14:43

“Rubak, A Kuumerang”

Mlara Elder Jeffrey R. Holland

Er a Chelechad er a Teruich me a Terung el Apostol

Mocholt a ngelsengesem eng di molisiich, er a kekerei el klaumera el mobang, ele rokui el tekoi a di sebechel mor tirkel tir oumerang.

A tara taem ea Jesus a mle duum er a cheldebechel er a remellomes el chad el mle meringel el kautitekangel lobengterir a roltirakl er Ngii. A Osobel a uleker el kirel tial klautok, ea demal ngika el ngalek a mlo dechor, e dula el kmo ng mla mo olengit a klengeltengat el kirel a ngelekel sechal er a roltirakl er a Jesus, eng dimlak el sebechir el msang. Me ngika el buik a dirk olsiu a ungelel, e teriobs a ngerel, e melletilech er ngii er a chutem, e ngika el chedam a mocha mengeluch er a Jesus el locha kmal meral uaia lulebongel lolengit a ngeso:

“A lsekum eng sebechem,” ng dulang, “e bom mchebkemam, e mngesukemam.

“Me a Jesus a ulenger ngii el kmo, Ke kmo alsekum eng sebechem, a rokui el tekoi a di sebechel er ngike el oumerang.

“Meng di mle mereched a demal ngika el buik, el melekoi el klou a ngerel, Rubak, a kuumerang; eng di diak mesisiich el loumerang.”¹

A uchelel a klaumera er ngika el chad, lultuil er a ongtil, a klebech. Eng di ng mlarngii orechudel el usbechellel, el kirel a di ta el ngelekel. Kede medengei el kmo tia klebech el kirel a uchelel. “Me a di le bo er ngii a di klemeriar reng er kau el mo oumerang,” A Alma a millekoi, e mkengei er tiaikid el klmeriar me bo loureor er a chelsel a rengum.”² A dousbech er tial tekoi, e ngika el chedam a mla mo sebechel lultuil er a klaumera er ngii e olengit er a Osobel er a beluulechad, “Alsekumeng sebechemel rullii a kmo ngerang,e bom mchebkemam, e dirrek elmngesukemam”³Ng diak el sebechek el menguiu aika el tekoi e lak langel. A tekoi elkemam a bleketakl a belkul. A mera er ngii, ngika el chad a melekoi el kmo, “A rokir el telungalek er kemam a olengit. Ng diak el ngemed a ringel er kemam. Ng dikea el sebechemam. A ngelekam a mla ruebet er a ralm. Ng mla ruebet er a ngau. Ng melemolem el ngara kengaol, me kemam a melemolem el ngara dakt. Ng diak ki modengei el kmo aki mekerang. Ng sebechem el ngosukemam? Aki oureng a saul el kirel a ngii di el ngerang—a telkib el klengeltengat, telkib el urunguled, telkib el selbechakl er a berraod loba delal ngika el buik er a bek el sils er a klengar ngii.”

“Alsekum eng sebechem a ngii di el ngerang,” le dillii ngika el chedam, a ulebult el morngii, “Alsekum eng sebechem elloumerang,” el lullekoi a Mastang. ⁴

“Ng bleketakl” el chedaol llechukl a melekoi— el diak ko meoud malechub e moumededenger ke bai “mereched” el ngika el chedam a mle bleketakl lochotii a ringel le ngarngii, “Rubak, a kumerang; eng di diak mui loumerang.” A nger er a beches e dirk kekerei el klaumerang, ea Jesus a ulemekungil er ngika el buik, el kmal di uaia lulkisii er a kodall, sel losaod er ngii a Markus.⁵

Ak melbedebek er tial cheldecheduch el ngara chedaol llechukl, e soak el mengedecheduch el mora rengeasek er a Ikelesia—el kesai a rekmiu malechub eng kesai a rak el mchedal a ikelesia malechub eng kesai a rak er kemiu loumerang. Ngii di el ta er ngii, eng dirrek el uldimukl er kid el rokui.

