Te hau i roto ia tatou : Te utu‘a no te parau-ti‘a
Na Elder Quentin L. Cook
No te Pŭpŭ no te Tino Ahuru Ma Piti Aposetolo
Noa’tu te mau tamataraa o te oraraa nei, na roto i te Taraehara a te Faaora e To’na aroha, e upooti‘a te oraraa parau-ti‘a e te hau i roto ia tatou.
No te mau ohipa i tupu iho nei, ua feruri au i ni‘a i te haapiiraa tumu o te hau, e te hopoi‘a taa ê a Iesu Mesia i roto i te tautururaa ia tatou tata‘itahi ia farii i te hau vai maoro i roto ia tatou.
E piti ohipa tei tupu i te mau ava‘e i ma‘iri a‘enei tei haaputapu roa ia’u. A tahi, ua paraparau vau i te oro‘a hunaraa o Emilie Parker, hoê tamahine iti ono matahiti, tei pohe e e 25 atoa mau taata, tei roto e 19 tamarii apî, no te pupuhiraa i tupu i Newtown, Connecticut. Ua heva vau e te utuafare e ua ite atoa vau e, e rave rahi tei haru-ê-hia te hau. Ua farii râ vau i te puai e te faaroo mai roto mai i to’na na metua o Robert e o Alissa Parker.
A piti, ua farerei au tauasini e tauasini melo faaroo o te Ekalesia i te fenua Côte d’Ivoire, i te oire no Abidjan.1 E fenua reo farani teie, i Afirita Tooa o te râ, tei faaruru i te fifi no te haapa‘oraa faufaa, te orure hau a te nuu faehau e e piti tama‘i i rotopu i te huiraatira iho tei hope i te matahiti 2011. E noa’tu râ te reira, e hau taa ê ta’u i farii i rotopu ia ratou ra.
Pinepine te tahi mau ohipa i te tupu no te haru ê atu i te hau ma te faarahi i to tatou mana‘o paruparu.
O vai te nehenehe e haamo‘e i te mau ati rahi no te 11 no setepa 2001, i ni‘a e rave rahi mau oire no marite ? Na teie huru ohipa e faahaamana‘o ia tatou i te oioi to tatou hau e to tatou mana‘o paruru e nehenehe ai e haamouhia.
Te tia‘i ra ta maua tamaroa matahiapo raua ta’na vahine i ta raua tamarii matamua, e te ora ra raua e toru pû fare i te atea o te World Trade Center i te Oire no New York, topa mai nei te manureva matamua i ni‘a i te fare matamua, tera i te pae apatoerau. Pa‘uma a‘era raua i ni‘a i te tapo‘i o te fare tahua ei reira to raua horuhoruraa te aau a hi‘o ai raua i teie ohipa mai te huru ra e hoê ati rahi. I reira, ite mata roa’tu râ raua i te toparaa o te piti o te manureva i ni‘a i te tahi fare, tera i te pae apato‘a. Mana‘o oioi atura raua e, e ere roa te reira i te ati manureva noa e ua ti‘aturi e te ta‘irihia râ te tuhaa raro no Manhattan. I to te fare i te pae apato‘a maruaraa i raro, ua po‘i roa to raua nohoraa i te ata repo tei puohu i te tuhaa raro no Manhattan.
No te taa ore i te mea ta raua i ite mata atu e no te mana‘ona‘oraa i te tahi tupitaraa, ua imi raua i te rave‘a ia tae i te hoê vahi papû a‘e e ua haere roa’tu i te fare tĭtĭ a te Ekalesia no Manhattan i Lincoln Center. I to raua tapaeraa i ô, ua ite raua ahuru ma piti tiahapa melo no te tuhaa raro no Manhattan tei faaoti atoa ia haaputuputu i te fare tĭtĭ. Taniuniu mai nei ia matou no te faaite mai e tei hea raua. Topa’tura te hau no te mea tei te vahi paruruhia ratou e aita atoa râ vau i maere rii a‘e i te vahi ta raua i horo. Te haapii nei te heheuraa no teie tau e, ua riro te mau tĭtĭ no Ziona ei parururaa e ei « vahi haapuraa no te vero, e i te riri ia niniihia’tu te reira ma te anoi ore i ni‘a i te ao paatoa nei ».2
Aita e ti‘a ia raua e ho‘i i to raua vahi faaearaa ua hau i te hoê hepetoma, e ua pe‘ape‘a roa raua i te poheraa te mau taata hara ore, aita râ e fifi rahi i tupu mai i ni‘a ia raua.
