Pagsusupadian iti Amin a Banag
Ti oposision wenno pagsusupadian ti mangpalugod kadatayo a dumur-as nga agturong iti kayat ti Nailangitan a pagbalinantayo.
Nakasentro iti ebanghelio ni Jesucristo ti plano ti Nailangitan nga Amatayo iti pannakaisalakan para iti agnanayon a panagdur-as dagiti annakna. Ti plano, a nailawlawag iti agdama a paltiing, mangtulong kadakayo a maawatan ti adu a banag a pakaipasanguantayo iti daytoy a biag. Maipamaysa ti mensahek iti napateg nga akem ti oposision wenno pagsusupadian iti dayta a plano.
I.
Panggep ti mortal a biag para kadagiti annak ti Dios ti mangted kadagiti padas a kasapulan “tapno dumur-as nga agturong iti kinaan-anay ken kangrunaanna maamirisda ti nadiosan a pagtungpalanda kas agtawid iti agnanayon a biag.”1 Kas iti insuro ni Presidente Thomas S. Monson a sibibileg iti daytoy a bigat, dumur-astayo babaen ti panagaramid kadagiti pili, a nakasubokan kadatayo tapno ipakita nga agtungpaltayonto kadagiti bilin ti Dios (kitaen iti Abraham 3:25). Tapno masubok, nasken nga addaantayo iti karbengan nga agpili tapno pumili kadagiti pagpilian. Tapno mangted kadagiti alternatibo a pakausaran ti karbengantayo nga agpili, nasken nga addaantayo iti pagsusupadian.
Napateg met ti dadduma a paset ti plano. No agaramidtayo kadagiti biddut a pili—a talaga nga maaramidtayto—marugitantayo iti basol ket nasken a madalusantayo tapno makairugitayo nga agturong iti agnanayon a pagtungpalantayo. Nangipaay ti plano ti Ama iti wagas tapno maaramid daytoy, ti wagas a mangpennek kadagiti agnanayon a dawdawaten ti hustisia: bayadan ti Mangisalakan ti gatad tapno subbotennatayo manipud iti basbasoltayo. Ni Apo Jesucristo dayta a Mangisalakan, ti Bugbugtong nga Anak ti Dios nga Agnanayon nga Ama, a ti pangsubbot a sakripisiona—panagsagabana—ti nangbayad iti gatad para iti basbasoltayo no agbabawitayto kadagitoy.
Maysa kadagiti kasayaatan a pannakailawlawag ti naplano nga akem ti oposision wenno pagsusupadian ket adda iti Libro ni Mormon, iti pannursuro ni Lehi iti anakna a ni Jacob.
“Ta nasken, nga adda pagsusupadian ti amin a banag. No saan a kasta, … saan a maipatungpal ti kinalinteg, wenno ti kinadangkes, wenno ti kinasanto wenno kinarigat, wenno imbag ken dakes” (2 Nephi 2:11; kitaen met iti bersikulo 15).
Kas bungana, intuloy ni Lehi, “inted ti Apo a Dios iti tao ti karbengan nga agtignay iti bukodna a bagi. Gapuna, saan a makapagtignay ti tao iti bukodna a bagi malaksid no ar-ariten ti maysa wenno ti sabali” (bersikulo 16). Kapadana, iti agdama a paltiing ipakdaar ti Apo, “Nasken unay a sulisogen ti sairo dagiti annak ti tattao, wenno saanda nga agtignay iti bagbagida” (D&K 29:39).
Napateg ti pagsusupadian wenno oposision iti Minuyongan ti Eden. No saan nga inaramid da Adan ken Eva ti pili a nayam-ammo iti mortalidad, insuro ni Lehi, “nagtalinaedda koma iti kasasaad ti kinainosente, …agaramid iti saan a naimbag, gapu ta saanda nga ammo ti basol” (2 Nephi 2:23).
Manipud pay idi rugina, napateg ti karbengan nga agpili ken pagsusupadian iti plano ti Ama ken iti yaalsa ni Satanas a maibusor iti daytoy. Kas iti impalgak ti Apo ken ni Moises, iti konseho ti langit ni Satanas “pinanggepna a dadaelen ti kinawaya ti tao nga agpili” (Moises 4:3). Makita dagita a panagdadael kadagiti kondision nga indiaya ni Satanas. Immay iti sanguanan ti Ama ket kinunana: “Adtoy, adtoyak, ibaonnak, agbalinakto nga anakmo, ket subbotek amin a sangkataw-an, tapno awan ti mapukaw nga uray no maysa a kararua, ket awan duadua nga aramidek; gapuna itdem ti panagraemmo” (Moises 4:1).
