Adda Bileg iti Libro
Ti kaindaklan a bileg ti Libro ni Mormon ket ti epektona a mangyasideg kadatayo ken Jesucristo.
Idi Hunio 14, 1989, gapu iti biddut nga impormasion maipapan ti Simbaan, imparit ti gobierno ti Ghana ti amin nga aktibidad ti Simbaan ni Jesucristo dagiti Santo iti Ud-udina nga Aldaw iti pagilian nga Africa. Innala ti gobierno ti amin a kukua ti Simbaan, nalapdan ti amin nga aktibidad ti misionario. Dagiti miembro ti Simbaan, a nangawag itoy a panawen iti “freeze,” inkarigatanda ti nagbiag iti pannursuro ti ebanghelio nga awan miting ti branch wenno awan tulong ti misionario. Adu dagiti makaparegta nga estoria no kasano nga pinagtalinaed dagiti miembro ti silaw ti ebanghelio iti balayda ken panangaywan iti tunggal maysa kas home ken visiting teacher.
Idi agangay narisut ti saan a panagkinnaawatan, ket idi Nobiembre 30, 1990, naggibus ti freeze ket naisubli dagiti normal nga aktibibad iti Simbaan. Manipud idin, adda dagiti napintas a pagnaigan ti Simbaan ken ti gobierno ti Ghana.
Dagiti miembro a nagbiag iti panawen ti freeze dakamatenda dagiti bendision a naggapu iti dayta karkarna a panawen. Pimmigsa ti pammati ti adu iti baet ti rigat a sinangoda. Ngem immay ti maysa a bendision ti freeze iti karkarna a wagas.
Maysa a pulis ni Nicholas Ofosu-Hene Opare a natudingan a mangbantay iti LDS meetinghouse bayat ti freeze. Pagrebbenganna a bantayan ti pasdek iti rabii. Idi damo a sumangpet ni Nicholas iti meetinghouse, nakitana dagiti banag a naiwara iti aglawlaw, dagiti papel, libro, ken alikamen nga awan iti urnos. Kadagiti naiwara, nakitana ti kopia ti Libro ni Mormon. Pinadasna a di mangikankano iti libro gapu ta naibaga kenkuana a dakes daytoy. Ngem naguyugoy iti daytoy. Saanen a di inkankano ni Nicholas ti libro. Pinidutna daytoy. Nariknana a nasken a basaenna. Nagbasa a nagpatnag, a nagar-arubos dagiti luana bayat ti panagbasana.
Idi damo a pinidutna daytoy, binasana amin ti 1 Nephi. Ti maikadua a gundaway, binasana amin ti 2 Nephi. Idi madanonna ti 2 Nephi kapitulo 25, binasana ti sumaganad: “Ket agsaotayo maipanggep ken Cristo, agrag-otayo ken Cristo, ikasabatayo ni Cristo, ipadtotayo ni Cristo, ket agsurattayo a maibatay iti padtotayo, tapno maammuan dagiti annaktayo ti pamuidanna a mangkita iti pakaugasan ti basbasolda.”
Iti dayta nga oras narikna unay ni Nicolas ti Espiritu ta nangrugi a nagsangit. Naamirisna nga iti panagbasana naawatna ti naespirituan a parikna a daytoy a libro ket scripture, ti kaumnuan a libro a nabasana. Naamirisna a dagiti Latter-day Saint, kasupadi iti nangngegna, ket napigsa ti pammatida ken Jesucristo. Kalpasan ti freeze ken panagsubli dagiti misionario iti Ghana, kimmappeng ni Nicolas, ti asawa ken annakna iti Simbaan. Idi makitak itay naglabas a tawen, isu ti police commander ken agserserbi a presidente ti Tamale Ghana District ti Simbaan. Kinunana: “Ti Simbaan ti namangbalbaliw iti biagko. … agyamanak iti Mannakabalin a Dios iti panangiturongna kaniak itoy nga ebanghelio.”
Ni Alibert Davies, maysa pay a taga Ghana, kinuyogna ti gayyemna iti maysa a meetinghousemi a nakaangayan ti presidency meeting ti gayyem. Bayat panangurayna iti gayyemna, binasa ni Alibert ti libro a nakitana iti asideg. Idi malpas ti miting, kayat ni Alibert a yawid ti libro. Naikkan permiso a mangyawid saan laeng iti libro no di ti kopia pay ti Libro ni Mormon. Idi nakaawid, rinugianna a binasa ti Libro ni Mormon. Dina maibbatan daytoy. Nagbasa a kandela ti silawna agingga ti alas tres ti parbangon. Inaramidna dayta iti adu a rabii, naragsakan iti binasa ken nariknana. Ni Alibert miembro itan ti Simbaan.
