Nigcine Njalo Ukuthethelelwa Kwezono Zenu
Ngamandla okungcwelisa kaMoya oNgcwele njengomlingani wethu onathi njalo, singagcina njalo ukuthethelelwa kwezono zethu.
Umusho ojulile osetshenziswe yiNkosi uBenjamini ezimfundisweni zayo ngoMsindisi neNhlawulo Yakhe ubulokhu uyisihloko esivela njalo ezifundweni zami nasekuzindleni eminyakeni eminingi edlule.
Kwintshumayelo yakhe yokuvalelisa eshukumisayo ngokomoya kubantu ayebakhonzile futhi ayebathanda, iNkosi uBenjamini yachaza ukubaluleka kokwazi inkazimulo kaNkulunkulu nokuzwa uthando Lwakhe, ukuthola ukuthethelelwa kwezono, ukukhumbula njalo ubukhulu bukaNkulunkulu, nokukhuleka nsuku zonke nokuma ngokuqina ekukholweni.1 Yabuye yathembisa ukuthi ngokwenza lezi zinto, “niyohlala nithokoza, futhi nigcwaliswe ngothando lukaNkulunkulu, futhi niyohlala nigcine ukuthethelelwa kwezono zenu.”2
Umyalezo wami ugxila kumgomo wokugcina njalo ukuthethelelwa kwezono zethu. Iqiniso eliveziwe kulomusho lingaqinisa ukholo lwethu eNkosini uJesu Kristu futhi lujulise ubufundi bethu. Ngiyakhuleka ukuthi uMoya oNgcwele ungasigqugquzela futhi usakhe njengoba sicabanga ndawonye amaqinso omoya abalulekile.
Ukuzalwa Kabusha Ngokomoya
Emhlabeni sidlula ekuzalweni ngokwenyama futhi sibanethuba lokuzalwa kabusha ngokomoya.3 Siyanxuswa ngabaprofethi nabaphostoli ukuba sivukele kuNkulunkulu,4 “sizalwe kabusha,”5 futhi sibe yizidalwa ezintsha kuKristu6 ngokwamukela ezimpilweni zethu izibusiso ezitholakala ngenxa yeNhlawulo kaJesu Kristu. “Izenzo ezinhle, nesihawu, kanye nomusa kaMesiya oNgcwele”7 zingasisiza ukunqoba amathuba okuziqhayisa nokuzicabangela komuntu wemvelo futhi sibe nokuzidela, nomusa, futhi sibe ngabangcwele. Siyalwa ukuba siphile ngendlela yokuthi sikwazi ukuthi “sime singenasici phambi [kweNkosi] ngosuku lokugcina.”8
UMoya oNgcwele neziMiso zobuPristi
UmProfethi uJoseph Smith wafingqa ngamafushane indima ebalulekile yezimiso zobupristi evangelini likaJesu Kristu: “Ukuzalwa kabusha, kuza ngoMoya oNgcwele ngenxa yezimiso.”9 Lesi sitatimende esikhanyisayo sigqamisa indima yoMoya oNgcwele kanye neyezimiso ezingcwele ekuqhubekeni kokuzalwa kabusha ngokomoya.
UMoya oNgcwele uyilungu lesithathu kubuNkulunkulu. Ungumuntu onesithunzi somoya futhi ufakaza ngakho konke okuyiqiniso. Emibhalweni engcwele, uMoya oNgcwele ubizwa ngoMduduzi,10 umfundisi,11 kanye nomembuli.12 Ngaphezu kwalokho, uMoya oNgcwele ungumngcwelisi13 ongcwelisa futhi ohlanza amanyala nobubi emimoyeni yabantu njengomlilo.
Izimiso ezingcwele zibaluleke kakhulu evangeleni likaMsindisi nasenqubweni yokuza Kuye nokubheka ukuzalwa kabusha ngokomoya. Izimiso ziyizenzo ezingcwele ezinezinhloso zokomoya, ukubaluleka okuphakade, futhi ezihlobene nemithetho nezimiso zikaNkulunkulu.14 Zonke izimiso ezisindisayo nesimo sesidlo esingcwele kumele zigunyazwe ngoyedwa onezikhiye zobupristi ezidingakalayo.
