Hat blong Ol Pikinini Bae I Tanem

David A. Bednar

Blong Kworom blong Olgeta Twelef Aposol

Mi invaetem evri yang pipol blong Jos blong lanem abaot mo eksperiensem Spirit blong Elaeja.

Taem yumi stadi, lanem, mo laef folem gospel blong Jisas Kraes, oda blong ol samting i givim tijing. Eksampol, tingting long ol lesen we yumi lanem abaot ol fasfala impoten samting long saed blong spirit folem oda blong ol bigfala samting we oli bin hapen taem gospel blong Sevya i bin kambak fulwan long ol las dei ia.

Insaed long Tabu bus ia, Josef Smit i bin luk mo i bin toktok wetem Papa we I No Save Finis mo Jisas Kraes. Long medel blong ol narafala samting, Josef i bin lanem abaot tru bodi blong Godhed mo abaot revelesen we i stap gohed. Naesfala visen i tekem i kam long taem blong “dispensesen blong taem blong evri wok blong God i kamtru” (Efesas 1:10) mo hem i wan long ol impoten taem long histri blong wol.

Kolosap tri yia afta, ansa blong wan strong prea i kamtru long aftenun blong 21 Septemba 1823, rum blong Josef i fulap wetem laet we i “bitim medeldei” (Josef Smit—Histri 1:30). Wan man i kamkamaot long saed blong bed blong hem, i singaotem yangfala boe ia long nem blong hem, mo i talemaot se: “hem i wan mesenja we God i bin sendem hem i aot long fes blong hem i kam long hem, … mo se nem blong hem i Moronae.” (ves 33). Hem i givim ol instraksen abaot Buk blong Momon we bae i kamaot. Mo afta, Moronae i bin kwotem Buk blong Malakae long OlTesteman, wetem smol jenis long fasin blong toktok insaed long King Jemes vesen:

“Luk, bae mi soemaot Prishud long yu, tru long han blong profet ia, Elaeja, bifo long bigfala dei blong Lod we man bae i fraet long hem.

“… Mo bae hem i planem insaed long hat blong ol pikinini, ol promes we Lod i bin mekem long ol papa, mo hat blong ol pikinini bae i tanem i go long ol papa blong olgeta. Sapos i no hapen olsem, bae Lod i spolem gud ful wol ia long taem we bae hem i kam” (ves 38, 39).

Ol las instraksen blong Moronae i go long yang profet i gat tu stamba mesej: (1) Buk blong Momon (2) ol toktok blong Malakae we i stap tokbaot wok blong Elaeja long Restoresen se “olgeta samting oli kam niuwan bakegen, olsem we God i talemaot finis long ol tok blong ol tabu profet blong hem bifo” (Wok 3:21). From hemia, ol samting we oli hapen long stat blong Restoresen ia oli soem wan tru save abaot Godhed, oli tokbaot olsem wanem Buk blong Momon i impoten, mo oli talemaot wok blong fasin blong sevem man mo fasin blong kam olsem wan god, blong olgeta we oli laef mo ded. Naesfala oda ia hem i givim infomesen abaot ol samting long saed blong spirit we oli impoten long Hae God.

Mesej blong mi i lukluk moa long seves mo Spirit blong Elaeja we Moronae i bin luk finis long ol fas instraksen blong hem i go long Josef Smit. Mi prea wetem ful hat blong mi from help blong Tabu Spirit.

Seves blong Elaeja

Elaeja hem i wan profet long OlTesteman we tru long hem ol bigfala merikel oli bin hapen. Hem i bin silim ol heven, mo i no gat ren i bin foldaon long Isrel blong bifo blong 3½ yia. Hem i mekem we flaoa long besin mo oel long botel blong wido ia i plante. Hem i mekem wan yangfala boe i girap bakegen long ded, mo hem i bin askem God blong sendem faea long heven i kamdaon blong jalenjem ol profet blong Bal. (Luk long 1 King 17–18.) Long en blong seves blong Elaeja long wol ia, “wael win i kam tekemaot hem i go antap long heven” (2 King 2:11) mo hem i no testem ded.

