Katauraoa te Kawai
E ngae ngke anganaki aia mition aika kakaokoro ao te kariaiakaki, te Nakoanibonga ae te Aaron ao te Merekitereka a uaia n ibuokanibwai n te mwakuri ni kamaiu.
Ngke 30 au ririki ni maiu, I moana au mwakuri ibukin te kambwana n iokinibwai i Buranti. N te bong teuana te beretitenti n te kambwana, te mwaane ae raoiroi man te ekaretia teuana, e weteai nakon ana aobiti. I miimi n ana titiraki: “I a tibwa ataia ngaia te ibonga ngkoe n am ekaretia. E koaua anne?”
I kaeka, “Eng, e koaua anne. Iai irou te nakoanibonga.”
I kona n nooria bwa e kukurei n au kaeka, e titiraki imwiina, “Ma ko kamatebwaia taekan te aro n te tieminari?”
“E koaua anne,” I kaeka, “imarenan te ririki 14 ao 18, ao I kamatebwai reirein te tieminari e kuri katoa bong!” E kuri ni bwaka man ana kaintekateka.
I rang ni miimi, ngke tabeua te wiiki imwiina e a manga weteai riki nakon ana aobiti n anganai au mwakuri ae te taraekita n tararua n teuana te kambwana. I kubanako ao ni kaota tabeaiangau ngkai I bon rangin n ataei ao n akea au atatai n taua te nakoa anne. Ma moangarena n akoi, e taku, “Tao e koaua anne, ma akea te kaangaanga. I atai am reirei, ao I atai baike ko reiakin n am ekaretia. I kainnanoiko.”
E bon koaua n taekan baike I a tia n reiakin n te Ekaretia. Ririki ake imwiina a bon kaangaanga, ao I aki ataia ngkana I kona n tokanikai n akea te atatai ae I karekea n au beku n te Ekaretia man te tai are te kairake ngai.
I kakabwaiaki n ikawairake n te mwaanga ae uarereke. Ibukin karakon ara mwaiti, a weteaki kairake n irii waakin nako te mwaanga. I bon rangin tabetabe ao n tangiria ni bongana. Ni bongin te Tabati i babairea aron te taibora n toa, ni beku n au kooram n te nakoanibonga, ao ni mwakuri n nakoa riki tabeua. N taainako inanon te wiiki I raona tamau ao tabeman kaain te nakoanibonga ngkai ti kakawari n reirei ni mweengaia kaain te aro, ni karau nanoia ake a aoraki ma ni karawawataaki, ao ni buokiia naake a kainnano. Akea temanna ae iangoia ae I rangin n ataei ni mwakuri ke ni kairiiri. Irou, a taraa ni kona ni karaoaki ao n riiriki.
Te mwakuri n ibuobuoki are I anga nako inanon riki n ataei aikanne e buokai ni katea au koaua ao atinroon maiu inanon te euangkerio. I katobibiaki irouia mwaane aika tamaroa man akoi ake a motinnanoia ni kamanena te nakoanibonga ni kakabwaiai maiuia tabeman. I tangiria ni kan riki n aekakiia. Ni beku ma ngaiia, n ae mwaiti riki nakon ae I nooria n te tai anne, I reiakinaki bwa n na riki bwa te tia kairiiri n te Ekaretia ao n te aonaaba naba.
A mwaiti ara ataeinimwaane aika a roroko ke n ongora n te boowi n te tairiki aei ake iai irouia te Nakoanibonga ae te Aaron. Ngkai I tarataraa te botanaomata aei, I nooria angiina n tekateka irarikiia mwaane aika ikawai, tao ami karo, tibumi, tarimi aika ikawai, ke ami taan kairiiri n te nakoanibonga—kaain te Nakoanibonga ae te Merekitereka ni kabane. A tangiriko, ao n ae korakora, a roko ikai n te tairiki aei n raoni ngkami.
Rooro aika kakaokoro a bane n ikotaki n te boowi aei a anga te taratara ae kamiimi n te katiteuanaaki ao te aro n itaritari are e riki imarenaia uoman ana nakoanibonga te Atua. E ngae ngke a irekereke ma mition aika kakaokoro ao te kariaiakaki, te Nakoanibonga ae te Aaron ao te Merekitereka a kaai n ibuokanibwai n te mwakuri ni kamaiu. A uaia n ikarekebai ao e korakora kainnanoaia n tatabemaniia nako.
Te banna ae kororaoi n te reitaki ae uakaan are e riki imarenan nakoanibonga aika uoua e kuneaki n te reitaki imarenan Iesu ao Ioane te Tia Bwabetito. E kona temanna n iangoa Ioane te Tia Bwabetito ao e aki iangoa Iesu? E na tera kanga aron taraakin ana mition Tia Kamaiu n akea te mwakuri ni katauraoi ae karaoia Ioane?
