Te ha’aputuputura’a ia ’Īserā’ela i ha’apurarahia

Russell M. Nelson

Nō te pupu nō te Tino ’Ahuru Ma Piti ’āpōsetolo

Tē tauturu nei tātou i te ha’aputuputura’a i te feiā mā’itihia e te Fatu i nā pae ’e piti o te pāruru.

’E au mau taea’e ’e mau tuahine here, māuruuru nō tō ’outou fa’aro’o, tō ’outou ha’apa’o maita’i ’e tō ’outou here. Tei ni’a ia tātou te hōpoi’a rahi ’ia riro mai tā te Fatu ’e hina’aro ia tātou ’ia riro ’e ’ia rave i te mea Tāna ’e hina’aro ia tātou ’ia rave. ’E tuha’a tātou nō te hō’ē vāve’a rahi: te ha’aputuputura’a ’ia ’Īserā’ela i ha’apurarahia. Tē parau nei au i teie ha’api’ira’a tumu i teie mahana nō tōna faufa’a rahi i roto i te fa’anahora’a mure ’ore a te Atua.

Fafaura’a a Aberahama

I muta’a iho rā, ’ua ha’amaita’i te Fatu i tō tātou metua ia Aberahama mā te fafau ’ia fa’ariro i tōna hua’ai ’ei nūna’a mā’itihia.¹ ’E tupu te mau fa’ahorora’a o teie fafaura’a, nā roto i te mau pāpa’ira’a mo’a. ’Ua fafau ato’ahia ē, ’e mea nā roto i te rēni tuatāpapara’a a Aberahama te Tamaiti ’a te Atua ’ia ho’i mai, e ’ai’ahia te tahi mau fenua, ’e e ha’amaita’ihia te mau nūna’a ’e te mau ’ōpū o te fenua nā roto i tōna hua’ai, ’e te vai aturā.² Noa atu ’ua tupu a’ena te tahi pae o taua fafaura’a ra, tē ha’api’i nei rā te Buka a Moromona ē, e tupu teie fafaura’a a Aberahama i te mau mahana hope’a nei ana’e !³ Tē ha’apāpū ato’a nei te reira ē, tei rotopū tātou i te nūna’a fafauhia a te Fatu.⁴ Nō tātou te ha’amaita’ira’a ’ia fa’aō ia tātou iho nō te fa’atupu i teie nei mau fafaura’a. ’Auē ïa tau maere nō te ora !

’Īserā’ela i ha’apurarahia

’Ei hua’ai nō Aberahama, ’ua fāri’i te mau ’ōpū o ’Īserā’ela i te tura o te ’autahu’ara’a ’e i te mau ha’amaita’ira’a o te ’ēvanelia, i te pae hope’a rā, ’ua ’ōrurehau te mau ta’ata. ’Ua ha’apohe rātou i te mau peropheta ’e ’ua fa’autu’ahia e te Fatu. ’Ua hōpoi-tītī-hia nā ’ōpū hō’ē ’ahuru i Asiria. Mai reira atu, mo’e roa atu tō rātou parau i te mau buka ’ā’amu o te ta’ata. (Teie rā, ’aita te ’ōpū hō’ē ’ahuru i mo’e nō te Fatu). ’Ua vai noa ā nā ’ōpū ’e piti ’e toe ra, nō te hō’ē ma’a taime iti ā, ’e i muri iho, nō tō rāua ’ōrurehau, ’ua hōpoi-tītī-hia rāua i Babulonia.⁵ I to rātou ho’ira’a mai, ’ua fa’ahereherehia rātou e te Fatu, terā rā, ’ua tāpiti fa’ahou i te fa’atura ’ore Iāna. ’Ua pāto’i ’e ’ua fa’a’ino rātou Iāna. ’Ua tapu te hō’ē Metua here noa atu te ’oto : « ’E ha’apurara vau ia ’outou i te mau fenua »⁶ ’e ’ua nā reira ’Oia—nā roto i te mau nūna’a ato’a.