Izimiso zensindiso nokuphakanyiswa eziphathwa eBandleni likaJesu Kristu elivusiwe akusizona izinto ezenziwayo nje. Kunalokho, ziyizindlela ezigunyaziwe lapho izibusiso namandla asezulwini angehlela khona ezimpilweni zethu kumuntu ngamunye.
“Futhi lobu buphristi obukhulu buphethe ivangeli futhi buphethe nesikhiye sezimfihlakalo zombuso, ngisho isikhiye sokwazi ngoNkulunkulu.
“Ngakho-ke, ezimisweni zabo, amandla obunkulunkulu ayembulwa.
“Futhi ngaphandle kwezimiso zabo, negunya lobuphristi, amandla obunkulunkulu awembulwa kubantu enyameni.”15
Izimiso ezamukelwe futhi ezihlonishwa ngobuqotho zibalulekile kakhulu ekutholeni amandla obunkulunkulu futhi nazozonke izibusiso ezikhona ngenxa yeNhlawulo yoMsindisi.
Ukuthola futhi Nigcine Ukuthethelelwa Kwezono ngenxa yeziMiso
Ukuze siqonde kabanzi indlela esingathola futhi sigcine njalo ukuthethelelwa kwezono zethu, sidinga ukuthi siqonde ubudlelwane obungahlukaniseki phakathi kwezimiso ezintathu ezingcwele ezisivulela indlela yokuthola amandla asezulwini kuqala: umbhabhadiso ngokucwiliswa, ukubekwa izandla ukuze uthole isipho soMoya oNgcwele, nesidlo esingcwele.
Umbhabhadiso ngokucwiliswa ukuze kuthethelelwe izono “yisimiso sokungeniswa sevangeli”16 likaJesu Kristu futhi kumele sendulelwe wukholo kuMsindisi kanye nokuphenduka obuqotho. Lesi simiso “[si]wuphaphu nomyalelo uNkulunkulu awubekele [izingane Zakhe] ukuze zingene embusweni Wakhe.”17 Umbhabhadiso wenziwa ngegunya lobuPristi buka-Aroni. Endleleni yokuza kuMsindisi nokuzalwa kabusha ngokomoya, umbhabhadiso unikeza umphefumulo wethu ukungcweliswa kokuqala esonweni.
Isivumelwano sombhabhadiso sinezibopho ezinezisisekelo ezintathu: (1) ukuba sivume ukuthatha igama likaJesu Kristu, (2) sikhumbule Yena ngaso sonke isikhathi, futhi (3) sigcine imiyalelo Yakhe. Isibusiso esithenjiswa sona uma sigcina ngobuqotho lesi sivumelwano “ukuthi [singa] hlala njalo sinoMoya wakhe [kithi].”18 Ngakho-ke, umbhabhadiso uyisilungiselelo esibalulekile ukuthola njalo ithuba lomlingani welungu lesithathu lobuNkulunkulu ngokomthetho.
“Umbhabhadiso ngamanzi … ufanele ulandelwe umbhabhadiso woMoya ukuze uphelele.”19 Njengoba uMsindisi afundisa uNikhodimu, “Uma umuntu engazalwa ngamanzi nangoMoya, ngeke angene embusweni kaNkulunkulu.”20
Izitatimende ezintathu eziphuma kumProfethi uJoseph Smith zigcizelela isixhumanisi esimqoka phakathi kwezimiso zombhabhadiso ngokucwiliswa ukuze uthethelelwe izono nokubekwa izandla ukuze uthole isipho soMoya oNgcwele.
Isitatimende 1: “Umbhabhadiso uyisimiso esingcwele esilungiselela ukwemukela uMoya oNgcwele; uyindlela nokhiye osingathwa ngayo uMoya oNgcwele.”21
Isitatimende 2: “Kufana nokubhabhadisa isaka lenhlabathi ulibize ngomuntu, uma kungenzelwe ukuthethelela izono nokwemukela uMoya oNgcwele. Umbhabhadiso ngamanzi qha ungumbhabhadiso ongaphelele, futhi awusizi ngalutho ngaphandle kwalenye ingxenye—pheculezi, umbhabhadiso woMoya oNgcwele.”22
Isitatimende 3: “Umbhabhadiso wamanzi, awunamsebenzi ngaphandle kombhabhadiso womlilo nokaMoya oNgcwele. Ibalulekile futhi ixhunywe ngokungahlukaniswa.”23
Ukuhlangana okuqhubekayo phakathi komgomo wokuphenduka, nesimiso sombhabhadiso nokwamukela isipho sikaMoya oNgcwele, nesibusiso esimangalisayo sokuthethelelwa izono kugqanyiswe ngokuphindelela emibhalweni engcwele.