I to’u hi‘oraa i teie mau ohipa, ua faahiahia vau i te taa-ê-raa o te haapiiraa tumu i rotopu i te hau nui e aore râ a to te ao nei e te hau i roto ia tatou.3
I te fanauraahia o te Faaora, e melahi nahoa rahi no te ra‘i ra tei arue i te Atua ma te parau e, « Ia haamaitai hia te Atua i ni‘a i te rai teitei, ei hau to teie nei ao, e ia ite au hia mai te taata nei ».4
E teie râ, ua papa‘i-papû-atoa-hia e, i taua iho tau hanahana mure ore ra i muri mai te fanauraa o te Tamaiti a te Atua, ua faaue te arii Heroda i te taparahiraa o te mau aiû hara ore i Betelehema ra.5
E mea faufaa rahi te ti‘amâraa no te ma‘itiraa i roto i te faanahoraa no te oaoa. E faati‘a te reira i te parau no te here, te tusia, te tupuraa o te taata iho e te iteraa faufaa rahi no to tatou haereraa mure ore i mua. E faati‘a atoa teie ti‘amâraa no te ma‘itiraa i te mauiui atoa e te mamae ta tatou e ite nei i roto i te oraraa tahuti nei, noa’tu â te mau tumu aita tatou e maramarama ra e te mau ma‘itiraa ino e te pau rahi a vetahi ê. Te Tama‘i iho i te Ra‘i ra, ua ravehia ïa no to tatou ti‘amâraa morare, e inaha, e mea faufaa ho‘i te reira no te maramarama maitai i te taviniraa a te Faaora i ni‘a i te fenua nei.
Mai tei faahitihia i roto i te pene 10 no Mataio, ua haapii te Faaora i te Tino Ahuru ma Piti e ua haapapû Oia e, eita Ta’na misioni e hopoi mai i te hau nui i roto i teie oraraa tahuti. Ua faauehia te mau aposetolo ia vaiiho i te hau i ni‘a i te mau fare parau-ti‘a ta ratou e ratere atu ma te faaara atoa’tu e, e riro ratou i te ti‘a « i rotopu i te mau luko ra… [E] e riri hia outou e te taata’toa i to’u nei i‘oa : o te taata râ e tape‘a maite e tae noa’tu i te hopea, o te ora ïa »6. E haapapûraa e vai ra i te irava 34 : « Eiaha e mana‘o e, i haere mai au e hopoi mai i te hau i te fenua nei ».7 E mea papû roa, aita te hau nui i vai i te tau o te taviniraa tahuti o te Mesia, e aita atoa ho‘i i teie nei mahana.
I roto i te omuaraa parau o Te Parau Haapiiraa e te Mau Parau Fafau, te haapiihia nei e rave rahi parau tumu faufaa roa. No ni‘a i te feia o te ore e tatarahapa, e ore roa ïa To’na Varua (te Varua o te Mesia), tei horo‘ahia i te mau taata atoa e tae mai i roto i teie nei ao,8 e « mârô noa’tu i te taata ».9 E teie atoa, « e rave-ê-hia’tu… te hau no ni‘a mai i te ao nei ».10 Ua faaite mau ihoa te mau peropheta e, ua rave-ê-hia te hau mai ni‘a mai te fenua nei.11 Aita â Lucifero i ruuruuhia e te faatere mana nei oia i reira.12
Ua vai na e e vai noa â te hiaai hanahana o te taata maitai i te mau vahi atoa, te hau i roto i te ao nei. Eiaha roa’tu tatou e faaru‘e i te tapaeraa i teie fâ. Noa’tu râ, ua haapii te peresideni Joseph F. Smith e, « eita roa e nehenehe i te varua o te hau e o te here ia tae mai i te ao nei… maori râ, ia farii te taata nei i te parau mau a te Atua e te parau poro‘i a te Atua, e ia farii i to’na puai e to’na mana tei riro hoi ei mea hanahana ».13
Te tia‘i mau nei tatou e te pure atoa nei no te hau nui, tera râ, e mea na roto i te taata hoê e i te utuafare e roaa ai ia tatou te huru hau tei fafauhia ei utu‘a no te parau-ti‘a. Te reira hau, o te hoê horo‘a fafauhia ïa mai roto mai i te misioni a te Faaora e To’na tusia taraehara.