Ioane te tia Bwabetito e anganaki teuana ana mition ae moan te kakannato n ana tai ni maiu: “ni katauraoa kawain te Uea,” 1 ni bwabetitoia n te ran, ao ni katauraoia aomata bwa a na butimwaaia. E “tamaroa te [mwaane] aei … ao … e tabu,2 are e a kaman tia ni katabuaki nakon te nakoanibonga are e rinano riki, e kororaoi ana atatai ni kakawakin ao tian ana mition ao kariaiakana.
A ikotaki aomata aika mwaiti nakon Ioane n ongora irouna ao ni bwabetitoaki irouna. A karinea aomata ibukina bon ana aomata te Atua. Ma ngke e kaoti Iesu, e nanorinano Ioane n anga ngaia nakon Temanna ae kakannato riki ao e kabwarabwara, “I babetito n te ran: ma E tei temanna i buakomi … are roko i mwiu, are I aki tau ba N na kabara kabaean ana kau.”3
Iesu Kristo, Ana Rikitemanna te Tama, Ba e tuai ni kaoti temanna ae kakannato riki nakon Ioane i buakoia akana bungiaki irouia aine: ma ane moan te mangori n uean te Atua ao e kakannato riki nako ina.”4
Tii iangoia bwa tera ae e na riki inanon ara kooram n te nakoanibonga ngkana te reitaki imarenaia kaain te nakoanibonga aika uoua a kairaki n te banna are e kateia Iesu ao Ioane te Tia Bwabetito. Tariu aika kairake n te Nakoanibonga ae te Aaron, n aron Ioane, tabemi bon “katauraoan te kawai”5 ibukin te mwakuri ae kakannato n te Nakoanibonga ae te Merekitereka. Kam karaoi aei ni kawai aika kakaokoro. Kam ibuobuoki n otenanti n te bwabetito ao n te toa. Kam buokiia ni katauraoia aomata ibukin te Uea man taetaekinan te euangkerio, ni [kawari] aia auti kaain te aro,6 ao n “[tararua] te ekaretia.7 Kam katauraoi buokaia kainnano ao rarikin man rikoan te angabwai n aki mamatam, ao kam ira te waaki n tararuai ana auti ni bootaki te Ekaretia ao tabeua ibuobuoki ibukin te rabwata. A kakawaki tabemi, a kainnanoaki, ao a tabu.
Tariu aika ikawai, ngkana ngkami kaaro, bitiobi, aetuwaitia n te Bootaki n Ataeinimwaane, ke kaain te nakoanibonga ae Merekitereka, kam kona n ira ana katooto te Tia Kamaiu man kawaraia tarimi ake iai irouia te nakoanibonga are e rinano riki ao ni kaoiia ni mwakuri ma ngkami. Ni koauana, te kakao aei e roko mairoun te Uea. E taku, “bwa kaain te Nakoanibonga ae te Merekitereka a riai ni kairiia naake a katabuaki nakon te nakoanibonga are e rinano riki, ao ni karimoaia ni karaoi boraraoi, ni katauraoi kawai, ao ni kaei boraraoi ngkai ngaiia (kaain te Nakoanibonga ae te Merekitereka) a aki kona ni kaei.”8
Ngkai kam kaoiia tarimi aika uarereke a na “katauraoa te kawai,” kam buokiia ni kinai ao ni karinea te kariaiakaki ane tabu ane irouia. Ni karaoana, kam buokiia ni katauraoi oin kawaia ngkai a katauraoi ibukin te bong a karekea iai ao ni kamwakura te nakoanibonga are e rietaata riki.
ariaia bwa N na tibwaua rongorongon Alex, te ibonga ae maam, akoi, ao ni wanawana. Te Tabati teuana ana bitiobi Alex e kunea n ti ngaia inanon te kiraatiruum n taraa n rangin rawawata. Te ataeinimwaane aei e kamataata bwa e rangin kaangaanga irouna n roko n taromauri n akea tamana, are tiaki kaain te aro. Ngkanne e taetae ma raninmatana e na bae n tamaroa riki ngkana e kitana te Ekaretia.
Ma tabeaiangan te ataeinimwaane aei ae koaua, te bitiobi e waekoa ni kaira te kauntira n te uoote ni kamwakuria ni buoka Alex. Ana babaire e bon bebete: ni kateimatoa ana kakaonimaki Alex ao ni buokia ni karekea ana koaua ibukin te euangkerio, a riai ni “karenaa ma aomata aika tamaroa ao n anganna bwaai aika kakawaki aika e na karaoi.”