Rinugian ni Angelo Scarpulla ti nagadal iti relihion iti ilina nga Italy idi agtawen iti 10. Idi agangay nagbalin a padi ken napasnek a nagserbi iti simbaanna. Iti naminsan kimmapuy ti pammatina, ket nagsapul ken immawat iti gundaway nga agadal pay. Nupay kasta, ti ad-adda a panagadalna, ad-adda met a naseknan.Ti nabasa ken nariknana ti nangkumbinsi kenkuana nga adda sapasap nga apostasia iti pudno a doktrina nga insuro ni Jesus ken dagiti nagkauna nga Apostol. Nagsapul ni Angelo iti pudno a relihion ti Dios iti agduduma a pammati ngem di napnek iti adu a tawen.
Maysa nga aldaw naam-ammona ti dua a miembro ti Simbaan a tumultulong kadagiti misionario nga agsapul iti ad-adu pay a tao a suruan. Siraragsak a dimngeg iti mensaheda. Siaayat nga inawat ni Angelo ti kopia ti Libro ni Mormon.
Dayta a sardam inrugina a basaen ti libro. Nariknana ti nalaus a rag-o. Babaen ti Espiritu, inikkan ti Dios ni Angelo iti namnama nga iti Libro ni Mormon masarakanna ti kinapudno a sapsapulenna iti adu a tawen. Napnuan ti kaungganna iti makaay-ayo a rikna. Ti nabasa ken naadalna kadagiti misionario ti nangipatalged kenkuana nga adda idi sapasap nga apostasia, ngem naammuanna pay a ti pudno a Simbaan ti Dios ket naisublin iti daga. Kalpasan ti nabiit a panawen nabuniagan ni Angelo iti Simbaan. Idi damo a maam-ammok, isu ti presidente ti Rimini Branch ti Simbaantayo iti Italy.
Ti napadasan da Nicholas, Alibert, ken Angelo iti Libro ni Mormon ket maipada iti padas ni Parley P. Pratt:
“Linukibko ti [libro] a sigagagar. … Binasak a nagmalem; istorbo kaniak ti pannangan, awan ganasko a mangan ken maturog idi … rumabiin, gapu ta kaykayatko ti agbasa ngem ti maturog.
“Bayat ti panagbasak, immay ti espiritu ti Apo kaniak, ken ammok ken naawatak a pudto ti libro, a kas iti kalawag ken kabunannag ti maawatan ken ammo ti tao a sibibiag isuna. Napno itan ti rag-ok, kas idi, ket umdasen ti rag-ok tapno mangrimbaw iti amin a ladingit, sakripiso ken panagkarigatak iti biagko.”
Sumagmamano a tattao ti addaan iti kasta a nabileg a padas iti Libro ni Mormon iti damo a lukibenda, ngem para iti dadduma in-inut nga umay ti saksi ti kinapudno no basaen ken ikararaganda daytoy. Dayta ti napadasak. Damo a nabasak ti Libro ni Mormon idi agad-adalak iti seminary.Daytoy ti kopia ti Libro ni Mormon a nabasak. Diak maibaga ti eksakto nga oras ken lugar idi napasamak, ngem bayat dayta a panagbasa, nariknak ti maysa a banag. Adda nabara ken espiritu nga umay tunggal lukibek ti libro. Napalaus ti riknak bayat ti panagtuloyko a nagbasa. Nagtuloy dayta a rikna agingga itoy nga aldaw. Tunggal basaek ti Libro ni Mormon, kasla pananglukat iti swits—agayus ti Espiritu iti puso ken kararuak.
Para iti dadduma, in-inut nga umay ti pammaneknek iti Libro ni Mormon, kalpasan ti adu a panagadal ken panagkararag. Adda gayyemko a nagbasa iti Libro ni Mormon tapno ammuen no pudno. Inusarna ti awis ni Moroni nga agdamag iti Dios nga addaan napudno a puso, pudno a panggep ken pammati ken Cristo, no pudno ti Libro ni Mormon. Ngem dina naawat a dagus ti naikari a naespirituan a sungbat. Nupay kasta, maysa nga aldaw, iti panangpanunotna iti nauneg, agmanmaneho iti kalsada, impaneknek ti Espiritu kenkuana ti kinapudno ti Libro ni Mormon. Kasta unay ti ragsakna ta linuktanna ti tawa ti kotse ket impukkawna, saan iti tao ngem iti lubong, “Pudno daytoy!”
Umay man ti pammaneknektayo iti Libro ni Mormon iti umuna a pananglukibtayo wenno kalpasan ti adu a panawen, impluwensiaannatayo iti unos ti biagtayo no ituloytayo a basaen ken yaplikar ti pannursurona. Insuro ni Presidente Ezra Taft Benson: “Adda bileg iti libro nga agayus iti biagyo iti kanito a rugianyo ti napasnek a panagadal iti libro. Makitayo ti bileg a mangkedked iti sulisog. Makitayo ti bileg a magliklik iti pannakaallilaw. Makitayo ti bileg nga agtalinaed iti nailet ken akikid a dalan.”