Ua papa‘i-haapoto-hia teie parau tumu i roto i Te Parau Haapiiraa e te Mau Parau Fafau : « A haapii mai râ e o oia o te rave i te mau ohipa parau ti‘a ra e farii ïa oia i ta’na utu‘a, oia ïa te mana‘o hau i roto i teie nei ao, e te ora mure ore i roto i te ao a muri atu ra ».14
Ua haapii te peresideni John Taylor e, e ere teie hau i te mea hinaaro-noa-hia, e « horo‘a [râ] na te Atua ».15
Te hau ta’u e faahiti ra, e ere ïa te vai-hau-raa no te tahi noa taime poto. E popou hohonu mure ore ïa e te oaoa i te pae varua.16
Ua faaite mai te peresideni Heber J. Grant i te hau o te Faaora mai teie te huru : « Na To’na hau e haamâmâ i to tatou mamae, e faaora i to tatou aau oto, e iriti i te riri i roto ia tatou, e faatupu i roto ia tatou i te here i to tatou mau taata tupu e na te reira e faaî i to tatou varua i te mărû e te oaoa ».17 I to’u farereiraa i na metua o Emilie Parker, ua ite au e, ua haamâmâ te hau o te Faaora i to raua mamae e te tauturu nei ia faaora i to raua aau oto. E mea au ia haapapû e, i muri noa iho i te pupuhiraa, ua faaite te taea‘e Parker i to’na faaoreraa hapa i taua taata hara ra. Mai ta te peresideni Grant i parau, e nehenehe i te hau o te Faaora e « iriti i te riri i roto ia tatou ». Na te Atua te haavâraa.
No te feia mo‘a i te fenua Côte d’Ivoire, i te roaraa o te tama‘i i roto i to ratou fenua, ua ite mai ratou i te hau na roto i te tutonuraa i ni‘a i te evanelia a Iesu Mesia, ma te rave puai i te ohipa aamu utuafare e te ohipa hiero no to ratou hui tupuna.18
Te hiaai nei tatou paatoa i te hau. E ere te hau i te vahi ruru noa e aore râ te ereraa te tama‘i, te hitahita, te aroraa e te mârôraa. E tae mai te hau na roto i te iteraa e, ua ite te Faaora e, o vai tatou, e e faaroo to tatou Ia’na, e e here to tatou Ia’na e te haapa‘o nei tatou i Ta’na mau faaueraa, e te reira, noa’tu â te mau tamataraa pohe rahi e te mau ati o te oraraa. Na te pahonoraa a te Fatu i te peropheta ra Iosepha Semita i te fare tape‘araa no Liberty e hopoi mai i te tamahanaharaa i te aau :
« E tau tamaiti, ia hau mai na to oe aau ; e vai poto noa mai to oe enemi e to oe mau ati hoi ;
« E i reira, mai te mea e faaoromai maite oe i te reira, e faateitei mai te Atua ia oe ».19
A haamana‘o e, « e ere te Atua i te tumu no te anoi noa, no te hau râ.20 Inaha o te faaru‘e i te Atua, aita to reira e hau. Ua amui tatou paatoa i roto i te apooraa i te ra‘i ra, tei horo‘a mai i te ti‘amâraa morare, e ua ite a‘ena tatou e, e ma‘iri mai te mauiui i te tahuti nei na reira atoa te mau ati aita e nehenehe e parau no te rave-ino-raa i te ti‘amâraa no te ma‘itiraa. Ua taa a‘ena ia tatou e, e faatae mai te reira i te riri, te mana‘o arepurepu, te paruru ore e te mana‘o paruparu. Ua ite atoa râ tatou e, na te Taraehara a te Faaora e faaupooti‘a e e faatuea i te mau mea ti‘a ore atoa o te oraraa tahuti ma te hopoi mai i te hau. E papa‘iraa ta Elder Marion D. Hanks i ni‘a i to’na papa‘i fare, na Ugo Betti te reira, te na ô ra : « Te ti‘aturiraa i te Atua, o te iteraa ïa e, ua tano te mau ture atoa, e e tupu mai te mau ohipa maere ».21
