O Keememej, Keememej
Henry B. Eyring
Rikapilōklōk eo Kein Karuo ilo Būreejtōnji eo Kein Kajuon
“O keememej, keememej,” ekkā an rikanaan ro ilo Bok in Mormon ba.1 Jibadbad eo aō ej n̄an libwijerjere kom̧ n̄an pukot wāween ko n̄an kile im keememej jouj eo an Anij.
Ij m̧ōņōņō kōn kumi in al eo ilo aer kar kadiwōjtok jibbon̄nin, eo ekar kōn Rilo̧mo̧o̧r, im m̧ōņōņō in lo bwe naan ko ilo juon iaan al ko raar al kake, “En̄in Kraist,” kar jeje jān Būreejtōn James E. Faust. Ke ij jijōt iturin Brother Newell, Iaar m̧al ļo̧k n̄an e im kajjitōk, “Ejet an ajri ro nejum̧ pād?” Eaar ba, “Ke Būreejtōn Faust ekar jijet ilo jea ņe, men eo ņe ej kajjitōk aolep iien.” Iaar jab ilbōk, kōnke Būreejtōn Faust eaar juon waanjon̄ok aolep iien in juon rikaļoor eo kar kōmeļeļeik ilo Al im Naan in Kōnono rainin. Iaar aolep iien en̄jake bwe n̄e irūtto, ikōņaan āinwōt Būreejtōn Faust. Emaron̄ wōr wōt iien.
Ke ajri ro nejum̧ raar iddik wōt, iaar jino je jet men ko kōn ta eo eaar waļo̧k kajjojo raan. In jiron̄ kom̧ ekōjkan an kar ijjino men in. Eaar rum̧wij aō ro̧o̧ltok jen juon an Kabun̄ in jerbal. Em̧ōj an marok. Ļōļļap eo nej jema, eo ej jokwe epaake kōm, eaar kailbōk eō ke ij jibadōk ļo̧k kōjem in m̧weeo m̧ō. Eaar ineek jet baib ioon aeran, m̧ōkaj in etal kōn nuknuk in jerbal ko an. Ijeļā bwe eaar jerbale juon system n̄an bam̧ tok dān jān juon reba n̄an m̧weeo m̧ōm̧.
Eaar ettōn̄dikdik, kōnono mera, innām bar m̧ōkaj in etal n̄an kōm̧m̧ane jerbal eo an. Iaar jidik m̧aanļo̧k n̄an m̧weeo, ļōmņake ta eo ej kōm̧m̧ane n̄an kōm, im ke ij tōbar kōjem eo, Iaar ron̄ ilo kōļmenļo̧kjeņ eo aō—jaab ilo ainikieō—naan kein: “Iaar jab lewaj n̄an eok en̄jake kein n̄an kwe make. Jei.”
Ikar deļo̧n̄. Iaar jab kiki. Men̄e iaar m̧ōk, iaar jibwetok jet peba im jino jeje. Im ke ij jeje, iaar meļeļe ennaan eo iaar ron̄ ilo kōļmenļo̧kjeņ eo aō. Ij aikuj kar ļo̧o̧k bwe ajri ro nejū ren riiti, ilju in jekļaj, ekōjkan aō lo an pein Anij kōjeraam̧m̧an baam̧le eo am̧. Jim̧m̧a ejjab aikuj in kōm̧m̧ane ta eo eaar kōm̧m̧ane n̄an kōm. Emaron̄ kar lo ro jet n̄an kōm̧m̧ane ak jab kōm̧m̧ane n̄an jidik. Ak eaar jipan̄ kōm, baam̧le eo an, ilo juon wāween ro rikaļoor Jisōs Kraist ro raar kōm̧m̧an bujen ippān Anij rej kōm̧m̧ane. Iaar jeļā bwe menin em̧ool. Im iaar je, bwe ro nejū en wōr aer ememļo̧kjeņ juon raan n̄e renaaj aikuji.