’E ha’aputuputuhia ’Īserā’ela

E mea pāpū ato’a te fafaura’a a te Atua ’ia ha’aputuputu ia ’Īserā’ela i ha’apurarahia.⁷ ’Ei hi’ora’a, ’ua ’ite ātea ’o Isaia ē, i te mau mahana hope’a nei, e tono mai te Fatu i « te mau ve’a vitiviti » i roto i teie mau ta’ata i « purarā ’e i rave-ū’ana-hia ra ».⁸

Teie fafaura’a i fāri’ihia nō te ha’aputuputura’a te nati i te mau mea ato’a nā roto i te ’ave o te mau pāpa’ira’a mo’a, e hope ana’e ïa i te tupu, mai te mau tohura’a ho’i nō ni’a ia ’Īserā’ela i ha’apurarahia.⁹

Te ’Ēkālesia a Iesu Mesia i te ’āfara’a o te tau ’e te tāivara’a

Hou i tōna fa’asataurora’ahia, ’ua ha’amau te Fatu ’o Iesu Mesia i Tāna ’Ēkālesia. Tei roto te mau ’āpōsetolo, te mau peropheta, te mau Hitu ’Ahuru, te mau ’orometua, ’e te vai atu ra.¹⁰ ’E ’ua tono te Fatu i tāna mau pipi nā te ao nei nō te poro i tāna ’ēvanelia.¹¹

Tau taime i muri mai, ’ua topa te ’Ēkālesia i ha’amauhia e te Fatu i roto i te fifi pae vārua. ’Ua fa’ahuru’ēhia Tāna mau ha’api’ira’a ; ’Ua tauihia tāna mau ’ōro’a. ’Ua tupu te tāivara’a rahi mai tei tohuhia e Paulo, ’o tei ’ite ē, e ’ore roa te Fatu e ho’i fa’ahou mai, maori rā « ’o te taiva te tupu nā mua. »¹²

’Ua hōho’a teie Tāivara’a Rahi i te hope’ara’a o te mau tau tu’ura’a ’ēvanelia tāta’itahi i ma’iri ra. Te mātāmua roa, ’ua tupu ïa i te tau o Adamu. I muri iho, i te mau tau tu’ura’a ’ēvanelia o Enoha, Noa, Aberahama, Mose, ’e vētahi atu ā. E fa’auera’a hanahana tā te peropheta tāta’itahi ’ia ha’api’i nō ni’a i te atuara’a ’e i te ha’api’ira’a tumu ’a te Fatu ra ’o Iesu Mesia. I te mau tau ato’a, ’ua riro teie mau ha’api’ira’a ei tauturura’a i te mau ta’ata. Terā rā, nō tō rātou ha’apa’o ’ore ’ua tupu te tāivara’a. Nō reira, ’ua tā’ōti’ahia te mau tau tu’ura’a ’ēvanelia ato’a i tahito ra i roto i te tau ’e te vāhi. ’Ua tā’ōti’ahia rātou i roto i te tau nō tō rātou hope’ara’a tāta’itahi i roto i te tāivara’a. ’Ua tā’ōti’ahia rātou i roto i te reva, te hō’ē tuha’a iti roa o te paraneta nei.

Te Fa’aho’i-fa’ahou-ra’a-hia mai o te mau mea ato’a.

Nō reira, ’ua tītauhia te ’īra’a o te hō’ē fa’aho’i-fa’ahou-ra’a-hia mai. ’Ua pi’i te Atua te Metua ’e o Iesu Mesia i te peropheta Iosepha Semita ’ia riro ’ei peropheta nō teie tau tu’ura’a o te tau. ’E fa’aho’i fa’ahouhia mai te mau mana ato’a o te ra’i nō te mau tau tu’ura’a ato’a o te tau i tahito ra, nā roto mai iāna.¹³ E’ita teie tau tu’ura’a nō te ’īra’a o te mau tau ’e tā’ōti’ahia i roto i te tau ’e e’ita ato’a i roto i te vāhi. ’Aita te reira e hope nā roto i te tāivara’a, ’e e fa’a’ī rā i te ao nei.¹⁴

