E Mafai ona Fesoasoani le Faamanatuga ia i Tatou ia avea ma Tagata Paia

Saunia e Elder Peter F. Meurs

O Le Fitugafulu

Mafaufau i ni auala se lima e faatele ai le aafiaga ma le malosi o lo tatou auai e le aunoa i le sauniga paia o le faamanatuga.

O se tasi o o’u muai manatuaga i sauniga faamanatuga na tupu i lo matou aiga i Warrnambool, Ausetalia. E i le va o le 10 ma le 15 tagata na auai i la matou paranesi, ma o lo’u tama, o se tasi o le toatolu na umia le perisitua, na masani lava ona maua le avanoa e faamanuia ai le faamanatuga. Ou te manatuaina ia lagona sa ou maua ao ia faitauina ma le lotomaualalo ma le faaeteete ia upu o tatalo o le faamanatuga. E masani ona tetete lona leo ao ia lagona le Agaga. O nisi taimi e tatau ona ia taofi ina ia pulea ona lagona ao lei faamaeaina le tatalo.

I le avea ma se tamaitiiti lima tausaga, ou te lei malamalama i le uiga atoa o upu ma mea na fai; ae na ou iloa o se mea taua sa tupu. Na ou lagona le faatosinaga toafimalie ma le faamautinoa o le Agaga Paia ao mafaufau lo’u tama i le alofa o le Faaola mo i tatou.

Na aoao mai le Faaola: “Ma o lenei mea ia outou faia e le aunoa ia te i latou o e e salamo ma papatiso i lo’u igoa; ma ia outou faia e faamanatu ai lo’u toto, lea ua ou faamaligiina mo outou, ina ia outou molimau atu ai i le Tama ua outou manatua pea a’u. Ma afai tou te manatua pea a’u o le a outou maua lo’u Agaga e faatasi ma outou” (3 Nifae 18:11).

Ou te valaaulia i tatou uma ina ia mafaufau i ni auala se lima e faateleina ai le aafiaga ma le malosi o la tatou auai e le aunoa i le sauniga paia o le faamanatuga, o se sauniga e mafai ona fesoasoani ia i tatou e avea ma tagata paia.

1. Ia Muai Saunia

E mafai ona amata a tatou tapenaga mo le faamanatuga ao lei taitai amataina le sauniga faamanatuga. O le Aso Toonai o se taimi lelei lea e mafaufau ai i lo tatou alualu i luma faaleagaga ma tapenaga.

O le olaga faaletino o se meaalofa taua i la tatou malaga i le avea ai e pei o lo tatou Tama Faalelagi. E taua tele lo tatou faaaofia ai o luitau ma tofotofoga lea e aumaia mo i tatou avanoa e suia ai ma tuputupu ae ai. Na aoao mai le Tupu o Peniamina faapea “o le tagata natura o se fili i le Atua, … ma o le a faapea lava, e faavavau faavavau lava, vagana ai ua gauai atu o ia i uunaiga a le Agaga Paia, ma tuu ese le tagata natura ma avea ma tagata paia e ala i le togiola a Keriso le Alii” (Mosaea 3:19). O le auai i le sauniga faamanatuga e aumai ai le avanoa e gauai atili atu ai o tatou loto ma agaga i le Atua.

I a tatou sauniuniga, o le a ootia o tatou loto ao tatou faaalia le agaga faafetai mo le Togiola a Keriso, salamo mai a tatou mea sese ma vaivaiga, ma ole atu mo le fesoasoani a le Tama i la tatou faigamalaga faifai pea ina ia avea atili faapei o Ia. O le a mafai ona tatou tulimatai atu i le avanoa ua saunia e le faamanatuga ina ia manatua Lana taulaga ma faafou a tatou tautinoga i feagaiga uma ua tatou osia.

