![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fe0%2F85%2Fe085e8552cfe374feb441aed7797f9020caafb7d%2Fe085e8552cfe374feb441aed7797f9020caafb7d.jpeg/full/!250,/0/default)
Pweinen Manaman en Priesthood
Kitail kin kak kapakap, kaisihsol, onop, rapahki, iang sarawi oh papah nin duwen ohl en Koht emen pwe kitail en kak alehdi manaman en prihsduhdo?
Sounpwung wenou samwalahro nan kapokon lap en Okotohpe 2015, I koasoaieng riatail lih en nan mwomwohdiso wet duwen arail pwukoah sarawi me re alehdier ni arail wia sapwelimen Kauno serepein kan. Met I men uhd koasoaiahieng kumwail riei ohl akan duwen amwail pwukoah sarawi kan ni amwail wia sapwelimen Kauno pwutakei. Ni ahi seiloak seli nan sampah, I kin medemedewe soangen kehlail oh mwahu me ohl oh mwahnakapw en nan mwomwohdiso wet ahneki. I sohte kak wadekada wen mohngiong me kumwail kamwahuialahr oh mour kan me kumwail sewesedahr. Kalahngan ohng kumwail!
Nan ahi koasoai en tiepene me nekehro, I koasoaiahda duwen irair kansensuwed me I ahnekidier ni ahi wia toaktehn mohngiong, ahi sohte kak kapitala mour en sin serepein riemen. I pekihda rehn ara pahpao ma I kak ekis koasoaiahda duwen arail peneineio.
Soumwahu en mohngiong me kin pein miehier sang ni ipwidi wiawiongehr nein Ruth oh Jimmy Hatfield seri silimen. Neira tepin seri, Jimmy Jr., mehla sang ni sohte petehk mwahu. I iangehr men kihda ahi sawas ni ansou me ira raprapahki sawas ohng neira serepein ko, Laural Ann oh rie me tikitiko, Gay Lynn. I nsensuwedkihla mehlel ni ansou me serepeinko pwon mehla mwurin koadoahkpera ah wiawihiero.1 I wehwehki wen palingehn en Ruth oh Jimmy ah luwetala mehlel.
Ansou kei mwurin mwo, I esehda me ira nsensuwedla pahi oh mwomwohdisoht. Kereniong sounpar weneisek, I wie nsensuwedki irairo oh kin sengisengki duwen peneinei en Hatfields. Pak tohto I song en daper irail di, ahpw sohte kak.
Ehu pwohngo nan Mehi me nekehro, I pwourkihda ahi kilangada sin serepein riemeno sang nan sapwen ngehno. Mendahte ahi sohte udahn kilang ira ni paliwar, ahpw I kak kehn me ira mih limwai. I rong ara pekipek. Ara pekipekwet me sansal mwahu oh mwotomwot: “Brother Nelson, se saikinte katengtengdi! Ke kak seweseikiht?” Mwuri iahpw esehda me ara nohno mehlar oh ara pahpao te oh riera kisin pwutak men me momourte.
Sang ni en Laural Ann oh Gay Lynn ara pekipek, I pwurehng song en daperdi ara pahpao me kin mihmi rehn nah pwutak Shawn. Ansou wet re mweidada ien tuwong ira.
Nan June o, I kelepwidi mwohn Jimmy, me met sounpar 88 oh koasoaieng. I koasoaiahieng duwen pekipek me nah serepein ko pekio oh ndang me I kak wia tiahk sarawi en katengteng penehn ih oh ah peneinei. I pil koasoaiahieng me e pahn ekis werei ih oh nah pwutako en kak kaunopada ira en iang doulong nan tehnpas sarawio, ni ira pwon ahr saik iang alehdi tiahk sarawi en nan tehnpas sarawi.
Ngehnen Kauno me inenen kehlail nan tuhpene o. Oh ansou me Jimmy oh Shawn mweidada ahi pekipeko, udahn I daulihala peren! Ira ehuong ara stake president o, pisopo, home teacher ko, oh ward mission leader, oh iangahki misineri pwulopwulko oh pwopwoudko me iang wia misineri. Oh sohte nohn werei, nan tehnpas sarawi en Payson Utah, I ahnekihdi ansou mwahu en kak katengepene Ruth oh Jimmy ohng neira seri pahmeno. Wendy oh ngehi sengisengkihla soangen kemwekid kesempwal me wiawihiero. Mohngiong tohto me maiaudahr nan rahno.
