Tamaroan te Raoiroi
E a tia Tamara are i Karawa ni katauraoia ibukira bwaai ake a kainnanoaki bwa ti aonga n riki n tabu n Arona ae tabu.
Ngke I a tia ni katauraoi nakon te bootaki aei, nanou e nakoia aine aika onimaki aika I a tia ni kaitibo ma ngaia, n taabo ni kabane. Ibukiu, a kabwarabwaraaki n te anene ni kakaitau iroun te Uea Tawita: “Angan Iehova te neboaki ae riai nakon arana: uota mai te karea, ao kam na roko i matana: Taromauria Iehova n tamaroan te raoiroi.”1
I noora tamaroan te raoiroi irouia aine ake a mena nanoia ni bwaai aika raraoi, aika a tangiria n riki n aron te Tia Kamaiu. Anga ni kabane tamneia, nanoia, ao korakoraia nakon te Uea n te kawai are a maiuakinna ni katoa bong.2 Te tabu e roko man te kekeiaki ao te korakai ni kawakin tuua ao ni karinei berita aika tabu ake ti a tia ni karaoi ma te Atua. Te tabu bon karaoan rinerine ake a na kawakina te Tamnei ae Raoiroi bwa ara kairi.3 Te tabu bon kararoaan te aro n aomata ao n riki bwa “aomata aika itiaki rinanon ana mwakuri ni kamaiu Kristo ara Uea.”4 “N taainako [inanon maiura] e riai ni mimitong nakon te Uea.”5
Atuan karawa e tuangiia natin Iteraera, “Ba Iehova Ngai ae Atuami: ma ngaia ae kam na tabuingkami, ao kam na itiaki; ba I itiaki Ngai; ao kam na tai kam’araiai ngkami.”6
E a tia n reirei Unimwaane D. Todd Christofferson: Tamara are i Karawa ae kantaninga ae bati mairoura. … E tuatua bwa ti na karikiira n tabu bwa ti aonga n ongeaba n tuan te abanuea ae te riretio (taraa D&C 88:22) ao ni maeka I matana (Moses 6:57).”7 Taan Reirei iaon te Onimaki a kabwarabwaraa, “Akea te aomata ae kona ni karekea kimwareirein te Atua te Tama n akea irouna ana kororaoi ao tabun te Atua te Tama.”8 Tamara are i Karawa E kinaira. E tangiriira ao E a tia ni katauraoia ibukira bwaai aika a kainnanoaki bwa ti aonga n riki n tabu n arona ae E tabu.
Ngaira natin te Tama are i Karawa aine, ao ngaira n tatabemaniira iai ara bwaibwai mai ieta aika tabu. E taekinna Tamara are i Karawa, ae Ngai te Atua ao arana bon te Aomata ae Tabu.9 N te aonaaba imwain te maiu aei, ti tangira Tamara ao ti Neboia. Ti tangiria ni kan riki n Aekakina. Ibukin ana tangira ae kororaoi, E anga Ana Rikitemanna, Iesu Kristo, bwa ara Tia Kamaiu ao te Tia Kabooi Maiura. Bon Natin te Aomata ae Tabu.”10 Arana Tabu,11 Atuaia Iteraera ae Tabu.”12
Ara kantaninga ibukin te tabu e boboto iroun Kristo, n Ana tangira ao Ana nanoanga. Ma te onimaki iroun Iesu Kristo ao Ana Mwakuri ni Kamaiu, ti riki n itiaki, n aki memea, ma ni kakeai ma iroumi bwaai aika aki itiaki 13 ao n rairi nanomi. Ti bwabetitoaki n te ran ibukin kabwaraan ara bure. A kakabwaiaki tamneira ngkana ti karekea te Tamnei ae Raoiroi ma nanora ni koaua. Ni kaota wiiki, ti karaoa te otenanti n te toa. N tamnein te rairannano ma te nano ni koaua ibukin te raoiroi, ti berita bwa ti kukurei ni katoka iaora aran natim, ma n aki toki n ururingnga, ma ni kawain ana tua nako ake e a tia n anganiira, bwa e aonga ni memena Tamneina iroura. Inanon te tai, ngkai ti reitinako ni kekeiaki n riki n teuana ma te Tama, te Nati, ao te Tamnei ae Raoiroi, ti buokanibwai n aroia n Atua.14
Te Tabu Bon Kawakinan Ara Berita aika Tabu
Ti kinai kariiri aika mwaiti, kataaki, ao ka rawawataaki aika mwaiti ake a kona ni katikiira nako man bwaai ni kabane aika tamaroa ao n tau imatan te Atua. Ma ara atatai n te maiu ae mamate e anganiira te tai n rinea ae tabu. N tainako bon te anganano aika ti karaoi ni kawakin ara berita aika tabu are e kaitiakiira ao n ni karikiira n tabu.
