Krɔnkrɔnyɛ Ahoɔfɛw no
Ɔdɔ hɛn, na Ɔama hɛn dza ohia nyina ama yeetum aabɛyɛ krɔnkrɔn dɛ mbrɛ Ɔno ɔyɛ krɔnkrɔn no.
Maayɛ ahoboa ama nhyiamu yi ntsi, m’akoma aadan aakɔ mbaa nokwafo dodow ara a mehyia hɔn, ha na ekyirekyir nyina. Emi dze Ɔhen David ne ndaase ndwom no na ɔkyerɛ hɔn su no yie. “Hom mma Ewuradze enyimnyam a ɔsɛ ne dzin: Hom mfa ayɛyɛdze mbra, na hom mbra n’enyim: Hom nsɔr Ewuradze wɔ krɔnkrɔnyɛ ahoɔfɛw mu.”1
Muhu krɔnkrɔnyɛ ahoɔfɛw no wɔ nkyerɛbaa a hɔn akoma tsim dza oye nyina do, a wɔpɛ dɛ wɔyɛ tse dɛ Agyenkwa no. Wɔdze hɔn kra, hɔn akoma, hɔn ahom, hɔn adwen, nye hɔn ahoɔdzen nyina ma Ewuradze wɔ daa daa abrɔbɔ kwan do.2 Krɔnkrɔnyɛ no fir aperdzi na mbɔdzembɔ dɛ yebesie mbrasɛm no na yedzi ahyɛmu a yɛnye Nyankopɔn ayɛ no nyi. Krɔnkrɔnyɛ nye nsanmuyi a yɛyɛ a ɔma Sunsum Krɔnkrɔn no kɔ do yɛ hɛn kwankyerɛfo.3 Krɔnkrɔnyɛ nye dɛ yɛpɔr hɛn nyimpa su no gu nkyɛn na ɔnam Ewuradze Christ No werdambɔ no no do bɛyɛ ɔhotsewnyi.4 “Hɛn ber biara wɔ [hɛn abrabɔ mu] no otwar dɛ ɔyɛ krɔnkrɔnyɛ ma Ewuradze.”5
Nyame no a ɔwɔ sor no hyɛɛ Israelmba dɛ, “Na emi nye Ewuradze hom Nyankopɔn: dɛm ntsi hom ntsew homho, na hom nyɛ krɔnkrɔn; na meyɛ krɔnkrɔn; nkyii so mma hom nngu homho fĩ.”6
Elder D. Todd Christofferson akyerɛkyerɛ dɛ: “Hɛn Ɔsor Egya wɔ hɛn ho enyidado kɛse noara. … Ɔyɛ Ne pɛ dɛ Ɔbɛyɛ hɛn krɔnkrɔn ama yeetum ‘atsena celestial enyimnyam no mu’ (N & A 88:22) na ‘yɛatsena n’enyim’ (Moses 6:57).”7 Lectures on Faith kyerɛ mu dɛ. “Nyimpa biara runntum nnya n’enyimnyam a onnyi n’emudzi na krɔnkrɔnyɛ.”8 Hɛn Egya a ɔwɔ Sor nyim hɛn. Ɔdɔ hɛn, na Ɔama hɛn dza ohia nyina ama yeetum aabɛyɛ krɔnkrɔn dɛ mbrɛ Ɔno ɔyɛ krɔnkrɔn no.