Te ha’aputuputura’a o ’Īserā’ela: e tuha’a-roto nō te fa’aho’i-fa’ahou-ra’a-hia mai o te mau mea ato’a

Mai tei tohuhia e Petero ’e Paulo, e fa’aho’ihia mai te mau mea ato’a i roto i teie tau tu’ura’a ’ēvanelia. Nō reira, i roto i te fa’anahora’a nō te fa’aho’i-fa’ahou-ra’a-hia mai, e tupu te ha’aputuputura’a o ’Īserā’ela i ha’apurarahia ’o tei tīa’i-maoro-hia.¹⁵ ’E mēha’i faufa’a te reira nō te Tae-piti-ra’a mai o te Fatu.¹⁶

Teie ha’api’ira’a tumu nō te ha’aputuputura’a, ’o te hō’ē ïa o te mau ha’api’ira’a faufa’a mau a te ’Ēkālesia a Iesu Mesia i te Feiā Mo’a i te mau Mahana Hope’a nei. ’Ua parau te Fatu : « ’E fa’a’ite atu vau i te hō’ē tāpa’o ia ’outou… ’ia ha’aputuputu vau i tō’u mau ta’ata i purara-maoro-hia ra, e te ’utuāfare o ’Īserā’ela ’e, ’ia fa’ati’a fa’ahou vau i tō’u Ziona i roto ia rātou. »¹⁷ Te fāra’a mai o te Buka a Moromona, e tāpa’o i tō te ao nei ē, ’ua ha’amata te Fatu i te ha’aputuputu ia ’Īserā’ela ’e i te fa’atupu i tāna i fafau ia Aberahama, Isaaka, ’e Iakoba.¹⁸ ’Aita tātou e ha’api’i noa i teie ha’api’ira’a tumu, tei roto ato’a rā tātou i te ravera’a i te reira. Tē nā reira nei tātou ’a tauturu ai i te ha’aputuputu i tei mā’itihia e te Fatu i nā pae e piti o te pāruru.

Te Buka a Moromona te pū nō teie ’ohipa. Tē fa’a’ite nei ’oia i te ha’api’ira’a tumu nō te ha’aputuputura’a.¹⁹ Tē arata’i nei ’oia i te ta’ata ’ia ’ite ia Iesu Mesia, ’ia ti’aturi i tāna ’ēvanelia, ’e ’ia ō i roto i tāna ’Ēkālesia. Te parau mau, ’āhiri ’aita e Buka a Moromona, e’ita e tupu te fafaura’a nō te ha’aputuputura’a ia ’Īserā’ela.²⁰

’E mea faufa’a te i’oa fa’aturahia o Aberahama nō tātou. ’Ua rahi a’e te fa’ahitira’a o te reira i roto i te mau ’īrava o te mau pāpa’ira’a mo’a nō te fa’aho’i-fa’ahou-ra’a-hia mai i te mau ’īrava ato’a o te Bibilia.²¹ ’Ua natihia ’o Aberahama i te mau melo ato’a o te ’Ēkālesia a Iesu Mesia i te Feiā Mo’a i te Mau Mahana Hope’a nei.²² ’Ua ha’apāpū fa’ahou mai te Fatu i tō tātou nei tau te fafaura’a a Aberahama nā roto i te peropheta Iosepha Semita.²³ I roto i te hiero, e fāri’i tātou i tō tātou mau ha’amaita’ira’a hope’a, ’ei hua’ai nō Aberahama, Isaaka, ’e Iakoba.²⁴

Te tau tu’ura’a nō te ’īra’a o te mau tau

’Ua hi’o ātea te Atua i teie tau tu’ura’a nō te ’īra’a o te mau tau ’ei tau nō te ha’aputuputura’a i te ra’i ’e i te fenua nei. ’Ua ’ite Petero ē, i muri a’e i te hō’ē tau nō te tāivara’a, e tae mai te tau nō te fa’aho’i-fa’ahou-ra’a. ’Oia ’o tei pārahi i piha’i iho i te Fatu i ni’a ’i te mou’a nō te Fa’ahuru’ēra’a, tē nā ’ō nei:

