2:3

Ia Manatua, Ia Manatua Lava

Henry B. Eyring

Fesoasoani Lua i le Au Peresitene Sili

“Ia manatua, ia manatua lava,” e tele ina augani mai ai perofeta o le Tusi a Mamona.¹ O lo’u manatu ia faatauanau outou ia saili auala e iloa ai ma manatua le agalelei o le Atua.

Sa ou faafetai lava mo le aufaipese i le latou faasalalauga i lenei taeao, lea sa faatatau i le Faaola, ma e faafetai i le vaaia o upu o se tasi o pese na latou lagiina, “O le Keriso Lenei,” sa tusia e Peresitene James E. Faust. A o ou nofo ai i talaane o Uso Newell, sa ou faalagolago atu ia te ia ma fesili i ai, “O a mai lau fanau?” Sa ia fai mai, “A o alala ai Peresitene Faust i lena nofoa, o lana fesili lava lena i taimi uma.” E le o faateia ai a’u, ona o Peresitene Faust o se faataitaiga atoatoa i taimi uma o se soo lea sa faamatalaina i le Musika ma le Afioga Tulei ananei. Sa ou lagona i taimi uma a o ou tuputupu ae, sa ou fia manao ia faapei o Peresitene Faust. Atonu o loo i ai pea se taimi.

A o laiti lava le ma fanau, sa amata ona ou tusitusia i lalo ni nai mea e uiga i mea na tutupu i aso uma. Se’i ou faamatala atu le ala na amata ai lena mea. Sa ou tuai mai i le fale mai se tofiga faale-Ekalesia. Sa pogisa. Sa faateia a’u e le tama o lo’u toalua, o le sa nofo latalata mai ia i matou, a o o’u savali agai atu i le faitotoa i luma o lo’u fale. Sa amo mai lana amoga o paipa, ma sa savali telea’i mai ma ona ofu faigaluega. Na ou iloa sa ia fauina se pamu e pamu mai ai le vai mai se vaitafe i lalo atu o lo matou fanua.

Sa soisoi mai o ia, ma talatalanoa lemu mai, ona toe alamu ane ai lea i o’u tafatafa i le pogisa e faaauau lana galuega. Sa ou savali teisi agai atu i le fale, ma mafaufau i lana mea sa fai mo matou, ma i le taimi na ou taunuu ai i le faitotoa, sa ou faalogoina i lo’u mafaufau—ae le o lo’u lava leo—ia upu nei: “Ou te le o tuuina atu nei aafiaga mo oe lava. Tusi i lalo.”

Sa ou alu i totonu. Ou te lei alu ou te moe. E ui lava ina sa ou le lava, ae sa ou aumaia ni pepa ma amata loa ona tusi. Ma a o ou faia, sa ou malamalama i le savali sa ou faalogoina i lo’u mafaufau. Sa tatau ona ou tusia mo la’u fanau e faitau ai, i se aso i le lumanai, le auala na ou vaaia ai le aao o le Atua sa faamanuiaina ai lo matou aiga. Sa le tau faia e tamamatua le mea sa ia faia mo i matou. Semanu e mafai ona ia fai i se tasi na te faia, po o le le faia lava. Ae sa auauna mai o ia ia i matou, o lona aiga, i le ala e masani ona faia ai e soo o le feagaiga a Iesu Keriso. Na ou iloaina e moni lena mea. Ma o lea sa ou tusia ai i lalo, ina ia mafai ai e la’u fanau ona manatua i se aso, i le taimi latou te manaomia ai.

Sa ou tusia ni nai laina i aso taitasi mo le tele o tausaga. Ou te lei misia lava se aso tusa lava po o le a lou le lava, po o le a foi le vave ou te usua’i ai i le taeao e sosoo ai. Ae ou te lei tusia se mea, ou te mafaufau lava i le fesili lenei: “Pe na ou vaaia le aao o le Atua o aapa mai e pa’i mai ia i ma’ua po o le ma fanau po o le matou aiga i le asō?” A o faaauau pea ona ou faia lenei mea, sa amata ona tupu se mea. Pe a ou mafaufau i mea na tutupu i le aso, ou te vaaia faamaoniga o mea sa faia e le Atua mo se tasi o i matou ae ou te lei iloaina i taimi pisi o le aso. A o tupu lena mea, ma e tele lava taimi e tupu ai, sa ou iloaina ai o le taumafai e manatua, na mafai ai e le Atua ona faasino mai ia te au le mea sa Ia faia.