Iti kasta, insingasing ni Satanas a mangipatungpal iti plano ti Ama iti wagas a manglapped iti pannakaipatungpal iti panggep ti Ama ken mangted ken ni Satanas iti gloriana.
Ti plano ni Satanas ti mangsigurado koma iti perpekto a panagpapada: daytoy ti “mangsubbot iti amin a sangkataw-an,” nga awan uray maysa a kararua ti mapukaw. Awan koma ti karbengan a pumili wenno panagpili ti asino man ken, ngarud, saan a kasapulan ti pagsusupadian wenno oposision. Awan koma ti pannubok, awan ti pannakapaay—ken awan ti balligi. Awan koma ti panagdur-as a mangragpat iti panggep ti Ama a tinarigagayanna para kadagiti annakna. Insurat dagiti nasantuan a kasuratan a nagbanag ti oposision ti Satanas iti maysa a “gubat idiay langit” (Apocalipsis 12:7), a nakagun-odan ti dua nga apagkatlo a paset dagiti annak ti Dios iti karbengan a mangpadas iti mortal a biag babaen ti panangpili iti plano ti Ama ken panangsupring iti yaalsa ni Satanas.
Paggep ni Satanas a gun-oden para iti bagina ti dayaw ken bileg ti Ama (kitaen iti Isaias 14:12–15; Moises 4:1, 3). “Nupay kasta,” kinuna ti Ama, “gapu ta immalsa kaniak ni Satanas, … imbilinko a nasken a mapapanaw” (Moises 4:3) a kadua ti amin nga espiritu a nangaramat iti karbenganda nga agpili a sumurot kenkuana (kitaen iti Judas 1:6; Apocalipsis 12:8–9; D&K 29:36–37). Gapu ta pinapanaw nga espiritu nga awanan iti bagi nga adda iti daga, tinarigagayan ni Satanas ken dagiti pasurotna a mangsulisog ken mangallilaw ken mangbalud kadagiti annak ti Dios (kitaen iti Moises 4;4). Isu a dayta a dakes, a nangsuppiat ken nanggandat a mangdadael iti plano ti Ama, ti talaga a nagpadaras iti daytoy, gapu ta ti oposision ti nangpaadda iti panagpili ken ti gundaway a pumili iti umno a mangiturong iti panagdur-as a dayta ti panggep ti plano ti Ama.
II.
Makita a ti sulisog nga agbasol saan laeng a kita ti oposision wenno pagsusupadian iti mortalidad. Insuro ni Ama Lehi a no saan a napasamak ti Pannakatnag, da Adan ken Eva “nagtalinaedda iti kasasaad iti kinainosente, nga awanan iti ragsak, gapu ta saanda nga ammo ti rigat” (2 Nephi 2:23). No awan ti mapadasan a pagsusupadian iti daytoy a biag, “nasken nga agkaykaysa ti amin a banag,” nga awan ti kinaragsak wenno kinarigat (bersikulo 11). Ngarud, intuloy ni Ama Lehi, kalpasan a pinarsua ti Dios ti amin a banag, “tapno matungpal ti agnanayon a paggepna iti panungpalan ti tao, … nasken nga adda pagsusupadian ti amin a banag a naparsua; a kas iti maiparit a bunga a maisupadi iti kayo ti biag; nasam-it ti maysa ket napait ti sabali” (bersikulo 15).2 Ti pannursurona iti daytoy a paset ti plano ti pannakaisalakan ti mangigibus kadagitoy a balikas:
“Adtoy, naaramid amin a banag ti nasaririt a makaammo iti amin a banag.
“Natnag ni Adan tapno adda tao; ket ti panggep dagiti tao, ket tapno maaddaanda iti ragsak” (dagiti bersikulo 24–25).
Ti pagsusupadian iti kita dagiti narigat a kasasaad a pakaipasanguantayo iti daytoy a biag ket paset pay ti plano a mangpadur-as kadatayo iti daytoy a biag.
III.
Mapadasantayo amin ti agduduma a kita ti pagsusupadian a mangsubok kadatayo. Sumagmamano kadagitoy a pannubok dagiti pannulisog nga agbasol. Sumagmamano dagiti karit iti biag nga awan pakainaigan ti bukod a basol. Sumagmamano dagiti dadakkel unay. Sumagmamano dagiti babassit. Sumagmamano dagiti agtultuloy, ken sumagmamano dagiti saan nga agpaut. Mapadasantayo amin daytoy. Ti oposision wenno pagsusupadian ti mangpalugod kadatayo a dumur-as nga agturong iti kayat ti Ama a Nailangitan a pagbalinantayo.
