O Laglagipen, Laglagipen
Henry B. Eyring
Maikadua a Mammagbaga iti Umuna a Panguluen
“O laglagipen, laglagipen,” masansan nga idawat dagiti propeta iti Libro ni Mormon.1 Ti puntok ket mangallukoy kadakayo a mangsapul kadagiti wagas a mangilasin ken manglaglagip iti kinasayaat ti Dios.
Agyamanak iti koro iti brodkastda iti daytoy a bigat, a maipapan iti Mangisalakan, ken agyamanak a makakita a dagiti balikas ti maysa kadagiti kanta a kinansionda,“This Is the Christ,” ket insurat ni Presidente James E. Faust. Bayat ti panangtugawko a kaabay ni Brother Newell, sinaludsodko kenkuana, “Komusta dagiti annakmo?” Kinunana, “Idi nagtugaw ni Presidente Faust iti dayta a tugaw, dayta ti kanayon a saludsodenna.” Diak masdaaw, gapu ta kanayon a naan-anay a pagwadan ti maysa a disipulo ni Presidente Faust a nailadawan iti Music and the Spoken Word ita. Kanayon a nariknak idi a no dumakkelak, kayatko ti agbalin a kas ken ni Presidente Faust. Mabalin nga adda pay laeng panawen.
Idi babassit pay dagiti annakmi, rinugiak ti nagsurat iti sumagmamano a banag maipapan iti napasamak iti inaldaw. Bay-andak a mangisarita no kasano a nangrugi dayta. Nagawidak a naladaw manipud iti pagrebbengak iti Simbaan. Nasipngeten idi. Sinorpresanak ti katugangak a lalaki, nga agindeg iti asidegmi, bayat ti pannagnak iti sango ti ridaw ti balayko. Bakbaklayenna ti sangagabsuon a tubo, nakaal-alisto ti pannagnagna ken nakasuot iti pagtrabaho a kawes. Ammok nga agbangbangon iti maysa a sistema nga agbomba iti danum manipud iti maysa a karayan iti babaenmi agingga iti kukuami.
Immisem, nagsao a siaalumamay, ket kalpasanna nagdardaras a linabsannak iti kasipngetan a nagturong iti trabahona. Nagaddangak iti sumagmamano a napan iti balay, a pampanunotek no ania ti ar-aramidenna para kadakami, ken iti yaasidegko iti ridaw, nangngegko iti panunotko—saan nga iti bukodko a timek—dagitoy a balikas: “Diak it-ited kenka dagitoy a padas para iti bagim. Isuratmo dagitoy.”
Simrekak. Diak napan iti iddak. Nupay nabannogak, nangalaak iti sumagmamano a papel ket inrugik ti nagsurat. Ken bayat ti panangaramidko, naawatak ti mensahe a nangngegak iti panunotko. Nasken nga agsuratak a basaento dagiti annakko, iti maysa nga aldaw iti masakbayan, no kasano a nakitak ti ima ti Dios a mangbembendision iti pamiliak. Saan a nasken nga aramiden ni Lelong ti ar-aramidenna para kadakami. Mabalin a paaramidna koma daytoy iti sabali wenno saanna koma lattan nga aramiden daytoy. Ngem agserserbi isuna kadakami, ti pamiliana, iti wagas a kanayon nga aramiden dagiti natulangan a disipulo ni Jesucristo. Ammok a pudno daytoy. Ket ngarud insuratko daytoy, tapno maaddaan dagiti annakko iti lagip no kasapulandanto daytoy iti maysa nga aldaw.
Nagsuratak iti sumagmamano a binatog iti inaldaw iti uneg ti sumagmamano a tawen. Diak pulos nalibtawan ti maysa nga aldaw nupay kasano ti bannogko wenno kasano ti kasapa ti nasken a panangirugik iti kabigatanna. Sakbay nga agsuratak, utobek no kua daytoy a saludsod: “Nakitak kadin ti ima ti Dios a gumawgaw-at a mangsagid kadatayo wenno dagiti annaktayo wenno ti pamilatayo iti agdama?” Bayat ti pangituloyko nga aramiden daytoy, adda banag a mangrugi a mapasamak. Bayat ti panangpanunotko iti aldaw, makitak no kua ti pakakitaan ti inaramid ti Dios para iti tunggal maysa kadakami a diak nailasin kadagiti nakumikom a kanitok iti dayta nga aldaw. Bayat ti pannakapasamak iti dayta, ken masansan a napasamak, naamirisko a ti panangpadas a manglagip ket nangpalugod iti Dios a mangipakita kaniak iti inaramidna.