N ae waekoa taari n te nakoanibonga ao kaain te uoote ni kabane a katiteuanai aia konabwai n raona Alex ao ni kaota aia tangira ma aia boutoka. Te tia kairiiri n te kurubu ibukiia ibonga aika rietaata, te mwaane ae korakora ana onimaki ao ana tangira, e rineaki bwa e na riki bwa toana n te reirei n te mweenga. Kaain te Bitiobiriki a boutokaia ao ni karikia bwa raoraoia ae kaan.
E taku te bitiobi: “Ti kateimatoa ni katabetabea Alex. E ibuobuoki n taian mare, e ibuobuoki n te taunimate, e buokai ni katabuan te ruanimate, e bwabetitoia tabeman kaain te aro aika boou, e katabuia ataeinimwaane nakon te nakoa n te Nakoanibonga ae te Aaron, e reireniia kairake, e reirei ma mitinare, e kakaukii tabo ibukin te maungatabu, ao n rokani n te tairiki imwiin te maungatabu. E karaoi mwakuri ni karikirake, e raonai ni kawariia kaain te aro aika a kara ake a kan toki maiuia, e taetae ni bootakin te toa, e nikira te toa irouia aoraki n te onaoraki ke inanon mweengaia, ao n riki bwa temanna te kurubu n aomata are I kona n onimakinna n aron tabeu ae te bitiobi.”
Teutana imwiin teutana, e bitaki Alex. E rikirake ana onimaki iroun te Uea. E karekea onimakinana i bon irouna ao ni mwaakan te nakoanibonga are irouna. E kainiin te bitiobi: “E a tia Alex ao n taainako e riki bwa teuana au kakabwaia inanon au tai ni bitiobi. Bon te kakabwaia ngai n reitaki ma ngaia. I kakoaua raoi bwa akea te ataeinimwaane ae e a tia n nako n tabo ni mitinare ae tauraoi riki man ana ibuobuoki n te nakoanibonga.”9
Au bitiobi aika tangiraki, n raonaki ma katabuami ao kamatoaakimi bwa bitiobi n ami uoote, kam karekea te nakoa ae tau ni beku bwa te beretitenti n te Nakoanibonga ae te Aron ao kooram n ibonga. I atai rawawatami aika kam uouoti, ma kam riai ni karaoi ami beku nakoia ataeinimwaane aikai teuana ami moanibwai nakon ake tabeua riki. Kam aki kona ni kakeaa taekana ke n anga mwiokoami aei nakoia tabeman.
I kaoi ngkami bwa ti na iangoiia ataeinimwaane aika kaain te Nakoanibonga ae te Aaron inanon ami uoote. Akea temanna ae e na kaakaki taekana ke n aki manena. Iai te ataeinimwaane ikanne are ngkami ma ake tabeman ae kam kona ni buokia? Kaoa bwa e na raoniko ni mwakuri. N angiin te tai ti kataia ni kakukurei nanoia ataeinimwaane ao ni katikuia ni mamataku n te mwakuri, ngke aia onimaki ma aia tangira ibukin te euangkerio e kona n rikirake ni kakoroi bukin nakoaia n te nakoanibonga. Ni kakaonimaki n ira te mwakuri ni kamaiu, a na reitaki ma karawa ao a na atai aia konabwai.
Te Nakoanibonga ae te Aaron e riao riki nakon ae ti kurubu n ririki, te reirei ke te burokuraem ibukin waaki ni kakukurei, ke te tai n rineia ataeinimwaane n te Ekaretia nakon te beku. Bon te mwaaka ao te kariaiakaki n ira waakin te mwakuri ae kakannato ni kamaiuia tamnei—tamneia ataeinimwaane akana a taua te nakoanibonga ao tamneia naake a beku. Ti riai ni katea te nakoanibonga n te mwioko ae bon riai, te tabo ae onoti, ao te tabo n ibuobuoki, katauraoi, ao katiaan tabeia ni kabane ataeinimwaane n te Ekaretia.
Tariu aika tangiraki n te Nakoanibonga ae te Merekitereka, I kaoi ngkami bwa kam na kakorakora te reitaki are e na katiteuanai ana nakoanibonga te Atua aika uoua. Kakorakoraia kairake n te Nakoanibonga ae te Aaron ni katauraoi kawai imwaaim. Tuangiia ma te onimakinaki, “I kainnanoi ngkami.” Nakoimi ataeinimwaane n te Nakoanibonga ae te Aaron, I tataro bwa ngkai kam beku ma tarimi aikana a ikawai, kam na ongo bwanaan te Uea n tuangi ngkami: bwa kam na kakabwaiaki, bwa kam na karaoi bwaai aika korakora. Ao kam kanakoaki n rimoa, n aron Ioane, ni katauraoa kawain te Uea.10 N aran Iesu Kristo, amen.