Aine ake a Atai taian Reirei
Aine aika a atai reirei bon reirei aika boboto iaon te Tia Kamaiu Iesu Kristo ao iai aia kantaninga rinanon te berita n Ana karea ni kamaiu.
Tariu aika tangiraki, ti rang tangiri ngkami ao ni karabwai ngkami ibukin ami kaeka n akoi ao kukurein nanomi nakon aia kakao te Moan Beretitentii ao te konabwai ae #NgaiTeIruwa. Taiaoka kateimatoa te tataro, kakauongo nakon ana wirikiriki te Tamnei, ao mwakuri iaon kairiiri ake ko anganaki.
Ngkana I mwamwananga iaon abau ke ni kabuta te aonaaba, tiaki te bae e na aki taneiai te aomata n titiraki, “Ko uringai?” Ibukina I aki tau, I riai ni butimwaaia ae n angin te tai I aki uring taian ara. E ngae n anne, I uringa ana tangira ae koaua te Tama are i Karawa are kariaiakai bwa e na iai au namakin ngkai I kaitibo ma Natina aine ao mwaane aika kakawaki.
N te tai ae nako e reke au tai ni kawaria tabeman aine aika tangiraki ake a mena n te onikaikain. Ngke ti a kaboo ma ngaiia, temanna te aine ae tangiraki, “Titita Burton, taiaoka tai mwaninga taekara.” Au kantaninga ngaia ma tabeman ake a kan uringaki a na namakinna naba ngkai I tibwauai tabeua iango ma ngkami.
Tarira rinanon rooro a tia ni kaota te banna ni kakaonimaki kanga ana reirei are ti keiakinna ni karokoira iai. “Te Nu Tetemanti n raonaki ma rongorongoia aine [aika atai taian reirei], ake ti atai ao ake ti aki atai araia, ake a kamwakura aia onimaki iroun Iesu Kristo [ao Ana Mwakuri ni Kamaiu], a reiakinna ao a maiuakina Ana reirei, ao ni kakoaua Ana mwakuri, kakai, ao mimitongina. Aine aikai a riki bwa katooto n aroia ana reirei ao taan kakoaua n te mwakuri ni kamaiu.”1
Iangoi rongorongo aikai n ana boki Ruka. Te moan, n tain ana mwakuri te Tia Kamaiu:
“Ao rimwi … [Iesu] e kabutai taian maeka ma kawa, n reirei, ma ni kaota rongorongon uean te Atua, ae raoiroi: ao a iria uake tengauni ma uoman,
“Ma aine aika a atai reirei, … Maria are e aranaki bwa Maketarene, … ma Ioana … , ma Tutanna, ma aine riki aika bati, ake a akoia n aia b’ai.”2
Imwiina, n rimwian Manga Utina:
“Ao aine aika a atai reirei … ake a roko n te ne ni mate;
“… Ngke a aki kunea rabatana, ao a oki, ao a taku ba a … noria anera, ake a taku ba E maiu Teuarei.”3
I a tia ni wareki rongorongoia aine aikai mai imwaaina n aranaki bwa, “aine aika a atai reirei” n taai aika bati mai imwaaina, ma ngke I karaurau ni wareki rongorongo aikai, ni karokoa te tai ae nako I kabwaka n ongora ni kateia aine aika a atai reirei n irekereke ma aroia ni kakaonimakiaine aika a atai reirei: are a “anaaki nanoia,” “tamaroa,” “onimaki,” “matoatoa,” “konabwai,” ao a “onimakinaki.”4
Ngkai I iangoi raoi kabwarabwara aika korakora aikai, I uringia uoman mai buakoia n te Nu Tetemanti aine aika a atai reirei ake a kaota ae tamaroa, onimaki, matoatoa, n aia koaua ibukin te Tia Kamaiu. E ngae ngke ngaiia, n ai arora, aine aika tiaki tau, e kaunganano naano aia koaua.
Uringa te aine ae aki atongaki arana are n te manibwa are e kaoiia tabeman bwa a na roko ao n nooria bwa tera ae reiakinna mairoun te Tia Kamaiu? E kaota ana koaua n tein te titiraki: tao te Kristo Ngaia?”5 Ana koaua ma ana kakao a rangin anainano are “a bati … ake a ira nanon ana taeka.”6
N rimwian maten mwaanena ae, Rataro—Mareta, te reirei ae tatangiraki ao raoraon te Uea, e kabwarabwara te bwai are e kakorakora te namakin, Te Uea, ngke Ko mena ikai, ao e bon aki mate m’aneu.” Iangoa ana koaua ngke e reitia, “I bon ataia, ngkai, ba ane Ko butia te Atua, ao E bon anganiko naba te Atua.” E reita ana kakoaua, “I taku ba e koaua ba te Kristo Ngkoe, are Natin te Atua, are roko i aon te aba.”7
Ti reiakinaki mairouia aine aikai bwa aine aika a atai reirei ana reirei te Uea ake a boboto iaon te Tia Kamaiu Iesu Kristo ao aia kantaninga rinanon te berita n Ana karea ni kamaiu.