Ad-adu pay a panagyaman ti nagrugi a dimmakkel iti pusok. Dimmakel ti pammaneknek. Nagbalin a nasigsiguradoak a denggen ken sungbatan ti Nailangitan nga Amatayo dagiti kararagtayo. Nariknak ti ad-adda pay a panagyaman para iti panangpalukneng ken panangpatarnaw iti puspuso dagiti tao a sumangbay gapu iti Pannubbot ti Mangisalakan a ni Jesucristo. Ket ad-adda a nagtalekak a ti Espiritu Santo ti mangipalagip iti amin a banag kadatayo—uray dagiti banag a saanmi a nakita wenno naikaskaso idi napasamak dagitoy.
Naglabas dagiti tawen. Dimmakkel dagiti annakko a lallaki. Ket no dadduma maysa kadakuada ti mangsorpresa kaniak babaen ti panangibagana iti, “Tatang, basbasaek iti kopiak ti journal maipapan iti …” ket kalpasanna ibagana kaniak maipapan iti no kasano a ti panangbasana iti napasamak iti nabayagen a panawen ti napalabas ket nakatulong kenkuana a mangkita iti maysa a banag nga inaramid ti Dios iti panawenna.
Ti puntok ket mangallukoy kadakayo a mangsapul kadagiti wagas a mangilasin ken manglaglagip iti kinaimbag ti Dios. Daytoyto ti mangpatibker kadagiti pammaneknektayo. Mabalin a dikayo agsursurat iti journal. Mabalin a diyo ibinglay ti ania man a kasuratan nga idulinyo kadagiti ay-ayaten ken pagserbianyo. Ngem mabendisionankayo ken mabendisionanda no laglagipenyo ti inaramid ti Apo. Malagipyo dayta a kanta a kantaentayo no dadduma: “Bilangem a saggaysa’t paraburmo; Ket masdaawkat’ aramid ti Apo.”2
Saanto a nalaka a laglagipen. Ti panagbiag bayat ti panangaramidtayo nga awan lagip iti biag sakbay daytoy a biag, ditayo malagip no ania ti kayarigan ti kaadda idi iti sidong ti Nailangitan nga Ama ken ti Ay-ayatenna nga Anak, ni Jesucristo, iti lubong sakbay daytoy a biag; wenno ditayo makita iti pisikal a matatayo wenno iti panunot laeng ti ima ti Dios iti biagtayo. Ti panangkita kadagiti kasta a banag agkasapulan a maaddaantayo iti Espiritu Santo. Ken saan a nalaka ti agbalin a maikari iti panangkadkadua ti Espiritu Santo iti nadangkes a lubong.
Dayta ti gapu no apay a ti pananglipat iti Dios ket maysa nga agtultuloy a parikut kadagiti annakna manipud pay iti rugi ti lubong. Panunoten dagiti panawen ni Moises, idi nangipaay ti Dios iti manna ken kadagiti namilagruan ken makita a wagas ket nangiturong ken nangsaluad kadagiti annakna. Binallaagan latta ti propeta dagiti tao a naparaburan unay, kas iti kanayon nga imballaag dagiti propeta ken kanayonto a mangiballaag: “Dumngeg iti bagiyo, ket pagtalinaedenyo ti kararuayo a sipapasnek, no saan malipatanyo dagiti banag a nakita dagiti matayo, ken no saan pumanawda iti pusoyo iti amin nga aldaw ti biagyo.”3
Ket ti karit a manglaglagip ti kanayon a karigatan para kadagiti naparaburan iti nawadwad. Masaluadan ken agrang-ayto dagiti napudno iti Dios. Sumangbay dayta kas bunga ti panangserbi iti Dios ken panagtungpal kadagiti bilinna. Ngem kagiddan dagita a parabur ti yaay ti sulisog a manglipat iti nagtaudanda. Nalaka nga irugi ti mangrikna kadagiti parabur a naited saan laeng a babaen ti panagayat iti Dios a pagpannurayantayo ngem babaen ti bukodtayo a bileg. Dinagdagullit dagiti propeta daytoy a panagunnoy:
“Ket kasta a maimatangantayo no kasano ti kinasinsinan, ken kasta met ti di pannakaidna ti puspuso dagiti annak ti tattao; wen, makitatayo a ti Apo iti di matukod a kinaimbagna bendisionan ken parang-ayenna dagiti agtalek kenkuana.
“Wen, ket makitatayo iti dayta a kanito a panangparang-ayna kadagiti taona, wen, iti maapit kadagiti talonda, dagiti arban ken dagiti pastorda, ken iti balitok, ken iti pirak, ken iti amin a kita ti napapateg a banag iti amin a langa ken sukog; pannakailisi ti bagbagida, ken panangisalakan kadakuada kadagiti kabusorda; pannakapalukneng ti puspuso dagiti kabusorda tapno saanda nga irakurak ti gubgubat a maibusor kadakuada; wen, iti ababa a pannao, agaramid iti amin a banag para iti pagimbagan ken pagragsakan dagiti taona; wen, ket daytanto ti kanito a panangpatangkenda iti puspusoda, ket malipatanda ti Apo a Diosda, ket iludekludekda ti Nasantuan—wen, ket daytoy gapu iti kinalukayda, ken iti aglaplapusanan a kinarang-ayda.”