Yɛyɛ Ɔsor Egya Ne mbabaa, na hɛn mu kor biara wɔ hyɛbea krɔnkrɔn. Ɔsor Egya apaa mu ase dɛ: “Hwɛ, meyɛ Nyankopɔn; Krɔnkrɔn Nyimpa nye me dzin.”9 Wiadze a ansaana yɛreba asaase do no, yɛdɔɔ hɛn Egya na yɛsom No. Nna yɛpɛ dɛ yɛyɛ tse dɛ Ɔno. Ofi egyapa ɔdɔ a odzi mu no, Ɔmaa hɛn No Dɔba, Jesus Christ. dɛ Ɔmbɛyɛ hɛn Agyenkwa na Pomfo. Ɔno nye Nyimpa Krɔnkrɔn no ne Ba no.10 Ne dzin nye Krɔnkrɔn,11 Israel Krɔnkrɔnnyi no.12
Hɛn krɔnkrɔnyɛ ho enyidado no tsim Christ do, wɔ N’ehumbɔbɔr na N’adom do. Yenya gyedzi wɔ Jesus Christ na No Werdambɔ mu no, hɛnho botum atsew, a nkekãa biara nnyi hɛnho, ber a yɛpow dza ɔnnyɛ Nyame su 13 na yenu hɛnho nokwar mu. Wonuma hɛn nsu mu dze kɔ bɔnfakyɛ mu. Hɛn akra ho tsew ber a yebue hɛn akoma dze gye Sunsum Krɔnkrɔn. Dapɛn dapɛn, yedzi sacrament ahyɛdze no. Yɛpɛ tseneneeyɛ ampaara no na yɛdze nnuhu sunsum no, yedzi ahyɛmu dɛ yenya pɛ dɛ yɛbɛfa Christ Ne dzin ato hɛn do, yɛakaa No, na yesie Ne mbrasɛm ama aber nyina yeenya No Sunsum ma ɔnye hɛn aatsena. Mber rugu mu no, ber a daa daa yɛbɔ mbɔdzen dɛ yɛnye Egya no, Ɔba no, na Sunsum Krɔnkrɔn no bɛyɛ kor no, yebenya kɛfa wɔ hɔn awosu krɔnkrɔn no mu.14
Krɔnkrɔnyɛ Nye Yerisie Hɛn Ahyɛmudzi
Yehu nsɔhwɛ piinara, ntõtõananmu horow, na amandzehu horow a wobotum atwe hɛn efi dza ɔyɛ ɔbra pa, na ɔsɛ nkamfo nyina wɔ Nyame enyim ho. Naaso hɛn sũahu wɔ ɔnnkyebo abrabɔ yi mu ma hɛn akwanya ma yɛsan mu yi krɔnkrɔnyɛ. Afɔrbɔ a yɛbɔ dze sie hɛn ahyɛmudzi no mu kɛse noara na ɔtsew hɛnho na ɔma yɛyɛ krɔnkrɔn.
Muhun krɔnkrɔnyɛ wɔ Evangeline, mfe-13 basiaba a ɔwɔ Ghana n’enyim. Kwan kor a ɔdze sie n’ahyɛdzi nye obotu ne frɛ dɛ Beehive adzesũafo ne president no mpon. Ɔkyerɛkyerɛɛ ase ahobrɛadze mu dɛ ɔkɔ n’anyɛnkofo efiefi, nkataasiamba no a wɔmmbɔ hyew no, na ɔserɛ hɔn awofo dɛ wɔmma hɔn kwan ma wɔmbra asɔr. Awofo no kã kyerɛ no dɛm no bɛyɛ dzen, osiandɛ Kwesida no otwar dɛ mbofra no yɛ fie adzeyɛ. Ɔno ntsi Evangeline kɔ na ɔkɔboa wɔ fie adzeyɛ no mu, na ɔnam no mbɔdzembɔ do wɔma n’anyɛnkofo no kwan ma wɔba asɔr.