E sili atu i le na o le lotofaafetai na amata ona tupu ae i lou loto. Sa faatupulaia le molimau. Sa amata ona ou mautinoa atili e faafofogaina e lo tatou Tama Faalelagi tatalo ma tali mai i ai. Sa tele atu lou lotofaafetai ona o le faamaluluina ma le faaleleia e oo mai ona o le Togiola a le Faaola o Iesu Keriso. Ma sa atili ai ona ou mautinoa e mafai e le Agaga Paia ona faamanatu maia mea uma ia i tatou—e oo lava i mea tatou te lei matauina pe gauai atu i ai pe a tutupu.

Ua mou atu tausaga. O la’u fanau tama ua avea ma alii matutua. Ma i lea taimi ma lea taimi e faate’ia ai a’u e se tasi o i latou i le faapea mai, “Tama, sa ou faitauina la’u kopi o le api talaaga e uiga i le …” ona ia faamatala mai lea e uiga i le faitauina o le mea sa tupu i se taimi ua leva ua fesoasoani ia te ia na te iloa ai se mea sa faia e le Atua i lona aso.

O lo’u manatu ia faatauanau outou ia saili auala e iloa ai ma manatua le agalelei o le Atua. O le a fausia ai a tatou molimau. Atonu e te le o tausia se api talaaga. Atonu e te le o faasoa atua soo se faamaumauga e te tausia ia i latou e te alofa ma auauna i ai. Ae o le a faamanuiaina oe ma i latou a o e manatua le mea na faia e le Alii. E te manatuaina lena pese lea tatou te usuina i nisi taimi: “Faitau ou manuia ua maua mai; faitau taitasi, e te ofo tele i mea ua Ia fai.”²

O le a le faigofie ona manatua. O le ola ai e pei ona tatou i ai ma se ufimata i o tatou mata, e le mafai ona tatou manatua ai pe na faape’i lo tatou i ai ma lo tatou Tama Faalelagi ma Lona Alo Pele, o Iesu Keriso, i le lalolagi i le muai olaga; e le mafai foi ona tatou vaai atu i o tatou mata faaletino pe malamalama atoatoa foi i le aao o le Atua i o tatou olaga. O le vaai atu i na mea e manaomia ai le Agaga Paia. Ma e le faigofie foi ona agavaa mo le mafutaga a le Agaga Paia i se lalolagi amioleaga.

O le mafuaaga lena ua avea ai le galo o le Atua ma faafitauli faifai pea i Ana fanau talu mai le amataga o le lalolagi. Mafaufau i ona po o Mose, ina ua avatu e le Atua le manai ma i ni ala faavavega ma le iloga na taitai ai ma puipuia Lana fanau. Ae, sa lapataia pea e le perofeta ia tagata sa matua faamanuiaina, e pei ona lapatai mai ai i taimi uma perofeta ma o le a faapea lava i taimi uma: “Tau ina faaeteete oe ia te oe, ma ia e matua faaeteete lava ia te oe, ne’i galo ia te oe nei mea na iloa ai e ou mata, ne’i te’a ese ai lou loto i aso uma o lou olaga.”³

Ma o le luitau ia manatua o loo avea pea ma mea faigata tele mo i latou ua matua faamanuiaina lava. O i latou o e faatuatua i le Atua e puipuia ma faamanuiaina. E oo mai lena mea o le taunuuga o le auauna atu i le Atua ma le tausiga o Ana poloaiga. Ae i na faamanuiaga e oo mai ai foi ma le faaosoosoga e faagalo lo latou punavai. E faigofie lava ona amata lagona o faamanuiaga sa lei foai maia e se Atua alofa o lē tatou te faalagolago i ai ae na ala mai i lo tatou lava malosi. Ua ta’u mai pea lava pea e perofeta lenei auega:

“Ma ua faapea ona mafai ona tatou vaai i le sese, ma le le maumaututu foi o loto o le fanauga a tagata; ioe, ua mafai ona tatou vaai e faamanuia ma faatamaoaiga e le Alii, i lona agalelei silisili le tuaoia, i latou o e e tuu atu lo latou faalagolago ia te ia.

“Ioe, ma e mafai ona tatou vaai o le taimi lava e faamanuiaina ai e ia ona tagata, ioe, i le fua tele mai o o latou fanua, a latou lafu ma a latou fagaga, ma i auro, ma ario, ma mea taua uiga eseese uma o ituaiga taitasi ma teuga; i le faasaoina o o latou ola, ma laveai i latou i fafo mai lima o o latou fili; i le faamaluluina o loto o o latou fili ina ia latou le sii taua faasaga mai ia te i latou; ioe, ma i se aotelega, i le faia o mea uma mo le manuia ma le fiafia o ona tagata; ioe, o le taimi lena latou te faamaaa ai o latou loto, ma galo ai ia i latou le Alii lo latou Atua, ma soli i lalo o o latou vae le Paia e Toatasi—ioe, ma o le pogai ona o lo latou le popole, ma lo latou tamaoaiga tele.”