“Yumi lan aot long lata dei revelesen se Elaeja i bin holem siling paoa blong Melkesedek Prishud, mo i bin las profet blong holem bifo taem blong Jisas Kraes” (Bible Dictionary, “Elijah”). Profet Josef Smit i eksplenem olsem: “Spirit, paoa mo koling blong Elaeja, hem i we, yu gat paoa blong holem ki … blong ful wok blong Melkesedek Prishud … ; mo blong … kasem … evri odinens we oli blong kingdom blong God” (Teachings of Presidents of the Church: Joseph Smith [2007], 311; oli ademap italik). Tabu atoriti blong siling ia hem impoten blong ol prishud odinens oli laef, mo i stap joenem man, tugeta long wol mo long heven.

Elaeja i bin kamaot long Moses long hil we Jisas i bin jenis i kam narafala (luk long Matiu 17:3) mo i bin givim atoriti ia i go long Pita, Jemes, mo Jon. Elaeja i bin kamaot tu long Moses mo ol narawan long namba 3 Epril 1836, long Ketlan Tempol, mo i bin givim ol semfala prishud ki ia long Josef Smit mo Oliva Kaodri.

Skripja i rekodem se profet Elaeja i bin stanap long fored blong Josef mo Oliva mo talem:

Luk, taem i kam fulwan, we maot blong Malakae i bin tokbaot—we i testifae se hem [Elaeja] bae Lod i sendem hem, bifo long bigfala dei blong Lod we man bae i fraet long hem i kam—

Blong tanem hat blong ol papa i go long ol pikinini, mo hat blong ol pikinini i go long ol papa, nogud bae mi kilim ful wol ia wetem wan strong nogud tok—

From hemia, Lod i givim ol ki blong dispensesen ia i go long ol han blong yutufala; mo tru long ol ki ia, bae yutufala i save se bigfala dei blong Lod we man bae i fraet long hem i stap kolosap, i stap long ol doa. (D&K 110:14–16).

I nidim blong Elaeja i putumbak siling atoriti long 1836, blong mekem wol ia i rere from seken kaming blong Sevya, mo i statem fasin blong man i intres bigwan long wok blong lukaotem famli histri, raon long wol.

Spirit Ia mo Wok blong Elaeja

Profet Josef Smit i bin tijim : “Wok we i moa bigwan we God i givim long yumi long wol ia i blong lukaotem olgeta dedman blong yumi. … Hem i nid se siling paoa i stap long han blong yumi blong silim ol pikinini blong yumi mo ol ded blong yumi blong dispensesen blong taem blong evri wok blong God i kamtru—wan dispensesen blong mitim ol promes we Jisas Kraes i bin mekem bifo Hem i krietem wol ia blong sevem man. … Afta, God i talem: ‘Bae mi sendem long yufala profet Elaeja’” (Teachings: Joseph Smith, 475).

Josef i eksplenem se:

?Be wanem nao hem i stamba tingting blong [Elaeja i kam]? o ?olsem wanem nao bae wok ia i kam tru? Ol ki bae oli kam, spirit blong Elaeja bae i kam, bae oli stanemap Gospel, Ol Sent bae oli kam olsem ol sevya long Hil ia Saeon [luk long Obadaea 1:21].

?Olsem wanem nao bae oli stap olsem ol sevya long hil ia, Saeon? Tru long ol tempol blong olgeta … mo go aot mo kasem evri odinens … blong olgeta famli we oli ded … ; mo long hemia jen ia we i joenem ol hat blong ol papa i go long ol pikinini, mo ol pikinini i go long ol papa, we i mekem misin blong Elaeja i kam tru (Teachings: Joseph Smith, 472–73).

Elda Russell M. Nelson i bin tijim se spirit blong Elaeja i rod ia we Tabu Spirit i testifae abaot stret tabu fasin blong famli (“A New Harvest Time,” Ensign, May 1998, 34). Spesel paoa blong Tabu Spirit ia we i pulum ol man blong oli kam blong faenem, sevem rekod, mo lavem ol bubu mo ol famli memba—tugeta olgeta blong bifo mo tedei.

