Olsem Wanem Wan Nem I Impoten

M. Russell Ballard

Blong Kworom blong Olgeta Twelef Aposol

Bambae yumi mekem i kam olsem wan fasin … blong stap mekem i klia se Jos blong Jisas Kraes blong Ol Lata-dei Sent, i nem ia we Lod Hemwan i daerektem blong oli save yumi long hem.

Elda Hales, long bihaf blong mifala evriwan, mifala stap talemaot dip lav blong mifala mo glad we yu stap wetem mifala long ples ia, long moning ia.

Long las Epril jeneral konfrens, maen blong mi i no stop blong tingting long topik ia, olsem wanem wan nem i impoten. Long ol manis we i jes pas, sam apu-pikinini oli bon insaed long famli blong mifala. Nomata we oli kam kwik moa bitim we mi save kipim trak long hem, wanwan long ol pikinini ia oli welkam insaed long famli blong mifala. Wanwan long olgeta oli kasem wan spesel nem we papa mo mama blong olgeta i jusum mo nem ia bae evriwan bae oli save long hem truaot long laef blong hem, mo nem ia nao ba i mekem hem i defren long ol narawan. Hemia i tru long evri famli, mo i tru tu long medel blong ol relijin long wol.

Lod Jisas Kraes i bin save olsem i impoten blong mekem i klia nem blong Jos blong Hem long ol las dei ia. Insaed long seksen 115 long Doktrin mo Ol Kavenan, Sevya Hemwan i talem: “Bae olsem ia nao oli mas singaotem jos blong mi long ol las dei, we i Jos blong Jisas Kraes blong Ol Lata-dei Sent(ves 4).

Mo King Benjamin i bin tijim ol pipol blong hem long ol taem blong Buk blong Momon:

Mi wantem se yufala i tekem long yufala nem blong Kraes, yufala evriwan we i bin mekem kavenan ia wetem God se bae yufala i obei kasem en blong ol laef blong yufala. …

Mo mi wantem se yufala i tingbaot tu, se hemia nem we mi bin talem se bae mi givim long yufala we bae oli no save tekemaot, be tru long brekem loa nomo; taswe, meksua se yufala i no brekem loa, blong mekem se nem ia i no lus long ol hat blong yufala. (Mosaea 5:8, 11).

Yumi tekem nem blong Kraes long yumi insaed long wota blong baptaes. Yumi riniu jenis ia we i hapen long baptaes blong yumi k taem yumi tekem mo kakae sakramen evri wik, blong talem se yumi rere gud blong tekem nem blong Hem long yumi mo blong promes blong oltaem tingbaot Hem (luk long D&C 20:77, 79).

?Yumi stap luksave blesing ia blong tekem nem blong Wan Pikinini ia nomo blong God we I lavem tumas? ? Yumi save andastanem olsem wanem hemia i impoten? Nem blong Sevya i nem ia nomo long wol we man i save sef long hem (luk long 2 Nifae 31:21).

Bae yu tingbaot Presiden Boyd K. Packer i bin toktok raon long olsem wanem nem blong Jos i impoten, long las Epril jeneral konfrens. Hem i eksplenem se “blong stap obei long revelesen, yumi stap singaotem yumi wanwan Jos blong Jisas Kraes blong Ol Lata-dei Sent be i no Momon Jos” (“Guided by the Holy Spirit,” Liahona mo Ensign, May 2011, 30).

From se evri nem blong Jos i impoten tumas, bae mi ripitim ol revelesen long ol skripja, ol instraksen blong Fas Presidensi long ol leta blong 1982 mo 2001, ol nara toktok blong ol aposol we oli bin leftemap tingting blong ol memba blong Jos holem antap mo tijim long wol se Jos oli save tru long nem blong Lod Jisas Kraes. Hem i nem ia we bae Lod i singaotem yu long hem long las dei. Hem i nem ia we bae i soem se Jos blong Hem i defren long ol nara jos.

Mi bin stap tingbaot plante taem se from wanem Sevya i bin givim naen sentens long nem blong Jos blong Hem we i bin kambak. Nem ia i long be, sapos yumi tingting long hem olsem se nem ia nao i tokbaot evri samting long wanem nao Jos ia, i kam naes mo i talem stret. ?Olsem wanem nao wan samting we i yumi tokbaot long wan stret toktok mo i klia be yet oli talem smol toktok nomo blong tokbaot?

Evri toktok long nem ia oli klia mo oli impoten. Toktok ia Ia i poenemaot wan samting we i olsem wanem Jos i difren long ol nara jos raon long wol.

