Kanayon a Pagtalinaeden ti Pannakapakawan Dagiti Basolyo
Babaen ti pangpasanto a bileg ti Espiritu Santo a kas kanayon a kadkaduatayo, kanayon a mapagtalinaedtayo ti pannakapakawan dagiti basoltayo.
Maysa a napateg a ragup dagiti balikas nga inusar ni Ari Benjamin kadagiti pannursurona maipapan iti Mangisalakan ken ti Pannubbotna ti inulit-ulitko nga inad-adal ken inut-utob iti uneg ti adu a tawen.
Iti makapaawis a naespirituan a pangpakada a sermonna kadagiti tao a pinagserbian ken inayatna, inladawan ni Ari Benjamin ti kinapateg ti panangammo iti dayag ti Dios ken panangnanam iti ayatna, ti panangawat iti pannakapakawan ti basbasol, ti kanayon a pananglaglagip iti kinaindaklan ti Dios, ken ti inaldaw a panagkararag, ken panagtakder a natibker iti pammati. Inkarina pay a ti panangaramid kadagitoy a banag, “kanayonkayonto a naragsak, ken mapno iti ayat ti Dios, ken kanayon a pagtalinaeden ti pannakapakawan dagiti basolyo.”
Naipamaysa ti mensahek iti pagbatayan ti kanayon a panangpatalinaed ti pannakapakawan dagiti basoltayo. Ti kinapudno a nayebkas iti daytoy a ragup dagiti balikas ti makapatibker iti pammatitayo iti Apo a ni Jesucristo ken aramidennatayo a nasayaat a disipulo. Ikararagko a paregtaen ken pareggetennatayo ti Espiritu Santo bayat ti panangutobtayo a sangkamaysa kadagiti kangrunaan a naespirituan a kinapudno.
Naespirituan a Pannakayanak Manen
Mapadasantayo iti daytoy a biag ti pisikal a pannakayanak ken ti gundaway a naespirituan a pannakayanak manen. Binallaagandatayo dagiti propeta ken apostol a nga agriingtayo iti Dios, agbalintayo a “maipasngay manen,” ken agbalintayo a baro a parsua ken ni Cristo babaen ti panangawat iti biagtayo kadagiti bendision a naaramid a posible babaen iti Pannubbot ni Jesucristo. Ti “pammateg, panangngaasi, ken parabur ti Nasantuan a Mesias” ket mangtulong kadatayo a mangparmek iti kinamanagimbubukod ken dagiti ugali a kinaimot ti nailubongan a tao ken agbalin nga ad-adda a managparabur, nasingsingpet, ken nasansantuan. Nabalakadantayo nga agbiag iti wagas a “makapagtakder[tayo] nga awan mulitna iti sango [ti Apo] iti maudi nga aldaw.”
Ti Espiritu Santo ken dagiti Ordinansa ti Priesthood
Ginupgop ni Propeta Joseph Smith iti ababa ti napateg nga akem dagiti ordinansa ti priesthood iti ebanghelio ni Jesucristo: “Ti panagbalin a mayanak manen, ket isangbay ti Espiritu ti Dios babaen kadagiti ordinansa.” Yunay-unay daytoy makapasagepsep a palawag dagiti akem ti agpada nga Espiritu Santo ken dagiti sagrado nga ordinansa iti proseso iti naespirituan a pannakayanak manen.
Ti Espiritu Santo ti maikatlo a kameng ti Kinadios. Isu ti maysa a kinatao ti espiritu ken mangipaneknek iti amin a kinapudno. Kadagiti nasantuan a kasuratan, maitulad ti Espiritu Santo kas ti Mangliwliwa, maysa a mannursuro, ken maysa a mammaltiing. Mainayon pay, ti Espiritu Santo ti maysa a mamagpasanto a mangdalus ken manguram ti rugit ken dakes kadagiti kararua ti tao a kas ti panangdalus ti apuy.
Dagiti nasantuan nga ordinansa ti kangrunaan unay iti ebanghelio ti Mangisalakan ken iti proseso nga umasideg Kenkuana ken panagkalikagum a manggun-od iti naespirituan a pannakayanak manen. Sagrado nga aramid dagiti ordinansa nga addaan iti naespirituan a panggep, agnanayon a kinapateg, ken adda pakainaiganna kadagiti paglintegan ken annuroten ti Dios. Amin a pangisalakan nga ordinansa ken ti ordinansa ti sakramento ket masapul nga awtorisado ti maysa nga addaan kadagiti kasapulan a tulbek ti priesthood.
