O Mataupu Faavae e Lua Mo Soo se Tamaoaiga
E masani lava i taimi o tofotofoga o faigata tatou te aoaoina ai na lesona sili ona taua e fausia ai o tatou tagata ma mamanu ai lo tatou taunuuga.
I a matou malaga asiasi i tagata o le Ekalesia i le lalolagi atoa, ma auala foi i fesootaiga faavae faaleperisitua, e muamua lava ona matou maua ai ni fingalo faaalia e uiga i tulaga ma luitau o o tatou tagata. Ua au tausagā o aafia le toatele o o tatou tagata ma faalavelave tuga faalenatura ma mea e fai e tagata, i le lalolagi atoa. Ua matou malamalama foi e toatele aiga ua le feauautai le faasoa ma ua popole pe faapefea ona onosaia nei taimi faigata.
Uso e, matou te lagona lo matou latalata tele atu ia te outou. Matou te alolofa ia te outou, ma o loo matou tatalo foi e le aunoa mo outou. Ua lava taimi lelei ma taimi leaga ua ou vaai i ai i lo’u olaga e iloa ai o le a faaavanoa lava e le taumalulu le mafanafana ma le faamoemoe e oo mai ai se tautotogo fou. Ua ou vaaia ata o le taulelei i le lumanai. Uso e, o la tatou vaega, e tatau ona tatou tumau ma mausali i le faamoemoe, galulue ma lo tatou malosi uma, ma faalagolago i le Atua.
E lei leva tele atu, sa ou mafaufau ai i se taimi i lo’u olaga ina ua toe tulai mai i o’u luma le mamafatu o le popole ma le atugalu e uiga i se lumanai e le o mautinoa. Sa 11 o’u tausaga ma sa matou nonofo ma lo matou aiga i le afeafe i luga o se fale o se faatoaga e latalata i Frankfurt, i Siamani. Sa toe avea foi i matou ma ni tagata sulufai, mo le taimi lona lua i se vaitau e na o ni nai tausaga, ma sa tauivi ai e atiina ae i matou lava i se nofoaga fou e matua mamao ese mai lo matou fale sa i ai muamua. E mafai ona ou fai atu faapea, sa matou matitiva, ae atonu e mamasagia lena faamatalaga. Sa matou momoe uma i se potu se tasi, ma sa matua laitiiti tele sa toetoe ina a leai se avanoa e savavali ai i le va o moega. I le isi tamai potu, sa i ai ni nai meaafale faaleogalua, ma se ogaumu sa masani ona kuka ai a matou meaai e Tina. A fia alu atu la mai le tasi potu i le isi, e tatau ona matou ui atu i se vaega sa teu ai e le faifaatoaga ana masini ma meafaigaluega, faatasi ai ma aano eseese o manu fasi ma sosisi sa tautau mai i laau faalava. O le manogi e oso ai i taimi uma lo’u fia ai. Sa leai so matou faletaele, ae sa i ai so matou fale le ta’ua i fafo—i lalo atu o le faasitepu ma pe 50 futu (15 mita) le mamao, o se va sa foliga mai e sili atu ona mamai i le taimi o le taumalulu.
Ona o au o se tagata sulufai, ma ona o lo’u iuleo faaSiamani Sasae, sa ula ai isi tamaiti ia te au ma faalili au ma fai o’u pona ou te matua tiga ai lava. Mai taimi uma o lo’u talavou, ou te talitonu o le taimi aupito sili lea ona faalotovaivai ai au.
O le taimi nei, i le fasefulu tausaga mulimuli ane ai, ua mfai ona tou toe manatua na aso ma le malamalama ua maua mai ai i le aafiaga. E ui lava ina o loo manatua pea le tiga ma le faanoanoa, ae ua mafai ona iloa atu nei le mea sa le mafai ona ou iloa i lena taimi: o se vaitau lena o le tuputupu a’e patino. O le taimi lena, sa fusia faatasi ai lo matou aiga. Sa ou matau ma aoao mai i o’u matua. Sa ou faamemelo i lo la naunautai ma le tumu i le faamoemoe. Na ou aoaoina mai ia te i la’ua e faapea o puapuaga, a taulimaina i le faatuatua, lototoa, ma le maua’i, e mafai ona manumalo mai ai.
I le iloaina o nisi o outou o loo feagai ma o outou lava vaitau o le atuatuvale ma le popole, ou te fia tautala atu i le asō e uiga i ni mataupu faavae taua se lua na lagolagoina ai au i lenei vaitau na aafia tele ai le atiina ae o lo’u olaga.
