Rotweɔn Ɔdzesɛɛfo No

Elder Brent H. Nielson ne Kasaa

Ɔkã Eduosuon no ho

Nkyɛ hɛn nyina yeenya nyikyerɛ ama yeehu kwan pa dze abɛn hɔn a wɔwɔ hɛn abrabɔ mu a wɔayew no.

Agyenkwa no dzii Ne mber wɔ asaase yi do dze kyerɛkyerɛɛ N’ayarsã na ɔpon ho tum no. Ber bi wɔ Luke nwoma tsir 15 wɔ Ahyɛmu Fofor mu no, wɔkasae tsiaa No dɛ Odzidzi na Ɔsɛɛ ne mber wɔ adzebɔnyɛfo ho (hwɛ Luke 15:2). Agyenkwa no faa dɛm kasatsia yi dɛ ɔyɛ akwanya a Ɔdze kyerɛkyerɛɛ hɛn mbrɛ wosi gye hɔn a wɔayew hɔn kwan no.

Ɔdze nsɛmbisa tsitsir ebien na ɔdze yii hɔn a wɔkasaa tsiaa no yi ano.

“ Hom mu nyimpa bɛn na sɛ ɔwɔ nguantsen ɔha, na hɔn mu kor kɛyew a, onkyegyaa eduokron akron no wɔ sar no, na ɔnnkã dza ɔayew no do nnkodu dɛ obohu no?” Luke 15:4.

“Ɔbaa bɛn na ɔwɔ ndwetɛbona du na sɛ no mu kor yew a, ɔronnsɔ kandzea, na ɔmmpra dan mu, na ɔnnhwehwɛ yie ara nnkodu dɛ obohu?” Luke 15:8.

Nkyii Agyenkwa no dze ɔba dzesɛɛfo abɛbusɛm no kyerɛkyerɛe. Abɛbu yi mmfa nguan 100 anaa ndwetɛbona 10 ho, ɔfa ɔbabanyin kor a ɔsom bo a, ɔayew ho. Dɛm abɛbusɛm yi mu no, ebɛnadze na Agyenkwa no rekyerɛ hɛn wɔ dza yɛbɛyɛ afa busuanyi bi a ɔayew ho?

Ɔba dzesɛɛfo no see n’egya dɛ ɔma ne nsa nkã n’ahodze mu kyɛpɛn hɔ nara. Ɔpɛ dɛ ofi fie na ebusua dwudwoodwo mu dze kɛnantsew wiadze (hwɛ Luke 15:12–13). Meserɛw hyɛ no nsew dɛ Agyenkwa N’abɛbu mu no, egya no nam ɔdɔ mu penee dze ɔba no n’ahodze mu kyɛpɛn maa no na ogyae no ma ɔkɔree. Mbrɛ ɔtse biara, egya no bɛyɛ dza obotum biara dze ama ɔba nye hɔn atsena. Naaso, susuampaara ɔba a oenyin yi ayɛ n’adwen no, egya nyansanyi yi gyaae no ma ɔkɔree. Afei egya yi kyerɛ ɔdɔ mapã, na ɔweɔnee na ɔtweɔnee (hwɛ Luke 15:20).

M’ebusuafo so nyaã dɛm suahu yi bi. Awofo mapã na wɔtsetsee hɛn nuambanyin anokwafo ebien, akyerɛbaa ɔnwanwanyi na emi. Wɔdze asɛmpa no tsetsee hɛn wɔ hɛn fie, na yenyinii yie, a hɛn mbaanan nyinara sɔɔw hɛn awar ano wɔ temple mu. Naaso afe 1994 mu no, hɛn akyerɛbaa, Susan, no werɛ poow Asɔr na ne nkyerɛkyerɛ binom. Binom a wosi atwetwe na wɔkasa tsia asɔpɔkan asɔrmpanyinfo ho no nyaa nsunsuando wɔ no do. Ɔpenee ma ne gyedzi a ɔwɔ ma nkɔnhyɛfo na asomafo atseasefo no berɛɛ adze. Mber guu mu no, n’ekyingye no hyɛɛ ne gyedzi do, ma ɔsaan mu yii dɛ ogyae Asɔr no. Susan ama me ho kwan dɛ memfa n’asɛm no nto gua wɔ enyidado mu dɛ gyangyanbiara sɛ obotum aboa binom so a.