Dagiti ordinansa ti pannakaisalakan ken pannakaitan-ok a naannong iti naisubli a Simbaan ket ad-adda pay ngem dagiti ritual wenno simboliko nga aramid. Ketdi, buklen dagitoy dagiti awtorisado a wagas a pakaibukbokan dagiti bendision ken bileg ti langit iti biagtayo.
“Ket annongen daytoy nabilbileg a kinasaserdote ti ebanghelio ken iggemna ti tulbek dagiti kinadatdatlag ti pagarian, nga isu ti tulbek ti pannakaammo ti Dios.
“Ngarud, kadagiti ordinansa iti daytoy, naipakita ti bileg ti kinadios.
“Ket no awan dagiti ordinansa iti daytoy, ken ti panangituray ti kinasaserdote, saan a maipakita ti bileg ti kinadios kadagiti tao iti lasag.”
Napateg dagiti ordinansa a naawat ken nadayaw nga addaan iti integridad tapno magun-od ti bileg ti kinadios ken amin a bendision nga adda a sidadaan babaen ti Pannubbot ti Mangisalakan.
Pananggun-od ken Panangpatalinaed iti Pannakapakawan dagiti Basoltayo babaen dagiti Ordinansa
Tapno ad-adda a naan-anay a maawatan ti proseso a pakagun-odantayo ken kanayon a panangpatalinaed iti pannakapakawan ti basbasoltayo, masapul nga umuna a maawatantayo ti saan a maisina a pakainagan dagiti tallo a sagrado nga ordinansa a mangipaay ti pannakagun-od iti pannakabalin ti langit, panagbuniag babaen ti pannakaipabatok iti danum, pannakaipatay dagiti dakulap a para iti sagut ti Espiritu Santo, ken ti sakramento.
Panagbuniag babaen ti pannakaipabatok para iti pannakapakawan dagiti basol “isu ti pangrugian nga ordinansa ti ebanghelio” ni Jesucristo ken nasken nga umun-una ti pammati iti Mangisalakan ken ti napudno a panagbabawi. Daytoy nga ordinansa “ket maysa a tanda ken bilin nga intuding ti Dios para [kadagiti annakna] tapno makastrek iti pagarianna.” Maannong ti panagbuniag iti turay ti Aaronic Prresthood. Iti proseso ti yaasideg iti Mangisalakan ken ti naespirituan a pannakayanak manen, mangipaay ti panagbuniag iti kasapulan nga umuna a pannakadalus ti kararuatayo manipud iti basol.
Karaman ti katulagan ti panagbuniag dagiti tallo a napapateg a panagkumit: (1) tapno siaayat a mangawat iti bagbagitayo iti nagan ni Jesucristo, (2) tapno kanayon a laglagipen Isuna, ken (3) tapno tungpalen dagiti bilinna. Ti naikari a bendision iti panangdayaw iti daytoy a katulagan ket “tapno kanayon nga agtaeng ti Espirituna [kadatayo].” Ngarud, kasapulan ti panagbuniag iti panagsagana tapno maawat ti awtorisado a gundaway para iti kanayon a pannarabay ti maikatlo a kameng ti Kinadios.
“Ti panagbuniag [babaen iti] danum … ket nasken a sarunuen ti panagbuniag iti Espiritu tapno agbalin a naan-anay.” Kas iti insuro ti Mangisalakan ken ni Nicodemo, “Malaksid no mayanak ti tao iti danum ken iti Espiritu, saan a makastrek iti pagarian ti Dios.”
Dagiti tallo a palawag ni Propeta Joseph Smith a mangyunay-unay ti napateg a pakainaigan ti nagbaetan dagiti ordinansa ken panagbuniag babaen ti pannakaipabatok iti danum para iti pannakapakawan dagiti basol ken ti pannakaipatay dagiti dakulap para iti sagut ti Espiritu Santo.
Umuna a Palawag: “Nasantuan nga ordinansa ti panagbuniag a mangisagana tapno maawat ti Espiritu Santo; daytoy ti pagayusan ken tulbek a pakaitedanto ti Espiritu Santo.”
Maikadua a Palawag: “Kaslakayo nangbuniagi iti sangasako a darat no binuniaganyo ti maysa a tao, no saan a naaramid daytoy para iti pannakapakawan dagiti basol ken pananggun-od iti Espiritu Santo. Awan pateg ti panagbuniag iti danum no saan a patalgedan a miembro ti Simbaan ti maysa a tao—kayatna a sawen, ti panagbuniag iti Espiritu Santo.”
Maikatlo a Palawag: “Ti panagbuniag iti danum, nga awan ti panagbuniag iti apuy ken pannakiraman ti Espiritu Santo, ket awan serbina. Kasapulan nga agkadua dagitoy ken saan a mabalin a pagsinaen.”