I noora te tabu ni moan Evangeline, te ataeinnaine ae 13-ana ririki i Ghana. Teuana te kawai ae kawakina iai ana berita aika tabu bon man kakorakoraan nakona ae te beretitenti n ana kiraati te Biiaiwe. E nanorinano ni kamataata are e nakon mweengaia raoraona, te ataeinnaine ae aki roroko, n titirakiniia ana karo ni kariaia bwa e na roko n taromauri. A tuangnga aia karo bwa e kaangaanga bukina bwa iai tabeia ni katoa bong n te mweenga. Ngaia are Evangeline e nako ao n ibuobuoki ma te mwakuri, ao man ana mwakuri raoraona a kariaiakaki n roko n taromauri.
Ngkana ti na kawakin berita aika tabu, otenanti n te nakoanibonga aika tabu a na bitiira, kaitiakiira, ao ni katauraoira n nako matan te Uea.15 Ngaia ae ti buoki rawawataia raora; ti kakorakoraira bon iroura. Ti karekea kabwaraan ara buure ngkana ti anga te karaunano n tamnei ao n rabwata nakoia rarikin, aika baki, akea karabaaia, ao aoraki.16 Ti kawakiniira n aki bareka ni bwain aon te aba ngkana ti kawakina te bong ae te Tabati ao n tau ni karekea te toa n ana bong te Uea ae tabu. 17`
Ti kakabwaia ara utu ao ni kariki mweengara bwa taabo aika tabu. Ti taotaona angin ara namakin bwa ti na kaonaki n te tangira ae itiaki ao n teimatoa.18 Ti kawariia tabeman n te akoi, te nanoanga, ao n tei bwa ana tia kakoaua te Atua. Ti riki bwa ana aomata Tion, n te nano ae ti teuana ao te iango ae teuana, aomata aika itiaki aika a uaia n reitaki n te katiteuanaaki ao te raoiroi.19 “E riai Tion n rikirake n te tamaroa, ao n ae tabu.”20
Aine, a roko nakon te tembora. Ngkana ti na riki bwa aomata aika tabu aika a tauraoi ni butimwaea te Tia Kamaiu ni Kauaokina, ti riai n teirake ao ni karin kunnikaira aika tikiraoi.21 N te korakora ao te karineaki, ti mwaninga kawain te aonaaba ao ni kawakin ara berita ,bwa ti aonga ni “kunnikaiaki n te itiaki, eng, n te ninira ae e raoiroi.”22
Ae Tabu Bon Anakin te Tamnei ae Raoiroi bwa Ara Kairi
Ae tabu bon ana bwaintangira te Tamnei. Ti butimwaea te bwaintangira aei ngkana ti rineia ni karaoi bwaai aikanne are e na karikirakea korakoran mwaakan te Tamnei ae Raoiroi inanon maiura.
Ngke Mareta e mwaneia n akoa Iesu Kristo nakon mweengana, e namakina te nano ae korakora ni beku ibukin te Uea nakon ana kabanea ni kona. Mwanena, Maria, e tekateka irarikin “waen’ Iesu” n ongora n Ana taeka. Ngke e namakina te karawawataaki Mareta n te mwakuri n akea te ibuobuoki, e tangitang, “Te Uea, ko aki muti ngkae e kitanai tariu ba N na makuri n ti ngai?”