O le Mataupu Faavae Muamua: Galue
E oo mai i le asō, e matua faagaeetia lava au i le ala sa galulue ai lo’u aiga ina ua leiloloa a matou uma i le tuanai ai o le Taua Lona Lua a le Lalolagi! Ou te manatua lo’u tama—o se tagata faigaluega savili ona o le tulaga o le a’otauina ma le poto masani—sa ia faigaluega ai i ni galuega faigata e aofia ai le eli koale, e eli metale, enisinia, ma le aveloli. Sa usupo o ia ma e masani ona foi mai ua leva le po ina ia tausia lo matou aiga. Sa amata e lo’u tina se fale ta lavalava ma e le mafaitaulia itusa sa faigaluega ai o ia i le faiga o galuega mamafa. Sa ia faafaigaluegaina i ma’ua a lo’u tuafafine i lana pisinisi. O le i ai o la’u uila na avea ai au ma tautua e pikiina ma tiliva tagamea. Sa ou lagonaina le fiafia ona o le mafai ona ou fesoasoani i le aiga i sina itiiti, e ui lava ou te le iloaina i lena taimi, o le galuega faaletino na avea foi ma se faamanuiaga i lo’u ola maloloina.
Sa le i faigofie ae o le galulue na puipuia ai i matou mai le mafaufau tele i faigata o lo matou tulaga sa i ai. E ui i lei suia lo matou tulaga i se taimi vave, ae na suia lava. O le faamanuiaga lena o le galue. Afai tatou te onosai ai—mausali ma tumau ai—e mautinoa lava o le a faaleleia atili.
E ese loʻu faamemelo i alii, o tamaitai, ma tamaiti o e e iloa le ala e galulue ai! E maeu le alofa o le Alii i le tagata e galue! Na Ia fetalai, “E te ai foi au mea e ‘ai ma le afu o ou mata,”1 ma le “E tatau foi i lē galue lona taui.”2 Na Ia tuuina mai foi se folafolaga: “Sasau atu lau selesaito ma lou agaga atoa, ma ua faamagaloina oe i au agasala.”3 O i latou e le fefefe e galulue ma taulai atu i latou lava i le tulimata’ia o sini oaga, o se faamanuiaga lea i o latou aiga, nuu, malo ma le Ekalesia.
E le o faamoemoe mai le Alii ia tatou galulue malosi atu nai lo le mea tatou te mafaia. Na te le (ma e le tatau foi ia i tatou) ona faatusatusa a tatou taumafaiga i taumafaiga a isi. Pau lava le mea o loo finagalo ai lo tatou Tama Falelagi, o lo tatou faia lea o le mea sili tatou te mafaia—ia tatou galulue e tusa ma lo tatou malosi atoatoa, pe o le a lava le tele po o le itiiti foi e mafai ai.
O le galue o se vaifofo o le atuatuvale, o se uu nato mo le faanoanoa, ma o se faitotoa i avanoa. Po o a lava o tatou tulaga o i ai i le olaga, o’u uso pēlē, ia tatou faia le mea sili tatou te mafaia ma atina ae se igoa o le ta’uleleia i mea uma tatou te fai. Ia tatou faagauai atu o tatou mafaufau ma tino i le avanoa mamalu mo le galuega e tulai mai i aso fou taitasi.
A oo ina pa’ulia la tatou taavale tosolima i le palapala, o le a fesoasoani le Atua i le tagata e oso i fafo e tulei nai lo le tagata o le a na ona sii a’e lona leo i le tatalo—tusa lava po o le a le susua o faaupuga. Na faaupu faapea e Peresitene Thomas S. Monson: “E le lava le manao e faia se taumafaiga ma faapea o le a tatou faia se taumafaiga. … O le faia, ae le na o le mafaufau, e mafai ai ona ausia a tatou sini. Afai tatou te tolopoina pea lava pea a tatou sini, o le a tatou le vaai lava o faataunuuina.”4
E mafai ona faagaeetia ma faamalieina le galue, ae ia manatua le lataiga a le Alii ina ia aua nei “faaaluina … a outou galuega mo mea e le ma’ona ai.”5 Afai tatou te tuuto atu i tatou lava i le tulimataiga o oa o le lalolagi ma viiga o le lauiloa faalauaitele ae faatuatuanai ai o tatou aiga ma lo tatou tuputupu ae faaleagaga, o le a le pine ae o tatou iloaina ua tatou faia se fetuunaiga e leai se aoga. O le galuega amiotonu tatou te faia i totonu o puipui o o tatou aiga e aupito sili ona paia; o ona faamanuiaga e faavavau. E le mafai ona faamatuu atu i se isi. O le faavae o la tatou galuega o ni e tauaveina le perisitua.