Iaar je jet ļain kajjojo raan iumin iiō ko. Ikar jab likjab juon raan mekarta ewi jon̄an aō m̧ōk ak ewi m̧ōkaj in aō jino raan eo juon. Mokta jen aō jeje, ij kōļmenļo̧kjeņ kōn kajjitōk in: “Iaar ke lo an pein Anij kar jibwe kōm ak ro nejum̧ ak baam̧le eo am̧ rainin?” Ilo aō kōm̧m̧ane wōt menin, jet men rejino waļo̧k tok. Ilo aō kōn keememej ta eo eaar waļo̧k raan eo, ij lo kam̧ool in ta eo Anij eaar kōm̧m̧ane n̄an juon iaam me iban kile ilo tōre ko reboub ilo raan eo. Ilo an kar waļo̧k, im ekkā an waļo̧k, iaar kile n̄an kajieon̄ keememej ekōm̧m̧an bwe Anij en kwaļo̧k n̄an eō ta eo Eaar kōm̧m̧ane.
Kam̧m̧oolol eaar jino ļapļo̧k ilo būruwō. Eaar kajoorļo̧k naan in kam̧ool. Iaar jino jeļā bwe Jemedwōj Ilan̄ ej ron̄ im uwaake jar ko. Eaar ļapļo̧k aō en̄jake kam̧m̧oolol kōn bōro ko repidodo im kōkm̧anm̧anļo̧k ko me rej waļo̧k kōn wōt Pinmuur eo an Rilo̧mo̧o̧r Jisōs Kraist. Im eaar ļapļo̧k aō lōke bwe Jetōb Kwojarjar emaron̄ bōktok men otemjeļo̧k n̄an kōļmenļo̧kjeņ eo ad—men̄e men ko jejjab jeļā kaki ak lukkuun kar leļo̧k ad ke raar waļo̧k.
Em̧ōj an eļļā iiō ko. Ļaddik ro nejū rerūttoļo̧k im erom̧ em̧m̧aan. Jet iien juon iaer emaron̄ kailbōk eō im ba, “Baba, ke iaar riiti kape in jōōnōļ eo kōn iien eo …” innām ej jiron̄ eō bwe ilo aō riiti kōn ta eo eaar waļo̧k jem̧aan ejipan̄ e bwe en kile men eo Anij eaar kōm̧m̧an ilo raan eo an.
Jibadbad eo aō ej n̄an libwijerjere kom̧ n̄an pukot wāween ko n̄an kile im keememej jouj eo an Anij. Enaaj kalōk naan in kam̧ool ko ad. Komaron̄ jab jeje jōōnōļ. Kwomaron̄ jab kwaļo̧k jabdewōt ta eo kwoj je ippān ro kwoj iakwe im jerbal n̄an er. Ak kwe im er naaj jeraam̧m̧an ilo ami keememej ta eo Irooj eaar kōm̧m̧ane. Kwoj keememej ke al eo me jet iien jej al kake: “Bwini menin joij kajo iair; bwini menin joij an Anij n̄ōn yuk, Im enaaj kailbōk eok kōn ta eo Anij eaar kōm̧m̧ane.”2
Eban pidodo n̄an keememej. Mour ilo ad kōm̧m̧ane kōn juon ron̄oļ ilo māj ko mājed, jeban keememej elemen ad kar pād ippān Jemedwōj Ilan̄ im Nejin Jitenbōro, Jisōs Kraist, ilo mour eo m̧okta; jejjab bar maron̄ lo kōn mājen kanniōk ko ad ak kōn jibadbad eo emake kōn pein Anij ilo mour ko ad. Lo kain men rot kein ebōk Jetōb Kwojarjar. Im ejjab pidodo n̄an erreeo n̄an m̧ōttāik Jetōb Kwojarjar ilo juon laļ eo ejerawiwi.
