Kam Tugeta blong Isrel We I Seraot

Russell M. Nelson

Blong Kworom blong Olgeta Twelef Aposol

Yumi help blong karem tugeta, olgeta we Lod i bin jusum, long tugeta saed blong vel.

Ol brata mo sista blong mi, tangkyu from fet, fasin blong givim evri samting, mo lav blong yufala. Yumi serem wan bigfala responsabiliti blong stap olsem huia Lod i wantem yumi blong kam mo blong mekem wanem Hem i wantem yumi blong mekem. Yumi pat blong wan bigfala seraot—kam tugeta blong Isrel we i bin seraot. Mi toktok long doktrin ia tedei from se i spesel mo impoten long plan ia blong God we i no save finis.

Kavenan blong Ebraham

Long taem bifo, Lod i blesem Papa Ebraham wetem wan promes se blong mekem ol jeneresen blong hem oli ol pipol we Lod i bin jusum.¹ Ol refrens blong kavenan ia i hapen truaot long ol skripja. I gat tu ol promes se Pikinini blong God bae i kam tru long laen blong Ebraham, mo we bae oli gat ol graon, mo se ol nesen mo ol famli long wol bae oli kasem blesing tru long ol pikinini blong hem mo sam moa.² Be sam long ol pat blong kavenan ia i bin hapen finis, Buk blong Momon i tijim se !kavenan blong Ebraham bae i hapen nomo long ol las dei ia!³ I tokbaot bigwan tu se yumi tu, yumi stap insaed long ol kavenan pipol blong Lod.⁴ Hem i spesel janis blong yumi tu, blong wanwan i tekpat blong mekem olgeta promes ia oli kamtru. !I wan gudfala taem blong laef long hem!

Isrel I Stat blong Seraot

Olsem ol jeneresen blong Ebraham, ol traeb blong Isrel blong bifo oli save yusum prishud atoriti mo kasem ol blesing blong gospel, be long en, ol pipol oli bin gat fasin blong go agens. Oli bin kilimded ol profet mo Lod i panisim olgeta. Oli bin holem ol Ten traeb olsem ol prisena i go long Asiria. Longwe, oli stat blong lus mo i nomo gat rekod blong olgeta long evri ples. (I klia se, ol ten traeb oli no lus long Lod.) Tu[2] traeb we i stap yet oli gohed blong stap blong wan sot taem mo afta, from fasin blong olgeta blong go agens, oli tekem olgeta i go prisena long Babilon.⁵ Taem oli kambak, Lod i lukaot gud long olgeta, be bakegen oli no onarem Hem. Oli sakemaot mo tokbaot nogud Hem. Wan Papa we i gat lav be yet i harem nogud i mekem tabu promes ia, “Bae Mi sakem yu long medel blong olgeta we oli no gat respek long God,”⁶ mo Hem i mekem—oli seraot i go long evri nesen.

Isrel i Stap Kambak Tugeta

Promes blong God blong karembak Isrel i kambak tugeta i stret gud mo i klia.⁷ Eksampol, Aesea i bin luk se long ol las dei, Lod bae i sendem “ol mesenja kwiktaem” long olgeta pipol ia we oli “seraot mo brokbrok.”⁸

Promes ia blong kam tugeta, we i stap long plante ves long ol skripja, bae oli hapen olsem we i tru tumas olsem ol profesi blong Isrel we i seraot.⁹

Jos Ia blong Jisas Kraes long Medel blong Taem mo Apostasi.