« E teie nei, e tātarahapa ’outou, ’e e fāriu mai, ’ia tūmāhia tā ’outou mau hara, ’ia ’itea mai te ’anotau haumārū nō ’ō mai i te aro o te Fatu ra…

« ’Ei te ra’i ā ho’i ’oia pārahi ai, ’e tae noa atu i te tau e ti’a ai te mau mea ato’a nei, tā te Atua i parau mai i te vaha ’ō te mau peropheta mo’a ato’a nōna mai te mātāmua mai ā o teie nei ao ra. »²⁵

I teie ’anotau, ’ua tonohia mai nā ’āpōsetolo Petero, Iakobo ’e Ioane e te Fatu ma « te mau tāviri nō [tōna] basileia, ’e nō te hō’ē tu’ura’a tau nō te ’ēvanelia nō te mau taime hōpe’a ; ’e nō te ’īra’a o te mau tau ato’a, » i roto i te reira « e ’āmui ai ’Oia i te mau mea ato’a, tō te ra’i, ’e tō te ao nei. »²⁶

I te matahiti 1830, ’ua ’ite te peropheta Iosepha Semita mai roto mai i te ve’a nō te ra’i mai, ’o Elia, tei mau i te mau tāviri nō te fa’atupu i « te fa’aho’i-fa’ahou-ra’a mai o te mau mea ato’a ».²⁷

E ono matahiti i muri mai, ’ua ha’amo’ahia te hiero nō Kētelani. I muri a’e i tō te Fatu fāri’ira’a i taua fare mo’a ra, ’ua haere mai te mau ve’a nō te ra’i mai, ma te mau tāviri ’ō te autahu’ara’a. ’Ua fā mai ’o Mose²⁸ « ’ē ’ua hōro’a maira te mau tāviri nō te ha’aputuputura’a o ’Īserā’ela mai nā tufa’a e maha o te ao nei, ’e nō te arata’ira’a mai o nā ’ōpū hō’ē ’ahuru ra mai te fenua i te ’apato’erau.

« ’I muri iho i teie, ’ua fā maira ’o Elia, ’e ’ua hōro’a maira i te tau tu’ura’a nō te ’ēvanelia a Aberahama, i te nā’ora’a mai ē, i roto ia mātou ’e i tō mātou hua’ai e ha’amaita’ihia ai te mau u’i ato’a i muri iho ia māua.”²⁹

I muri iho, haere maira te peropheta Eliaha ma te parau mai ē: « Inaha, ’ua tae roa mai te tau, ’o tei parauhia maira e te vaha o Malaki—’o tei fa’a’ite mai ē, e tonohia mai ’oia [’o Eliaha], hou te mahana rahi ’e te mea hanohano ra o te Fatu e tae mai ai—Nō te fa’afāriu mai i te ’ā’au o te mau metua i te mau tamari’i, ’e tō te mau tamari’i ho’i i te mau metua, ’oi tā’irihia mai te ao nei i te hō’ē ’āhua ra.”³⁰

’Ua tupu teie mau ’ohipa i te 3 nō ’ēperēra 1836,³¹ ’e ’ua fa’atupu i te tohura’a a Malaki.³² ’Ua fa’aho’i fa’ahouhia mai te mau tāviri mo’a o teie tau tu’ura’a .³³

Te ha’aputuputura’a ’ō te mau vārua i te tahi a’e pae o te pāruru

’Aua’e rā, e fa’atoro ato’ahia te anira’a ’ia « haere i te Mesia ra »³⁴ i te feiā tei pohe ma te ’ore i ’ite i te ’ēvanelia.³⁵ Te tuha’a o tō rātou fa’aineinera’a, tei roto ïa i te fa’aitoitora’a ’a vētahi ’ē i te fenua nei. E putu tātou i te mau ’api tuatāpapara’a tupuna, e hāmani i te mau ’api pupu ’utuāfare, ’e e rave i te mau ’ōro’a hiero nā roto i te monora’a, nō te ha’aputuputu i te mau ta’ata i te Fatu ra ’e i roto i tō rātou mau ’utuāfare.³⁶