En̄in ej unin an menin meļo̧kļo̧k Anij ilubwiljin ro Nejin juon jōrrāān eo ekkā an waļo̧k jen ke eaar ejaak laļ in. Ļōmņak kōn tōre ko an Moses, ke Anij eaar leļo̧k manna im ilo wāween ko rekabwilōn̄lōn̄ im alikkar an tōl im kōjparok ro Nejin. N̄an rainin, rikanaan eo ej kakkōļ armej ro ro raar lukkuun jeraam̧m̧an, āinwōt aolep iien rikanaan ro rej kakkōļ im aolep iien renaaj: “Kwōn lale kwe make, im kanooj kōjparok am̧, n̄e kwō jab meļo̧kļo̧k men ko mejam̧ kar loi, im n̄e rab jako jān būruowōm̧ raan ko otemjej in am̧ mour.”3
Im idajon̄jon̄ eo n̄an keememej eaar aolep iien pen n̄an ro rej lukkuun jeraam̧m̧an. Ro rej tiljek n̄an Anij rej kōjparok im jeraam̧m̧an. Ej waļo̧k āinwōt juon tōprak in jerbal n̄an Anij im kōjparok kien ko An. Ak ilo an itok kōjeraam̧m̧an ko kapo eo n̄an meļo̧kļo̧k ia eo jeram̧m̧an ej itok jāne. Epidodo n̄an en̄jaki kōjeraam̧m̧an ko kar litoki ejjab jen juon Anij eo ej iakwe eo jej kōjatdikdik kake ak jen kajoor ko ad make. Rikanaan ro raar āliji ennaan in:
“Im āindein jemaron̄ lo ekōjkan an bōd, im barāinwōt okoktak in būruōn ro nejin armej; aaet, jej maron̄ lo bwe Irooj ilo em̧m̧an eo ejjeļo̧k jem̧ļo̧kin An ej kōjeraam̧m̧an im kōļapļo̧k ro rej likūt aer kōjatdikdik ilo E.
“Aaet, im jej maron̄ lo bwe ilo lukkuun iien eo n̄e E ej kōļapļo̧k armej ro An, aaet, ilo wōrļo̧k in meļaaj ko aer, bwijin in mennin mour ko reļļap im bwijin in mennin mour ko aer reddik, im ilo gold, im ilo silver, im ilo aolep mennin aorōk ko otemjeļo̧k im kapeel ko; im dāpij mour ko aer, im kōtļo̧k er jān pein rikōjdat ro aer; im kameoeo būruōn rikōjdat ro aer bwe ren jab kabun̄pata ņae er; aaet, im ilo tukaduin, kōm̧m̧an aolep men ko n̄an oņaake im m̧ōņōņō an armej ro An; aaet, innām ej iien eo in rej kapene burueer, im rej meļo̧kļo̧k Irooj aer Anij, im rej jujuri ium̧win neer Rikwōjarjar Eo—aaet, im men in kōnke ejjeļo̧k aer inepata, im m̧weie eo aer eļap otem ļap.”
Im rikanaan ro raar ba: “Aaet, ekōjkan aer innitōt n̄an utiej ilo juwa; aaet, ekōjkan aer innitōt n̄an likōmjāje, im kōm̧m̧an aolep men ko otemjeļo̧k in men eo ebōd; im ekōjkan aer rum̧wij n̄an ememej Irooj aer Anij, im n̄an leļo̧k lo̧jiln̄ier n̄an kapilōk ko An, aaet, ekōjkan aer rum̧wij n̄an etetal ilo iaļ ko an mālōtlōt!”4
Ekaburom̧ōjm̧ōj, jeraam̧m̧an ejjab un eo wōt armej rej meļo̧kļo̧k Anij. Emaron̄ bar pen n̄an keememej E n̄e eajebjeb mour ko ad. N̄e jej apan̄, āinwōt ro jet, kōn jeram̧ōļ ak n̄e ro rikōjdat kōj rej anjo iood ak n̄e nan̄inmej ejjab ājmour, rikōjdat eo ad emaron̄ jilkintok an in naan eriab bwe ejjeļo̧k Anij ak eļan̄n̄e Epād Ejjab kea kōn kōj. Innām emaron̄ pen an Jetōb Kwojarjar bōktok n̄an keememej eo ad kōn kōjeraam̧m̧an ko an mour eo Irooj eaar letok n̄an kōj jen ad lo̧tak im ilo iien ko ad reppen.
Ewōr juon unokan n̄an kemour bwe jen jab meļo̧kļo̧k Anij, kōjeraam̧m̧an ko An, im naan ko An n̄an kōj. Jisōs Kraist eaar kallim̧uri rikaļoor ro An m̧okta jen An kar dōbwāāl, jerkakpeje, innām kar bōk jen er n̄an wanlōn̄ļo̧k ilo aiboojoj eo an Jemen. Raar inepata n̄an jeļā ewi wāween aer maron̄ niknik n̄e Eban bar pād ippāer.