2. Ia Vave Taunuu

E mafai ona faaleleia o tatou aafiaga i le faamanatuga pe a tatou taunuu ao lei taitai amataina le sauniga ma mafaufau loloto ao tataina le musika e muai tataina.

Ia vave taunuu mo le sauniga faamanatuga

Na aoao mai Peresitene Boyd K. Packer: “O pese i le amataga o sauniga, e taina ma le faaaloalo, o se meaai mo le agaga. Na te valaauina musumusuga.” “E le o se taimi lena,” na faamalamalama mai ai e Peresitene Russell M. Nelson, “e talatalanoa ai pe fepasiai ai ni feau, ae o se taimi e manatunatu loloto ai ma le agaga tatalo a o sauniuni faaleagaga le au taitai ma le au paia mo le faamanatuga.”

3. Usu ma Aoao mai Upu o le Viiga o le Faamanatuga

O le viiga faamanatuga o se vaega taua tele o lo tatou aafiaga i le faamanatuga. E faagaeetia e musika o tatou manatu ma lagona. E i ai i viiga faamanatuga se faatosinaga sili pe a tatou taulai atu i upu ma le aoaoga faavae mamana o loo aoao mai ai. E tele mea tatou te aoao mai i upu e pei o le “Manua, ma faalavaau mo i matou,” “Ia tatou manatua ma mautinoa o loo mama o tatou loto ma lima,” ma “Faamasino tonu ma alofa ua tasi i Le paia!”

A tatou lagiina se viiga e saunia ai e aai ma feinu i faatusa, e mafai ona avea upu ma se vaega o tautinoga o a tatou feagaiga. Mafaufau, mo se faataitaiga: “Matou te alolofa ia te oe, le Alii e; ua tumu o matou loto. O le a matou savalia ou ala filifilia.”

4. Auai Faaleagaga i Tatalo o le Faamanatuga (Tagai Moronae 4–5)

Nai lo le faalogologo ma le faaeteete i upu masani o tatalo o le faamanatuga, e mafai ona tatou aoao ma lagona atili ao tatou auai atu faaleagaga i le mafaufau i tautinoga ma faamanuiaga fesootai o loo aofia i nei tatalo paia.

E faamanuiaina ma faapaiaina le areto ma le vai i o tatou agaga. Latou te faamanatu maia ia i tatou le taulaga a le Faaola ma e mafai ona Ia fesoasoani mai e avea i tatou ma tagata paia.

E faamatala mai e tatalo lo tatou aai i le areto ia manatua ai le tino o le Alo, lea na Ia tuuina mai o se taulaga ia agavaa ai tagata uma mo le toetutu, ma e tatou te feinu i le vai ia manatua ai le toto o le Alo, lea na Ia faamaligiina saoloto mai ina ia togiola ai i tatou i tuutuuga o le salamo.

O tatalo e faailoa mai ai ia feagaiga ma se fuaitau “latou te loto ina ia” (Moronae 4:3). O lenei fuaitau e tele naua se faamoemoega mo i tatou. O tatou loto ia auauna atu ma auai? O tatou loto ia suia? O tatou loto e faailoa atu o tatou vaivaiga? O tatou loto ia aapa atu ma faamanuia i isi? O tatou loto e faalagolago atu i le Faaola?

Ao tuuina mai folafolaga ma ao tatou aai ma feinu, ua tatou faamautinoa atu i o tatou loto ua tatou loto e:

Ave i o tatou luga le suafa o Iesu Keriso.
Taumafai e tausi Ana poloaiga uma.
Manatua pea o Ia.

E faaiuina le tatalo i se valaaulia musuia ma se folafolaga: “Ina ia latou maua pea lona Agaga e faatasi ma i latou” (Moronae 4:3).

Na tusia e Paulo, “A o le fua o le Agaga o le alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, ma le le gaoia” (Kalatia 5:22–23). Ua avanoa mo i tatou faamanuiaga ma meaalofa matagofie pe a tatou tausia a tatou feagaiga.

