Na Te Faamaloloina i Latou e Mafatia i Avega

Dallin H. Oaks

O Le Korama a Aposetolo e Toasefululua

O le mana faamalolo o le Alii o Iesu Keriso … o loo maua mo mafatiaga uma i le olaga nei.

Na fetalai mai le Alii, “Ia outou o mai ia te au, o outou uma o e tigaina ma mafatia i avega, o a’u foi e malolo ai outou” (Mataio 11:28).

E toatele o loo tauaveina ni avega mamafa. O nisi ua mou atu e pele ona o le oti pe o loo tausia se tasi e le atoatoa le malosi. O nisi o loo faamanualia ona o le tete’a. O nisi o loo faananau mo se faaipoipoga e faavavau. O nisi ua faapologaina e mea ua fai ma mausa po o amioga e pei o le ava malosi, tapaa, fualaau oona, po o le ponokalafi. O isi o loo i ai ni le atoatoa i le tino po o le mafaufau. O nisi o loo tauivi ma le tosina atu i tagata o lana lava itupa. O isi o loo iai lagona matautia o le lotovaivai po o le le atoatoa. Po o le a lava le tulaga, e toatele lava o loo mafatia i avega.

Na tuuina mai e le Faaola ia i tatou taitoatasi lenei valaaulia alofa:

“Ia outou o mai ia te au, o outou uma o e tigaina ma mafatia i avega, o au foi e malolo ai outou.

“Ia outou amoina la’u amo, ma ia outou faaa’oa’o ia te au, aua o au lē agamalu ma le loto maulalo, ona maua lea e outou o le malologa mo outou agaga.

“Aua e avegofie la’u amo, o la’u avega foi e mama ia” (Mataio 11:28–30).

O loo aofia ai i tusitusiga paia le tele o tala i le faamaloloina e le Faaola o e mafatia i avega. Na Ia faapupula i le tauaso; faafaalogo le na tutuli; na ia toe faamalosi i le supa, o le gase, po o e na mumutu; o lepela na faamamaina; ma agaga leaga na tuliese i fafo. E masani ona tatou faitau faapea o tagata na faamaloloina i nei ma’i faaletino na “malolo i latou” (tagai Mataio 14:36; 15:28; Mareko 6:56; 10:52; Luka 17:19; Ioane 5:9).

Na faamaloloina e Iesu le toatele mai ma’i faaletino, ae Na te le’i taofiofia le faamalologa mai ia i latou o e na saili ina ia “malolo” mai isi ma’i. Na tusia e Mataio e faapea, na Ia faamalolo o ma’i uma ma ma’i tiga uma o le nuu (tagai Mataio 4:23; 9:35). E toatele le motu o tagata na mulimuli atu ia te Ia ma na Ia “faamaloloina i latou uma” (Mataio 12:15). E mautinoa lava o nei faamalologa na aofia ai i latou o o latou ma’i sa aafia ai lagona, mafaufau, po o le faaleagaga. Na Ia faamaloloina i latou uma.

I Lana uluai lauga i le sunako, sa faitau leotele atu ai e Iesu mai lenei valoaga a Isaia: “Ua na faauu mai ia te au e folafola le tala lelei i e matitiva; ua auina mai au e ia e faamalolo i e loto momomo, e talai le saolotoga i le tafeaga, ma ia pupula mata o e tauaso, e tuusaoloto i e ua faasauaina” (Luka 4:18). A o faailoa atu e Iesu faapea ua Ia afio mai e faataunuu lena valoaga, na Ia toe faamautuina lava o le a Ia faamaloloina i latou o loo i ai ni ma’i faaletino ma o le a Ia tatala i e o loo faapologaina, ma tuusaoloto i e ua faasauaina, ma faamalolo i e loto momomo.

O le Talalelei a Luka o loo aofia ai le tele o faataitaiga o lena galuega. O loo faamatala mai ai le taimi na “faapotopoto atu ai le motu o tagata e toatele e faalogologo ia [Iesu], ma ia faamaloloina e ia o latou ma’i” (Luka 5:15). O isi taimi o loo faamaumauina ai e faapea na “faamalolo e Iesu tagata e toatele sa i ai ma’i” (Luka 7:21) ma na Ia “faamalolo i e na fia faamaloloina” (Luka 9:11). O loo faamatalaina ai foi le oo ifo o le motu o tagata e toatele mai Iutaia uma ma Ierusalema ma le itu i tai o Saitonu i le mea laugatasi “e faalogologo ia te ia, ma ia faamaloloina” (Luka 6:17).

