Koasoamw ong Tiepene Lap

Sang President Thomas S. Monson

Kitail … minimin nan atail pwoson oh ngoang en rong oh kasukuhl sang padahk kan me pahn kohdohng kitail

Riei ohl oh lih kempoake kan, uwen peren me I ahniki en kasamwoh kumwail ong tiepene lap wet ong sampah pwon en Mwomwohdiso en Sises Krais en Souleng en Imwin Rahn Akan. Kitail kapokonpenehr duwen peneinei lap, tohtohsang rar 15, minimin nan atail pwoson oh ngoang en rong oh kasukuhl sang padahk kan me pahn kohdohng kitail.

Sounpwong weneu samwalahro me inenen mwadang ni doadoahk en Mwomwohdiso wet eh doudoula ni sohte me kerempwa. E wia ahi ansou mwahu sounpwong ehu samwalahro en kasarawihala Tehnpas Sarawi en Gilbert, Arizona, ihmw kaselel ehu. Soutik mwohn kasarawio kemweit en tiahk wiawi nan Discovery Park me karanih wasao. Me pwulopwul meh lop riekid wiahda arail pwurokirahm me minit 90. Kahlek, koul, oh iren kemweit kan inenen kaselel.

Wasao ahniki irair en apwal pihl, oh I kamehlele me diren kapakap leldalahr nanleng erein wihk kei mwowe pwehki anahnepen keteu. Ihmwo, keteuo kohdo mwohnte pwurokirahmo eh pahn tep oh keteuteiehu lao nekila! Mendahte me pwulopwulko ahr meduhkihla keteu oh pouda nan lemwlemwur, kiht koaros kehn Ngehn en Kauno. Oaralap en pwurokirahmo iei, “Momour Poadidi nan Pwoson,” oh sansalda mwahu nan mesen peinakapw oh mwahnakapw kokouruhr oh pereperen kan. Mendahte lemwlemwur oh keteu, irair wet audaudki pwoson oh kamarain oh me pwulopwul pwukat pahn tamataman oh koasoaiahieng neirail serihkan oh nein neirail serihkan nan pahr kohkohdo kan.

Mandahn rahno, kasarawi en Tehnpas Sarawi en Gilbert, Arizona wiawi. E wia tehnpas nempe 142 me wie doadoahk nan Mwomwohdiso. Wiksang soutik en mwoweo, rahno kaselel oh ketipin. Mihting kan me kamarain. Me iangie iei President Henry B. Eyring, Elder oh Sister Tad R. Callister, Elder oh Sister William R. Walker, oh Elder oh Sister Kent F. Richards.

Nan Mei, Tehnpas Sarawi en Fort Lauderdale Florida pahn kasarawi. Ekei tehnpas sarawi tohrohr pil koasoandi ong kaneknekla oh kasarawihala mwuhr nan pahr wet. Nan 2015 se kasik en kanekehla oh kasarawihala tehnpas sarawi kapw nan wasa tohto nan sampah. Doadoahk wet pahn doula. Ansou me koaros tehnpas sarawi me pakairpe miehier kanekelahr, kitail pahn ahniki tehnpas sarawi 170 me wie doadoahk nan sampah.

Mendahte aht kainene aht doadoahk ong kanekehla tehnpas sarawi kan me pakairpe miehier oh sohte pahn pakairkihda me kapw ansou kiset, se wie doudoula nan aht doadoahk en kasawihada anahn oh kilangada wasahkan ong tehnpas sarawi kan me pahn pil kohdo. Pakairperail pahn wiawi nan tiepene lap kohkohdo kan. Kitail wia aramas en kawada tehnpas sarawi oh aramas en kin tohtohwe tehnpas sarawi.

Met, riei ohloko oh lihoko, kitail kaskasik en rong padahk me pahn kohda rahnwet oh lakapw. Irail me pahn padahk ong kitail repenehr sawas oh kaweid sang nanleng ni arail kaunopada me re pahn padahngki.

Kitail—koaros, wasaht oh wasahteikan—en audaudiki Ngehn en Kauno oh en kamarahrada oh kamarainda ni atail rong oh kasukuhl. Ni mwaren Sises Krais, atail Sounkomour, ahmen.