Ma na faaauau pea le fetalaiga a le perofeta: “Ioe, ua ese lava le vave ona faafefeteina i le faamaualuga; ioe, ua ese lava le vave ona mitamitavale, ma fai mea uiga eseese uma ua amioletonu; ma ua ese lava ona gese ia te i latou ona manatua o le Alii lo latou Atua, ma uai atu o latou taliga i ana fautuaga, ioe, ua ese lava le gese ona latou savavali i ala o le poto!”⁴

O le mea e faanoanoa ai, o le tamaoaiga e le na o le mafuaaga lea e galo ai i tagata le Atua. E mafai foi ona faigata ona manatuaina o Ia pe a le lelei o tatou olaga. Pe a tatou tauivi, e pei lava o le toatele o tagata, i le mativa faifai pea po o le taimi e manumalo ai o tatou fili ia i tatou po o taimi e le faamaloloina ai se ma’i, e auina mai e le fili o o tatou agaga ana feau leaga e faapea e leai se Atua ae afai foi o loo i ai o Ia e le popole o Ia ia i tatou. Ona ono faigata lea mo le Agaga Paia ona faamanatu mai ia i tatou ia faamanuiaga o le olaga atoa ua foai mai e le Alii ia i tatou mai lo tatou tamaitiiti ma i le lotolotoi o o tatou mafatiaga.

O loo i ai se vaifofo faigofie lava mo le mala o le galo o le Atua, o Ana faamanuiaga, ma Ana savali ia i tatou. Sa folafola atu e Iesu Keriso lena mea i Ona soo a o latalata ina faasatauro o Ia, toetu mai, ma aveese atu mai ia i latou ma afio atu i le mamalu o Lona Tama. Sa latou atugalu i le fia iloa pe faapefea ona latou mafaia ona tumau pe a le toe i ai o Ia ma i latou.

O le folafolaga lenei. Sa faataunuuina mo i latou i lena taimi. E mafai foi ona faataunuuina mo i tatou uma i le taimi nei:

“O mea ia ou te fai atu ia te outou manu o tatou nonofo.

“A o le Fesoasoani, o le Agaga Paia lea, e auina mai e le Tama i lo’u igoa, o ia lava na te aoao ia te outou i mea uma lava, e faamanatu mai foi o ia ia te outou i mea uma ua ou fai atu ai ia te outou.”⁵

O le ki i le manatuaina lea e aumaia ma faatumauina le molimau, o le mauaina lea o le Agaga Paia e avea ma soa. O le Agaga Paia lea e fesoasoani ia i tatou ia iloa mea o loo faia e le Atua mo i tatou. O le Agaga Paia lea e mafai ona fesoasoani ia i latou o loo tatou auauna i ai ia iloa mea o loo faia e le Atua mo i latou.

Ua tuuina mai e le Tama Faalelagi se mamanu faigofie mo i tatou ia maua ai le Agaga Paia e le faatasi ae faifai pea i le vāvāō o o tatou olaga i aso taitasi. O lea mamanu e toe faia i le tatalo o le faamanatuga: Tatou te folafola atu o le a tatou manatua pea le Faaola. Tatou te folafola atu e ave i o tatou luga Lona suafa. Tatou te folafola atu e tausi Ana poloaiga. Ma ua folafola mai ia i tatou afai tatou te faia lena mea, o le a tatou maua pea Lona Agaga e faatasi ma i tatou.⁶ O na folafolaga e galulue faatasi i se auala matagofie e faamalosia ai a tatou molimau ma i se taimi, e ala i le Togiola, e suia o tatou natura pe a tatou tausia la tatou vaega o le folafolaga.

O le Agaga Paia lea e molimau mai o Iesu Keriso o le Alo Pele o se Tama Faalelagi o le e alofa ia i tatou ma finagalo ia tatou maua le ola e faavavau faatasi ma Ia i ni aiga. E oo lava i le amataga o lena molimau, tatou te lagonaina se manao ia auauna atu ia te Ia ma ia tausi i Ana poloaiga. A tatou tumau i le faia o lena mea, tatou te maua ia meaalofa a le Agaga Paia e aumaia ia i tatou le mana i la tatou auaunaga. O le a oo ina tatou iloa manino atili le aao o le Atua, i le manino tele lea e i ai le taimi e le gata tatou te manatuaina o Ia, ae o le a tatou alolofa foi ia te Ia ma, e ala i le mana o le Togiola, tatou te avea ai e faapei o Ia.