Bifo oli krusifaem Hem, Lod Jisas Kraes i stanemap Jos blong Hem. I gat tu ol Aposol, ol profet, ol seventi, ol tija, mo i gogohed.¹⁰ Mo Masta i sendem ol disaepol blong Hem i go long wol blong prijim gospel blong Hem.¹¹

Afta wan taem Jos we Lod i stanemap i foldaon mo roten long saed blong spirit. Ol tijing blong Hem i jenis; Ol odinens blong Hem i jenis. Bigfala Apostasi i bin kam olsem we Pol i bin talem bifo, we hem i save se Lod bae i kam bakegen “fastaem ol man bambae oli girap, oli agens long God, we hemia bambae i lastaem blong ol man oli save mekem olsem.”¹²

Bigfala Apostasi i folem paten ia we i bin endem wanwan dispensesen we i bin pas finis. Fasfala wan i hapen long taem blong Adam. Afta i folem wetem ol dispensesen blong Inok, Noa, Ebraham, Moses mo ol narafala wan. Wanwan profet i gat wan tabu misin blong tijim tabu wok mo doktrin blong Lod Jisas Kraes. Ol tijing ia oli minim blong stap long wanwan dispensesen ia blong helpem ol pipol. Be from oli no stap obei mekem se i risal long apostasi. From hemia, evri dispensesen i gat limit long taem mo ples we oli stap long hem. Oli gat limit long taem from se wanwan dispensesen i en long apostasi. Oli gat limit long ples we oli stap long hem long wan wan smol pat blong planet wol ia.

Restoresen blong Evri Samting

From i nidim wan ful restoresen. God Papa mo Jisas Kraes i singaotem Profet Josef Smit, blong stap olsem profet blong dispensesen ia. Evri tabu paoa blong ol dispensesen blong bifo oli kam bak bakegen tru long hem.¹³ Dispensesen ia blong en blong taem we evri wok blong God i kamtru bae i no gat limit long taem mo ples we i stap long hem. Bae I no en long apostasi mo bae i save fulumap wol.¹⁴

Kam Tugeta blong Isrel—wan impoten pat ia blong Restoresen blong Evri Samting.

Olsem we Pita mo Pol i bin profesae, evri samting i mas kam bak bakegen long dispensesen ia. I tru, i mas kam, olsem pat blong restoresen, longtaem-wet blong kam bak tugeta blong Isrel.¹⁵ Hem i wan impoten singaot we i stap hapen blong Seken Kaming blong Lod.¹⁶

Doktrin blong kam tugeta ia, i wan long ol impoten tijing blong Jos Ia blong Jisas Kraes blong Ol Lata-dei Sent. Lod i talemaot: “Mi givim long yufala wan saen, … se bae mi karem i kam tugeta aot long taem we oli bin seraot olbaot, ol pipol blong mi, O laen blong Isrel, mo bae mi stanemap bakegen long medel blong olgeta Saeon ia blong mi.”¹⁷ Taem ia we Buk blong Momon i bin kamaot, i wan saen long ful wol se Lod i bin statem wok blong karem Isrel i kam tugeta, mo Hem i mekem olgeta kavenan we Hem i bin mekem long Ebraham, Aesak, mo Jekob.¹⁸ Yumi no stap tijim doktrin ia nomo, be tu, yumi stap tekpat long hem. Yumi mekem hemia taem yumi stap help blong karem tugeta, olgeta we Lod i bin jusum, long tugeta saed blong vel.

Buk blong Momon i stamba blong wok ia. I talemaot doktrin blong kam tugeta.¹⁹ Hem i mekem ol pipol oli lanem abaot Jisas Kraes, blong oli biliv long gospel blong Hem, mo blong joenem Jos blong Hem. I tru, sapos i no gat Buk blong Momon, kam tugeta blong Isrel we God i promesem, bae i no save hapen.²⁰

Long yumi, yumi onarem nem blong Ebraham i impoten. Oli talemaot moa insaed long ol ves blong ol skripja blong Restoresen bitim long evri ves blong Baebol.²¹ Ebraham i konek i go long evri memba blong Jos Ia blong Jisas Kraes blong Ol Lata-dei Sent.²² Lod i talem wan moa taem kavenan blong Ebraham long dei blong yumi tru long Profet Josef Smit.²³ Insaed long tempol yumi kasem ol fasfala blesing blong yumi, olsem ol sid blong Ebraham, Aesak, mo Jekob.²⁴

