்று தெரியாவிட்டாலும் கூட, விசுவாசத்தைப் பிரயோகப்படுத்துவதன் மூலம் மனிதர்கள். அற்புதங்களைச் சாதிக்கிறார்கள்.

“விசுவாசத்தினாலே மோசே … பார்வோனுடைய குமாரத்தியின் மகன் என்னப்படுவதை வெறுத்து,

“அநித்தியமான பாவ சந்தோஷங்களை அநுபவிப்பதைப் பார்க்கிலும் தேவனுடைய ஜனங்களோடே துன்பத்தை அநுபவிப்பதையே தெரிந்துகொண்டு,

“எகிப்திலுள்ள பொக்கிஷங்களிலும் கிறிஸ்துவினிமித்தம் வரும் நிந்தையை அதிக பாக்கியமென்று எண்ணினான்.

“விசுவாசத்தினாலே ராஜாவின் கோபத்துக்குப் பயப்படாமல் எகிப்தைவிட்டுப் போனான். …

“விசுவாசத்தினாலே அவர்கள் சிவந்த சமுத்திரத்தை உலர்ந்த தரையைக் கடந்துபோவதுபோலக், கடந்துபோனார்கள். …

“விசுவாசத்தினாலே எரிகோ பட்டணத்தின் மதில்கள் விழுந்தது.”¹⁵

பிறர் “விசுவாசத்தினாலே ராஜ்யங்களை ஜெயித்தார்கள், வாக்குத்தத்தங்களைப் பெற்றார்கள், சிங்கங்களின் வாய்களை அடைத்தார்கள்,

“அக்கினியின் உக்கிரத்தை அவித்தார்கள், பட்டயக்கருக்குக்குத் தப்பினார்கள், பலவீனத்தில் பலன்கொண்டார்கள், யுத்தத்தில் வல்லவர்களானார்கள்.”¹⁶

ஆனால் பங்கேற்பாளர்களால் நம்பப்பட்ட மற்றும் எதிர்பார்க்கப்பட்ட அனைத்து புகழ்பெற்ற விளைவுகளுக்கு மத்தியில், எப்போதும் ஆனால் இல்லை என்றால்:

“ வேறு சிலர் நிந்தைகளையும் அடிகளையும் கட்டுகளையும் சிறைத்தனத்தையும் அநுபவித்தார்கள்:

“கல்லெறியுண்டார்கள், வாளால் அறுப்புண்டார்கள், சோதனைக்குட்பட்டார்கள், பட்டயத்தினாலே வெட்டப்பட்டு மரித்தார்கள், …திரிந்து, குறைவையும் உபத்திரவத்தையும் துன்பத்தையும் அநுபவித்தார்கள்; … ¹⁷

“தேவன் அவர்களின் துன்பங்களின் மூலம் அவர்களுக்கு சில சிறந்த விஷயங்களை வழங்கினார், ஏனென்றால் துன்பங்கள் இல்லாமல் அவர்கள் பூரணமானவர்களாக இருக்க முடியாது.”¹⁸

நமது வேதங்களும் நமது வரலாறும் தேவனின் பெரிய மனிதர்கள் மற்றும் பெண்கள்பற்றிய விவரங்களால் நிரம்பியுள்ளன, அவர் அவர்களை விடுவிப்பார் என்று நம்பினர், ஆனால் இல்லையென்றாலும், அவர்கள் நம்புவார்கள் மற்றும் உண்மையாக இருப்பார்கள் என்பதை அவர்கள் நிரூபித்தனர்.

அவருக்கு வல்லமை இருக்கிறது, ஆனால் அது நமக்கு சோதனை.

நமது சவால்களைப் பொறுத்தமட்டில் கர்த்தர் நம்மிடம் என்ன எதிர்பார்க்கிறார்? நம்மால் முடிந்த அனைத்தையும் செய்ய வேண்டும் என்று அவர் எதிர்பார்க்கிறார். மீதியை அவர் செய்கிறார். நேபி சொன்னான், “நம்மால் முடிந்த எல்லாவற்றையும் செய்த பின்பு, நாம் கிருபையாலேயே இரட்சிக்கப்படுகிறோம் என்பதை நாங்கள் அறிவோம்.”¹⁹

ஷாத்ராக், மேஷாக் மற்றும் ஆபேத்-நேகோ போன்ற அதே நம்பிக்கையை நாமும் கொண்டிருக்க வேண்டும்.

நமது தேவன் நம்மை கேலி மற்றும் துன்புறுத்தலில் இருந்து விடுவிப்பார், ஆனால் இல்லையென்றாலும். … நமது தேவன் நம்மை நோய் மற்றும் வியாதியிலிருந்து விடுவிப்பார், ஆனால் இல்லையென்றாலும் … . அவர் நம்மை தனிமை, மனச்சோர்வு அல்லது பயத்திலிருந்து விடுவிப்பார், ஆனால் இல்லையென்றாலும். … நமது தேவன் அச்சுறுத்தல்கள், குற்றச்சாட்டுகள் மற்றும் பாதுகாப்பின்மை ஆகியவற்றிலிருந்து நம்மை விடுவிப்பார், ஆனால் இல்லையென்றாலும். … அவர் நம்மை அன்புக்குரியவர்களின் மரணம் அல்லது குறைபாடுகளிலிருந்து விடுவிப்பார், ஆனால் இல்லையென்றாலும், … நாம் கர்த்தரை நம்புவோம்.

நாம் நீதியையும் நியாயத்தையும் பெறுவதை நம் தேவன் பார்த்துக்கொள்வார், ஆனால் இல்லையென்றாலும். … நாம் நேசிக்கப்படுவதையும் அங்கீகரிக்கப்படுவதையும் அவர் உறுதி செய்வார், ஆனால் இல்லையென்றாலும். … நாம் ஒரு பரிபூரணமான தோழர் மற்றும் நீதியுள்ள மற்றும் கீழ்ப்படிதலுள்ள குழந்தைகளைப் பெறுவோம், ஆனால் இல்லையென்றாலும், நாம் இயேசுகிறிஸ்து மீது விசுவாசம் வைத்திருப்போம், நம்மால் முடிந்த அனைத்தையும் செய்தால், அவருடைய நேரத்திலும், அவருடைய வழியிலும் நாம் விடுவிக்கப்படுவோம். மற்றும் அவரிடம் உள்ள அனைத்தையும் பெறுவோம்.²⁰ அப்படியே இயேசு கிறிஸ்துவின் நாமத்தில் நான் சாட்சியளிக்கிறேன், ஆமென்.