Emi na mo nuambanyin nye hɛn enã kunafo no hɛn werɛ howee kɛse noara. Yenntum anntse ase adzekor ara a ɔmaa ɔyeew ne gyedzi no. Nna m’akyerɛbaa no ne nsanmuyi no yɛ dɛ ma orububu hɛn maame n’akoma.

Emi na mo nuambanyin no, yɛasom dɛ bishopfo na quorum presidentfo, na yɛnye ward na quoromfo enya dɛwdzi wɔ konyimdzi a yenyae ber a yegyaa eduokron akron no hɔ na yɛkɔhwehwɛɛ kor no. Naaso, ɔfa hɛn akyerɛbaa yi ho no, aber a yerisi nketse reper atwe no no, mbom na ekyir ara na ɔrokɔ.

Aber a yɛreserɛ ɔsor akwankyerɛ afa mbrɛ yebesi ayɛ no mboa no, ɔbɛdaa edzi dɛ ɔsɛ dɛ yɛfa sũahu fi egya no a ɔwɔ ɔba dzesɛɛfo abɛbu mu no. Susan ayɛ n’adwen, ntsi nna ɔwɔ dɛ yɛma ɔkɔ—naaso nna ɔsɛ dɛ yɛma ohu hɛn tsema na nokwar ɔdɔ a yɛwɔ ma no. Na dɛm ntsi, yɛdze ɔdɔ na ayamuyie nkenyan, dze weɔnee na yɛtweɔnee.

Me nã ennyi n’enyi na no dɔ ennfi Susan ho da. Aber biara me maame bɔkɔ temple no, ɔdze Susan ne dzin to mpaabɔ adaka no mu, na n’enyidado ammpa dabiarada. Mo nuapanyin na ne yer a wɔtse bɛn Susan wɔ California no, aber nyina wɔtoo nsa frɛɛ no wɔ ebusua dwumadzi nyina mu. Afe biara wɔ Susan n’awoo da no wɔtoo pon maa no wɔ hɔnara hɔn fie. Wosii pi yɛɛ nokwar dɛ aber nyina wɔnye no bedzi nkitaho na ama oeehu hɔn nokwar ɔdɔ a wɔwɔ ma no.

Monua kumaa na yer hwehwɛɛ Susan ne mba wɔ Utah na wɔhwɛɛ hɔn na wɔdɔɔ hɔn. Wɔyɛɛ ahwɛyie dɛ ebusua dwumadzi nyina mu wɔto nsa frɛ ne mba no, na aber a ɔbaa no dɛ worubonuma Susan ne nana-babaa no, mo nuabanyin yi kɔr hɔ kɛyɛɛ ayɛdze no. Susan so na ɔwɔ fie akyerɛkyerɛfo na visiting teacherfo a wɔammpa abaw da.

Ber hɛn mba kɔɔr asɛmpakã na wɔwarwaree no, yɛtoo nsa frɛɛ Susan na ne mba ma wɔbaa bɛkãa ebusua enyigye nhyiae yi ho. Yɛdze mbɔdzembɔ dze hyehyɛɛ ebusua ayɛdze nyina ama Susan na ne mba etum abɛkã hɛn ho ma woehu dɛ yɛdɔ hɔn na wɔkã hɛn ebusua ho. Aber a Susan ne nsa kãa n’abɔdzin kɛse wɔ suapɔn bi a ɔwɔ California no, hɛn nyinara kɔr hɔ kɛtae n’ekyir. Ɔwɔ mu dɛ nnyɛ n’apɛdze nyina na yebotum agye ato mu, naaso nokwar ara yebotum agye ɔno ato mu. Yɛkyerɛɛ ɔdɔ, yɛweɔnee na yɛtweɔnee.