Ol toktok ia Jos blong Jisas Kraes i talemaot se i Jos blong Hem. Long Buk blong Momon, Jisas i tijim: “?Mo hao nao hem i jos blong mi sapos oli no singaotem hem long nem blong mi? From sapos oli singaotem wan jos long nem blong Moses, ale, hem i jos blong Moses; o sapos oli singaotem hem long nem blong wan man, ale, hem i jos blong wan man; be sapos oli singaotem jos long nem blong mi, ale, hem i jos blong mi, sapos oli bildimap folem gospel blong mi.”3 Nifae 27:8

Blong Ol Lata-dei i eksplenem se hem i sem Jos olsem Jos we Jisas Kraes i bin stanemap taem Hem i bin stap long wol, be long ol las dei ia, jos ia i bin kambak bakegen. Yumi save se i bin gat wan foldaon o wan apostasi, blong mekem se bae i mas nid blong gat wan Restoresen blong tru mo ful Jos blong Hem long taem blong yumi.

Ol Sent i minim se ol memba blong Jos i folem Hem mo traehad blong mekem tingting blong Hem, holem ol komanmen blong Hem, mo rere wan moa taem blong laef wetem Hem mo Papa blong yumi long Heven long fiuja. Sent i minim nomo se olgeta we oli lukaotem blong mekem laef blong olgeta i kam tabu tru long ol kavenan we oli mekem blong folem Kraes.

Nem ia Sevya we oli bin givim long Jos blong Hem, i talemaot long yumi stret se huia yumi mo wanem yumi biliv long hem. Yumi biliv se Jisas Kraes i Sevya mo Ridima blong wol. Hem i pemaot praes blong evriwan we oli wantem sakem sin blong olgeta, mo Hem i brekem ol rop blong ded mo mekem wan wei blong i gat laef bakegen long ded. Yumi folem Jisas Kraes Olsem we King Benjamin i bin talem long ol pipol blong hem, so mi stap talem bakegen long yufala tedei: “Yufala i tingbaot blong holem nem mo raetem oltaem long ol hat blong yufala” (Mosaea 5:12).

Oli bin askem yumi blong stanap olsem ol witnes blong Hem long evri taem mo long evri samting, mo long evri ples” (Mosaea 18:9 Hemia i minim se bae yumi mas wantem blong mekem evriwan i save se huia nao yumi stap folem mo Jos blong huia nao yumi stap long hem: Jos blong Jisas Kraes. Bae yumi wantem blong mekem hemia wetem spirit blong lav mo testemoni. Yumi wantem blong folem Sevya, taem yumi mekem i simpol mo i klia wetem tingting we i stap daon se yumi ol memba blong Jos blong Hem. Yumi folem Hem taem yumi stap olsem Ol Lata- dei Sent— ol disaepol blong lata-dei.

Ol pipol mo ol oganaesesen, plante taem ol nara man nao oli stap givim ol sot sot nem blong olgeta Wan sot nem i save stap olsem wan nem we oli mekem i kam sot, o oli mekemap afta we wan samting i tekem ples o sam samting we i hapen long bodi o tru long wanwan fasin blong wan. Ol sot nem ia oli no gat mining o impoten olsem ol stret nem, oli save yusum gud olgeta.

Tugeta Jos blong Lod long ol taem bifo mo ol taem tedei, i bin gat ol sot nem. Ol Sent long taem blong Niu Testeman oli bin singaotem olgeta Ol Kristin from se oli gat wan biliv long Jisas Kraes. Nem ia fastaem ol man we oli givim nem ia long olgeta oli yusum blong daonem tingting blong olgeta, be naoia i nem ia blong mekem olgeta i defdefren long ol narawan; mo i wan ona blong singaotem olgeta wan Kristian Jos.

Oli singaotem ol memba blong yumi, Ol Momon, from se yumi biliv long Buk blong Momon: Wan Narafala Testeman blong Jisas Kraes. Ol narawan oli save traem blong yusum toktok ia Momon i go moa raon long wol blong tekem mo talem i go long olgeta we oli bin lego Jos mo statem ol defren smolsmol grup. Hemia i mekem man i konfius . Mifala i glad long wanem we media i bin mekem blong stopem blong yusum toktok ia Momon long wan wei we ba i save mekem pablik i konfius wetem Poligami mo ol nara smolsmol grup blong ol jos. Bae mi talemaot i klia se bae i no gat wan Poligami grup, mo tu olgeta we oli stap singaotem olgeta ol smol grup blong ol Momon o eni risal blong nem blong yumi, i gat eni bisnis wetem Jos blong Jisas Kraes blong Ol Lata-dei Sent.

Nomata we Momon i no ful mo stret nem blong Jos, mo nomata nem ia i kamaot faswan long ol man we oli agensem Jos long eli taem blong jos, nem ia oli kam blong akseptem olsem wan sot nem blong jos taem oli stap tokbaot ol memba blong jos Yumi no nid blong stop blong yusum nem ia Momon long taem we i stret blong yusum,be gohed blong stap tokbaot mining blong ful nem mo stret nem blong Jos. Long ol nara toktok, yumi mas stopem mo nomo yusum toktok ia “Momon Jos.”