Te fa’aōra’a i roto i te ha’aputuputura’a: fāri’ihia nā roto i te fafaura’a

I ni’a i te fenua nei, e mea faufa’a te ’ohipa misiōnare i roto i te ha’aputuputura’a o ’Īserā’ela. E hōpoi mātāmuahia te ’ēvanelia « i te mau māmoe i mo’e i te ’ūtuafare ra o ’Īserā’ela ».³⁷ E nō reira, ’ua haere te mau tāvini o te Fatu e poro haere i te parau nō te fa’aho’i-fa’ahou-ra’a. I roto i te mau fenua e rave rahi, tē ’imi haere nei tō tātou mau misiōnare i te feiā nō ’Īserā’ela i ha’apurarahia ; tē ā’uā’u nei ia rātou « i roto i te mau ’āpo’o ato’a o te mau mato ra » ’e tē rava’āi nei ia rātou mai tahito ra.³⁸

Te fa’aotira’a ’ia haere i te Mesia ra, e’ita i te parau nō te fenua ; e parau rā nō te fāri’ira’a nō roto mai i te ta’ata iho. E riro te ta’ata i te « fa’ataehia i te ’ite i te Fatu ra »³⁹ ma te fa’aea noa i roto i tō rātou fenua ’āi’a. Parau mau, i te ’ōmuara’a o te ’Ēkālesia tē fa’afāriura’a, ’o te fa’aru’e-ato’a-ra’a ïa i te ’āi’a. ’Are’a rā i teie nei, e tupu te ha’aputuputura’a i roto i te mau fenua ato’a. ’Ua fa’ature te Fatu i te ha’amaura’a o Ziona⁴⁰ i roto i te bāsileia tāta’itahi o tāna i hōro’a ’ei ’āi’a ’e ’ei nūna’a nō Tōna feiā mo’a. ’Ua fa’a’ite ātea te pāpa’ira’a mo’a ē « ’ia ha’aputuputuhia rātou i tō rātou ’ūtuāfare i te fenua ’āi’a nō rātou ra, ’e e ha’apārahihia rātou i tō rātou mau fenua ato’a i parauhia ra. »⁴¹ « ’Ua riro te mau fenua ato’a ’ei vāhi ha’aputuputura’a nō tōna iho mau ta’ata ».⁴² Te vāhi ha’aputuputura’a ō te feiā mo’a Beresiria, tei Beresiria ïa, te vāhi ha’aputuputura’a o te feiā mo’a nō Nigeria, tei Nigeria ïa ; te vāhi ha’aputuputura’a nō te feiā mo’a o Korea tei Korea ïa ; ’e hope noa atu Teie ho’i Ziona, « tei mā te ’ā’au. »⁴³ Ziona, ’ō te mau vāhi ato’a ïa tei reira te feiā mo’a ha’apa’o maita’i. I teie mahana, ’ua tāpae te mau nēne’ira’a, te mau tūreiara’a ’e te mau ’āmuira’a i te hō’ē faito e roa’a ai fātata i te mau melo ato’a te mau ha’api’ira’a tumu, te mau tāviri, te mau ’ōro’a ’e te mau ha’amaita’ira’a o te ’ēvanelia, ma te ’ore e hi’o i te vāhi tei reira rātou.

Te pārurura’a ia tātou i te pae vārua, tei te huru ïa o tō tātou orara’a, ’eiaha rā i te vāhi tei reira tātou te orara’a. E nehenehe te feiā mo’a nō te mau fenua ato’a e tītau i te Fatu ra, hō’ē ā mau ha’amaita’ira’a

E parau mau teie ’ohipa ’a te Atua mana hope. Tē ora nei ’Oia. ’O Iesu te Mesia. Teie Tāna ʼĒkālesia, tei faʼahoʼihia mai nō te faʼatupu i Tāna fā hanahana, mai te haʼaputuputuraʼa o ’Īserā’ela i parauhia. Te Peresideni Gordon B. Hinckley te peropheta ’a te Atua i teie mahana. Tē faʼaʼite pāpū atu nei au i te reira i te i’oa ’o Iesu Mesia, ’āmene.