N te tai ae nako, aine aika a atai reirei anganano ngkai a kakoaua ao ni maiuakin ana reirei Iesu. Aine aika a atai reirei ni boong ake ngkoa ni Kaokan te euangkerio a karaoa naba aei. Drusilla Hendricks ma ana utu a mena ibuakoia naake, a tibwa rairaki, a rootaki n tain bwainikirinaia Aomata i Clay County Missouri. Kainnabana e boo rabwatana n tain te Buaka i Crooked River. E tiku n tabeakinna n aron naba katauraoan kainnanoia ana utu.
“Teuana te tai ae karawawata, ngke akea kanaia ana utu, e uringa te bwanaa ae taku nakoina, ‘Tataninga, bwa e na katauraoia te Uea.’”
Ngke e kainnanoaki natina te mwaane n te anganano ibukin Ana Buaka Amerika, n te moan ao e aki kariaia Drusilla ao e kakorakora n tataro nakon te Tama are i Karawa ni karokoa are “ti ma e taetae te bwanaa nakoina, ‘Ko aki tangira te mimitong ae korakora?’ Ni koauana e taku, ‘Eng,’ ao e reitinako te bwanaa, ‘E kanga am iango ni karekea ko na tii karaoi anganano aikai?’’’8
Ti reiakinaki mairoun te aine ae a atai reirei bwa taan kawakin berita n aroia ana reirei e kainnanoa ara tauraoi n anganano.
I a tia n taekiniia aine aika a atai reirei inanon ana bong te Tia Kamaiu ao ni boong ake ngkoa are e Kaokaki iai te euangkerio. E kanga aia katooto n aroia ana reirei ao aia koaua aine aika a atai reirei inanon ara bong?
Ni mwiokoau n ae nako nako Atia, I a manga kaungaaki riki man mwaitiia aine aika a atai reirei ake I kaitibo ma ngaiia. I rangin kukurei ma kaain te moan roro mai Inria, Malaysia, ao Indonesia, ake a kataia ni maiuakina te euangkerio inanon mweengaia, n tabetai te anganano ae korakora ni maiuakina te euangkerio angin te tai e kauntaba ma katein aia utu ao abaia. Te roro ae mwaiti aei aine aika a atai reirei i Hong Kong ao Taiwan a reitinako ni kakabwaiai maiuia aia utu, kaain te Ekaretia, ao te kaawa n teimatoa ni boboto iaon te Tia Kamaiu ao n tauraoi n anganano ni kawakin aia berita. N ae ti te arona aine aika a atai reirei a kuneaki ni kabuta te Ekaretia.
Te aine ae atai reirei are e a tia ni kakabwaia maiu tebwi n ririki nako n te maan ae 15 te ririki n te aoraki ae kamamaara, kaangaanga ao n rikirake buakakana ae aranaki bwa marakin te mwaatireti. E ngae ngke e tii kona ni mwaing man kamanenaan te kaintekateka ae kookaki, e kataia ni kukurei ao ni kateimatoa aron “Baike e Kona ni Karaoi”—ni kabooui rinanin baike e kona ni karaoi, n aron ae I KONA n ikeike, I KONA n ongnga, I KONA n tataro, ao I KONA n namakina ana tangira au Tia Kamaiu. E kaota ana koaua ae boboto iaon te Kristo ana kakoaua ae kuri katoa bong nakoia ana utu ao raoraona.
I ongora rongorongon Jenny n te tai ae nako. E a tia ni mitinare are a raure ana karo inanon ana tai ni mitinare. E karakina aron ana iango ni kan oki nakon mweengana “[e] mate ni maaku.” Ma ni banen ana mitinare i Itare, ngke e kawara mweengan te beretitenti n te mition ni kawaina n okira te United States, te aine ae atai reirei,buun te beretitenti n te mition, e akoia ni kaakaara irana.
Ririki ake imwiina, temanna te aine ae atai reirei, Terry—te beretitenti n te Bootaki n Aine n te titeiki ao ana reirei Kristo e kakabwaia maiun Jenny ngke e weteaki Jenny bwa te beretitenti n te Bootaki n Aine n te uoote. N te tai anne, e mwakuri iaon ana kabanea ni beeba ibukin karekean ana beeba n taokita. E aki tii mwakuri Terry bwa te tia tararua ao ni kaira Jenny, ma e tekateka naba ma ngaia inanon 10 te aoa n te onaoraki ngke e kunea te rongorongo Jenny bwa e kaentia. E nanako n te onaoraki Terry ao ninikira Jenny ibukin ana tutuo. E kaotia Jenny, “I taku bwa N na mumuta n te tai ae bati inanon te kaa.”