Afe 2006 mu no, mfe 12 ekyir a Susan fii Asɔr no mu, hɛn babasia Katy nye no kun tui kɛtsenaa California ama oeetum aakɔ mbranyimfo skuul. Nna wɔnye Susan tse kurow kor mu. Dɛm awarfo kumaa yi hwehwɛɛ hɔn aunt Susan no mboa nye ekyirtaa, na wɔkyerɛɛ ɔdɔ maa no. Susan yɛɛ mboa dze hwɛɛ hɛn mfe-ebien nana basiaba Lucy, na ɔbaa dɛ Susan nna ɔboa Lucy wɔ n’anafua mpaabɔ mu. Katy frɛɛ me dakor bi, bisaa dɛ ana mowɔ adwen bi dɛ Susan bɛsan aba Asɔr no mu bio? Medze anoyie buaa dɛ, ɔyɛ me dɛ ɔbɛba na ohia dɛ yɛkɔ do ara sie abotar. Mfe ebiasa a otwaa mu no, yɛkɔr do dɔɔ no, yɛweɔnee na yɛtweɔnee.

Dapɛnda yi yɛ mfe esia a, nna emi na me yer, Marcia, yɛtsena enyim ngua yi mu wɔ Conference Center ha. Nna wɔrebɛma me tsipia dɛ Wiadze Mfɛndzanan Asɔrpanyin Tumdzifo dɛm da no. Marcia a, aber biara onya Sunsum no ne nhyɛdo no kyerɛɛw nsɛnsin maa me dɛ, “Ɔyɛ me dɛ aber aso a ɔsɛ dɛ Susan san ba”. Me babasia Katy susuu dɛ monsoɛr na menkɛfrɛ Susan dɛ ɔnhwɛ Wiadze Mfɛndzanan Ehyadzi dɛm da no.

Mbaa ekunyin ebien yi kenyaan me no, menatsewee kɔɔr foyer no mu kɛfrɛɛ m’akyerɛabaa no. Me nsa kãa ne voicemail na motoo nsa frɛɛ no ara dɛ ɔnhwɛ dɛm nhyiamu a ɔwɔ dɛm wiadze mfɛndzanan ehyiadzi yi no. Ne nsa kãa nkrato no. Ɔyɛɛ me enyigye dɛ, onyaa pɛ dze hwɛɛ ehyiadzi no mu nhyiamu no nyina. Otsie nkɔnhyɛfo na asomafo a ɔdɔɔ hɔn nkan no no. Ohun edzin afofor a ɔnntsee da, binom tse dɛ President Uchtdorf na Elder Bednar, Cook, Christofferson, na Anderson. Iyinom nye akwanhorow bi a wɔdze fi sor maa m’akyerɛbaa yi—tse dɛ ɔba dzesɛɛfo no—n’enyi baa no ho do (hwɛ Luke 15:17). Nkɔnhyɛfo na asomafo hɔn nsɛm nye ebusua hɔn dɔ na ɔtwee no ma ɔsaan n’ekyir baa fie. Mfe 15 ekyir, hɛn babaa na akyerɛbaa a ɔyewee no, woehu no. Nweɔnee na ntweɔnee no aba ewiei.

Susan kyerɛɛ dɛm suahu yi mu tse dɛ mbrɛ Lehi kyerɛɛ mu wɔ Mormon Nwoma mu no. Ogyae dadze poma no mu ma ɔkɛhyɛɛ sum ehubɔhubɔw kebii mu (hwɛ 1 Nephi 8:23). Ɔkãa dɛ, oennhu no dɛ ɔayew kɛpem ber a Christ ne Kan no kenyaan ne gyedzi, ma ɔmaa ohun nsonsonoee kɛse a ɔda dza orinya no wɔ wiadze na dza Ewuradze na n’ebusua dze rema no mu.