En̄in kallim̧ur eo. Eaar kūrm̧ool n̄an er iien eo. Emaron̄ bar kūrm̧ool n̄an aolep kōj kiiō.
“Men kein iaar kōnono n̄an kom̧, aaet rej waļo̧k n̄an kom̧.
“Ak Ri Kaaenōm̧m̧an, E Jetōb Kwojarjar, Eo Jema enaaj jilkintok ilo Eta, Enaaj katakin kom̧ men otemjej, im kakememej men otemjej n̄an kom̧, men ko Iar ba n̄an kom̧.”5
Ki eo n̄an keememej me ej bōktok im dāpij naan in kam̧ool ej bōk Jetōb Kwojarjar āinwōt juon m̧ōttad. Ej Jetōb Kwojarjar eo ej jipan̄ kōj lo ta eo Anij eaar kōm̧m̧ane n̄an kōj. Ej Jetōb Kwojarjar eo emaron̄ jipan̄ ro jej jerbal n̄an er lo ta eo Anij eaar kōm̧m̧ane n̄an er.
Jemedwōj Ilan̄ eaar letok juon jon̄ok eo epidodo n̄an ad bōk Jetōb Kwojarjar ejjab juon alen ak elōn̄ alen ilo mour ko ad kajjojo raan. Jon̄ok in ej ālij in men ilo jar in kwojkwoj eo: Jej kallim̧ur bwe jenaaj iien otemjej keememej Rilo̧mo̧o̧r. Jej kallim̧ur n̄an bōk iood Etan. Jej kallim̧ur n̄an kōjparok kien ko An. Im jej kallim̧ur bwe eļan̄n̄e jej kōm̧m̧ane, jenaaj bōk Jetōb eo An bween pād ippād.6 Kallim̧ur kein rej jerbal ippān doon ilo juon wāween eo eaiboojoj n̄an kōkajoorļo̧k naan in kam̧ool ko ad im ilo iien, kōn Pinmuur eo, n̄an ukōt m̧wiliid ilo ad kōjparok ijo kuņaad ilo kallim̧ur in.
Ej Jetōb Kwojarjar eo ej kam̧ool bwe Jisōs Kraist ej Nejin Jemedwōj Ilan̄ Ejitenbōro eo ej iakwe kōj im kōņaan bwe jen bōk mour indeeo Ippān āinwōt baam̧le ko. Jekdoon ilo jinoin naan in kam̧ool eo, jej en̄jake juon ikdeelel in jerbal n̄an E im n̄an kōjparok kien ko An. N̄e jej kijejeto n̄an kōm̧m̧ane menin, jej bōk menin letok eo an Jetōb Kwojarjar n̄an letok n̄an kōj kajoor ilo jerbal in jipan̄ eo ad. Ej ļapļo̧k an alikkar ad lo pein Anij, lukkuun alikkar ilo tōre in jejjab keememej wōt E, ak jej jino in iakwe E im, kōn kajoor in Pinmuur eo, jej erom̧ āinwōt E.
Kwomaron̄ ba, “Ak elmen an jerbal in ijjino ippān eo ejjab jeļā kōn Anij im ba ke ejjeļo̧k ememļo̧kjeņ in jetōb ļo̧k wōt n̄an jidik?” Aolep ewōr aer jetōb in en̄jake me remaron̄ jab kile. Aolep armej, n̄an deļo̧n̄e tok laļ in, ej bōk Jetōb in Kraist. Elmen an jetōb jerbal ej kōmeļeļe ilo bok in Moronai:
“Bwe lo, Jetōb in Kraist em̧ōj leļo̧k e n̄an aolep armej, bwe en maron̄ jeļā em̧m̧an jān nana; kōn menin, ij kwaļo̧k wāween eo n̄an ekajet; bwe men otemjeļo̧k ej karuwainene n̄an kōm̧m̧an em̧m̧an, im n̄an karreel n̄an tōmak ilo Kraist, kar jilkinļo̧k e jān kajoor eo im mennin leļo̧k eo an Kraist; kōn menin kom̧ maron̄ jeļā kōn juon jeļāļo̧kjeņ eweeppān e ej jān Anij.