UNefi wathi, “Isango okufanele ningene ngalo ngukuphenduka kanye nokubhabhadiswa ngamanzi; bese kuza ukuthethelelwa kwezono zenu ngomlilo kanye nangoMoya oNgcwele.”24
UMsindisi uqobo Lwakhe wamemezela ethi, “Manje lona ngumyalelo: Phendukani, nonke mikhawulo yomhlaba, futhi nize kimi futhi nibhabhadiswe egameni lami, ukuze ningcweliswe ngokwamukela uMoya oNgcwele, ukuze nime ningenasici phambi kwami ngosuku lokuphela.”25
Ukubeka izandla ukwemukela isipho sikaMoya oNgcwele kuyisimiso esenziwa ngegunya lobuPristi bukaMelkisedeki. Endleleni yokuza kuMsindisi nokuzalwa kabusha ngokomoya, ukwemukela amandla angcwelisayo kaMoya oNgcwele ezimpilweni zethu kuvula ithuba lokuba imiphefumulo yethu ihlanzwe ngokuqhubekayo esonweni. Lesi sibusiso esithokozisayo sibalulekile njengoba “akukho nto engcolile engahlala noNkulunkulu.”26
Singamalungu eBandla leNkosi elivusiwe, sibusiswe kabili ngokuhlanzwa kwethu okokuqala esonweni okumelene nombhabhadiso futhi nethuba lokuthi kuqhubeke kusihlanze esonweni okwenzeka ngenxa yobuhlobo namandla kaMoya oNgcwele—ngisho ilungu lesithathu lobuNkulunkulu.
Cabanga ukuthi umlimi uthembele kanjani kumfanekiso wokutshala nokuvuna. Ukuqonda ukuhlangana phakathi kokutshala nokuvuna kungumthombo omile onesizathu futhi kunomthelela kuzo zonke izinqumo nezenzo umlimi azenzayo kuzo zonke izinkathi zonyaka. Ngakho-ke, ukuxhumana okungenakuhlukaniswa phakathi kwesimiso sokubhabhadiswa ngokucwiliswa ukuze uthethelelwe izono nokubekwa izandla ukuze uthole isipho soMoya oNgcwele kufanele kube nomthelela kuzo zonke izingxenye zobufundi bethu kuzo zonke izikhathi ezimpilweni zethu.
Isidlo esingcwele yisimiso sesithathu esidingakalayo ukuze sikwazi ukuthola amandla obunkulunkulu. Ukuze sizigcine singcwele singenasici ezweni, siyalwa ukuba siye endlini yomkhuleko futhi sinikele ngeminikelo yethu osukwini olungcwele lweNkosi.27 Ngicela ukuba nicabangisise ukuthi izifanekiselo zomzimba kanye negazi leNkosi, isinkwa kanye namanzi, kokubuli kuyabusiswa futhi kuyangcweliswa. “O Nkulunkulu, Baba waPhakade, siyakucela egameni leNdodana yakho, uJesu Kristu, ukuthi ubusise futhi ungcwelise lesi sinkwa [noma lawa manzi] emiphefumulweni yabo bonke labo abasidlayo [noma abaphuzayo].”28 Ukungcwelisa ukwenza into ibe msulwa futhi ibe ngcwele. Izifanekiselo zesidlo esingcwele ziyangcweliswa ukukhumbula ubumsulwa bukaKristu, nokwethembela kwethu okuphelele kwiNhlawulo Yakhe, futhi nesibopho sethu sokuhlonipha izimiso nezivumelwano zethu ukuze sizokwazi “ukuma singenasici phambi [Kwakhe] ngosuku lokuphela.”29
Isimiso sesidlo esingcwele kuyisimemo esincgwele esiphindiweyo sokuthi siphenduke ngobuqotho futhi sivuselelwe ngokomoya. Isenzo sokwamukela isidlo esingcwele, ngokwaso, asithetheleli izono. Kodwa ngesikhathi silungiselela ngokujula futhi sibambe iqhaza kulesi simiso esingcwele ngenhliziyo elusizi kanye nomoya odabukileyo, lapho-ke isithembiso wukuthi uMoya weNkosi uyoba nathi njalo . Nangamandla kaMoya oNgcwele okungcwelisa njengomlingani wethu, singagcina njalo ukuthethelelwa kwezono zethu.