Sɛ yebesie ahyɛmu no a ɔkã ho a, nkyɛ asɔfodzi ayɛdze krɔnkrɔn no bɛsesã hɛn, atsew hɛnho, na woesiesie hɛn ma yɛakɔ Ewuradze N’enyim.15 Dɛm ntsi yɛsoasoa kor biara adzesoadze; yɛhyɛ kor biara dzen. Yenya bɔnfakyɛ ber a yɛma ehiafo, hɔn a ɔkɔm dze hɔn, hɔn a wɔda adagyaw, na ayarfo no sunsum mu na honam afamu mboa.16 Yeyi hɛnho fi wiadze nkekaa mu, ber a yesie Ahomgyeda no na yedzi sacrament no emudzi mu wɔ Ewuradze Ne da krɔnkrɔn no mu no.17
Yehyira hɛn ebusua ebusua na yɛma hɛn efiefi yɛ mbea krɔnkrɔn. Yɛhom hɛn adwen mu nkã tse do ama daapem ɔdɔ mapã no aahyɛ hɛn mã.18 Yɛkyerɛ ayamuyie na ayamuhyehye ma nkaafo, na yegyina dɛ Nyame adasefo. Yɛbɛyɛ Zion nkorɔfo no, yɛwɔ akoma na adwen kor, nkorɔfo a wɔtsen a wɔbɔmu tsena wɔ koryɛ nye tsenenee mu.19 “Osiandɛ ɔwɔ dɛ Zion n’ahoɔfɛw nye no krɔnkrɔnyɛ nya mpontu.”20
Nkyerɛbaa, hom mbra temple. Sɛ yɛbɛyɛ nkorɔfo krɔnkrɔn a yɛayɛ ahoboa dɛ yebehyia Agyenkwa no wɔ Ne mbae mu a, nna ɔwɔ dɛ yɛsoɛr na yɛfa hɛn atar krɔnkrɔn no hyɛ.21 Yɛpa wiadze akwan wɔ ahoɔdzen na enyidzi mu na yesie hɛn ahyɛmudzi ama “ahotsew efura [hɛn], nyew, tsenenee atar mpo na wɔdze bɛhyɛ [hɛn].”22
Krɔnkrɔnyɛ Nye Yɛrefa Sunsum Krɔnkrɔn no dɛ Hɛn Kwankyerɛfo
Krɔnkrɔnyɛ yɛ Sunsum akyɛdze. Yɛgye dɛm akyɛdze yi ber a yɛsan mu yɛ dɛm ndzɛmba horow no a opegya Sunsum Krɔnkrɔn No tum a Ɔdze tsew hɛnho wɔ hɛn abrabɔ mu.
Ber a Martha gyee Jesus Christ wɔ ne fie no, onyaa pɛ kɛse dɛ ɔbɔbɔ mbɔdzen yie asom Ewuradze dɛ mbrɛ obotum. N’akyerɛbaa, Mary, saan mu yii dɛ “ɔtsena Jesus anan ho” na otsiee Ne nsɛm. Ber a Martha tsee nkã dɛ ɔafona wɔ ɔsom pii ho a onnyi boafo no, ɔkãa dɛ “Mo wura, ennhwɛ dɛ mo nua egyaa mo nko na morosom?”
Mepɛ nsɛmfua no a mususu dɛ ɔyɛ nkasaenyim bɔkɔɔ koraa no. Agyenkwa no dze ɔdɔ mapã na ayamuhyehye a ɔmmbɔadze, kãa n’enyim dɛ:
Martha, Martha, edwendwen na ehaw woho wɔ ndzɛmba pii ho?
“Na adze kor na ohia: na Mary dze, oeyi dza oye a wɔrenngye ne nsamu.”23
Nkyerɛbaa, sɛ yɛbɛyɛ krɔnkrɔn a, ɔwɔ dɛ yesũa dɛ yɛtsena Israel Krɔnkrɔnnyi no anan ho na yɛgya mber ma krɔnkrɔnyɛ. Ana yɛdze tɛlɛfoon no to nkyɛn, dza yɛakyerɛw dɛ yɛbɛyɛ a yennwie da no, wiadze akadwen? Mpaabɔ, adzesũa, na yɛretsie Nyame asɛm no, ɔto nsa frɛ N’ahosan na ayarsã ɔdɔ no ba hɛn akra mu. Hom ma yɛmfa mber nyɛ krɔnkrɔn ama No Sunsum a ɔyɛ krɔnkrɔn na ɔtsew ho no aahyɛ hɛn mã. Sunsum Krɔnkrɔn no reyɛ hɛn kwankyerɛfo no, yebɛyɛ ahoboa dɛ yɛdze krɔnkrɔnyɛ ahoɔfɛw behyia no Agyenkwa no.24