Dispensesen blong En blong Taem we Evri Wok blong God i Kamtru

God i bin luk finis dispensesen ia blong en blong taem we evri wok blong Hem i kamtru olsem ol taem blong karem i kam, tugeta ol samting long heven mo long wol. Pita i bin save se afta long wan taem blong apostasi, wan restoresen i mas kam. Hem we i bin stap wetem Lod antap long Bigfala Hil we Jisas i Jenis I Kam Niu, i talemaot;

“Oraet, yufala i mas tanem tingting blong yufala from ol sin blong yufala, mo yufala i mas luk long God blong hem bambae i tekemaot ol sin blong yufala; …

“Be Jisas i mas stap long heven fastaem, gogo kasem taem we bambae olgeta samting oli kam niuwan bakegen, olsem we God i talemaot finis long ol tok blong ol tabu profet blong hem bifo.”²⁵

Long taem tedei, Lod i sendem Aposol Pita, Jemes mo Jon, Lod wetem “ol ki blong kingdom [blong Hem], mo wan dispensesen blong gospel ia blong ol las taem ia; mo blong en blong taem we evri wok blong God i kamtru,” mo we bae Hem i “putum evri samting i kam wan, tugeta ol samting we oli stap long heven, mo ol samting we oli stap long wol.”²⁶

Long yia 1830 Profet Josef Smit i lanem abaot wan mesenja blong heven we nem blong hem Elaeas, we i gat ol ki blong mekem i hapen “restoresen blong evri samting.”²⁷

Afta sikis yia, oli dediketem Ketlan Tempol. Afta we Lod i akseptem tabu haos ia, ol mesenja long heven oli kam wetem ol ki blong prishud. Moses i bin kamaot²⁸ “mo i bin givim … ol ki blong wok blong karem Isrel i kam wanples aot long ol fo pat blong wol, mo blong lidim ol ten traeb aot long kantri long not.

“Afta long hemia, Elaeas i kamaot, mo i givim dispensesen blong gospel blong Ebraham, mo i talem se tru long mifala mo laen blong mifala, evri jeneresen afta long mifala bae i gat blesing.”²⁹

Afta profet Elaeja i kam blong talemaot, “Luk, taem i kam fulwan, we maot blong Malakae i bin tokbaot—we i testifae se hem [Elaeja] bae Lod i sendem hem, bifo long bigfala dei blong Lod we man bae i fraet long hem i kam—blong tanem hat blong ol papa i go long ol pikinini, mo hat blong ol pikinini i go long ol papa, nogud bae mi kilim ful wol ia wetem wan strong nogud tok.”³⁰

Samting ia i hapen long 3 Epril 1836,³¹ mo i mekem profesi blong Malakae i hapen.³² Ol Tabu Ki blong dispensesen ia oli kam bak bakegen.³³

Karem Tugeta Ol Sol long Narasaed blong Vel

Wetem sore, invitesen ia blong “kam long Kraes³⁴ oli save givim tu i go long olgeta we oli bin ded be oli no bin save long gospel.³⁵ Pat blong wok ia blong oli rere, i nidim ol hadwok blong ol narawan long wol ia. Yumi putum tugeta ol bubu jat, yumi krietem ol famli grup wok long pepa, mo yumi mekem tempol wok long bihaf blong ol dedman blong karem i kam tugeta ol man mo ol woman oli kam long Lod mo long ol famli blong olgeta.³⁶

Blong Tekpat long Kam Tugeta: Wan komitmen tru long Kavenan

Long wol ia, misinari wok i impoten tumas blong karem Isrel i kam tugeta. Gospel i mas go fastaem long, “sipsip we i lus blong laen blong Isrel.”³⁷ Wanwan taem ol wokman blong Lod oli stap go olbaot blong talemaot Restoresen. Long plante nesen, ol misinari blong yumi oli bin lukaotem olgeta ia we oli pat blong Isrel we i seraot olbaot; oli bin lukaotem olgeta “long ol hol long ston” mo oli bin go hukum olgeta, semmak olsem long taem bifo.³⁸