Awanwasɛm esi wɔ mfe esia a woetwa mu yi. Susan asan enya dasegye wɔ Mormon Nwoma no ho. Ɔagye ne temple recommend. Ɔasom dɛ edwumayɛnyi wɔ temple, na sesei yi ɔkyerɛ adze wɔ Asɛmpa Nkyerɛkyerɛ Adzesua wɔ no ward. Sor ntokura ebuei ama ne mba na nananom, na mbom no nsuansuando ayɛ dzen dze, naaso ɔyɛ no dɛ ma oemmfi mu dabiarada.

Hom mu binom tse dɛ Nielson ebusua no, wɔwɔ ebusua mu mba bi a wɔayew hɔn kwan. Agyenkwa n’asɛm a ɔdze ma obiara a ɔwɔ nguantsen 100, ɔwɔ dɛ ogyaa eduokron akron no wɔ hɔ na ɔkɛka na ɔnhwehwɛ kor no. N’asɛm a ɔdze ma hɔn a wɔwɔ ndwetɛbona 10 na wɔayew kor no ye dɛ ɔnkɔhwehwɛ nkesi dɛ obohu. Sɛ nyia ɔayew no yɛ wo babanyin anaa babasia, wo nuabanyin anaa akyerɛbaa, na sɛ woefi fie a, dza yesũaa no wɔ hɛn ebusua mu nye dɛ, dza yɛbɛyɛ nyinara ekyir no, yɛdze hɛn akoma nyina dze dɔ dɛm nyimpa no na yɛweɔn, yɛbɔ mpaa, na yɛtweɔn kesi ber a Ewuradze bɛma ne nsa do.

Gyama adzesua a ohia mapã a Ewuradze kyerɛɛ me wɔ dɛm kwan yi do no yɛ aber a yɛreyɛ ebusua kyerɛwsɛm adzesũa a nna m’akyerɛbaa no efi Asɔr mu ekyir no. Hɛn ba David nna ɔrekenkan Luke 15wɔ aber a hɛn nyina abɔmu rosũa. Aber a ɔrekenkan abɛbusɛm a ɔfa ɔba dzesɛɛfo ho no, dɛm da no metsee no soronko sen mbrɛ misii tsee no nkan no. Siantsir bi mu no, aber nyina medze moho totoo ba no a ɔtsenaa fie no ho. Anapa no a David ɔrekenkan no muhunii wɔ kwan bi do dɛ emi nye ɔba dzesɛɛfo no. Hɛn nyina yɛatɔ sin wɔ Nyankopɔn enyimnyam ho (hwɛ Romefo 3:23). Hɛn nyina yehia Agyenkwa No Werdambɔ no dze enya ayarsã. Hɛn nyina yɛayew na ohia dɛ wɔhwehwɛ hɛn. Dɛm da no, nyikyerɛ no boaa me ma muhun dɛ emi na m’akyerɛbaa no nyina yehia Agyenkwa No Werdambɔ no. Susan na emi nyina yɛnam anamɔn kwan kor do rokɔ fie.

Agyenkwa ne nsɛm a ɔdze faa egya ne nkyia a ɔdze maa ɔba no, tum wɔ mu na mowɔ gyedzi dɛ ɔrekyerɛ sũahu a emi na ɔwo yebenya efi Egya no hɔ, aber a yɛbɛsan akɔ hɛn sor fie no. Ɔkyerɛ hɛn egya a ɔwɔ dɔ, ɔtweɔn na ɔweɔn. Iyinom yɛ Agyenkwa no ne nsɛm: “ Na ɔda ho wɔ ekyirkyir no, n’egya hun no, na ne yamu hyehyee no, na otuu mbirika kɛbaar no kɔn, na ofeew n’ano” (Luke 15:20).

Hɛn nyina nkyɛ yebenya nyikyerɛ ama yeehu kwan pa a yɛdze bɛbɛn hɔn a wɔwɔ hɛn abrabɔ mu a wɔayew, na sɛ ho hia a, yebenya abotar na ɔdɔ a ofi Hɛn Egya a ɔwɔ Sor, na Ne Ba Jesus Christ, dɛ yɛdɔ, yɛweɔn, na yɛtweɔn dzesɛɛfo no. Wɔ Jesus Christ ne dzin mu, amen