Eaha te mau puna no te hau ? E rave rahi o te imi nei i te hau na roto i te mau rave‘a o te ao nei, e aita râ teie imiraa i manuia, e eita roa’tu te reira e manuia. Eita te hau e itehia na roto i te roaaraa i te tao‘a rahi, te mana e aore râ te roo rahi.22 Eita te hau e itehia i roto i te tapaparaa i te ohipa faaanaanatae, te ohipa arearea e aore râ te ohipa faaoaoa noa. Eita hoê a‘e o teie mau mea, noa’tu â ua roaa era a‘e te rahi, e nehenehe e faatupu mai i te oaoa vai maoro e te hau.
I roto i te himene au-roa-hia a Emma Lou Thayne, te uihia ra te uiraa tano e : « I hea vau e farii ai te hau ? Tei hea te tautururaa ?23 Te pahonoraa, o te Faaora ïa, o Oia te puna e te tumu o te hau. O Oia te « Arii no te hau ».24
Nahea tatou e vai fatata noa ai i te Faaora ? Te faahaehaaraa ia tatou i mua i te Atua, te pure-tamau-raa, te tatarahaparaa i te hara, te tomoraa i roto i te pape no te bapetizoraa ma te aau oto e te varua haehaa, e te riroraa ei pĭpĭ mau na Iesu Mesia, e mau hi‘oraa papû te reira no te parau-ti‘a e faautu‘ahia i te hau tamau.25 I muri mai to te arii Beniamina horo‘araa i ta’na a‘oraa hanahana no ni‘a i te Taraehara a te Mesia, ua topa te nahoa rahi i raro i te repo. « O te Varua o te Atua i ni‘a maira ia ratou ra, î ihora ratou i te oaoa, i matara hoi ta ratou mau hara, e ua hau to ratou aau, no te mea tei ia ratou te faaroo rahi ia Iesu Mesia ra o te tae mai ».26 E faati‘a te tatarapaha e te oraraa parau-ti‘a i te hau o te aau, o te mea faufaa rahi ho‘i no te oaoaraa.27 Mai te mea e ofatiraa ture teimaha, titauhia te faîraa no te faatae mai i te hau.28 Peneia‘e aita’tu e mea e aifaito i te hau e tae mai i roto i te hoê varua tei ta‘irihia e te hara e o te fauta nei i ta’na hopoi‘a i ni‘a i te Fatu ra ma te titau mai i te mau haamaitairaa no te Taraehara. Mai ta te tahi faahou himene au e parau nei, « E tuu vau i ta’u hopoi‘a Ia’na e e haere ma te himene ».29
Te oaoa nei to’u aau ia ite au e, i teie nei mahana, ahuru tauasini feia apî tamaroa, feia apî tamahine e te misionare paari tei farii i to ratou piiraa ei ti‘a mana no to tatou Fatu e Faaora, o Iesu Mesia. Te hopoi nei ratou i te evanelia hau tei faaho‘i-faahou-hia mai i to te ao nei, te hoê taata e te hoê utuafare i te taime hoê—e ohipa no te parau-ti‘a o te hopoi i te hau i te mau tamarii a te Metua i te Ao ra.