N aki tabe ma mamaarana, e reitinako Jenny ni beku bwa te beretitenti ae kakaonimaki n te Bootaki n Aine n te uoote. E ngae inanon ana kaangaanga ae korakora, e tatareboon ao ni kanako tekiti ao n imeeri man ana kainiwene, ao e kaoiia aine bwa a na roko n nooria. E meerin taian beeba ma taekaia nakoia aomata, n tangiria aine man taabo aika raroa. Ngke a bubuti kaain ana uoote rawean tamneia kaain ana beretitentii ibukin ana rongorongo te uoote, aio te bwai ae a karekea. Ibukina ngkai Jenny bon te aine ae atai reirei i bon irouna, e kaoiia ni kabane bwa a na ibuokanbwai n rawawataia tabeman, n raonaki ma ngaia.
N aron te aine ae atai reirei, e kaotia: “Tiaki mena ikai tii ibukin kamaiuaia tabeman, ma ti na kamaiuiira naba. Ao te kamaiuaki anne e roko man te kaai n ibuokanbwai ma Iesu Kristo; n ataakin ana akoi ao Ana Mwakuri ni Kamaiu ao Ana namakin n tangira ibukiia aine n te Ekaretia. E riki anne rinanon bwaai aika bebete n aron kaakaarakin iran temanna, kanakoan te rongorongo ae kaunganano, e mataata, n iai te kantaninga iai ao te akoi, ke ni kariaia aine bwa a na beku ibukira.”9
Tariu, ngkana ti katabetabeaki, nanououa, bwarannano, kairua, ke ni mamaara tamneira, ti bia butimwaea ana kakao te Uea ni mooi n Ana ran ni kamaiu n aron are e karaoia te aine are mena n te maniba, ni kaoiia tabeman bwa a na karaoa naba anne ngkai ti uoti oin ara kakoaua: “tao te Kristo Ngaia?”
Ngkana e taraa ni katanginano te maiu, n aron ae riki ni maten mwaanen Mareta—ngke ti rinanon te uruaki n nano n te maroaa, kanoaboo, buaia aika ti tangiriia, buan taian kakabwaia n te mare ao te utu, mweenga are a raure iai kaaro, aki keiakinan te rawawata, aorakin te rabwata ao te namakin, korakoran te tabeaianga, raraoma, te reketaati, te kaangaanga n te kataumwane, ke mwaitin tabeua konabwai—ti bia uringa Mareta ao ni kabwarabwarai ara kakoaua aika koaua: “Ma I ataia … [ao] I taku ba e koaua ba te Kristo ngkoe, are natin te Atua.”
Ti bia uringia aine ake aki kariaia bwa a na kakeaa ara Tia Kamaiu n te korakai are e rinanona iaon te kaibangaki ao aoa tabeua imwiina n reken te kakabwaia n riki bwa moan kakoaua ni koauan mimitongin Manga Utina. Ti na kuneaki ni kaan ma ngaia inanon te tataro ao kamwatebwaian booki aika tabu. Ti na kaniira ma Ngaia ni katauraoira ibukin ao butimwaean te toa ni katoa wiiki ni kanikinaean Ana karea ni kamaiu n te otenanti ae te toa ngkai ti kawakin ara berita ni beku ibukiia tabeman n aia tai ni kainnano. Tao ngkanne ti riki bwa mwakoroia aine aika atai reirei, ana reirei Iesu Kristo, ake a na bukamarua mimitongin okina ngkana E a manga roko.
Tariu, I kakoauaia ara Karo ake i Karawa; ibukin ara Tia Kamaiu, Iesu Kristo; ao ibukin ana Mwakuri ni Kamaiu ae akea tiana ibukira. I kakoaua te Burabeti Iotebwa Timiti e a kaman katabuaki bwa te burabeti ni Kaokan te euangkerio. I ataa ana Boki Moomon bwa e koaua ao e rairaki man mwaakan te Atua. Ti kakabwaiaaki ma ara burabeti ae maiu inanon ara bong, Beretitenti Thomas S. Monson. Man taian koaua aikai, I koauai! N aran Iesu Kristo, amen.
Bwaai aika a na taraaki: N Eberi 1, 2017, e kamotiraaki Titita Burton ngkai te Beretitentii ni Kabuta n te Bootaki n Aine.