Kalpasan a naipatarus ni Joseph Smith ti Libro ni Mormon, kinasapulanna pay laeng ti nagsapul iti maysa nga agipabpablaak [publisher]. Saan a nalaka daytoy. Makapakapuy iti rikna ti kinakumplikado daytoy atiddog a manuskristo ken ti gatad ti panagprenta ken panagaramid iti ginasgasut a kopia daytoy. Immuna nga inasitgan ni Joseph ni E. B. Grandin, maysa nga agimalmaldit iti Palmyra, a nangkedked iti daytoy. Kalpasanna nagsapul iti sabali pay nga agimalmaldit iti Palmyra, a nagkedked met kenkuana. Nagbiahe isuna iti Rochester, 25 milia (40 km) ti kaadayona, ket inasitganna ti kalatakan nga agipabpablaak [publisher] iti makinlaud a Nueva York, a nagkedked met kenkuana. Kayat nga aramiden ti sabali pay nga agipabpablaak iti Rochester, ngem gapu kadagiti pasamak a naaramid saan a naawat daytoy nga alternatibo.
Naglabas dagiti lawas, ken nalabit a natikaw ni Joseph iti oposision iti panangipatungpal iti pagrebbengan nga imbilin ti Dios kenkuana. Saan nga inaramid ti Apo a nalaka daytoy, ngem inaramidna a posible daytoy. Ti maikalima a pananggandat ni Joseph, nagballigi ti maikadua a yaasidegna iti agipabpablaak iti Palmyra a ni Grandin.3
Kalpasan dagiti tawen, sililiday a naibalud ni Joseph iti Liberty Jail iti uneg ti adu a bulan. Idi nagkararag para iti gin-awa, imbaga ti Apo kenkuana nga “amin dagitoy a banag ipaayandaka iti padas, ket agbalindanto a pagsayaatam” (D&K 122:7).
Ammotayo amin dagiti dadduma pay a kita ti oposision a saan a gapu dagiti bukodtayo a basol, agraman ti panagsakit, pagkurangan, ken ipapatay. Inlawlawag ni Presidente Thomas S. Monson:
“Nalabit a sumagmamano kadakayo no dadduma ti immararaw iti panagsagabayo, masmasdaaw no apay nga impalubos ti Nailangitan nga Amatayo a mapasaranyo dagiti ania man a pannubok a sangsanguenyo. …
Nupay kasta, ti biagtayo iti daga ket saan a naairanta nga agbalin a nalaka wenno kanayon a makaay-ayo. Ti Nailangitan nga Amatayo … ammona a masursuruan ken dumur-as ken mapatarnawtayo babaen dagiti narigat a karit, makauppapay a ladingit, ken naririgat a pili. Mapadasan ti tunggal maysa kadatayo dagiti naliday nga aldaw no pumusay dagiti ipatpategtayo, malidlidayantayo no agkapuy ti salun-attayo, mariknatayo ti panagmaymaysa no kasla binaybay-andatayon dagiti ipatpategtayo. Dagitoy ken dadduma pay a pannubok a sagsagabaentayo ti pudno a mangsubsubok iti kabaelantayo nga agibtur.”4
Dagiti panagkagumaantayo a mangpasayaat iti panangngilin wenno panagdaydayawtayo iti aldaw ti Sabbath ket pagwadan ti saan unay a narigat nga oposision. Imbilin ti Apo a dayawentayo ti aldaw ti Sabbath. Nalabit a sumagmamano kadagiti pilitayo ti manglabsing iti dayta a bilin, ngem dagiti dadduma pay a pagpilian no kasano ti mangbubos iti orastayo ket maysa laeng a saludsod no aramidentayo kadi ti nasayaat laeng wenno nasaysayaat wenno kasayaatan.5
Tapno mailawlawag ti oposision iti pannulisog, iladawan ti Libro ni Mormon ti tallo a wagas nga aramidento ti sairo kadagiti maudi nga aldaw. Umuna, isu ket “kuriruennanto iti dayta nga aldaw ti puspuso dagiti annak ti tattao, ket gutugotenna ida a manggura iti banag a nasayaat” (2 Nephi 28:20). Maikadua, isu ket “pagtalnaennanto dagiti dadduma, ket allilawennanto [dagiti miembro] nga iturong iti nailubongan a talged,” a kunkunada: “Nasayaat amin iti Zion” (bersikulo 21). Maikatlo, ibagananto kadatayo “awan ti impierno; ken … saanak a sairo, ta awan ti kasta” (bersikulo 22), ket ngarud awan ti umno ken biddut. Gapu iti daytoy a pagsusupadian wenno oposision, naballaagantayo a saan a “mangyaleng-aleng iti Zion!” (bersikulo 24).