Sibusisiwe ngempela masonto onke ngethuba lokuba sihlole izimpilo zethu ngaso isimiso sesidlo esingcwele, sivuselele nezivumelwano zethu, futhi sisamukele lesithembiso sesivumelwano.30
Ukubhabhadiswa Kabusha
Ngezinye izikhathi abaNgcwele beziNsuku zokuGcina bafisa ukuba bangabhabhadiswa kabusha—ngokunjalo babe msulwa futhi bafaneleke njengosuku lapho bamukela khona okokuqala izimiso ezisindisayo zevangeli. Ngenhlonipho ngicela ukuphakamisa ukuthi uBaba wethu oseZulwini neNdodana Yakhe eThandekayo abafisi ukuthi sizwe lemizwa yokuvuselelwa ngokomoya, ukuzizwa sibasha, nokubuyiselwa kanye vo ezimpilweni zethu. Izibusiso zokuthola futhi sigcine ukuthethelelwa kwezono zethu ngokwezimiso zevangeli zisisiza ukuthi siqonde ukuthi umbhabhadiso uyiphuzu lokusuka endleleni yethu yangokomoya sisasemhlabeni; akusiyona indawo okumele sifise ukubuyela siyivakashela njalo.
Izimiso zombhabhadiso ngokucwiliswa, nokubekwa izandla ukuze uthole isipho soMoya oNgcwele, kanye nesidlo esingcwele akusiyona imicimbi ehlukene; kunalokho, kuyizakhi ezihlangene futhi ezikhulisanayo emfanekisweni wenqubekela phambili. Isimiso esilandela esinye siphakamisa futhi sinweba inhloso yethu ngokomoya, isifiso, kanye nesenzo. Isu likaBaba, neNhlawulo yoMsindisi, kanye nezimiso zevangeli kusinika umusa esiwudingayo ukuqhubekela phambili umugqa phezu komunye umugqa kanye nomyalelo phezu komunye umyalelo ekuyeni phambili kwikusasa lethu laphakade.
Isethembiso nobuFakazi
Singabantu abangaphelele abazama ukuphila emhlabeni ngokwesu eliphelele likaBaba oseZulwini lenqubekela phambili yaphakade. Izidingo zesu Lakhe ziyamangalisa, zinesihawu, futhi zinzima. Ngezinye izikhathi singazizwa sinomfutho bese kwezinye sizizwe sengathi asanele. Singamangala sizibuze ukuthi siyokwazi ngokomoya ukufeza umyalelo wokuma phambi Kwakhe singenasici ngosuku lokuphela na.
Ngosizo lweNkosi nangamandla oMoya Wakhe “[okusi]fundisa zonke izinto,”31 nangempela singabusiswa ukubona izinto ezingenzeka kithi ngokomoya. Izimiso zimema isizathu sangokomoya namandla ezimpilweni zethu njengoba sizama ukuzalwa kabusha sibe amadoda namadodakazi kaKristu.32 Ubuthakathaka bethu bungaqiniswa, nokulinganiselwa kwethu kunganqotshwa.
Yize kungekho namunye ongakwazi ukuzuza ukuphelela du kulempilo, singafaneleka kancane kancane futhi singabinasici njengoba “sihlanzwe yigazi le Mvana.”33 Ngiyathembisa futhi ngiyafakaza sizobusiswa ngokholo olwandayo kuMsindisi kanye nesiqiniseko esandayo ngokomoya ngesikhathi sibheka ukugcina njalo ukuthethelelwa kwezono zethu futhi, ekugcineni, sime singenasici phambi kweNkosi ngosuku lokuphela. Ngiyafakaza ngalokhu egameni elingcwele likaJesu Kristu, amen.