1. ’A hi’o Genese 12:1–2 ; PH&PF 132:29–32 ; Aberahama 2:6–11.

2. ’A hi’o Genese 26:1–4, 24, 28 ; 35:9–13 ; 48:3–4 ; Ioane 8:33, 39 ; Te mau ’ohipa 3:25 ; 1 Nephi 17:40 ; 2 Nephi 29:14 ; Iakoba 5 ; Etera 13:7–8 ; PH&PF 52:2.

3. ʼA hiʼo, ʼei hiʼoraʼa, 1 Nephi 15:12–18.

4. Hi’o 1 Nephi 14:14 ; 15:14 ; 2 Nephi 30:2 ; Mosia 24:13 ; 3 Nephi 29:3 ; Moromona 8:15 ; PH&PF 133:26–34.

5. Nā te ’ōpū o Levi i hōro’a i te mau tahu’a i rotopū i te mau ta’ata, ’aita i tai’ohia ’ei ’ōpū ’e ’aita ïa e ’āi’ara’a nō te reira ’ōpū. ’Ua hōro’ahia te fenua ’ei ’āi’ara’a nō nā tamari’i tamāroa ’a Iosepha, ’o Manase rāua Epheraïma. ’Ua tai’ohia rāua i rotopū i te mau ’ōpū ’ei monora’a i tō rāua metua tāne, ’o Iosepha. E mea nā reira te nūmera hō’ē ’ahuru ma piti ’ōpū i vai noa ai.

6. Levitiko 26:33 ; hi’o ato’a Ieremia 9:16.

7. ’A hi’o Genese 22:16–18 ; 3 Nephi 20–22 ; Aberahama 2:10–11.

8. Isaia 18:2, 7.

9. Hi’o Levitiko 26:44 ; Deuteronomi 4:27–31 ; 28 ; 29 ; 30:2–5 ; Nehemia 1:9 ; Isaia 11:11–12 ; Ieremia 31:7–8, 10–12 ; Ezekiela 37:21–22 ; Amosa 9:14–15 ; Mataio 24:31 ; Iakoba 6:2 ; hi’o ato’a Russell M. Nelson, « Te Exodo tei parau faahouhia », Liahona, ’Ēperēra 2002, 30–39 ; Ensign, Tiurai 1999, 6–13.

10. Hi’o Luka 10:1, 17 ; Ephesia 4:11 ; Te mau hīro’a fa’aro’o 1:6.

11. ’A hi’o Mataio 28:19–20 ; Mareko 16:15.

12. 2 Tesalonia 2:3. “Topa” ’ia hurihia i roto i te reo Heleni apostasia, tōna aura’a ra, “tāivara’a.”

13. Hi’o PH&PF 128:18 ; 132:45.

14. Hi’o Isaia 27:6.

15. Hi’o 1 Nephi 15:18 ; ’a hi’o ato’a i te ’Api upo’o parau o te Buka a Moromona, paratarafa 2.

16. Hi’o PH&PF 133:17

17. 3 Nephi 21:1

18. ’A hi’o Genese 12:2–3 ; 26:3–4 ; 35:11–12 ; ’e te tāupo’o pene nō te 3 Nephi 21 ; 29.

19. Te Ha’api’ira’a tumu nō ni’a i te ha’apurarara’a ’e i te ha’aputuputura’a o te ’utuāfare o ’Īserā’ela, e mau ha’api’ira’a mātāmua ïa tei hōro’ahia i roto i te Buka a Moromona: « E ’ia ha’apurarāhia te ’utuāfare o ’Īserā’ela ra, e ha’aputuputu fa’ahouhia mai rātou… e poihia te mau ’āma’a mau o te rā’au ’ōrive ra, ’oia ho’i te toe’a o te ’ūtuāfare o ’Īserā’ela ra, ’oia ïa, e ’ite rātou i te Mesia mau ra, tō rātou Fatu ’e tō rātou Fa’aora » (1 Nephi 10:14).

