Moker ra Remisionari! Te Sebecherir el Ngosukau!
Mlara Elder Russell M. Nelson
Er a Chelechad er a Teruich ma Terung el Apostol
A rokui el misionari, a remekekerei ma remeklou, a mesiou el di oureng er sil di mo ungil ra rechad.
Kemiu el betik er a renguk el odam, rudos, ma resechelik, aki mo odars a beltikelreng el mlar kemam el lekor kemiu. Ng dmeu a rengud el lobengkel a chetengakel el President Thomas S. Monson a uluchais er kid er tia el tutau, el mo meruul e kongei el kirel a rekrir a re mo misionari el mo mesiou el mo ngar ra 18 el mo ra remekekerei el sechal e 19 el mo ra rengeask el redil. Ngoukiu tial uldasu, eng mo betok ra rengeasek el mo mukngeltengat e mo dmeu a rengrir sel lo siou.
Eru el rak a kot ma klisiich a ual liluut a President Monson el melkoi er elecha el tutau el kmo “tirke el rokui el klikiid, e sebechir el rengeask el sechal a kmal kirir el mengetmokl er tir el mo mesiou. Missionari lureour a urerir a re priesthood—e ureour el Rubak a ultuiil er kid el mla meskiid a kmal betok.”1 E lemult el tang, ng uluchais el kirir a reteru el mekekerei el lodos, a mission a ungil uldasu, eng di ng diak el ngercheled. Ma lemuut el tang ng mengemedaol er tir ke el meklunga el bechil el direk el mo mesiou.
A omerech ma omengetmokl el mo mesiou a klou a ultutelel. A mission a tar ra rolel el mesiou ra Rubak ma rechad. Ngesuil a remissionari ma ike el di ududir ra bedengir. Chad er a blai, telungalek, sechelei, ma re kuk di olengeseu el kirel tia el General Missionary Fund a direk el kmal sebecherir el longeseu. A rokui el missionaries, remekerei ma remeklou, a mesiou loba kllou el reng el mo meruul ra mo ungil el klengar el mo ra rechad.
A reng malechub eng telbiil el mo mesiou a ngosukii a remisonari el lomelemii a klemisonari, ngii ma lechub eng bechil, mar telcheroll el mei. A reng er tir el sorir el mo mesiou, a ngar ra klikiid, el omengetmeklel a ungil teletael.
Ngara beluulechad el meliuekel er kid, ng locha betok er kemiu a diak kom chad ra Ikelesia ra Jesus Kiristo ra Uriul-klebesei el Santo e di medengelii e kmal di kekerei el kirir a remisionari. Kau ke locha orrenges ma lechub e komes ra General Conference eleng soam el mo medengei el kirel a Mormons, ma locha ngera lolsisechakl tirkal misionari. Sel me mosuub el kiram, e kau a mo metik el kmo kede kmal betok a osisiu el kired. A ki mengesuseu er kau el mo oltirakl e molemolem el ngar ra ungil ma klemerang, e momes el kmo ng sebecham el lemuut el dochel a bebil. Ngar tial beluulechad el ngii a mui ra ringel, kede ousbech a ngeso er chelecha el mong e mei. Klechelid, diak a ulebengelel el klemerang, ma remisionari er kemam a ngar ngii a ultutelir el sebechel ngosukid.
Tirka el misionari a mo mechei skuul, ureoor, klausechelei ma ikel ngii a remekekerei el chad a meruul ra chelsel a klengar tir ra uai chelechal taem. Er a teruich ma eai el mo ra lluich ma eua el buil, te kmal di momechei a rokui el kora meringel el ngerchelir eleng kmal klou e dmolech sel ngar ra rengrir a mo mesiou ra Rubak.2 Ea rebebil ra remsionari a mesiou el mo mesiou sel kmal kora meklungal chad. Ak medengei el kmo a telungalek er tir a mukngeltengat. Chelsel a telungalek er kemam, e te teiai el chad ra chelsel a telungalek er ngak a mlo mesiou—tedei el ngelkek el redil, ma rebecherir, chimo el ngelkel a ngelkek el redil, ma chimo el ngelkel a ngelkek el sechal.
Ng locha betook er kemiu a omededenger el kirel a ngakl el Mormon. Ng direk el kora kedeb el ngakl el rechad a ousbech el lomekedong er kid. Ng diak el meral ngkled, eng di a rechad a medengelkid el Mormons. Tial tekoi a mengai ra chedaol llechukl el dodengelii el Babier ra Mormon.