A kot el dotebengar el kirel tial cheldecheduch a kmo sel bo de chebengelii a ongarm el kirel a klaumerang, a ngike el chedam a mle kot lochotii sel le mesisiich er ngii e kuk mocha ochotii a chelitechetul. A kot el tekingel a mle bleketakl el diak el kora omart: “Rubak a kumerang.” Ak kmu er tirkel er rokui el oureng el morngii a klaumera er tir, molbedebek er ngika el chad! Aikel taem er a dakt me a rraureng malechub a meringel el taem,e morkedii sel klaumerang el kau a mla nguu, luldimukl a di lekekerei. A ulekeroul el de ngarngii er tial klengar, e ngarngii a kmo ngera el mo duubech el mei er kid el melutk el kirel chedaol tekoi el uai sel dilubech el mo er ngika el buik me a rechad er a blil. Sel lemei aikakid el taem me a mondai le dubech, ea nger a diak el blechoel mereched el morngii, e merengum lorkedii sel kau a mla mo medengelii e mdechor el mesisiich e mongiil a dechelel a llomes. Ng tiaikid el taem, el tiaikid el ongasireng, ea Jesus a millekoi el kirel tiang,”A lengarngii a klaumera er kemiu el uaia tane er a mustard, ea omdu er tial Risois el kmo, Molukl el mo er a tara basio; eng mengukl; e diak a ngera el diak el sebechiu el rullii.”⁶A klungel malechub a delechel a klaumera er kemiu a diak el ngii a mondai—ng sel klemerang el kau ochotii el kirel a klaumera er kau me a ikel modengei el klemerang el kau olab.

A ongeru el dotebengar a kuk ngodech er sel kot. A mondai sel lemei el dubech a ker, e lak mosiik er a klaumera er kau loker el kmo ngere sel diak er kau, el lomuchel er sel “diak a klaumera” er kau er ngii. Ng uaia omolecha stuffing er a tarkii er a ngerel! Msall ek beketeklii tial tekoi: Ng diak du er kemiu el kmo ko melasm el oleko ngarngii a klaumera er kemiu ea lechub eng diak. Ak dmu er kemiu me ko mo ngara klemera er sel klaumerang el kemiu obang. Bebil er a taem e sel oleko ngmeral rraureng er kid a leko ngolchotel a diak a dekted e bai diak lolchotel a mera el klaumerang er kid. Ng diak leuaisei! Mei e bo dolbedebek er tial cheldecheduch el ngara chedaol llechukl: Bo bleketakl el kirel a kerim; di ngarngii a kerid. Eng di alsekum e kau me a telungalek er kau a somiu el mo ungil, e lak ko bechei a ikal ker me lolenget er a rolel ongasireng lomeruul.

Osisiu, ko ba klaumerang er sel bai di uldesuem ele kau loba sel Babier er a Mormon a melekoi er ngii el kmo “ng kmal betok lolchotel.”⁷ “Ko mo medengelterir lokiu omerellir,” A Jesus a millekoi,⁸ me a olchotel osisechakl er a ebangkelio loruul a kltukl er a klengar er a Ruriul-klebesei el Santo er a ngii dil ker. El uaia tekingel a Petrus me a Johanes el mora rechad er a ngara mong, ea kmu er kemiu, “Kede melekoi a tekoi el bla deues e remenges,” ea bla deues e remenges a kmo “a mengasireng el ongasireng a mla meruul” era klengar er a re million el chedal a Ikelesia. Tia diak el sebeched el diak doumera er ngii.⁹

Rodam me a rodos, tia chedaol ureor el melemolem, lobengkel a ocholt me a klengeltengat er a ngii dil ker, me lak el sal mo suebek a rengmiu el kirel sel dubech olibesongel el kirel meues, mo bleketakl, e mesmechokl. Ngarngii e morngii. Chelsel tial Ikelesia, ea ikel dodengei a lmuut el meklou a ultutelel er a ikel diak dodengei. Molatk, el kmo chelsel tial beluulechad, eng kired el merael ngara klaumerang.

Bol meklou a rengmiu er a ringel er a klechad— aikel molab me a ikel lolab tirkel mesiou lobengkemiu er a chelsel tial Ikelesia, loruul a rsechal me a redil. Meng di klikiid el Ngelekel, ea re diak el klikiid el chad a tir a di mla oureor lobengkel a Dios er a uchelel. Ng locha kmal mle meringel er Ngii, eng di Ngii a ulereor lobengterir. Meng kired el mo uaisei. E sel mesa diak el cherrungel, e molatk el kmo ng diak el ngar tial ureor. El uaia tal chad er a omeluches el kmo, sel metengel a cherrengelel, eng diak el telmellel a oil el remiid ele a bilas a diak el sebechel lotekur el rokir.¹⁰ Tirkel sebechir lotekau el rokui a kau me a ngak, ma da bol klou a regnum e mngara klausubes.