Ia manatua, o i tatou ua na o ni tagata malaga mo sina taimi i lenei lalolagi. Aua tatou te tuuto atu a tatou taleni ma le malosi na to mai i le Atua mo le faatulagaina o taula faalelalolagi, ae tatou faaalu o tatou olaga e faatupulaia ai o tatou apaau faaleagaga. Aua, i le avea ai o ni atalii o le Atua Silisili Ese, sa foafoaina i tatou e felelei atu i tafailagi fou.
Ia, o se upu mo i tatou uso ua loa le soifua: o le litaea e le o se vaega o le fuafuaga a le Alii mo le fiafia. E leai se polokalama e malolo ai mo se vaitau ae totogi, pe litaea mai tiutetauave o le perisitua—tusa lava po o le a le matua po o le tulaga gafatia faaletino. E ui ina i ai le fasifuaitau, “na ou i ai na ou faia foi” atoanu e ono avaea o se ‘alofaga e aloese ai mai le faaseega i laupapa faasee, teena se valaaulia mo se tietiega uila, pe faapasi ai le kale feu i le taumafataga saoloto, ae le o se ‘alofaga e taliaina e ‘alo ai mai tiutetauave o le feagaiga, ia tuu atu o tatou taimi, o taleni, ma punao, i le galuega o le malo o le Atua.
Atonu o i ai i latou, ina ua mavae tausaga e tele o le tautua i le Ekalesia, ua talitonu ua ia te i latou le aia tatau mo se vaitau e malolo ai a o faia e isi le galuega. I se faaupuga lata mai, uso e, o lena ituaiga o mafaufauga e le tatau ai mo soo o Keriso. O se vaega tele o la tatou galuega i lenei fogaeleele, o le tumau ma le olioli e oo i le iuga—i aso uma o lo tatou ola.
O le taimi nei, o se upu foi i o tatou uso talavou o le Perisitua Mekisateko, o e o tulimataia sini amiotonu o le mauaina o se a’oga ma saili se toalua e faavavau. O ni sini sa’o na, ou uso e, ae manatua: o le galue ma le maelega i le tovine o le Alii o le a matua faateleina ai ma faalautele lou faitotoa mo le manuia i nei taumafaiga taua uma e lua.
Pe o oe o le tiakonoaupito laitiiti po o le faitaulaga sili e aupito matua, o loo i ai le galuega e fai!
O le Mataupu Faavae Lona Lua: Aoao
I le taimi faigata ina ua mavae le taua i Siamani, sa le tele ni avanoa mo a’oga e pei ona i ai i le taimi nei. Peitai, e ui lava ina utiuti avanoa, sa ou lagonaina lava e le aunoa se naunautaiga e aoao. Ou te manatua se tasi aso, a o alu i lau uila e tiliva le tagamea, sa ou ulufale atu i se fale o se tasi sa ma vasega. I se tasi o potu, sa i ai ni tamai kesi se lua sa faalagolago i le puipui. Oka se vaaiga ina a manaia! Matuai laki nei tamaiti e i ai a la’ua lava kesi! Sa mafai ona ou vaai faalemafaufau ia i la’ua o nonofo ai ma a la’ua lesona ma fai a la’ua meaaoga. Sa foliga mai ia te au, afai e i ai sa’u lava kesi, o se mea aupito sili lea ona manaia i le lalolagi.
Sa umi se taimi sa ou faatali ai faatoa taunuu lena moomooga. I ni tausaga mulimuli ane, sa maua sa’u galuega i se kamupani e faia sailiiliga, ma e i ai so latou faletusi tele lava. Ou te manatua le faaalu o le ele o o’u taimi avanoa i lena faletusi. O iina na mafai ai ona ou nofo i se kesi—na o a’u lava—ma inu i faamatalaga ma le poto na maua mai i na tusi. Oka so’u fiafia e faitau ma aoao! O aso na, sa ou muai malamalama ai i upu o se anaga e faapea: O le a’oga e le na o le faaputuputu o le malamalama, a o le faia o se mea i lena malamalama.