Ni ahi kin pwurehng tamanda dahme wiawihero, I kapinga Jimmy oh Shawn oh dahme ira mweidada ira en wiahier. Re wiahla aramas me i men wiahla. Ma I kak alehdi dahme mih nan ahi mohngionget, iei e pahn koaros ohl oh pwutak en mwomwohdiso wet ren kak kasalehda eimah, kehlail, oh karakarahk en pahpa oh pwutak menet. Re mweidada ren ahneki mahk oh mweidala medek oh mwokid en mahsoko. Re inengieng ren alehda oh idawehn kaweid kan sang rehn kaun en priesthood kan pwe Tomw en Sises Kraiso en kamwakelehda oh kamarainih irah da. Emen emen ira inengieng irahn wiahla ohl me warohng en kol priesthood en melkisedeko.”2
Ken alehda iei me wehwehki utungada wen toutou me kak pwokpwokdahu. E wia likilik ehu ken alehda priesthood o, me iei manaman laud oh mweimwei ma sang rehn Koht. Medewe met: priesthood me pwilpwildier pohtail iei ihte manamanoh mweimwei me Kauno kepingkihda sampah oh sampah teikan, kaunki nanleng oh sampah, oh pwongkihda Sapwellime seri loaloapwoat akan.3
Me keren, Wendy oh ngehi iang kapokon ehu me sohn kesengki organ o onopadahr pwe en kesengki koul en ritingadahu. E kilkilang koulo oh peh ko onopadahr pohn kih ko. Ni ah tepida padik kih ko, ah e sohte ngile. I mwengininginiong Wendy nda, “sohte nah lioal. ” I medewe me mie mehkot me kawuhdi lioalo en kak lela nan kesengo.
Rieiko, ni soangen mwohmwehte, I masak me e nohn tohtohla ohl me kolokolehr mweimwei en priesthood o ahpw sohte ahneki manaman en priesthood o pwehki wasa me manamano kin tang iehu pon kilahr dihp me rasong pohnmwahso, likamw, aklapalap, mour suwed, de kin kediropwkihla kopwehn sampah.
I masak me e tohtohla irail kan me alehda priesthood kin wiahda kisin doahk tikitik de udahn sohte wiahda mehkot pwehn kalaudehla ahr koahiek en alehdi manaman sang nanleng. I pwunodiki irail koaros priesthood me sohte ahneki madamadau mwakelekel kan, pepehm sakanakan kan, de mwekid sakanakan kan de me kin wiakawe arail pwoud de neirail serih kan, me elehieng irail en kawuhdi arail kak en alehdi manaman en priesthood o.
I masak me e tohtohla me mweidala ahr saledek en lohdi pahn imwintihtio oh kin nda ni ahr mwekid, “I katapaniki laud ien kansenamwahu ih pein ngehi sang ni ahi pahn ahneki en Sounkomouro manaman pwehn kapaikihda mehteikan.”
Rieiko, I periki, me ekei kitail ehu rahn pahn pirida oh tehkada soangen manaman dah ehu mwo oh ahniki koluhla laud me re nohn nsenohkihla rapahki manaman en kaunda ekei de manaman nan doadoahk sang esehla en onopiki mwahu manaman en Kauno.4 President George Albert Smith kaweidki “kitail sohte mihmi met pwe kitail en kesehla mwahl ansou nan mouret oh kohlahng nan ehu wasa me mwahu; ahpw kitail mih met pwe kitail en nantiong warohng la ansou koaros ohng pwukoah me Samatail Nanleng kupwuriki kitail en wiahla mwurin mour wet.”5
Dahme aramas emen pahn kesehlahki ah ansou oh mih nan sapwung me Esau wiadahro6 ni ah lukwerohngehr me e pahn alehdi kapai koaros me pahn kohsang rehn Abrahm?7
I peki ni ngidingid ohng emen emen kitail en warohng atail kapwukoah kan en alehda priesthood o. Ni ansou kohkohdo kan, irailte me doadoahngki arail priesthood ko ni mehlel, me ngoangki rapahki kasukuhl sang rehn Kauno Koht, me pahn kak en kapaiada, kaweid, doarehla, kakehlaka, oh kamwahuiala mehteikan. Ihte ohl me wiahier wen ah kak pwehn warohng manaman en priesthood o me pahn kak wahdo mehkot koapwuriamwei ohng irail kan me e kin poakpoake oh kolokol ah pwoud oh ah peneinei ni soanamwahu, met oh pil kohkohlate soutuk.
Dahme anahn pwehn alehdi soangen manaman wet? Sapwelimen Sounkomouro wahnpoaroan o, Peter—Peter ohte me iangih Seims oh Sohn kihdi priesthood o pohn Joseph Smith oh Oliver Cowdery8—kihda anahn kei me kitail anahne rapahki pwehn iang wia“tohn ale sohso sarawio.”9
E ketin koasoaiahda pwoson, mwakelekel, eripit, kehlail, kanengamah, momourki kupwuren koht, kadek, limpoak unsek oh ngoangki.10 Oh dehr manokehla aktikitik!11Eri I pahn idek, iamwomwen atail peneinei, kempoakepahtail, oh iengetail tohn doadoahk kan pahn idek iairen kowe oh ngehi ohng atail wie kakairada soahng pwukat oh ekei kisakis teikan? 12 Ma e pahn tohtohla soangen mwekid kan kekeirda, atail manaman en priesthood o pahn laudla.