E haapuraa te Ekalesia i reira te feia pee i te Mesia e tae ai i te hau. Te parau nei vetahi feia apî i roto i teie nei ao e, te haapa‘o nei ratou i te pae varua, aita râ e haapa‘oraa. E taahiraa matamua maitai roa te haapa‘oraa i te pae varua. Are‘a râ, tei roto i te Ekalesia tatou e aupuruhia ai, e haapiihia ai e e faaamuhia ai e te parau maitai a te Atua. Hau atu ra, na te mana o te autahu‘araa i roto i te Ekalesia e faafana‘o i te mau oro‘a mo‘a e te mau fafauraa e taamu i te mau utuafare e e faati‘a atoa ho‘i ia tatou tata‘itahi ia ho‘i atu i te Atua te Metua e ia Iesu Mesia i roto i te basileia tiretiera. E hopoi mai teie mau oro‘a i te hau no te mea e mau fafauraa te reira i te Fatu ra.
O te mau hiero te mau vahi i reira te rahiraa o teie mau oro‘a mo‘a e tupu ai e ua riro atoa te reira ei hoê puna no te haapuraa hau i roto i te ao nei. Te feia e ratere nei na roto i te mau aua hiero e aore râ o te haere nei i te mau opani iriti, ua putapu atoa ïa ratou i te reira hau. Te vai nei te hoê ohipa tei vai noa i roto i to’u feruriraa, o te hiero ia no Suva Fiti, ua ravehia te opani iriti e te haamo‘araa. Ua tupu te arepurepuraa poritita, e ua tutu‘i te mau orure hau e ua eiâ atoa na roto i te oire ra no Suva, e ua parahi roa ratou i te Fare iriti ture ma te haru atoa i te mau auvaha iriti ture. Tei raro a‘e te oire i te ture a te faehau. Ua taoti‘a te mau faehau no Fiti i te parau faati‘a i te Ekalesia ia ore te nahoa rahi e putuputu i te taime no te opani iriti e ua faaiti faahou atu te pŭpŭ no te haamo‘araa. Aita atura te mau melo i titau-manihini-hia ia haere mai no te paruru ho‘i ia ratou. Tera ana‘e te haamo‘araa hiero, mai te tau mai â o te hiero no Nauvoo, tei faatupuhia i te taime pato‘iraa rahi.
Te vai ra te hoê vahine tei titau-manihini-hia ia haere mai i te opani iriti, e Hindu oia, e huaai Initia, hoê melo no te Fare iriti ture, e ua haru-atoa-hia oia e i muri iho ua tuuhia no te mea e vahine.
I roto i te piha tiretiera, aita faahou te ahoaho o to te ao, ua ta‘i atura oia ma te faaite mai i te mana‘o hau tei haaputapu ia’na. Ua putapu oia i te Varua Maitai tei tamahanahana e tei faaite papû i te natura mo‘a o te hiero.
O te Faaora te puna no te hau mau. Noa’tu te mau tamataraa o te oraraa nei, na roto i te Taraehara a te Faaora e To’na aroha, e upooti‘a te oraraa parau-ti‘a e te hau i roto ia tatou. I roto i te faanahoraa mo‘e ra no te piha no te Pasa, ua fafau te Faaora i Ta’na mau aposetolo e, e haamaitaihia ratou e te « Faaa‘o, te Varua Maitai » ma te faahiti atoa i teie mau parau rahi : « E hau ta’u e vai iho ia outou nei, o to’u nei hau ta’u e ho atu no outou ; e ere mai ta to te ao nei horo‘a ta’u horo‘a ia outou ».30 E i muri mai, na mua noa a‘e Ta’na pure arai : « I parau atu vau ia outou i teie nei mau parau, ia hau hia to outou ia’u nei. E pohe to outou i teie nei ao. E faa itoito râ, ua riro te re o teie nei ao ia’u ».31
Ua tarima nehenehe o Eliza R. Snow i te reira mana‘o :
O teie ïa to’u iteraa papû i te i‘oa mo‘a o Iesu Mesia, amene.