Spirit blong Elaeja i tajem ol pipol insaed mo aotsaed long Jos. Olsem ol memba blong Jos we i kambak, we i blong Kraes, yumi gat wan responsabiliti ia we i kam tru long kavenan, blong lukaotem ol bubu blong yumi mo mekem i posibol long olgeta blong kasem ol odinens blong gospel blong sevem man. Sapos i no gat yumi, oli no save kam stret gud evriwan. (Hibrus 11:40; luk tu long Teachings: Joseph Smith, 475). Mo semmak “yumi, sapos i no gat olgeta dedman blong yumi, bae yumi no save kam stret evriwan” (D&K 128:15).

From ol risen ia yumi mekem famli histri wok, bildim ol tempol, mo mekem ol odinens long bihaf blong olgeta. From ol risen ia Elaeja i bin kambak blong putumbak fulwan atoriti blong siling we i joenem man, tugeta long wol mo long heven. Yumi ol wokman blong Lod long wok ia blong mekem wok blong fasin blong sevem man mo fasin blong kam olsem wan god, we bae i stopem “Hem [blong] kilim ful wol ia wetem wan strong nogud tok” (D&K 110:15) taem bae Hem i kambak. Hem i diuti blong yumi mo i bigfala blesing.

Wan invitesen long Jeneresen we I Stap Kam Antap

Mi stap naoia invaetem ol yang woman, ol yang man, mo ol pikinini blong jeneresen we i stap kam antap blong lisin gud taem mi tokbaot hamas i impoten blong gat Spirit blong Elaeja long laef blong yufala tedei. Mesej blong mi, hem i blong ful jos—be moa long yufala ol yangfala.

Plante long yufala i tekem se famli histri wok hem i wok blong ol bigfala man nomo. Be mi no save long wan yia long ol skripja o long ol gaedlaen we ol Jos lida oli anaonsem se impoten seves ia i blong ol bigfala man nomo. Yu yu pikinini boe mo gel blong God, ol pikinini blong kavenan, mo ol man blong bildim kingdom. Yu no wet blong yu kasem wan yia we yu ting se i stret blong mekem responsabiliti blong yu blong help long wok blong fasin blong sevem man blong ful famli blong yumi man.

Lod i mekem i stap finis long taem blong yumi tedei ol risos we bae oli helpem yu blong lanem abaot mo lavem wok ia we Spirit blong Elaeja i statem. Eksampol, FamilySearch hem i wan grup blong ol rekod, ol risos, mo ol seves we yu save kasem isi nomo wetem ol kompiuta blong yu mo wan kaen teknoloji, we oli mekem blong helpem pipol blong faenemaot mo rekodem wok blong famli histri. Ol risos ia oli stap tu long ol famli histri senta we oli stap long plante long ol Jos bilding blong yumi raon long wol.

I no wan mistek we FamilySearch mo ol narafala tul oli bin kam tru long wan taem we ol yang pipol oli kam blong save gud long plante kaen teknoloji blong infomesen mo komunikesen. Ol fingga blong yu oli bin tren blong teks long fon mo kompiuta blong muv kwik mo fulumap wol long wok ia blong Lod—i no blong toktok kwik nomo wetem ol fren. Ol skil mo talen we plante long yufala ol yang pipol tedei i gat, oli kam olsem wan wei blong rere blong givhan long wok blong fasin blong sevem man.

Mi invaetem evri yang pipol blong Jos blong lanem abaot, mo eksperiensem Spirit blong Elaeja. Mi leftemap tingting blong yufala blong stadi, blong lukaotem ol bubu blong yufala, mo blong mekem yufala i rere blong mekem ol proksi baptaes insaed long haos blong Lod, blong olgeta ded famli blong yufala (luk long D&K 124:28–36). Mi askem yufala blong helpem ol narafala pipol blong faenem ol famli histri blong olgeta.

Taem yufala i mekem folem invitesen ia long fet, ol hat blong yufala bae i tanem i go long ol papa. Promes we i blong Abraham, Aesak, mo Jekob bae stap insaed long ol hat blong yufala. Petriakel blesing blong yu, wetem toktok we i talemaot laen blong yu, bae i joenem yu wetem olgeta papa mo bae i gat moa mining long yu. Lav mo tangkyu blong yu long ol bubu blong yu bae i gro. Testemoni blong yu mo fasin blong jenisim laef i kam long Sevya i kam moa strong mo moa stret. Mi promesem yu se bae yu gat proteksen agensem paoa blong enemi we i stap kam bigwan moa. Taem yu tekpat long, mo lavem tabu wok ia, bae yu stap sef olsem wan yut mo truaot long laef blong yu.”