A kmerang el ngklel a Ikelesia a Ikelesia ra Jesus Kristo ra Uriul-klebesei el Santo. El ngii a mla llemuut el mo dechor el Ikelesia ra Jesus Kristo. Se ra dirk lechad er tial beluulechad, e Ngii a milkdebechii a Ikelesia er Ngii. Ng ulemekedong ra re Apostol, Seventies, ma rebebil ra remerreder el Ngii a milsterir a ngerachel ra priesthood el bol loba el meruul a urerel el ngar ra Ngklel.3 A uriul ra lemad a Kristo ma re Apostol er ngii, ea rechad a ngildechii a ruoll ma osisechakl. Sel ngii a kot el teletael ra Ikelesia ma priesthood a ririid. A uriul ra taem ra Dark Ages, eng mlara cheungel a dereder ra Demad ra Babeluades, ea Jesus Kristo a ngiluu a Ikelesia er Ngii el muut el mei. Chelechang eng dechor, ng mla lemuut ra smechel ma cheldellel a ma lemuut el mo cherrungel el ngara cheungel a dereder er Ngii. 4
A ki oltirakl ra Rubak el Jesus Kristo ma osisecheklel. A ki medengei el kmo a Osobel sel luut ra okiis ra kodall, ea Rubak a mo oldingel er tike el rechedal ra kakerous el taem. Ng ngulmengur lobengerir. Ng milrael lobengterir. Ea uche ra lemei sel temel, a Ngii a dilu er tir “Melorael … ma bol lolisechaklra beluu, el melecholb er tir el ngara ngklel a Chedam, ma Ngalek ma Chedaol Reng.” 5 A reapostol a kilengei e ulengesenges er ngii ra ika el dilu er tir. Te dirrek el luleker rar rebebil el me olngeseu er tir el meruul a urerel a Rubak.
Chelechang, e ngara cheungel a dereder er a reapostol ma repropet, eng kmal di osisiu omeruul el blal beskid a remisionari ra Ikelesia er a Jesus Kristo er a Uriul-klebesei el Santo. Tirka el misionari a mesiou ra lemuut el kmal betok ra dart ma okeim el beluu. A ngerchelir a mesiou el lomerk a tekingel a Jesus Kristo, el tir a melasem el loltirakel er tial llach—omekbeches ra chelechal sils lokiu a Rubak el dingii—el mo melai ra mui el ebangkilio er a cheroid el beluu el mo omekngeltengat a klengar ra rechad ra ngidil ker. 6
A remisionari el tir a dirk ke ngeasek malechub e te ngar ra lluich a kmal diak a klaumedngei er tir ra klechad. Eng di te ngeltengat el sebecherir el olengeseu—el ngar ngii a klisichel a Chedaol Reng, beltik el reng ra Rubak, ma klaumerang—ngii a rulii me te momesisiich el mesiungel a Rubak. Te olisechakl ra ungil klumech ra el ngii a uchul a deuereng ma diak a ulebengelel deureng el mor tirke el tir rongesterir. Ra bek el beluu e te meruul e olisechakl ra tekoi el tir a melekoi er ngii.
A remisionrai a mesuub el mo oltirakl ra Jesus Kristo ra ikel cheldecheduch ma teletael. Te olisechakl ra Jesus Kristo ma Tngakireng er Ngii. 7Te meral olisechakl er sel Olutel a Ikelesia ra Jesus ra ngaramong el lokiu a remesiungel a Rubak ra uriul-klebesei el prophet, el Joseph Smith.
Kau alta ke mla kotouar, ma lechub e ke kuk di oumechad er kau, er tirka el missionari. A kuureng el kmo kau me lak bo medakt er tir e bai mosuub er tir. Te sebecherir el mo usbechall el mla ra babeluades el leko er kau.