20. ’A hi’o Bruce R. McConkie, Hō’ē ’ite nō te mau hīro’a fa’aro’o (1985), 554.

21. ’Ua fa’ahitihia ’o Aberahama i roto e 506 ’īrava o te pāpa’ira’a mo’a: 216 i roto i te Bibilia ; 290 i roto i te mau pāpa’ira’a mo’a nō te fa’aho’i-fa’ahou-ra’a mai.

22. E fāri’i ato’ahia te fafaura’a nā roto i te fa’a’amura’a (hi’o Mataio 3:9 ; Luka 3:8 ; Galatia 3:26–29 ; 4:5–7 ; Aberahama 2:9–10).

23. Hio PH&PF 124:58 ; 132:31–32.

24. ’A hi’o PH&PF 84:33–40 ; 132:19 ; Aberahama 2:11.

25. Te mau ’Ohipa 3:19, 21.

26. PH&PF 27:13. ’Ua tohu ato’a Paulo nō ni’a i tō tātou ’anotau: « E ’ia tae i te tuʼuraʼa parau i te hoperaʼa mau ʼo te mau tau ra, e ʼāmui ai [te Fatu] i te mau mea atoʼa i te Mesia ra, tō te raʼi ʼe tō te ao nei, ʼei Iāna. » (Ephesia 1:10).

27. PH&PF 27:6.

28. E mea tano maita’i ē, ’o Mose tei arata’i mātāmua i te mau tamari’i ’a te Atua i te fenua ’o ta rātou i ’āi’a, ’ia riro ato’a ’ei hō’ē nō te hōro’a i te mau tāviri no te ha’aputuputura’a ia ’Īserā’ela i te ’Ēkālesia tei fa’aho’i fa’ahouhia mai. ’Ua haere mai ’o Mose ia Petero, Iakobo ’e Ioane i ni’a ’i te mou’a nō te fa’ahuru’era’a, ’e i reira ’ua hōro’a mai hō’ē ā mau tāviri nō te autahu’ara’a mai i tō rātou ra ’anotau. I te ’āmuira’a ’a te ’Ēkālesia i te ’āva’e ’ēperēra 1840, ’ua mā’iti te peropheta Iosepha Semita ia Orson Hyde ’ia haere i Ierusalema ’e i reira, e ha’amo’a ai i te fenua nō te ho’ira’a o te mau ’ati Iuda ’e o ’Īserā’ela i ha’apurarahia.⁴⁴ I te Sābati 24 nō ’Ātopa 1841, ’ua tūturi ’o Elder Hyde i te mou’a nō Oliveta ’e ’ua ha’amo’a i taua fenua ra nō te ha’aputuputura’a o te mau ’ati Iuda ’e o ’Īserā’ela i tō rātou ’āi’a i tahito ra.

29. PH&PF 110:11–12.

30. PH&PF 110:14–15.

31. ’E mea faufa’a ’ia ’ite ē, ua haere mai ’o Mose, Elia, ’e o Eliaha i te Sābati Pāsa, i te ’ōmuara’a o te Pāsa.

32. A hi’o Malaki 4:5–6.

33. Hi’o PH&PF 110:16.

34. Iakoba 1:7 ; Omoni 1:26 ; Moroni 10:30, 32 ; PH&PF 20:59.

35. Hi’o PH&PF 137:6–8.

36. Hi’o 1 Korinetia 15:29 ; 1 petero 4:6.

37. Mataio 10:6 ; 15:24.

38. ’A hi’o Ieremia 16:16.

39. 3 Nephi 20:13.

40. Hi’o PH&PF 6:6 ; 11:6 ; 12:6 ; 14:6.

41. 2 Nephi 9:2

42. Bruce R. McConkie, i roto i te Conference Report, ’āmuira’a ārea nō Mexico City, Mexico 1972, 45.

43. PH&PF 97:21.

44. Hi’o 2 Nephi 9:2 ; 10:7–9 ; 25:16–17, 20 ; 3 Nephi 21:22–28 ; PH&PF 29:7–8.