Joes ia blong kam long Kraes i no wan kwestin abaot ples; hem i wan invitesen blong komitmen blong wanwan man mo woman. Ol pipol oli save kam “blong kasem save long saed blong Lod”³⁹ mo oli nomo aot long homples blong olgeta. I tru, long ol eli dei blong Jos, fasin blong jenisim laef i stap minim tu fasin blong lego wan ples mo muv i go stap long wan nara ples. Be naoia, kam tugeta i tekem ples long wanwan nesen. Lod i talemaot wok blong stanemap Saeon⁴⁰ long wanwan ples ia we Hem i bin givim blong Ol Sent blong Hem oli bon long hem mo gat sitisensip long hem. Skripja i talem finis se ol pipol “bae oli karem olgeta i kambak tugeta long evri graon blong olgeta we i kam long ol papa blong olgeta mo bae oli stanap long evri graon blong promes blong olgeta.”⁴¹ “Evri nesen i ples blong kam tugeta blong ol pipol blong hem.”⁴² Ples blong kam tugeta blong Ol Sent long Brasil, hem i long Brasil; ples blong kam tugeta blong Ol Sent long Naejeria; hem i long Naejeria; ples blong kam tugeta blong Ol Sent long Koria, hem i long Koria. Saeon i olgeta “we hat blong olgeta i klin evriwan”.⁴³ Sion hem i eni ples we ol Sent we oli stret mo gud oli stap long hem. Ol buk we oli pablisim, ol komunikesen, mo kongregesen oli kam ol samting we naioa kolosap evri memba blong Jos oli save kasem ol doktrin, ol ki, ol odinens, mo ol blesing blong gospel, i nomata long ples we oli stap long hem.

Blong stap sef long saed blong spirit, oltaem bae i dipen long wei we wan i stap laef folem, be i no folem weaples hem i stap long hem. Ol Sent long evri graon i gat ikwol raet long ol blesing blong Lod.

Wok ia blong God we I Gat Olgeta Paoa i tru. Hem i stap laef. Jisas Hem I Kraes. Hem ia i Jos blong Hem we i kam bak bakegen blong mekem i hapen ol stamba tingting blong hem,we i gat tu promes blong kam tugeta blong Isrel. Presiden Gordon B. Hinckley i wan profet blong God tedei. Mi testifae long hemia, long nem blong Jisas Kraes, amen.

1. Luk long Jenesis 12:1–2; D&K 132:29–32; Ebraham 2:6–11.

2. Luk long Jenesis 26:1–4, 24, 28; 35:9–13; 48:3–4; Jon 8:33, 39; Ol Wok 3:25; 1 Nifae 17:40; 2 Nifae 29:14; Jekob 5; Ita 13:7–8; D&K 52:2.

3. Luk long eksampol, 1 Nifae 15:12–18.

4. Luk long 1 Nifae 14:14; 15:14; 2 Nifae 30:2; Mosaea 24:13; 3 Nifae 29:3; Momon 8:15; D&K 133:26–34.

5. Laen blong Livae i gat ol pris long medel blong ol pipol mo oli no kaontem olgeta olsem wan laen blong Isrel o blong i kasem graon blong traeb we i kam long ol papa blong olgeta. Tufala pikinini boe blong Josef, Manase mo Ifrem i kasem ol graon blong olgeta. Oli kaontem olgeta long medel blong ol traeb long ples blong papa blong olgeta, Josef. Namba blong ol twelef traeb i stap semmak.

6. Levitikas 26:33; luk tu long Jeremaea 9:16.

7. Luk long Jenesis 22:16–18; 3 Nifae 20–22; Ebraham 2:10–11.

8. Aesaea 18:2, 7.

9. Luk long Levitikas 26:44; Ditaronemi 4:27–31; 28; 29; 30:2–5; Nehemaea 1:9; Aesaea 11:11–12; Jeremaea 31:7–8, 10–12; Esikel 37:21–22; Amos 9:14–15; Matiu 24:31; Jekob 6:2; luk tu long Russell M. Nelson, “The Exodus Repeated,” Liahona, Apr. 2002, 30–39; Ensign, July 1999, 6–13.