5. Mafaufau ma Manatua o Ia ao Tufaina mai ia Faatusa o le Faamanatuga

E mafai ona avea taimi faaaloalo ao tufaina mai e le au perisitua le faamanatuga o se mea paia ia i tatou.

Ao tufaina le areto, e mafai ona tatou mafaufau i le faatinoga tupito o le alofa mo i tatou, na ave ai e le Faaola “i ona luga le oti, ina ia mafai ona ia tatalaina fusi o le oti ia ua noatia ai ona tagata” (Alema 7:12).

E mafai ona tatou manatua le faamanuiaga faamamaluina o le Toetu lea “o le a oo mai i tagata uma, … o e pologa ma e saoloto, o tane ma fafine, o e e amioleaga ma e e amiotonu; ma e oo lava i se lauulu e tasi o o latou ulu o le a le toesea; ae o le a toefuataiina mea taitasi i lona tulaga atoatoa” (Alema 11:44).

Ao tufaina le vai, e mafai ona tatou manatuaina le aioi atu o le Faaola:

“Faauta, o A’u, o le Atua, na mafatia i nei mea mo tagata uma, ina ia latou le mafatia pe afai latou te salamo; …

“O le mafatia lea na oo ai ia te a’u lava, o le Atua lava lea, o le ua silisili i tagata uma, le gatete ona o le tiga, ma tafe ifo ai i pu afu uma, ma mafatia ai i le tino atoa ma le agaga—ma manao ai ia Ou le inuina le ipu oona, ma ma’e’e’e” (MF&F 19:16, 18).

Tatou te manatua na Ia ave “i ona luga [o tatou] vaivaiga, ina ia mafai ona faatumuina ona loto i le alofa mutimutivale, e tusa ai ma la le tino, ina ia mafai ona ia silafia e tusa ai ma la le tino, le ala e fesoasoani ai i ona tagata, e tusa ma o [tatou] vaivaiga” (Alema 7:12).

A tatou mafaufau i a tatou aafiaga i le faamanatuga, atonu tatou te fesiligia i tatou lava:

O le a se mea ou te faia i lenei vaiaso e saunia lelei ai mo le faamanatuga?
Mata e mafai ona ou saofaga atili atu i le migao ma le faaaliga lea e o faatasi ma le amataga o le sauniga faamanatuga?
O le a le aoaoga faavae lea na aoaoina i le viiga faamanatuga?
O le a se mea na ou faalogo i ai ma lagona ao ou faalogo atu i tatalo o le faamanatuga?
O le a se mea na ou mafaufau i ai ao tufaina le faamanatuga?

Na aoao mai Elder David A. Bednar: “O le sauniga o le faamanatuga o se valaaulia paia ma fai soo ia salamo faamaoni ma ia faafouina faaleagaga. O le faatinoga o le taumamafa i le faamanatuga, na o le faamanatuga lava, e le faamagaloina ai ni agasala. Ae a o tatou saunia ma le mafaufau loloto i ai ma auai i lenei sauniga paia faatasi ma se loto momomo ma le agaga salamo, ona maua lea o le folafolaga o le a mafai ona tatou maua pea le Agaga o le Alii e faatasi ma i tatou. Ma e ala i le mana faapaiaina o le Agaga Paia e fai ma a tatou soa tumau, e mafai ai ona tatou faatumauina pea se faamagaloga o a tatou agasala.”

Ou te molimau atu i le tele naua o faamanuiaga o avanoa mo i tatou pe a faateleina a tatou sauniuniga mo ma auai faaleagaga i le sauniga o le faamanatuga. Ou te molimau atili atu ai i nei faamanuiaga ua avanoa mo i tatou ona o le alofa o lo tatou Tama oi le Lagi ma le taulaga togiola le iu a Lona Alo Pele, o Iesu Keriso. I Lona suafa paia, o Iesu Keriso, amene.