Ket intuloy ti propeta ti nagsao: “Wen, anian a laka ti agbalin a napalangguad; wen, anian a laka ti agpang-as, ken agaramid iti amin a kita ti pagbasolan; ken anian a buntogda a manglagip iti Apo a Diosda, ken dumngeg kadagiti pammagbagana, wen, anian a buntog ti magna iti dana ti sirib!”4
Naladingit, a ti panagrang-ay ket saan laeng a gapu ti pananglipat dagiti tao iti Dios. Mabalin pay a narigat ti manglagip Kenkuana no narigat ti panagbiagtayo. No ikarigatantayo, kas iti aramiden ti adu, iti panangparmek iti kinakurapay wenno no mangabak dagiti kabusortayo kadatayo wenno no saan a maagasan dagiti sakit, mangipatulod ti kabusor dagiti kararuatayo iti dakes a mensahena nga awan ti Dios wenno no adda man Isuna saannatayo nga ipatpateg. Kalpasanna mabalin a narigat para iti Espiritu Santo a mangipalagip kadatayo ti manayon a parabur nga inted ti Apo kadatayo manipud iti kinamaladagatayo ken kabayatan dagiti narigat a panawentayo.
Adda simple nga agas para iti nakaro a sakit ti pananglipat iti Dios, dagiti paraburna, ken dagiti mensahena kadatayo. Inkari ni Jesucristo daytoy kadagiti disipulona idi asidegen a mailansa iti krus, agungar, ken kalpasanna maala manipud kadakuada tapno umuli iti gloria iti Amana. Maseknanda a mangammo no kasano a kabaelanda ti agibtur no awanen Isuna kadakuada.
Daytoy ti kari. Naipatungpal daytoy para kadakuada idin. Mabalin a maipatungpal daytoy para iti amin kadatayo itan:
“Dagitoy a banag nga insaok kadakayo, adda pay laeng kadakayo.
“Ngem ti Mangliwliwa, nga isu ti Espiritu Santo, nga ibaonto ni Ama iti naganko, isuronanto kadakayo dagiti amin a banag, ket ipalagipnanto kadakayo dagiti isu amin a banag nga imbagak kadakayo.”5
Ti tulbek iti pananglaglagip a mangyeg ken mangpatalinaed iti pammaneknek ket panangawat iti Espiritu Santo kas kadkadua. Ti Espiritu Santo ti mangtulong kadatayo a kumita iti no ania ti inaramiden ti Dios para kadatayo. Ti Espiritu Santo ti makatulong kadagiti pagserbiantayo a kumita no ania ti inaramiden ti Dios para kadakuada.
Nagted ti Nailangitan nga Ama iti simple a pagtuladan tapno maawattayo ti Espiritu Santo saan laeng a maminsan no di ketdi agtultuloy iti baet ti dakkel a pakarikutan ti inaldaw a panagbiagtayo. Maulit ti pagtuladan iti kararag ti sakramento: Ikaritayo a kanayon a laglagipentayo ti Mangisalakan. Ikaritayo nga awatentayo ti naganna kadatayo. Ikaritayo ti agtungpal kadagiti bilinna. Ket maikari kadatayo no aramidentayo dayta, maaddaantayto iti Espirituna a mangkadkadua kadatayo.6 Aggigiddan a maaramid dagita a kari iti nakaskasdaaw a wagas a mangpapigsa kadagiti pammaneknektayo ken iti agangay, babaen ti Pannubbot, a mangbalbaliw kadagiti kinataotayo no agtungpaltayo iti pasettayo iti kari.
Ti Espiritu Santo ti mangipaneknek a ni Jesucristo ti Ay-ayaten nga Anak ti Nailangitan nga Ama a mangipatpateg kadatayo ken agtarigagay a maaddaantayo iti agnanayon a biag Kenkuana a kadua dagiti pamilia. Uray idi mangrugi dayta a pammaneknek, mariknatayo ti tarigagay nga agserbi Kenkuana ken agtungpal kadagiti bilinna. No agtultuloytayo iti panangaramid iti dayta, umawattayo kadagiti sagut ti Espiritu Santo a mangted kadatayo iti bileg iti panagserbitayo. Makitatayo ti ima ti Dios a nalawlawag, nalawag unay tapno in-inut a saantayo laeng a manglagip Kenkuana, no di ketdi mangipateg Kenkuana, ken babaen ti bileg ti Pannubbot, agbalintayo nga ad-adda a kas Kenkuana.