Ol papa mo mama mo ol lida, plis helpem ol pikinini blong yufala mo yut blong lanem abaot mo eksperiensem Spirit blong Elaeja. Be no mekem program ia i stap semmak oltaem o no givim tumas infomesen o trening. Invaetem ol yang pipol blong lukaotem, eksperiensem, mo lanem blong olgetawan (luk long Josef Smit—Histri 1:20). Eni yangfala i save mekem wanem we mi stap talem ia, tru long ol aktiviti blong lan we oli stap long lds.org/familyhistoryyouth. Aronik Prishud kworom mo Ol Yang Woman klas presidensi oli save mekem impoten wok ia blong helpem ol yut blong save gud olsem wanem blong yusum ol simpol risos ia. Ol yang pipol oli nidim blong kam antap gud long fasin blong lan, blong oli tekem aksen mo afta kasem moa laet mo save tru long paoa blong Tabu Spirit—mo no wet blong samting i tekem aksen long olgeta (luk long seken Nifae 2:26).

Ol papa mo mama mo ol yut lida, bae yufala i sapraes we ol pikinini mo ol yut blong yufala oli kam blong kasem kwiktaem nomo olsem wanem blong yusum ol tul ia. I tru se bae yufala i kam blong lanem ol impoten lesen aot long ol yang pipol ia long wei blong yusum gud ol risos ia Ol yut oli save helpem olgeta bigfala man we oli no save yusum o oli fraet blong yusum teknoloji o oli no save hao blong go long FamilySearch. Yu tu, bae yu kaontem plante blesing taem ol yang pipol ol givim plante taem long wok blong famli histri mo seves long tempol, mo smol taem nomo long ol gem long vidio, lukluk long intanet, mo stap go long Facebook.

Troy Jackson, Jaren Hop, mo Andrew Allan oli holem Aronik Prishud mo bisop blong olgeta i putum olgeta tugeta olsem wan tim blong tijim famli histri klas long wod blong olgeta. Olgeta yangfala boe ia oli pikja blong plante long yufala we oli bin gat hat blong lan mo wantem tumas blong givim seves.

Troy i talem se: “Mi bin stap kam long jos mo sidaon i stap nomo, be naoia, mi luksave se mi nid blong go long haos blong mekem wan samting. Yumi evriwan i save mekem famli histri wok.”

Jaren i bin ripotem se taem hem i stap lanem moa abaot famli histri, hem i faenemaot “se hemia i no ol nem nomo ia be oli ol nem blong ol ril pipol. Mi bin glad moa blong tekem ol nem ia i go long tempol.”

Mo Andrew i talem se: “Mi interes long famli histri wetem wan lav mo paoa we mi no bin save se mi bin gat. Taem mi stap rere evri wik blong tij, mi kasem revelesen we i kam long Tabu Spirit blong mekem mo traem sam wei we mi stap tijim long klas. Bifo famli histri i bin wan samting we i mekem mi fraet. Be tru long help blong Spirit mi bin save wok folem koling blong mi mo helpem plante pipol long wod blong mifala”

Ol yang brata mo sista we mi lavem tumas, famli histri i no wan simpol mo interesting program o aktiviti we Jos i sapotem; be, hem i wan impoten pat blong wok blong fasin blong sevem man mo fasin blong kam olsem wan god. Oli bin rere long yufala from dei ia blong bildimap kingdom blong God. Yu yu stap long wol ia naoia blong help long naesfala wok ia.

Mi testifae se Elaeja i bin kambak long wol ia finis mo putumbak fulwan tabu siling atoriti. Mi witnes we wanem we yu joenem long wol ia, bae i joen long heven. Mo mi save se ol yut blong jeneresen we i stap kam antap oli gat wan impoten pat long wok ia blong kasem bigfala gol ia. Mi testifae olsem long tabu nem blong Lod Jisas Kraes, amen.