Allukoyek amin nga umaw-awat itoy a mensahe, agraman dagiti Aaronic Priesthood bearer a naguummong ditoy a miting, tapno takuaten ti bileg ti Libro ni Mormon. Kas inyallukoy ni Presidente Thomas S. Monson: “Basaenyo ti Libro ni Mormon. Utobenyo dagiti pannursurona. Damagen iti Nailangitan nga Ama no pudno daytoy.” Bayat dayta a wagas mariknayo ti Espiritu ti Dios iti biagyo. Ti Espiritu agbalin a paset ti pammaneknekyo a pudno ti Libro ni Mormon, a propeta ti Dios ni Joseph Smith, a ti Simbaan ni Jesucristo dagiti Santo iti Ud-udina nga Aldaw ti pudno a Simbaan iti daga. Dayta a pammaneknek tulongannakayo a mangliklik iti sulisog. Isagananakayo iti “napateg nga awag ti kinaregta … ti tattao nga agtrabaho kadagiti bangkag ti Apo.” Daytoy ti pagtaudan ti tibker no adda dagiti pammabasol ken palso a sasao a mangkarit iti pammatiyo ken daytoy ti natibker a pundasion no adda dagiti saludsod a diyo masungbatan. Kabaelanyo nga ilasin ti kinapudno iti biddut, ket mariknayo ti namnama ti Espiritu Santo a mangipatpatalged iti pammaneknekyo bayat panagtuloyyo a mangbasa iti Libro ni Mormon iti unos ti biagyo.
Allukoyek pay ti amin a nagannak a dumdumngeg wenno mangbasbasa itoy a mensahe nga aramidenyo ti Libro ni Mormon a napateg a paset ti taengyo. Iti panagdakkel dagiti annaktayo, basaentayo ti Libro ni Mormon no mangantayo iti bigat. Daytoy ti bookmark nga usarentayo. Iti sango ket ti adaw ni Presidente Benson a mangikarkari nga ibukbokto ti Dios ti bendision kadatayo no basaentayo ti Libro ni Mormon. Iti likud ket daytoy kari ni Presidente Marion G. Romney, sigud a mamagbaga iti Umuna a Panguluen: “Awan duaduak a no iti pagtaengantayo, nainkararagan ken masansan a basaen dagiti nagannak ti Libro ni Mormon, agmaymaysa ken kaduada dagiti annakda, umay ti espiritu dayta naindaklan a libro a mangpunno iti pagtaengantayo ken ti amin nga agyan ditoy.… Pumanaw ti espiritu ti sinnuppiat. Balakadan dagiti nagannak ti annakda nga addaan dakkel nga ayat ken sirib. Ad-addanto nga agtungpal dagiti annak iti balakad dagiti nagannakda. Dumur-as ti kinalinteg. Ti pammati, namnama ken asi---ti natarnaw nga ayat ni Cristo---aglabonto iti pagtaengan ken biagtayo, a kakuyog dagitoy ti talna, rag-o, ken ragsak.”
Ita, adu a tawen kalpasan a pumanaw dagiti annaktayo iti pagtaengan ken magpatanor iti bukodda a pamilia, nalawag a makitatayo ti pannakatungpal ti kari ni Presidente Romney. Saan a perpekto ti pamiliatayo, ngem maipaneknektayo ti bileg ti Libro ni Mormon ken dagiti bendision nga insangbayna no basaentayo ken agtultuloy a maisangbay iti biag ti pamiliatayo.
Ti kaindaklan a bileg ti Libro ni Mormon ket ti epektona a mangyasideg kadatayo ken Jesucristo. Daytoy ti natibker a saksi Kenkuana ken ti pangsubbot a misionna. Babaen daytoy maawatantayo ti ngayed ken bileg ti Pannubbotna. Isurona a nalawag ti doktrinana. Ket gapu kadagiti nangayed a kapitulo a mangiladawan iti isasarungkar ni Cristo kadagiti Nephite, makitatayo nga inayat, binendisionan, ken insurona dagita a tao ken maawatantayo nga aramidennanto ti kasta met kadatayo no umasidegtayo Kenkuana babaen ti panagbiag iti ebangheliona.
Kakabsat, paneknekak ti bileg iti Libro ni Mormon. Basaentayo man iti Ingles, Italiano, wenno Pranses, naiprenta wenno iti electronic device, makitak ti isu met la a nakaskasdaaw nga espiritu nga agay-ayus manipud kadagiti kapitulo ken bersikulo nga umay iti biagko. Paneknekak ti kabaelanna a mangyasideg kadatayo ken Cristo. Sapay ta gundawanyan ti tunggal maysa kadatayo ti bileg nga adda ditoy a nakaskasdaaw a libro ti nasantuan a kasuratan. Iti nagan ni Jesucristo, amen.