Yano ug Bililhon nga mga Kamatuoran
Ni Elder Gary E. Stevenson
Sa Kurom sa Napulog Duha ka mga Apostoles
Ang buhong nga panalangin sa Langitnong Amahan alang sa atong pagpakabuhi sa lisud nga panahon mao nga kita nagpuyo usab sa kahingpitan sa panahon.
Minahal nga mga kaigsoonan, daghan nang mga dekada sukad nga napahigayon ang kinatibuk-ang komperensya nga sila si Presidente Boyd K. Packer ug Elder L. Tom Perry ug Richard G. Scott manglingkod dayon dapit sa luyo sa podyum ug namulong sa usa niining mga sesyon. Ang atong handumanan kanila makapatandog, ug akong idugang ang akong pasidungog ngadto kanila, ang matag usa nila talagsaon kaayo apan nagkahiusa sa ilang pagsaksi ug pagpamatuod mahitungod ni Jesukristo ug sa Iyang Pag-ula.
Dugang pa, ako, sama ninyo, nakakuha og kalig-on gikan ni Presidente Thomas S. Monson ug mipaluyo kaniya isip propeta, manalagna, ug tigpadayag, ug nakadayeg ko sa iyang matinud-anon ug mapaubsanong pagserbisyo isip apostol nga milungtad og sobra sa 50 ka talagsaong katuigan.
Ug niadtong Martes sa buntag karong semanaha, pagkahuman gyud sa alas 9:00 sa buntag samtang ang Bishopric nagsugod og miting uban sa Asia Area Presidency, kinsa mianhi alang sa komperensya, nga gitawag ko aron makigkita kang Presidente Monson, uban sa iyang mga magtatambag. Mga gutlo pagkahuman niana, sa pagsulod nako sa kwarto nga mitinganan tupad sa iyang opisina, siguro ginerbyus ko nga tan-awon nga naglingkod atbang sa lamesa, samtang mabination siyang nagsulti aron makalma ang akong kanerbyus. Mikomentaryo siya, kalabut sa akong edad, nga morag batan-on pa ko ug gani mas batan-on pa ko tan-awon kay sa akong edad.
Dayon, sulod sa pipila ka gutlo, si Presidente Monson mihulagway nianang pagbuhat sumala sa kabubut-on sa Ginoo, ang tawag ngadto sa Korum sa Napulog Duha iyang gihatag ngari nako. Iya kong gipangutana kon modawat ba ko sa tawag, diin, human sa lawom nga pagpanghupaw, sa hingpit nga kakurat, mitubag ko nga kini akong gidawat. Ug dayon, sa wala pa gani ko makapagawas sa tanan nakong gibati, diin ang kadaghanan mao ang mga pagbati sa kakulang, si Presidente Monson mabinationg mipasabut, naghulagway kon sa unsang paagi siya gitawag daghang katuigan na ang milabay isip Apostol ni Presidente David O. McKay, nga nianang higayuna mibati usab siya og kakulang. Kalma siya nga mitudlo nako, “Bishop Stevenson, ang Ginoo mohimong kwalipikado niadtong kinsa Iyang gitawag.” Kining makapahupay nga pulong sa propeta nahimong tinubdan sa kalinaw, kalma nga pagbati sa sakit nga pagsusi sa akong kaugalingon ug malumo nga pagbati sa makutas nga milabayng mga oras adlaw ug gabii sukad niana.
Akong gisulti sa akong pinalanggang asawa, nga si Lesa, ang unsay bag-o lang nakong gihulagway ninyo, sa ulahing bahin nianang adlawa, naglingkod sa hilum nga dapit sa Temple Square, nga dunay matahum nga talan-awon sa templo ug sa makasaysayanong Tabernacle sa among atubangan. Samtang misulay kami sa pagsabut sa panghitabo nianang adlawa, among nakita ang among kalig-on nga mao ang among hugot nga pagtuo kang Jesukristo ug sa among kahibalo bahin sa mahinungdanong plano sa kalipay. Miresulta kini sa pagpahayag nako sa akong dakong gugma alang ni Lesa. Siya ang tinubdan sa akong kalipay ug usa ka talagsaong anak sa Dios. Ang iyang kinabuhi usa ka kinabuhi sa dili hinakog nga pagserbisyo ug walay kondisyon nga gugma alang sa tanan. Maningkamot kong magpabiling takus sa panalangin sa among mahangturong panag-uban.