Ti saan nga agbalbaliw a pagnaigan iti tunggal maysa dagiti pagbatayan ti panagbabawi, dagiti ordinansa ti panagbuniag ken yaawat iti sagut ti Espiritu Santo, ken ti nagloriaan a bendision ti pannakapakawan ti basbasol ket naulit a nayunay-unay kadagiti nasantuan a kasuratan.
Impakdaar ni Nephi, “Gapu ta ti ruangan a rumbeng a serkanyo isu ti panagbabawi ken pannakabuniag babaen iti danum; ket kalpasanna umayto ti pannakapakawan dagiti basolyo babaen iti apuy ken babaen iti Espiritu Santo.”
Impakdaar ti Mangisalakan mismo, “Ita daytoy ti bilin: Agbabawikayo, amin nga adda iti daga, ket umaykayo kaniak ket mabuniagankayo iti naganko, tapno mapasantokayo babaen ti panangawat ti Espiritu Santo, tapno makapagtakderkayo nga awan mulitna iti sanguanak iti maudi nga aldaw.”
Tipannakaipatay dagiti ima para iti sagut ti Espiritu Santo ket maysa nga ordinansa a maannong iti turay ti Melchizedek Priesthood. Iti proseso a yaasideg iti Mangisalakan ken ti naespirituan a pannakayanak manen, ti panangawat ti pangpasanto a bileg ti Espiritu Santo iti biagtayo ket makaaramid iti possible nga agtultuloy a pannakadalus ti kararuatayo manipud iti basol. Napateg daytoy makaparag-o a bendision gapu ta “saan a mabalin a makipagnaed iti Dios ti narugit a banag.”
Gapu ta miembrotayo iti napasubli a Simbaan ti Apo, nabendisionantayo nga agpada babaen ti intayo umuna a pannakadalus manipud iti basol a mainaig iti panagbuniag ken babaen ti potensial nga agtultuloy a pannakadalus manipud iti basol a namagbalin a posible babaen ti pannarabay ken pannakabalin ti Espiritu Santo—uray pay ti maikatlo a kameng ti Kinadios.
Panunotenyo no kasano nga agpannuray ti maysa a mannalon iti saan nga agbalbaliw a pagtuladan ti panagmula ken panagani. Ti pannakaawat iti pakainaigan ti panagtukit ken panagapitket kanayonpagtaudan ti panggep ken mangimpluensia iti amin a pangngeddeng ken panagtigtay ti maysa a mannalon iti amin a panawen ti tawen. Iti kasta met la a wagas, ti mapagsina a pagnanaigan dagiti ordinansa ti panagbuniag babaen ti pannakaipabatok para iti pannakapakawan dagiti basol ken ti pannakaipatay dagiti ima para iti sagut ti Espiritu Santo ket nasken a makaapekto iti tunggal aspeto ti kinadisipulotayo iti amin a panawen ti biagtayo.
Ti sakramento ti maikatlo nga ordinansa a kasapulan tapno maragpat ti bileg ti kinadios. Tapno ad-adda a naan-anay a mapagtalinaedtayo ti bagitayo nga awan mulitna manipud iti lubong, nabilintayo a mapan iti balay a pagkararagan ket mangidaton kadagiti sakramentotayo iti nasantuan nga aldaw ti Apo. Panunotenyo koma a dagiti simbolo ti dara ken bagi ti Apo, ti tinapay ken ti danum, ket agpada a binendisionan ken pinasanto. “O Dios, Agnanayon nga Ama, dawatenmi kenka iti nagan ti Anakmo, ni Jesucristo, a bendisionan ken pasantuem daytoy a tinapay [wenno daytoy a danum] kadagiti kararua dagiti amin a mairanud [wenno uminum] iti daytoy.” Ti kayat a sawen ti pasantuen ket aramiden a natarnaw ken nasantuan. Dagiti simbolo ti sakramento ket mapasanto kas panglagip iti kinatarnaw ni Cristo, iti naan-anay a panagpannuraytayo iti Pannubbotna, ken iti pagrebbengantayo a mangdayaw kadagiti ordinansa ken katulagantayo tapno “makapagtakdertayo nga awan mulitna iti sanguanan[na] iti maudi nga aldaw.”