Tia diluubch el mo ra Jerry, a chad ra Berodestant el ngar ra okolem, el kiliei ra Mesa, Arizona. A demal a Jerry a mle minister ra Babtist ea delal a mle minister ra Medodist. A ta er a sils ea ta er a kmal kmeed el sechelil a Jerry el Pricilla a uluchais er ngii el kirel a ringel el ngar ra rengul el lulechesuar er ngii ra lemad a ngelekel el dirk lulchelii ma kmal meringel el dertel a chebechiielel el ngii a kmal dirk dilubch. Klou el chelebuul el lengar ngii el mesobil el chedil, ea Pricilla ngar ngii a reteua el ngelekel— tede el redil ma chimo el sechal. Mise ra louchisa el mo ra Jerry aika el mla ra rengul, eng ulechais a klemerang el kmo ng mlo soal el melai er a klengar er ngii. Rokui el klisiich ma beltik el reng el Jerry a olab, eng ulsiik rolel e soal ngosuir el kmo a klengar ngii a ngar ngii a ulutelel. Ng milngemedaol er ngii el me ra ikelesia, eng di Pricilla a ulmeketakl el kmo ng mla kotouar ra Dios.
A Jerry a dimlak lodengei el kmo ng mekerang. Uriul, er a lolubes a kerrekar er a odesongel, eng kal chad el ngar ngii a klaumerang er ngii a miluluuch el mo ra Rubak el lolengit a ngeso. E sera loluluuch, eng rirengesii a ngor el mera udesuel el kmo, “Morrob er tirke el buik el ngar ra rrat.” A Jerry, a kora mle rrau a rengul, lomdasu el kmo tiang locha ngera belkul. Meng ulemtab e omdasu er tial teletael e ulemes el mo ra rael e milsterir a reteru el mekekerei el chad el loubail a becheleleu ma nektai el ngara rrat el merael me bedul a blil. Mechas a rengul er tial “teletael,” el mla dubech,ngulmes er tir el lourat el merael mei. E mocha, omelchesuar er tial teletael el kirel, rulii me nguleldiu, “Ea, kemiu, me moutekangel el stob adang! Ng kirek el mengedecheduch er kemiu!”
Meng rrau a rengrir e semeriar a osengir el mekere el chad a mle stob. Ma rololang el mei, ea Jerry a mo dongcheterir el ngar ngii a llechukl el ngklir lochoti el kmo te misionari ra Ikelesa ra Jesus Kristo er a Uriul-klebesei el Santo. A Jerry a ulemes er tir e dula, “Tia a locha kora klebelung sel morenges er ngii, eng di ak miluluuch eak ringesii a ngor el kmo ‘mstob er tirke el ngar ra rrat.’ Ma kulmes ra rael e milsekemiu. Sebechiu el ngosukak?”
Tirka el misionaris a mlo klikm e dula el kmo, “Choi, ng kmal sebechemam.”
A Jerry a uluchais er tir el kmo ngera meng mle bekikl er a Pricila. Ng dimak el meketeket e tirka el misionaris a mocha omais el lomes ra Pricilla, ma tirka el ngelekel ma Jerry. Te milsaod el kirel a moktek ra klengar ma diak a ulebengelel uldesuel a Dios el kirir. A Jerry, ma Pricilla, ma rengelekel a mlo klou a klaumerang er tir lokiu a nglunguchir, ma omesubir ra Babier ra Mormon, ma ungil deluil ma beltikereng el mla ra rechad er a Ikelesia. Tial klaumerang ra Jerry er a Jesus Kristo a liluut el mukeroul el mo klou. A uldesuel a Priciall ra mo melai ra klengar er ngii a ririid e bai ulebult el mo deuerreng. Te miltecholb e mlo chedal a Kristo er tial mla moluut el Ikelesa. 8
Choi, a remisionari a sebecherir el longeseu ra kakerous el teletael. A ta ra okesiu, bebil er kemiu a locha sorir el mo medengelterir ar chederir ra irechar. Ke locha medengei a ngklir ar rechad ra blim ma ongeua el telcheroll ra memong, eng di ke medengelterir tirkel ngara ongeai el telcheroll ra memong? Ke medengei a ngklir? Ng soam el muut el mo medengelterir? Moker ra remisionari! Te sebecherir el ngosukau!9 Te meduch e sebecherir el ngosukau el ngmai a reksi er a telungalek er kau er tia el Ikelesia ra Jesus Kristo ra Uriul-klebesei el Santo.