Ina ua faaali atu le Faaola i e amiotonu i le Lalolagi Fou, sa Ia valaau i tagata o e pipili pe tauaso pe o aafia i soo se ma’i. Na Ia tuuina atu le valaaulia lava lea e tasi ia i latou sa “puapuagatia i se tasi mea” (3 Nifae 17:7). “Aumai ia i latou iinei,” sa Ia fetalai atu ai, “ou te faamaloloina i latou” (f. 7). O loo faamatala mai e le Tusi a Mamona le oo mai o le motu o tagata uma ma aumai i latou “uma ua tigaina i se tasi mea” (f. 9). Atonu na aofia ai i lenei vaega ia tagata sa i ai soo se ituaiga mafatiaga faaletino pe faalelagona po o le mafaufau, ma o loo molimau mai le mau na “faamaloloina e [Iesu] i latou uma taitoatasi” (f. 9).

Ua aoao mai le Faaola e faapea, o le a tatou feagai ma faigata i le lalolagi, ae tatau ona “tatou fiafia” aua ua Ia “manumalo i le lalolagi” (Ioane 16:33). O Lana Togiola e au ma ua lava le malosi e le gata e totogi ai le tau mo agasala, ae e faamaloloina ai foi mafatiaga uma faaletino. Na aoao mai le Tusi a Mamona e faapea, “O le a afio atu o ia, ma mafatia i tiga ma puapuaga ma faaosoosoga o ituaiga eseese uma; ma o le a oo ia te ia nei mea, ina ia mafai ona faataunuuina o le upu ua fai mai, o le a ia ave i ona luga tiga ma ma’i o ona tagata” (Alema 7:11; tagai foi 2 Nifae 9:21).

Na te silafia o tatou tiga, ma o loo i ai o Ia iina mo i tatou. E pei o le Samaria agalelei i Lana faataoto, ina ua Ia mauaina i tatou o manunu’a i tafaala, Na te fusifusi i o tatou manu’a ma tausi ia i tatou (tagai Luka 10:34). Uso e ma tuafafine, o le mana faamalolo o Lana Togiola e mo oe, e mo i tatou, ma tagata uma.

O Lona mana faamalolo silisiliese o loo sailia i upu faatalosaga o la tatou viiga, “Matai e, Ua Sou le Vasa”:

Matai e, ma le tiga o le agaga

Ou te ifo ai ma le faanoanoa.

Ua popole tele lo’u loto.

Maleifua mai faaola!

O agasala sa ou fai

Ua toetutu mai,

Le Matai e! Toe a fano o au.

Alofa sei tautai mai!

E mafai ona faamaloloina i tatou e ala i le pule o le Perisitua Mekisateko. Na tuuina atu e Iesu i Ana Aposetolo le mana “ina ia faamalolo i ma’i uma ma ma’i tiga uma” (Mataio 10:1; tagai foi Mareko 3:15; Luka 9:1–2), ma sa latou o atu ma “folafola le talalelei, ma faamalolo i ma’i i mea uma”” (Luka 9:6; tagai foi Mareko 6:13; Galuega 5:16). Na auina atu foi le Toafitugafulu ma le mana ma le faatonuga ina ia faamalolo i e mamai (tagai Luka 10:9; Galuega 8:6–7).

“E ui e mafai e le Faaola ona faamalolo ia i latou uma Na te faamaloloina, ae le moni lenei mea ia i latou e umia Lana pule o le perisitua. O le faaaogaina i le faaletino o lena pule e faatapulaa lea i le finagalo o Le ana le perisitua. O lea la, ua tauina mai ia i tatou e faapea o nisi o e faamanuiaina e toeaina e le faamaloloina aua ua ‘tofia e oti’ (MF&F 42:48). E faapena foi, ina ua saili le Aposetolo o Paulo ina ia faamaloloina mai le “mea matuitui i le tino” lea na tui ai o ia (2 Korinito 12:7), na le finagalo le Alii e faamalolo ia te ia. Na tusia mulimuli ane e Paulo faapea na fetalai atu le Alii ia te ia, “O lo’u nei alofa tunoa e lava lea e fesoasoani ia te oe, aua o le vaivai e faaatoatoaina ai lo’u mana” (f. 9). Sa tali atu Paulo ma le usitai e faapea o le a ia “mitamita i mea ua ou vaivai ai, ina ia tumau i o’u luga le mana o Keriso … aua pe a ou vaivai ona ou malosi ai lea” (ff. 9–10).

O faamanuiaga o le faamalologa e oo mai i auala e tele, e fetaui lelei ma o tatou manaoga taitoatasi, e pei ona silafia e Ia o le e sili Lona alofa ia i tatou. O nisi taimi e faamaloloina e se ‘faamalologa’ o tatou ma’i pe faamatuu ese atu ai a tatou avega. Peitai, o nisi taimi e ‘faamaloloina’ i tatou e ala i le tuuina mai o le malosi po o le malamalama po o le onosai e onosaia ai avega ua tuu mai i o tatou luga.