Truaot long ol yia taem mi stap mekem ol wok blong mi raon long wol, plante taem oli stap askem mi sapos mi blong Momon Jos. Oltaem ansa blong mi i bin, “Mi mi wan memba blong Jos blong Jisas Kraes blong Ol Lata-dei Sent. From se yumi biliv long Buk blong Momon, we i nem ia blong wan olfala profet-lida blong Amerika mo we i wan nara testeman blong Jisas Kraes, samtaem oli stap singaotem yumi ol Momon. Long evri taem, ansa ia, man i akseptem mo i openem ol janis blong mi eksplenem abaot restoresen blong ful gospel long ol las dei ia.Long ol kaen taem olsem, ol ansa blong yumi long olgeta i klia mo oli akseptem long wan gud wei mo i tru i bin openem ol janis blong mi blong save eksplenem Restoresen mo gospel we i fulwan long ol las dei ia.

Ol brata mo sista, tingting long wanem jenis nao bae yumi save mekem long laef blong wan narawan taem yumi givim ol simpol ansa, taem yumi yusum ful nem blong Jos olsem we Lod i bin talem blong yumi mas mekem. Mo sapos yu no save yusum ful nem, talem: “Mi blong Jos blong Jisas Kraes” mo afta jes eksplenem “blong Ol Lata-dei Sent.”

Sam bae oli askem se, ?be olsem long ol Intanet websaet olsem Mormon.org mo tu ol defren saen blong Jos long media? Olsem we mi bin talem, blong singaotem ol memba olsem ol Momon samtaem, i stret. Olsem wan praktis, olgeta aotsaed long biliv blong yumi, oli stap lukaotem yumi long intanet tru long nem ia nao. Be taem yu openem Mormon.org, bae stret nem blong Jos bae oli eksplenem long hom pej mo tu ba i kamaot long evri narafala pej. Plante long ol pipol oli no yus blong stap prestem ful nem blong Jos, taem oli stap wantem faenem yumi long websaet blong yumi long intanet.

Praktis ia bae i stap gohed be i no minim se ol memba bae oli stop blong yusum ful nem blong Jos taem i gat nid. Bae yumi mekem i kam wan fasin insaed long ol famli blong yumi, ol Jos aktiviti mo ol evri dei aksen blong yumi blong stap mekem i klia se Jos blong Jisas Kraes blong Ol Lata-dei Sent i nem we Lod Hemwan i daerektem se ba oli save yumi long hem.

Wan tingting we i jes kamaot long wan intaviu se plante pipol oli no andastanem stret se Momon i minim ol memba blong Jos. Mo plante we plante pipol oli no save se ol Momon oli ol kristian. No mata oli ridim abaot ol help wok blong yumi truaot long wol we Jos i stap givim long taem blong ol saeklon, graon i muvmuv, bigfala ren mo wota i fulap, mo long ol taem blong hanggri, ol no joen wetem yumaniterian help wetem yumi olsem wan kristian oganaesesen. I tru bae i moa isi blong olgeta blong andastanem se yumi biliv long mo folem Sevya sapos yumi talem se yumi ol memba blong Jos blong Jisas Kraes blong Ol Lata-dei Sent. Long wei ia, olgeta we oli harem nem ia Momon bae oli joenem toktok ia wetem nem we oli bin talemaot mo wetem ol pipol we oli folem Jisas Kraes.

Olsem Fas Presidensi i bin askem insaed long leta blong olgeta blong 23 Febwari, 2001: Blong yusum nem we Lod i bin talemaot, Jos blong Jisas Kraes blong Ol Lata-dei Sent …, i impoten tumas long responsabiliti blong yumi blong talemaot nem blong Sevya truaot long ful wol. Long sem wei, mifala stap askem long yufala se blong tokbaot Jos yumi yusum ful nem long eni ples, taem i nid blong talem.

Long Oktoba jeneral konfrens, Presiden George Albert Smith i bin talem, “brata mo sista, taem bae yufala go longwe long ples ia, bae yufala i save joen wetem ol defren jos blong wol, be tingbaot se i gat wan Jos long ful wol ia we tru long tabu toktok i karem nem blong Jisas Kraes, Lod blong yumi” (long Konfrens Ripot, Okt. 1948, 167).

Ol brata mo sista bae yumi tingbaot hemia tu taem bae yumi lego konfrens ia tedei. Bambae oli harem ol testemoni blong yumi long Hem mo lav blong yumi long Hem bae i stap oltaem long hat blong yumi, mi prea wetem wan tingting we i stap daon long nem blong Hem, Lod Jisas Kraes, amen.