Ti ordinansa ti sakramento ket maysa a nasantuan ken maulit-ulit nga awis nga agbabawi a sipupudno ken naespirituan a mapabaro. Ti aramid a pannakiranud iti sakramento, iti ken ti mismo, ket saan a mangsubbot iti basbasol. Ngem no sipapasnektayo nga agsagana ken makipagpaset iti daytoy nasantuan nga ordinansa nga addaan iti nasneban a puso ken napnuan babawi nga espiritu, kalpasanna maited kadatayo ti kari a kanayon nga agtaeng kadatayo ti Espiritu ti Apo. Ken babaen ti pangpasanto a bileg ti Espiritu Santo a kas agtultuloy a pannarabaytayo, mabalintayo a kanayon a pagtalinaeden ti pannakapakawan dagiti basoltayo.
Pudno a naparaburantayo iti gundaway iti linawas a mangamiris iti biagtayo babaen ti ordinansa ti sakramento, mangpabaro kadagiti katulagantayo, ken umawat iti kari daytoy a katulagan.
Nabuniagan Manen
No dadduma ipeksa dagiti Santo ti Ud-udina nga Aldaw ti tarigagay a mabuniaganda koma manen—ken tapno agbalinda a nadalus ken maikari kas iti daydi nga aldaw a naawatda ti umuna a pangisalakan nga ordinansa ti ebanghelio. Sidadayaw nga isingasingko man a saan a panggep ti Nailangitan nga Amatayo ken ti Patpatgenna nga Anak a mapasarantayo ti kasta a rikna ti naespirituan a pannakapabaro, pannakapasadiwa, ken pannakaisubli iti maminsan laeng iti biagtayo. Dagiti bendision ti pananggun-od ken kanayon a panangpatalinaed iti pannakapakawan dagiti basoltayo babaen kadagiti ordinansa ti ebanghelio ket mangtulong a maawatantayo a ti panagbuniag ket maysa a panawen ti panangrugi iti naespirituan a panagdaliasattayo iti daytoy a biag; saan a daytoy ti pagtungpalan a nasken a a paggagarantayo nga ulit-uliten a sarungkaran.
Dagiti ordinansa ti panagbuniag babaen ti pannakaipabatok, ti pannakaipatay dagiti ima para iti sagut ti Espiritu Santo, ken ti sakramento ket dagiti agkakanaig ken saan a mapagsisina a paspasamak; ketdi, napateg dagitoy kadagiti agkakanaig ken agkakadua a pagtuladan ti pannakasubbot. Tunggal sumaruno nga ordinansa ket mangingato ken mangpadakkel ti naespirituan a panggep, tarigagay, ken aramidtayo. Ti plano ti Amatayo, ti Pannubbot ti Mangisalakan, ken dagiti ordinansa ti ebanghelio ket makaipaay iti parabur a kasapulantayo tapno agtultuloy ken dumur-as iti tunggal binatog ken iti tunggal annuroten nga agturong iti agnanayon a pagtungpalantayo.
Kari ken Pammaneknek
Saantayo a perpekto a tattao a mangikarkarigatan nga agbiag ditoy daga a mayannurot iti naan-anay a plano ti Nailangitan nga Ama iti agnanayon a panagdur-as. Nagloriaan, manangngaasi, ken naiget dagiti naidawat a kasapulan ti planona. No dadduma mabalin a natibker dagiti pangngeddengtayo ken no dadduma mariknatayo nga adda pagkurangantayo. Mabalin a panunotentayo no naespirituan a makapagtungpaltayo met laeng iti bilin a tumakder nga awan mulitna iti sanguananna iti maudi nga aldaw.
Addaan iti tulong ti Apo ken babaen iti bileg ti Espirituna a “mangisuro [kadatayo] iti amin a banag,” pudno a mabendisionantayo a mangragpat kadagiti naespirituan a pagbalinantayo. Dagiti ordinasa ti mangawis iti naespirituan a panggep ken bileg iti biagtayo bayat ti panangikarigatantayo a mayanak manen ken agbalin a lallaki ken babbai ni Cristo. Mapapigsa dagiti pagkapsutantayo, ken maparmektayo dagiti limitasiontayo.
Uray no awan kadatayo ti makaragpat iti kinaperpekto iti daytoy a biag, makapagbalintayo nga ad-adda a maikari ken awan mulitna no datayo ket “nadalusan babaen iti dara ti Kordero.” Ikarik ken paneknekak a mabendisionantayonto nga addaan iti napigpigsa a pammati iti Mangisalakan ken nain-indaklan a naespirituan a pammatalged no kalikagumatayo a kanayon a pagtalinaeden ti pannakapakawan dagiti basoltayo, ken iti kamaudiananna, tapno makapagtakder nga awan mulitna iti sanguanan ti Apo iti maudi nga aldaw. Paneknekak daytoy iti sagrado a nagan ni Jesucristo, amen.