O tagata o e sa mulimuli ia Alema sa nofo pologa i tagata amioleaga. Ina ua latou tatalo mo se mapusaga, na ta’u atu e le Alii ia i latou o le a i’u ina Ia aveeseina i latou, ae o lea taimi o le a Ia faamāmāina foi avega ua tuu i o outou tauʼau, “e oo ia te outou tou te lē lagonaina i latou i luga o o outou tua, aʼo outou i ai lava i le pologa; ma o le a Ou faia lenei mea ina ia mafai ona outou tutu e avea o ni molimau … o Aʼu, o le Alii le Atua, e asiasi atu i oʼu tagata i o latou puapuaga” (Mosaea 24:14). I lena tulaga e lei aveeseina ia avega mai tagata, ae na faamalolosia i latou e le Alii ina ia “mafai ona latou tauave ma le faigofie a latou avega, ma sa latou gauaʼi atu ma le fiafia ma le onosai i le finagalo atoa o le Alii” (f. 15).

O le folafolaga foi lava lenei ma aafiaga e faatatau i tina ua maliliu a latou tane pe ua tetea, i tagata nofofua o loo tuua toatasi, ia te outou o e tausiaina o e o loo mamafatu le avega, ia te outou o tagata o loo i ai mausa, ma i tatou uma pe o a lava a tatou avega. “O mai ia Keriso,” ua saunoa mai ai le perofeta, “ma faaatoatoaina ia te Ia” (Moronae 10:32).

E i ai taimi e mafai ai ona tatou faanoanoa ona ua mamafatu a tatou avega. Pe a oo ina foliga mai ua sousou naua o tatou olaga, e mafai ona tatou lagonaina le tuulafoaiina ma alaga atu e pei o le au soo i le afa, “Le Aoao e, e te le manatu mai ea ia te i matou a fano?”” (Mareko 4:38). O taimi faapena e ao ai ona tatou manatua Lana tali: “Se a le mea tou te fefefe ai faapea? Se a le mea tou te le faatuatua mai ai?” (f. 40).

“O le mana faamalolo o le Alii o Iesu Keriso—e tusa pe aveeseina ai a tatou avega pe faamalolosia ai i tatou ina ia onosaia ma ola faatasi ma i latou e pei o le Aposetolo o Paulo—o loo avanoa mo mafatiaga uma i le olaga faaletino.

Ina ua uma ona ou tuuina atu se lauga i le konafesi aoao i le leaga o ponokalafi (tagai “Ponokalafi,” Liahona ma le Ensign, Me 2005, 87–90), Sa ou mauaina le tele o tusi mai tagata na mafatia i lenei vaisu. O nisi o nei tusi e mai alii o e na faatoilaloina ponokalafi. Na tusia e se tasi alii:

“E tele ni lesona na ou mauaina mai lo’u aafiaga o le aluese mai le pogisa o se agasala lea sa matuai puleaina ia olaga o tagata na maileia ai: (1) O se faafitauli tele lenei e le talitonuina le faigata ona faatoilalo. … (2) O le pogai sili ona taua o le lagolago ma le malosi i le faagasologa o le salamo o le Faaola lea. … (3) O le matuai suesueina o tusitusiga paia i aso taitasi, tapuaiga faifaipea i le malumalu, ma le auai ma le manatunatu loloto i le sauniga o le faamanatuga o vaega taua uma ia o se faagasologa o le salamo moni. Ou te matea, o nei gaoioiga uma na faia ina ia faaloloto ma faamalosia ai le sootaga a se tasi ma le Faaola, o le malamalamaaga o se tasi i Lana taulaga togiola, ma le faatuatua o se tasi i Lona mana faamalolo” (na tusia le tusi i le aso 24 Oke. 2005).

“Ia outou o mai ia te au,” le fetalaiga a le Faaola, “ma e tou te maua le malologa mo outou agaga” (Mataio 11:28–29). Sa liliu atu lena alii sa mafatia i avega i le Faaola ma e mafaia foi e i tatou uma.

O se tamaitai na faamata’uina lana faaipoipoga ona o le faananau o lana tane i ponokalafi sa ia tusia le auala sa ia tu ai i ona autafa mo tausaga e lima sa faatumulia i le tiga, a o ia faapea mai, “o le meaalofa o le Togiola mamalu a lo tatou Faaola pele ma le mea na Ia aoao mai ia te au e uiga i le faamagaloga, ua iu ai ina saoloto [la’u tane]—e faapena foi ia te au.” I le avea ai ma se tasi e le manaomia se faamamaina mai le agasala, ae sa na o le sailia o le faasaolotoina o se pele mai le pologa, sa ia tusia ai lenei fautuaga:

“Fesootai ma le Alii. … O Ia o lau uo sili! Na te silafia ou tiga aua ua uma ona Ia lagonaina mo oe. O loo Ia saunia e tauave lena avega. Ia lava le faatuatuaina o Ia ina ia tuu ai i Ona aao ma faataga o Ia e tauave mo oe. Ona mafai lea ona suia lou tiga i Lona filemu, i le taele o lou agaga” (na tusia le tusi i le aso 18 Aperila, 2005).