Atonu e te fesili, “Ae faapefea ona amatalia lenei faagasologa i se tasi e leai ma sona iloa e uiga i le Atua ma leai sona manatuaga se tasi o aafiaga faaleagaga?” E i ai i tagata uma ni aafiaga faaleagaga ia atonu latou te le iloaina. O tagata uma, i le ulufale mai ai i le lalolagi, e tuuina atu i ai le Agaga o Keriso. O le auala e galue ai lena agaga o loo faamatalaina i le tusi a Moronae:

“Aua faauta, ua tuuina mai i tagata taitoatasi le Agaga o Keriso, ina ia mafai ona iloa e ia le lelei mai le leaga; o le mea lea, ou te faaali atu ai ia te outou le ala e faamasino ai; ona o mea uma e valaau mai ia fai le lelei, ma faatauanau mai ia talitonu ia Keriso, ua auina mai i le mana ma le meaalofa a Keriso; o le mea lea e mafai ai ona outou iloa ma le malamalama atoatoa ua mai le Atua.

“Ae o soo se mea e faatauanauina tagata ia latou faia le leaga, ma ia le talitonu ia Keriso, ma faafiti o ia, ma ia le auauna i le Atua, ona outou iloa lea ma le malamalama atoatoa ua mai le tiapolo; ona o le ala lea e galue ai le tiapolo, aua e le faatauanauina e ia se tagata ia faia le lelei, e leai, e leai lava se tasi; pe faia foi e ana agelu; pe faia foi e i latou o e latou te tuu atu i latou lava ia te ia. …

“O le mea lea, ou te aioi atu ia te outou, uso e, ia outou sailiili ma le filiga i le malamalama o Keriso ina ia outou iloa le lelei mai le leaga; ma afai tou te taofi mau i mea lelei uma, ma lē tauleagaina ia mea, o le a avea moni outou ma ni fanau a Keriso.”⁷

O lea, e tusa lava pe a o lei mauaina e tagata le aia i meaalofa a le Agaga Paia, pe a faamauina i latou o ni tagata o le Ekalesia, ma e tusa foi pe a o lei faamautu atu e le Agaga Paia le upumoni ia i latou a o lei faia le papatisoga, latou te maua lava aafiaga faaleagaga. Ua uma lava ona valaaulia e le Agaga o Keriso i latou, mai lava i lo latou tamaitiiti, ia faia le lelei ma lapataia i latou e tetee atu i le leaga. Ua i ai ia i latou manatuaga o na aafiaga e tusa lava pe latou te lei iloaina lo latou punavai. O lena manatuaga o le a toe foi mai ia i latou o ni faifeautalai pe tatou te aoao atu foi le afioga a le Atua ae latou faalogo mai i ai. O le a latou manatuaina lagona o le olioli po o le faanoanoa pe a aoaoina i latou i upumoni o le talalelei. Ma o lena manatuaga o le Agaga o Keriso o le a faamalūlūina o latou loto e faataga le Agaga Paia e molimau atu ia i latou. O lena mea o le a taitai atu ai i latou e tausi i poloaiga ma mananao e ave le suafa o le Faaola i o latou luga. Ma a latou faia, i totonu o vai o le papatisoga, ma a latou faalogo i upu o le faamauga “Talia le Agaga Paia” e tautalagia e se auauna faatagaina a le Atua, o le a faateleina le mana o le manatua pea o le Atua.

Ou te molimau atu ia te outou o lagona mafanafana ua e mauaina a o e faalogo ai i le upumoni o tautalagia i lenei konafesi e mai i le Agaga Paia. O le Faaola, lea na folafola mai o le a afio mai le Agaga Paia, o le Alo pele ma faamamaluina o lo tatou Tama Faalelagi.

O le po nei, ma le po taeao, atonu e te tatalo ma mafaufau loloto, ma faia ni fesili: Pe na auina mai e le Atua se savali mo na o au? Pe sa ou vaaia Lona aao i lo’u olaga po o olaga o la’u fanau? O le a ou faia lena mea. Ona ou sailia lea o se ala e teumalu ai lena manatuaga mo le aso o le a ou manaomia ai, ma manaomia ai e i latou ou te alofa i ai, ona manatuaina le tele na’ua o le alofa o le Atua ia i tatou ma le tele na’ua o lo tatou manaomiaina o Ia. Ou te molimau atu e alofa o Ia ia i tatou ma faamanuia i tatou, e sili atu ma le toatele o i tatou e le’i le iloaina lava. Ou te iloa e moni lena mea, ma na te aumaia le olioli ia te a’u i le manatuaina o Ia. I le suafa o Iesu Keriso, amene.