Ulebongel el tekoi sel lemei a rraureng, e lak ko medakt losiik a ngeso. Alsekum eng soad el kmal ngara rengud e bleketakl el uaia ngike el chedam, eng sebeched el nguu. “A chedaol llechukl a mesaod er tial klemeriar reng el kmo “ng meral ngara reng,” el losiik “loba mui el moktek, el diak de kora ombebulak er medal a Dios.”¹¹ A nger el kirel tial mera el ongit, ea Dios a blechoel morngii a ngeso er a bita me a bitang el mo melisiich er a klaumera er kid.

Ak dilu el kmoak mengedecheduch er a rengeasek. Ak dirk mengedecheduch er tir. A 14 a rekil buik a dirk millekoi er ngak, “Brother Holland, Ng dirkak bol sebechek el kmo a Ikelesia a klemerang, eng di a kumerang er ngii.” Ak milchulii el kilo ng tuobed a chelsul a medal. Ak dilu er ngii loba klisichel a renguk el kmo a oumerang a kmal ungil tekoi, el muut el ungil er a omeruul, e diak el kirel mekngit a rengul er tiang ng “kirel di oumerang.” Ak dilu er ngii el kmo a Kristo a dilu el kmo, “Lak ko medakt, di moumerang,”¹² el ngii a tekoi, el silbecheklii a ngeasek, el Gordon B. Hinckley er a le ngara mission.¹³ Ak dilu er ngika el buik el kmo a oumerang a kot el dauch el kirel a bult ea tebechelel a klaumerang el ngii a smodii a klaumerang el kid oba el rokui a omuchel loba tekoi el kmo, “Aki oumerang.”¹⁴ E dilu er ngii el kmo ng dmeu a renguk er ngii el kmal bleketakl el kirel a skel a klaumera er a ikelesia.

Chelecha el blak kiei e kusuub el kmeed el okolem el rak er a taem er a le 14 a rekik, ea kuchais a bebil er a tekoi el kudengei. Ak medengei el kmo a Dios er a rokui el taem rokui el rael rokui el teletael a Demad er a Babeluades. Ak medengei el kmo a Jesus a di mle chimo el klikiid el Ngelekel, el klengar ngii a mlodars loltiakl er a soal a Chedam me a Ngalek el kirel osebeled kid el rokui el diak de klikiid. Ak medengei el kmo ng milkiis er a kodall el muut el mo ngar, el Ngii a mlo uchul, e kau me a ngak a dirrek el mo mekiis er a kodall. Ak medengei el kmo a Joseph Smith, ¹⁵ el ulechais el kmo ng diak el klikiid, a mera el milengilt el mo dongu er a chimal a Dios lolutii a diak a ulebengelel ebangkelio el mei er a beluulechad. Ak dirrek el medengei el mlo uchul—lokiu oidel a Babier er a Mormon—a mla osischeklak a lmuut el betok el kirel a beltikelreng er a Dios, me a klengar er a Kristo, diak a ulebengelel klemrang, klisichel a priesthood, er a ngii dil profet el blak kunguiu el kirel, rongesii, malechub ak medengelii er a chelsel a klengar ngak. Ak medengei el kmo a President Thomas S. Monson, el ngii a blak a rengul e semeriar er tial mong meng mocha okeim el rak er a lemoterekokl el mo Apostol er a Rubak, a meral kirel ngar tial okedong er a mo profet er chelechal sils. Ak medengei el kmo a reteruich me a teua el chad el kemiu a kongei e oldubech er tir el profet, chad er a ues, me a ocholt a oldubech er ngii lokiu odersel chimorir, rengrir, me a kiis lolab el apostol.

Aika el tekoi a kdung lekor kemiu loba sengk el Petrus omekedong er ngii el “mera el tekingel a ulaoch.”¹⁶ Sel mle kekerei el tane er a oumerang el kulebang a mla mo klou el kerrekar er a klengar, me a lskeum ea klaumera er kemiu a ngara skeng er tial klengar, eak siotai er kemiu el mo ultuir er a klaumera er ngak. Ak medengei el kmo tial ureor a klemerang el urerel a Dios. Ng di a de bechei rraureng me luchul e lak doltirakl a suobel me a osisechakl. Molemolem loureng. Molemolem el merael. Mocholt a ngelsengesem eng di molisiich er a kekerei el klaumera el mobang, ele rokui el tekoi a di sebechel mor tirkel tir oumerang. El ngara ngklel a Jesus Kristo, amen.