A bebil er kemiu a chad er tia el Ikelesa eng di ng betok er kemiu a diak el blechoel el ngar ra ikelesia. Ng betik a rengmiu ra Rubak e omdasu el somiu el lemuut el me ra Ikelesia. Eng di ng diak modengei el kmo mekera momuchel. Ak melekoi el kmo bo moker rar remisionari!10 Te sebecherir el ngosukau! Te sebecherir el ngosukau el lolsisechakl ra rebebil er kau mar betik ra regnum el chad. Kemam mar remisionari a betik a rengmam er kemiu e oureng el nguu tia el deuerreng ma llomes er tia el lungil klumech el leko ra klengar er kemiu
A bebil er kemiu e locha sorir el mo medengei el kmo kom mekerang e mengubet er tial mekngit el blekeradel e bol sebechem el loldeu ra rengum ra ungil el klengar er kau. Moker ra remisonari! Te sebecherir el ngosukau! A kakerous el omesuub a mla ocholt el kmo, sel de chelchad, ra cheldebechel ra Ikelesia ra Uriul-klebesei el Santo a kmal mesisiich a bedengir el cheldebechel. Sei a uchul ea tekoi ra kodall a kmal kekerei ea klengar er tir a kekemanget ng klou el chais el ngii a blal lebetik er ngii ra osisecheklir ra kmal kekemanget el taem ra beluu ra merikel .11
A bebil er kemiu a locha omdasu el kmo a klengar a kmal meringel, ea dmolech el chelsel a rengmiu, e kom melechesuar a klou el ringel, el uaia lak omekrael malechub eng moktek. Moker ra remisionari! Te sebecherir el ngosukau! Te sebecherir el ngosukau el mo medengelii a meral moktek ra klengar er tial beluulechad—ngera ma uchul e ke ngara tial beluulechad e morker sel omad. Ng sebechem el mesuub el kmo ng mekera tia el mla moluut el ebangkelio ra Jesus Kristo e sebechel omekngeletengat ra klechad er kau ma ike el ngii a diak el sebechem el mdasu.
Al sekum e ke kora ulemdasu el kirel a telungalk er kau, moker ra remisionari! Te sebecherir el ngosukau! Smisichii a chelbechielem ma telungalk er kau a a klou a ultutelel ra Ruriul-klebesei el Santo. Telungalek a sebecheir el mo dmak el mo cherechar. Moker ra remsionaris me losisecheklau el kmo ng mekerang e sebechel el mo tekoi.
A remisonari a sebecherir el ngosukau me sel reng ma klemedengei er kau el kmal mo ungil. A reng ra chad a osiik a llomes. A le klemerang el ngar ra rechad ra scientific laboratory malechub eng ngar ra Rubak, eng se beched el sikii! A klebkellel a Dios a mellomes. 12
Obdois el suobel a obengkel a tekoi ra klechelid el mer ra klemedengei er kid. Ke de omtab ra ike el meklou a ultutelel el klemedengei er kid el kirel a chedaol llechukl. A ileakl el lomesuub el dirk biltik er ngii el kmo a Ruriul-klebesei el Santo a tar tirke el klou a klemedengei er tir ra Klekeristiano ma Biblia.13 Al sekum eng soam el mo ungil el medengelii a Babier ra Mormon, el lemuut el mo klou a klemedengei er kau ra klodam ma klechedam ra Dios, e moker ra remisonari! Te sebecherir el ngosukau!
Ng betok er kemiu a ngar ngii ra rengrir el sorir el lolengesu ra remechebuul. E leng soad el mesuub ra Jesus Kristo, ea Ruriul-klebesei el Santo a diak a ulebengelel el llorimel.14 Ngidil chad a sebechel me teloi er kemam e olengeseu ra remechebuul e mesiou er tir ra ikel meklou el kerior ra chelsel a beluulechad. Al sekum eng soam el longeseu, e moker ra remisionari! Te sebecheri el ngosukau!
Ea lsekum eng soam lemuut el momedengelii a klengar ruriul ra kodall, ma babeluades, ma kirel a moktek ra Rubak el lekor kau; alsekum eng soam el momedengei el kirel a Rubak el Jesus Kristo, Tngakireng er Ngii, ma Olutel a Ikelesia er Ngii el di uase ra kot el lomuchel, moker ra remisionari! Te sebecherir el ngosukau!
Ak medengei el kmo a Rubak a ngar. A Jesus a Kristo. Ea olutel a Ikelesia er Ngii a mla lemuut el mei. Ak ngara omengull, e meluluuch el kmo a Dios lomekngeltengat ra ta ma ta me tirke el misionari. El ngara ngklel a Jesus Kristo, amen