Mo tagata o le Ekalesia, ua le na o se manatu lelei—o se polokalama. E ao ona tatou aoao “i mea o i le lagi ma o i le lalolagi, ma o i lalo o le lalolagi; o mea sa i ai, o mea o i ai, o mea ua vave ona oo mai; o mea o loo i le atunuu, o mea o i isi atunuu.”6
Sa fiafia Iosefa Samita e aoao e ui lava ina sa itiiti ona avanoa mo a’oga aloaia. I ana api o talaaga, sa ia talanoa fiafia ai lava i aso na ia faaaluina e suesue ai, ma sa faatele ona ia ta’ua lona fiafia e aoao.7
Sa aoao atu e Iosefa i le Au Paia e faapea, o le atamai o se vaega e tatau a o la tatou malaga i le olaga nei, aua “e le televave atu ona laveaia o se tagata nai lo lona [ mauaina] o le atamai,”8 ma “o soo se mataupu faavae o le malamalama tatou te maua … i lenei olaga, o le a tu mai faatasi ma i tatou i le toetutu.”9 I taimi o faigata, e sili atu foi ona taua le aoao. Na aoao mai e le Perofeta o Iosefa, “O le atamai e aveeseina ai le pouliuli, [atuatuvale] ma le masalosalo; aua e le mafai ona i ai nei mea i le mea e i ai le atamai.”10
Uso e, ua ia te outou se o loo i ai so outou tiute e aoao ai le tele o mea e te mafaia. Faamolemole ia fautuaina o outou aiga, o tagata o a outou korama, tagata uma lava e aoao ma faaleleia atili o outou tulaga faaleaoaoga. Afai e le maua a’oga aloaia, aua nei e faatagaina lena mea e taofia ai oe mai le mauaina o le poto uma e mafai ona e maua. O na tulaga faapena, o tusi aupito sili, i se isi itu, e mafai ona avea ma au “iunivesite”—o se potuaoga e matala i taimi uma ma talia ai i latou uma e talosaga atu i ai. Taumafai e faateleina lou iloa i mea uma e “mama, matagofie, logoleleia, ma tauleleia.”11 Saili le atamai “e ala lava i le suesue ma le faatuatua foi.”12 Saili ma se agaga lotomaualalo ma e loto momomo.13 A e faaaogaina le itu faaleagaga o le faatuatua i lau suesuega—e oo lava i mea faaleolaga nei—e mafai ona e faateleina lou malosi faalemafaufau, aua “afai e tau tasi o outou mata i le mamalu o le [Atua], o le a faatumulia lou [tino] atoa i le malamalama, … ma [e malamalama] i mea uma.”14
I a tatou aoaoga, aua nei o tatou tuulafoaia le puna o faaaliga. O tusitusiga paia ma afioga a aposetolo ma perofeta o ona po nei, o punavai ia o le poto, atamai faalelagi, ma faaaliga patino e fesoasoani ia i tatou ia maua ai tali i luitau uma o le olaga. Tatou aoao ia Keriso; tatou saili atu i lena atamai lea e tau atu i le filemu, upumoni, ma mealilo atoa o le faavavau.15
Faaiuga
Uso e, ou te toe mafaufau i lena tamaitiiti e 11 tausaga i Frankfurt, Siamani, o le sa popole i lona lumanai ma sa lagonaina le tiga tele o upu agaleaga. Ou te manatua lea taimi ma sina lagona faanoanoa. E ui ina ou le manatua e toe fafagu mai na aso o faigata ma fita, ae e itiiti lava si o’u faaletonu e faapea, o lesona sa ou aoaoina, o se sauniuniga tatau lea mo le avanoa i le lumanai. I le taimi nei, ua tele tausaga ua tuanai ai, ua ou iloa lenei mea ma le mautinoa: o le tele o taimi i tofotofoga o puapuaga, tatou te aoao mai ai lesona e aupito sili ona taua e faafoliga ai a tatou amio, ma faatulaga lo tatou taunuuga.
Ou te tatalo, o masina ma tausaga o le aoo mai, o le a mafai ai ona tatou faatutumuina o tatou itula ma aso i galuega amiotonu. Ou te tatalo o le a tatou saili e aoao ma faaleleia atili o tatou mafaufau ma loto e ala i le matuai feinu mai punavai manino o le upumoni. Ou te tuuina atu o’u alofaaga ma faamanuiaga i le suafa o Iesu Keriso, amene.