“A jabdewōt men ej karreel armej n̄an kōm̧m̧an nana, im jab tōmak ilo Kraist, im kaarmejjete E, im jab jerbal n̄an Anij, innām kom̧ naaj jeļā kōn juon jeļāļo̧kjeņ eweeppān men in ej jān devil; bwe ilo̧kan wāween in devil ej kōm̧m̧an jerbal enana, bwe e ej karreel ejjeļo̧k armej n̄an kōm̧m̧an em̧m̧an, jaab, jab juon, jaab enjeļ ro an, im jab er ro raar wūjlepeļo̧k er n̄an E. …
“Kōn menin, ij akweļap n̄an kom̧, ro jeiū im jatū, bwe kom̧ij aikuj kappukot ilo niknik ilo meram eo an Kraist bwe kom̧in maron̄ jeļā em̧m̧an jān nana; im eļan̄n̄e kom̧ naaj ekkejel pen ioon men otemjej em̧m̧an, im jab liaakeļo̧k men in, kom̧ naaj lukkuun m̧ool juon nejin Kraist.”7
Kōn menin, men̄e m̧okta jen an armej bōk menin letok an Jetōb Kwojarjar, n̄e rej kapen āinwōt membōr ro an Kabun̄ in, im em̧ool m̧okta jen an Jetōb Kwojarjar kapen m̧ool eo n̄an er m̧okta jen peptaij, ewōr ippaer en̄jake ko an jetōb. Jetōbin Kraist ekar pād wōt, jān ke raar dik, kūr er n̄an kōm̧m̧an em̧m̧an im kakkōļ er ņae nana. Ewōr ippāer ememļo̧kjeņ eo kōn en̄jake kein men̄e rejjab kile rej itok jen ia. Ememļo̧kjeņ in enaaj bar ro̧o̧ltok n̄an er āinwōt mijenede ro ak kōj jej katakin er naan in Anij im rej ron̄jake. Renaaj keememej en̄jake eo kōn lan̄lōn̄ ak būrom̧ōj n̄e kar katakin er kōn m̧ool ko an gospel in. Im ememļo̧kjeņ eo an Jetōb in Kraist enaaj kapidodoik būruweer n̄an kōtļo̧k bwe Jetōb Kwojarjar en kam̧ool n̄an er. Menin enaaj tōl ļo̧k er n̄an kōjparok kien ko im kōņaan bōk iooer etan Rilo̧mo̧o̧r. Im n̄e rej kōm̧m̧ane, ilo dānin peptaij, im ilo aer ron̄jake naan eo ilo iien kapen eo “Bōk Jetōb Kwojarjar” kōnono jen juon rikarejeraņ Anij eo em̧ōj kōmālimi, kajoor eo n̄an keememej Anij iien otemjej enaaj ļapļo̧k.
Ij kam̧ool n̄an kom̧ bwe en̄jake ko kwoj būki ilo am̧ kar ron̄ m̧ool eo kar kōnono kake ilo kweilo̧k in rej jān Jetōb Kwojarjar. Rilo̧mo̧o̧r, eo eaar kallim̧ur bwe Jetōb Kwojarjar enaaj itok, eo ejitenbōro, eaiboojoj Nejin Jemedwōj Ilan̄.
Jotenin, im jotenen ilju, kwonaaj jar im kōļmenļo̧kjeņ, kajjitōk kajjitōk in: Anij eaar ke jilkintok juon ennaan n̄an n̄a? Iaar ke lo Pein ilo mour eo aō ak ilo mour ko an ro nejū? Inaaj kōm̧m̧ane menin. Innām inaaj pukot juon wāween n̄an dāpij ememļo̧kjeņ in ilo iien en, bwe n̄a, im ro ij iakwe er, naaj keememej ewi jon̄an an Anij iakwe kōj im ewi jon̄an ad aikuji E. Ij kam̧ool bwe Ej iakwe kōj im kōjeraam̧m̧an kōj, eļapļo̧k jen an jet iaad kile. Ijeļā bwe ej m̧ool, im ej bōktok n̄an eō m̧ōņōņō n̄an keememej E. Ilo etan Jisōs Kraist, amen.