Ti Simbaan iti nadiosan a misionna ken datayo iti bukodtayo a biag ket kasla maipaspasangotayo iti nakarkaro nga oposision iti agdama. Nalabit a bayat ti panagdur-as ti Simbaan iti pigsana ken dumurdur-astayo a miembro iti pammati ken panagtulnog, pumigpigsa met ni Satanas iti puersa ti panagsupadina wenno oposision tapno agtultuloytayto a maaddaan iti “pagsusupadian iti amin a banag.”
Aggapu kadagiti miembro ti Simbaan ti sumagmamano iti daytoy a pagsusupadian wenno oposision. Dagiti tao nga agusar iti personal a panagrason wenno kinasirib tapno mangsupring iti direksion ti propeta ket aw-awaganda ti bagbagida iti—”dagiti mapagtalkan nga oposision.” Nupay nalabit a mayannatup para iti maysa a demokrasia, saan a nainrasonan daytoy a konsepto iti gobierno ti pagarian ti Dios, a pakadayawan wenno maaw-awat dagiti panagsaludsod ngem saan ti oposision wenno pagsusupadian (kitaen iti Mateo 26:24).
Kas maysa pay a pagarigan, adu dagiti banag iti nagkauna a pakasaritaan iti Simbaantayo, kas iti inaramid ni Joseph Smith wenno dina inaramid iti tunggal pasamak, nga us-usaren ti dadduma kas maysa a batayan para iti oposision. Kunak iti amin, aramatenyo ti pammatiyo ket agpannuraykayo iti pannursuro ti Mangisalakan a nasken nga “ammotayo ida babaen dagiti bungada” (Mateo 7:16). Ikarkarigatan unay ti Simbaan a mangipakaammo kadagiti kasuratan nga adda kadatayo, ngem kalpasan a maipablaak ti amin, dagiti miembrotayo no dadduma ket mabati nga agsalsaludsod maipapan kadagiti banag a saan a marisut babaen iti panagadal. Dayta ti bersion ti “pagsusupadian iti amin a banag” iti pakasaritaan ti Simbaan. Adda dagiti banag a masursuro laeng babaen ti pammati (kitaen iti D&K 88:118). Nasken a naan-anay nga agpannuraytayo iti pammaneknek a naawattayo manipud iti Espiritu Santo.
Manmano a biangan ti Dios ti karbengan a panagpili ti asino man kadagiti annakna para iti pannakagin-awa dagiti dadduma. Ngem palag-anenna dagiti dagensen dagiti sagabaentayo ken papigsaennatayo a mangibaklay kadagitoy, kas iti inaramidna kadagiti tao ni Alma iti daga ti Helam (kitaen iti Mosiah 24:13–15). Saanna a lapdan dagiti amin a pakadadaelan, ngem sungbatanna dagiti kararagtayo a mangbaliktad kadagitoy, kas iti inaramidna iti napigsa a bagyo a naidumduma ti karungsotna a nagbutbuteng tapno lapdan ti dedikasion ti templo iti Fiji;6 wenno pakapsutenna dagiti epekto dagitoy, kas iti inaramidna iti panagbomba dagiti terorista a nangkettel iti biag ti adu a tattao iti Brussels airport ngem sinugatanda laeng ti uppat a misionariotayo.
Iti amin nga oposision iti daytoy a biag, impanamnama ti Dios kadatayo nga Isunto ti “mangted-pateg iti sagabaen[tayo] para iti pakairanudan[tayo]” (2 Nephi 2:2). Nasuruantayo pay a maawatan dagiti padastayo iti daytoy a biag ken dagiti bilinna iti konteksto ti naindaklan a planona iti pannakaisalakan, a mangibaga kadatayo iti panggep ti biag ken mangted kadatayo iti pammatalged ti maysa a Mangisalakan, nga iti naganna paneknekak ti kinapudno dagitoy a banag. Iti nagan ni Jesucristo, amen.