Iamwomwen atail pil kak kalaudehla atail manaman en priesthood o? Kitail anahne kapakap ni mehlel. Koasoakoasoaia ni karakarahk duwen mahs oh pil kemwekid en me kohkohdohkan, imwihkihla pekipek en ekei kapai kan, sohte kak wiahda soangen koasoai ohng Kauno me pahn wahdo manaman en ansou werei. Komw inengieng kapakap pwehn esehla duwen kapakapiki ohng manaman laud? Kauno pahn ketin kaweid uhk.
Ke ahniki ineng en rapahki iren nan pwuhk sarawihkan oh rapahki oh momourki mahsen en Krais13—ken kasukuhlki ni ngidingid pwe ken kak ahniki manaman laud? Ma ke men ahmw pwoud en kapinga iuk de perenikinuhk, wiahieng en diaruhk wie onohnop sang nan internet ki duwen padahk en Krais14 de ke wadek noumw pwuhk sarawihkan!
Ke ahniki ineng en kaudek nan tehnpas sarawio ansou koaros? Kauno ketin kupwur pereniki wia sapwelime kasukuhl nan tehnpese me sarawio. Medewe iawen ah pahn ketin kupwur perenikihda ni ahmw pahn kalelapak Reh en ketin kaweidkiong uhk duwen kih en priesthood, mweimwei, oh manaman ni ahmw kehn tiahk sarawikan en priesthood en melkisedek nan tehnpas sarawio.15 Medewe soangen pahn laudlahn manaman en priesthood me ke pahn ahneki.
Komw inengiong en idawehn sapwellimen Thomas S. Monson karasaras en papah mehteikan? Sounpar tohto e wiadahr soahng tohto me e sohte koasoanehdi me e pahn wia, idawehn Ngehno ken pwarek imwen mehteikan oh rong soangen lokaiahkan me nda, “Ia mwomwen ahmw ese me ketemen pen nei serepeino rahnet?” de “Ia mwomwen ahmw ese me ahi ipwidi rahnet?” Oh, ma ke udahn men ahneki laud manaman en priesthood, ke pahn kanai oh kesempwaliki ahmw pwoud, utung ih oh ah kaweid kan.
Met, ma soahng pwukat koaros nohn laudla, menlau tehk mwahu iawen wekpeseng laud ah pahn mie ni atail pahn ehuwong atail pwoud, neitail serihkan, oh iengetail akan e pahn mie ma kitail pahn nsenohki alehdi manaman en priesthood o duwehte atail pahn nsenohki en pweida nan atail doadoahk de ohng neitail sent en laud nan neitail pwuhk en bank. Ma kitail pahn karakarahkala mwohn Kauno oh peki reh en ketin kaweid kitail, E pahn ketin kasalehiong kitail iamwomwen atail pahn kalaudehla atail kak en alehdi Sapwelime manamano.
Nan imwin rahn pwukat, kitail ese me e pahn mie rerer en sahpw nan ekei sahpw akan.16 Mwein ekei wasahko pahn wiawi nan imwatail akan, wasa me rerer en nan loaletail, de sent, de palingenatail pahn pwerda ie. Manaman en priesthood o kak kameleilei ihdi sehd akan oh kamwahuiala elen pwal akan en sampah. Manaman en priesthood kak pil kameleilei ihdi nan atail madamadau kan oh kamwahuila elen pwal akan en nan mohngiong en irail akan me kitail poakoahng.
Kitail ahneki ineng en kapakap, kaisihsol, onopiki, rapahki, kaudekiohng, oh papah nin duwen wia Sapwellimen Koht serihkei pwe kitail en kak iang ahneki soangen manaman en priesthood o? Pwehki kisin serepein riemen ahr udahn men katengtengehng ara peneinei, ara pahpa oh riera pwutak inengieng en alehda oh wewa melkisedek priesthood sarawio.
Riei ohl oko, likilik laud kohieng kitail ehr—Sapwellimen Kauno mweimwei pwehn kapaiada mehteikan. Kitail pwourda nin duwen Sapwellimen Kauno seri me emen emen kitail koasoandier kitail en wiahla mwohn moureto—onopadahr pwehn alehda Sapwellimen Kauno priesthood o ni komwad, ngoangki en pwainla wen pweipwei ehu me anahn pwehn kalaudehla ah manaman en priesthood o. Ohng ni manamanohte, kitail kak sewese sampah kaunopada ohng Ketido Keriau en atail Sounkomour, Sises Krais. Iet Sapwellime mwomwohdisou, me kaukauweid pahn sapwellime Soukohp, president Thomas S. Monson, me udahn I poakoahng oh utung. I kadehdehki ni mwaren Sises Krais, amen.