Na tusi atu se alii i se Pulega Aoao e uiga i le auala na fesoasoani ai le mana o le Togiola ia te ia i lona faafitauli o le tosina atu i tagata o lana lava itupa. Sa tape lona igoa mo ni solitulafono matuia lea na ia solia ai ana feagaiga o le malumalu ma ona tiutetauave i lana fanau. Sa ia filifili ai pe taumafai e ola i le talalelei pe faaauau ai pea i se auala e feteenai i ona aoaoga.

“Sa ou iloa o le a faigata,” sa ia tusia ai, “ae ou te lei iloaina le mea o le a ou oo i ai.” Sa faamatalaina i lana tusi le tuugaogaoina ma le tuua toatasi, ma le tiga matautia na ia oo i ai mai lava i le taele o lona agaga a o ia saili ina ia toe foi mai. Sa ia matuai tatalo mo le faamagaloga, o nisi taimi e tai fia itula i le aso. Sa lagolagoina o ia e ala i le faitauina o tusitusiga paia, e ala i le mafuta atu o se epikopo alofa, faapea ma faamanuiaga o le perisitua. Ae o le mea mulimuli na faia se eseeega o le fesoasoani lea a le Faaola. Na ia faamatalaina mai:

“Sa na o Ia ma Lana Togiola na auala mai ai. … Ua ou lagonaina nei se lotofaafetai e le mafaatusalia. O o’u tiga na toetoe lava a le gafatia i nisi o taimi, ae peitai sa matuai itiiti lava pe a faatusatusa i mea na Ia puapuagatia ai. O le mea sa pogisa ai lo’u olaga, ua i ai nei le alofa ma le loto faafetai.”

Sa ia faaauau pea: “O nisi ua fai mai e mafai ona faia suiga ma o le fofo e na o le pau lea o le tali. Ua latou matuai malamalama lelei i le mataupu [o le tosina atu i le itupa e tasi] ma e tele naua mea e ofoina atu i e o loo tauivi ai … , ae ou te popole ina ne’i galo ia i latou ona faaaofia ai le Tama Faalelagi i le faagasologa. Afai e tupu se suiga, o le a tupu e tusa ai ma le finagalo o le Atua. Ou te popole foi ona o le toatele o tagata e taulai atu i mafuaaga o le [tosina atu i le itupa e tasi]… E le manaomia ona tau fuafua pe aisea na ou maua ai [lenei luitau]. Ou te le iloa pe na ou fanau mai ma au, pe ona o aafiaga o le siosiomaga. O le mea moni lava na tupu, o lenei tauiviga sa ia te au i lo’u olaga atoa ma o le mea ou te faia i ai e amata atu i le taimi nei o le mea lena e sili ona taua” (na tusia le tusi i le aso 25 Mati, 2006).

O tagata na tusia nei tusi ua iloaina o le Togiola a Iesu Keriso ma le faamalologa o loo ofoina mai ai, e tele atu mea ua faia ai nai lo le avanoa e salamo ai mai agasala. “E tuuina mai foi e le Togiola le malosi ia i tatou e onosaia ai “mea tiga ma puapuaga, ma tofotofoga uiga eseese uma,” aua na tauave e lo tatou Faaola i Ona luga “ia puapuaga ma ma’i o lona nuu” (Alema 7:11). Uso e ma tuafafine, afai e le faamaloloina oe mai se mafatiaga e lou faatuatua ma talosaga ma le mana o le perisitua, e mautinoa lava o le mana o le Togiola o le a tuuina atu ia te oe le malosi e tauaveina ai le avega.

“Ia outou o mai ia te au, o outou uma o e tigaina ma mafatia i avega,” na fetalai mai ai le Faaola, “o a’u foi e malolo ai … o outou agaga” (Mataio 11:28_29).

A o tatou tauivi ma luitau o le olaga faaletino, ou te tatalo mo i tatou taitoatasi, e pei ona tatalo le perofeta o Mamona mo lona atalii, o Moronae: “Ia sii ae oe i luga e Keriso, ma talosia ia mau e faavavau i lou mafaufau ona mafatia ma lona maliu, … ma lona alofa mutimutivale ma le tali-tiga, ma le faamoemoe o lona mamalu ma le ola faavavau” (Moronae 9:25).

Ou te molimau atu ia Iesu Keriso, lo tatou Faaola, o le na valaaulia i tatou uma ina ia o mai ia te Ia ma ia faaatoatoaina ia te Ia. O le a Ia fusifusia o tatou manua ma o le a Ia faamalolo i e o mafatia i avega. I le suafa o Iesu Keriso, amene.