Akong ipahayag ang akong dakong gugma sa among upat ka anak nga lalaki ug sa ilang pamilya, tulo nila nia dinhi uban sa ilang matahum nga mga asawa, mga inahan sa among unom ka apo; ang ikaupat, usa ka misyonaryo, nga dunay espesyal nga pagtugot nga molapas sa curfew sa misyonaryo aron makatan-aw niini nga miting karon uban sa iyang mission president ug sa asawa sa mission president sa ilang mission home sa Taiwan. Gihigugma nako silang tanan ug ganahan ko kon unsa nila kamahal ang Manluluwas ug ang ebanghelyo.
Akong ipahayag ang akong gugma sa tanang sakop sa akong pamilya: sa akong pinalanggang inahan ug sa akong amahan, nga namatay na sa miaging tuig, kinsa mitabang nako nga makabaton og pagpamatuod nga diha na kanako gikan sa sayo nakong panumduman. Idugang nako og padangat kini nga pasalamat ngadto sa akong mga igsoon, ug sa ilang matinud-anong mga kapikas, ingon man usab sa pamilya ni Lesa, nga daghan kanila nanambong gayud karon. Mopahayag usab ko niini nga pasalamat sa daghang kaparyentihan, mga higala, mga misyonaryo, mga lider, ug mga magtutudlo nga akong nakaila sa akong kinabuhi.
Bulahan ko nga suod nakong nakauban ang mga sakop sa Unang Kapangulohan, ang Napulog Duha, ang Seventy, ug ang kinatibuk-ang mga kapangulohan sa auxiliary. Akong ipahayag ang akong gugma ug pagtahud kaninyong tanan mga igsoon ug maningkamot nga mahimong takus sa atong padayon nga panag-uban. Ang Presiding Bishopric nagkahiusa gayud. Mingawon ko sa akong pakig-uban matag adlaw nila ni Bishop Gérald Caussé, Bishop Dean M. Davies, ug sa mga kaubanan.
Mibarug ko sa inyong atubangan isip ebidensya sa mga pulong sa Ginoo nga narekord diha sa unang seksyon sa Doktrina ug mga Pakigsaad: “Nga ang kahingpitan [sa] ebanghelyo mahimo tingali nga ikapahayag pinaagi sa mahuyang ug yano ngadto sa mga lumulupyo sa kalibutan, ug sa atubangan sa mga hari ug mga magmamando.” Kini nga mga pulong giunhan sa pamahayag sa Ginoo nga nagpakita sa gugma sa usa ka Amahan alang sa Iyang mga anak: “Busa, Ako ang Ginoo, nahibalo sa katalagman nga moabut diha sa mga lumulupyo sa yuta, mitawag sa akong sulugoon si Joseph Smith, Jun., ug namulong ngadto kaniya gikan sa langit, ug mihatag kaniya og mga sugo.”
Ang atong mahigugmaon nga Langitnong Amahan ug ang Iyang Anak, si Jehova, nga nahibalo sa katapusan gikan sa sinugdanan, miabli sa kalangitan ug sa usa ka bag-ong dispensasyon aron mabakwi ang mga kalamidad nga Ilang nahibaloan nga moabut. Si Apostol Pablo mihulagway sa umaabut nga mga kalamidad isip “mga panahon nga malisud.” Alang nako, nagsugyot kini nga ang buhong nga panalangin sa Langitnong Amahan alang sa atong pagpakabuhi sa lisud nga panahon mao nga kita nagpuyo usab sa kahingpitan sa panahon.
Samtang naghunahuna ko niining semanaha bahin sa akong kakulang, nakadawat ko og klaro nga impresyon nga parehong mipanton ug mihupay kanako: nga dili mag-focus sa unsay dili nako mahimo apan sa unsay akong mahimo. Makapamatuod ko sa yano ug bililhong mga kamatuoran sa ebanghelyo.
Kini ang mga pulong nga akong napakigbahin sa gatusan ka higayon ngadto sa mga miyembro sa Simbahan ug sa daghang dili mga miyembro: “Ang Dios mao ang atong [mapinanggaon] nga Langitnong Amahan. Kita Iyang mga anak. … Magsubo Siya kon kita mag-antus ug malipay kon kita mobuhat sa unsay husto. Gusto Siya nga makigsulti kanato, ug mahimo kita nga makigsulti Kaniya pinaagi sa sinsero nga pag-ampo. …
“Ang Langitnong Amahan mihatag kanato, nga Iyang mga anak, og paagi nga … makabalik aron makapuyo uban sa Iyang presensya. … Ang pinakamahinungdanon sa plano sa atong Amahan mao ang Pag-ula ni Jesukristo.”
Ang Langitnong Amahan mipadala sa Iyang Anak dinhi sa yuta aron sa pag-ula sa mga sala sa tanang katawhan. Niining yano ug bililhong kamatuoran ako mopamatuod, ug mobuhat sa ingon sa pangalan ni Jesukristo, amen.