10. Luk long Luk 10:1, 17; Efesas 4:11; Ol Toktok blong Bilif 1:6.

11. Luk long Matiu 28:19–20; Mak 16:15.

12. Seken Tesalonaeka 2:3. “Foldaon” oli transletem aot long lanwis blong Krik apostasia, minim “apostasi.”

13. Luk long D&K 128:18; 132:45.

14. Luk long Aesea 27:6.

15. Luk long 1 Nifae 15:18; luk tu long taetol pej blong Buk blong Momon, paragraf 2.

16. Luk long D&K 133:17.

17. 3 Nifae 21:1.

18. Luk long Jenesis 12:2–3; 26:3–4; 35:11–12; mo ol japta topik blong 3 Nifae 21; 29.

19. Ol Doktrin we i go wetem seraot mo kam tugeta blong laen blong Isrel i stap long medel blong ol fasfala lesen we oli tijim insaed long Buk blong Momon: “Afta we ol laen blong Isrel bae oli seraot, bae oli mas kam tugeta bakegen; … ol stret branj blong olif-tri, o ol smol haf nomo we i stap yet blong laen blong Isrel, Lod bae i joenem olgeta, o oli kam blong save long saed blong tru Mesaea, Lod blong olgeta mo Ridima blong olgeta” (1 Nifae 10:14).

20. Luk long Bruce R. McConkie, A New Witness for the Articles of Faith (1985), 554.

21. Oli tokbaot Ebraham 506 taem insaed long skripja: 216 i stap insaed long Baebol; 290 i stap long ol skripja blong Restoresen.

22. Kavenan ia oli save kasem tu tru long adopsen (luk long Matiu 3:9; Luk 3:8; Galesia 3:26–29; 4:5–7; Ebraham 2:9–10).

23. Luk long D&K 124:58; 132:31–32.

24. Luk long D&K 84:33–40; 132:19; Ebraham 2:11.

25. Ol Wok 3:19, 21.

26. D&K 27:13. Pol i profesae tu abaot dei blong yumi “mo long stret taem blong hem, bambae hem i mekem plan ya i kamtru. Long plan ya, hem i wantem se olgeta samting we hem i mekem, bambae oli kam joen wanples. Hem i wantem we olgeta samting long heven mo long wol” (Efesas 1:10).

27. D&K 27:6.

28. Hem i stret se Moses we i lidim ol pikinini blong God i go long graon blong ol papa blong olgeta, bae i hem ia nao blong givim ol ki blong kam tugeta blong Isrel blong Jos Ia we i kambak. Moses i bin kam long Pita, Jemes mo Jon long Bigfala Hil we Jisas i Jenis I Kam Niu mo givim long olgeta ol semmak prishud ki long dei blong olgeta. Long Konfrens blong Jos long Epril 1840, Profet Josef Smit i givim wan wok long Orson Hyde blong go long Jerusalem mo dediketem graon we ol Jiu mo Isrel we i seraot bae oli kambak blong stap long hem. Long Sandei, 24 Oktoba 1841, Elda Hyde i nil daon long Bigfala Hil Oliv mo dediketem graon blong kam tugeta blong Ol Jiu mo blong Isrel i go long graon blong ol papa blong olgeta blong bifo.

29. D&K110:11–12.

30. D&K110:14–15.

31. Wanem i moa impoten mo tru, i we Moses, Elaeas mo Elaeja oli kam long Sandei long stat blong Pasova.

32. Luk long Malakae 4:5–6.

33. Luk long D&K 110:16.

34. Jekob 1:7; Omnae 1:26; Moronae 10:30, 32; D&K 20:59.

35. Luk long D&K 137:6–8.

36. Luk long 1 Korin 15:29; 1 Pita 4:6.

37. Matiu 10:6; 15:24.

38. Luk long Jeremaea 16:16.

39. 3 Nifae 20:13.

40. Luk long D&K 6:6; 11:6; 12:6; 14:6.

41. 2 Nifae 9:2.

42. Bruce R. McConkie, in Conference Report, Mexico City Mexico Area Conference 1972, 45.

43. D&K 97:21.