Mabalin a saludsodenyo, “Ngem kasano a mairugi daytoy a proseso iti maysa a tao nga awan ti ammona maipapan iti Dios ken mangibaga nga awan malagipnan maipapan kadagiti naespirituan a padas?” Naaddaan ti tunggal maysa kadagiti naespirituan a padas a mabalin a saanda a mailasin. Tunggal tao, iti iseserrekna iti lubong, ket maikkan iti Espiritu ni Cristo. No kasano nga agtrabaho dayta nga espiritu ket mailadawan iti libro ni Moroni:
“Ta adtoy, naited ti Espiritu ni Cristo iti tunggal tao, tapno maammuanna ti nasayaat manipud iti dakes; gapuna, imparangko kadakayo ti wagas a mangngeddeng; ta amin a banag a makaawis tapno agaramid iti nasayaat, ken mangallukoy iti panamati ken Cristo, naibaon babaen iti pannakabalin ken sagut ni Cristo; gapuna maammuanyo iti naan-anay a pannakaammo dagitoy iti Dios.
“Ngem ania man a banag a mangallukoy iti tao nga agaramid iti dakes, ken saan a mamati ken ni Cristo, ket tallikudanna, ken saan nga agpaay iti Dios, ammoyon iti naan-anay a pannakaammo a kukua ti sairo; ta kastoy a wagas ti panagtrabaho ti sairo, ta saan a mangallukoy iti tao nga agaramid iti nasayaat, saan, uray maysa; wenno dagiti anghelna; uray kadagiti mangiruknoy iti bagbagida kenkuana. …
“Gapuna, balakadankayo kakabsat, a sapulenyo a sireregta ti silaw ni Cristo tapno maammuanyo ti naimbag manipud iti dakes; ket no agtalekkayo iti tunggal nasayaat a banag, ket saanyo a babalawen, pudno nga anaknakayo ni Cristo.”7
Isu nga uray sakbay nga awaten dagiti tao ti karbengan kadagiti sagut ti Espiritu Santo, no makumpirmaanda kas miembro ti Simbaan, ken uray sakbay nga ipatalged ti Espiritu Santo ti kinapudno kadakuada sakbay ti panagbuniag, addaandan kadagiti naespirituan a padpadas. Manipud iti kinaubingda, inawis idan ti Espiritu ni Cristo nga agaramid iti nasayaat ken binallaaganna ida a maibusor iti dakes. Addaandan kadagiti lagip maipapan kadagita a padas uray no saanda pay a nailasin ti nagtaudanda. Agsublinto dayta a lagip kadakuada kas misionario wenno no isurotayo kadakuada ti balikas ti Dios ket denggenda daytoy. Malagipdanto ti rikna ti rag-o wenno ladingit no maisuro kadakuada dagiti kinapudno ti ebanghelio. Ket dayta a lagip ti Espiritu ni Cristo ti mangpaluknengto iti puspusoda a mangpalugod iti Espiritu Santo nga agpaneknek kadakuada. Daytanto ti mangiturong kadakuada nga agtungpal kadagiti bilin ken agtarigagay a mangawat iti nagan ti Mangisalakan kadakuada. Ket no aramidenda, kadagiti danum ti panangbuniag, ken no denggenda dagiti balikas ti kumpirmasion nga “Awatem ti Espiritu Santo” nga insao ti napusgan a katulongan ti Dios, dumakkelto ti bileg a kanayon a manglaglagip iti Dios.
Paneknekak kadakayo a dagiti nabara a rikna nga adda kadakayo kabayatan ti idedengngegyo iti kinapudno a naisao iti daytoy a komperensia ket naggapu iti Espiritu Santo. Ti Mangisalakan, a nangikari nga umayto ti Espiritu Santo, ket isu ti patpatgen, naitan-ok nga Anak ti Nailangitan nga Amatayo.
Ita a sardam, ken iti rabii no bigat, mabalin nga agkararag ken agutobkayo, nga agdamdamagkayo kadagiti saludsod: Impatulod kadi ti Dios daytoy a mensahe para kaniak? Nakitak kadi ti imana iti biagko wenno iti biag dagiti annakko? Aramidekto dayta. Ket kalpasanna agsapulakto iti wagas a mangtaginayon iti aldaw a masapul a laglagipek, ken dagiti patpatgek, no kasano ti kadakkel ti ayat ti Dios kadatayo ken no kasano ti kadakkel ti panagkasapulantayo Kenkuana. Paneknekak nga ay-ayatennatayo ken bembendisionannatayo, iti ad-addu pay ngem iti mailasin ti kaaduan kadatayo. Ammok a pudno dayta, ket daytoy ti mangyeg kaniak iti rag-o a manglaglagip Kenkuana. Iti nagan ni Jesucristo, amen.