Krɔnkrɔnyɛ Nye Yɛrudua Jesus Christ No Werdambɔ no do Abɛyɛ Ɔhotseweenyi
Ɔhen Benjamin ne nkenyan nsɛmfua no kyerɛ dɛ, hɔn a wodua Jesus Christ No Werdambɔ no do bɛyɛ ahotseweefo no nye hɔn a wogyaa hɔnho ma, wɔdwe, wɔwɔ ahobrɛadze, wonya abotar, na ɔdɔ hyɛ hɔn mã dɛ mbrɛ Agyenkwa no tse no.25 Ɔhyɛɛ nkɔm dɛ Jesus Christ, “Ewuradze Otumfo a odzi hen no, nyia tsetse no na ɔwɔ hɔ, na ɔwɔ hɔ sesei fi mbersantsen nyina kesi mbersantsen nyina, dze tum befi sor esian adasamba mu, na ɔabɛfa dɛtse honandua ahyɛ.” Ɔbaa dɛ oribehyira ayarfo, ebubuafo, na efurafo, na Oebenyan hɔn a woewu no aba nkwa mu. Naaso ohun amandze “kyɛn ma ɔdasanyi botum asɔw mpo, ekesi owu mu.”26 Kaansa Ɔno nye ɔbaakofo kotoo a nkwagye bodua No mu aba no, wosii No atwetwe, wɔkãa No mpire, na wɔbɔɔ No mbeamudua mu. Mbom Nyame Ne Ba no soɛree fii owu mu ama adasa nyina edzi owu do konyim. Ɔno nye nyia a obegyina ebu wiadze atsɛn wɔ tsenenee mu. Ɔno nye nyia a Ɔbɔpon hɛn nyina. Ɔno nye Israel Krɔnkrɔnyi no. Jesus Christ nye krɔnkrɔnyɛ ahoɔfɛw no.
Ber a Ɔhen Benjamin no nkorɔfo no tsee ne nsɛm no, wotwaa hwee famu, mbrɛ hɔn ahobrɛadze na obu ma hɛn Nyankopɔn N’adom na enyimnyam dua yɛ kese a. Wohun hɔn nyimpa su tsebea. Ana yehu dɛ Hɛn Ewuradze Christ N’adom na ehumbɔbɔr no do na yenya ahom biara? Ana yehu dɛ akyɛdze pa biara, honandua mu na sunsum mu dze, dua Christ do ba hɛn hɔ a? Ana yɛkaa dɛ mbrɛ Egya no N’onnyiewiei nhyehyɛɛ no tse no, abrabɔ yi mu asomdwee na onnyiewiei enyimnyam bodua Ne Ba krɔnkrɔn No nko mu abɛyɛ hɛn dze?
Nkyɛ yɛakã Ɔhen Benjamin no nkorɔfo no ho ber a wɔdze ndze kor tsẽaa mu see dɛ: O hu hɛn mbɔbɔr, na ma Christ no werdam bɔgyaa no nyɛ edwuma mma yenya bɔnfakyɛ ama hɛn akoma mu aatsew; na yɛgye Jesus Christ, Nyankopɔn ne Ba no, nyia ɔbɔɔ sor nye asaase na ndzɛmba nyina no.”27
Megye dase dɛ ber a yɛba Israel Krɔnkrɔnnyi no hɔ a, No Sunsum bɛba hɛn do ama dɛw aahyɛ hɛn mã na yenya bɔnfakyɛ na adwenmutsewee.
Ɔsor Egya ama hɛn mu kor biara botum abɛyɛ krɔnkrɔn. Yɛmbɔ hɛn mbɔdzen ara yie dɛ yebesie hɛn ahyɛmudzi no na yɛbɛfa Sunsum Krɔnkrɔn no dɛ hɛn kwankyerɛfo. Yɛdze gyedzi wɔ Jesus Christ mu no, yedua No Werdambɔ no mu, bɛyɛ ahotseweefo, ama yeebenya bɛkyebo na onnyiewiei nkwa, na yɛama Nyame hɛn Egya enyimyam a ɔsɛ Ne dzin. Hɛn abrabɔ nyɛ afɔrbɔ krɔnkrɔn aber nyina, ama yɛdze krɔnkrɔnyɛ ahoɔfɛw eegyina Ewuradze enyim. Wɔ Jesus Christ Ne dzin krɔnkrɔn no mu, amen.