I tangiri ana taeka te aomata ae te kabanea n akoi ae I kona n iangoia. Ma te tangira ae kororaoi ao te kabanea n nanoanga ae I kona n iangoia. Ma te tangira ae kororaoi ao te nanoanga ae teimatoa, e kauringiira te Tia Kamaiu:
“Mareta, Mareta, ko iango n raraoma, ao ko katabeaiangako ni baika bati:
“Ma ti teuana te b’ai ae riai n reke: ao Maria e rinea te tiba are e raoiroi, are e na bon aki anaki mai irouna.”23
Tariu, n te aro bwa ti aonga n tabu, ti riai n reiakinna n tekateka ni waen Temanna ae Tabu mai Iteraera ao n anga te tai bwa e na raoiroi. Ti kararoa te tareboon, karinanan bwaai aika riai ni karaoaki ae aki toki, ao te tabeaianga ni bwain te aonaaba? Te tataro, te kamatebwai, ao karinean ana taeka te Atua e kaoa Ana tangira ni kaitiaki ao ni kamaiu nakon tamneira. Ti a anaa te tai n riki n tabu, bwa ti aonga ni kaonaki ma Tamneina ae tau man itiaki. Ma te Tamnei ae Raoiroi bwa ara kairi, ti na tauraoi ni butimwaea te Tia Kamaiu n tamaroan te raoiroi. 24
Te Raoiroi E Riki bwa Aika Itiaki rinanon Ana Mwakuri ni Kamaiu Iesu Kristo
Ni kaineti ma ana taeka te Uea Beniamina aika kaunganano, naake a riki bwa aika itiaki rinanon Ana Mwakuri ni Kamaiu Iesu Kristo bon naake a ongeaba, a nanorinano, tataonakinnano, ao n onrake n te tangira.25 E taetae ni burabetia bwa Iesu Kristo, “te Uea ae Akea tiani Mwaakana ae tautaeka, ae iai ngkoa ao ngkai ao n aki totoki, e na ruo ma te mwaaka mai karawa, nako buakoia natiia aomata, ao e na maeka inanon te rabwata ae mamate.” E roko ni kakabwaiaia aoraki, mwauku, bonotaninga, ao mataki ao ni kamaiuia naake a tia ni mate nakon te maiu. Ao e ngae n anne E rinanon te kaririiaki “ae riaon riki bwaai ake e kona n rinanona te aomata, are e na aki mate iai.”26 Ao e ngae ngke ti Ngaia n rinanon are e roko iai te kamaiuaki, E kaenaenaaki, e kataereaki, ao ni kamateaki. Ma Natin te Atua e kautaki mai ibuakoia mate, are ti na bane ni kona n tokanikai iaon te mate. Ngaia are e na tei ni motika taekan te aonaaba n te raoiroi. Ngaia are E na kamaiuira ni kabane. Ngaia Atuaia Iteraera ae Tabu. Iesu Kristo bon tamaroan te raoiroi.
Ngke a ongo ana aomata te Uea Beniamina ana taeka, a bwaka nako aontano, n ae korakora bon aia taotaonaki n nano aia karinerine ibukin te nanoanga ao mimitongin te Atua. A kinai buren maiuia. Ti noori ara mwioko ae bwanin iaon ana akoi ao ana nanoanga Kristo, ara Uea? Ti ataia ae bwaintangira ni kabane aika raoiroi, bwain aon teaba ao n tamnei, a roko nakoira rinanon Kristo? Ti uringa are ni kaineti ma ana babaire te Tama ae akea tokina, ae te rau n te aonaaba aio ao mimitongin akea tokina bon ti ara bwai inanon ao rinanon ti Natina ae Tabu?
Ti bia itoman ma ana aomata te Uea Beniamina ngke a tang n takarua n te bwanaa ae ti teuana, ni kangai “Taiakoa nanoangaira, ao kamaiura n raraan Kristo ni kabwara bure bwa ti aonga ni karika kabwaran ara bure, ao a na kaitiakaki nanora; bwa ti kakoaua Iesu Kristo, ae Natin te Atua, are karika karawa ma aonaaba, ma bwaai ni kabane.”27
I kakoaua bwa ngkana ti na roko nakon Teuae Tabu ae Atuaia Iteraera, Tamneina e roko iroura ao n onrake n te kimwareirei ao ni karekea kamaunaan aia bure ao raun nanoia.
E a tia Tamara are i Karawa n anganiira te konabwai ni kona n riki n raoiroi. Ti na karaoa ara kabanea n tamaroa ni kawakin ara berita aika tabu ao n anaa te Tamnei ae Raoiroi bwa ara kairi. Ma te onimaki iroun Iesu Kristo, ti na riki bwa aika itiaki rinanon Ana Mwakuri ni Kamaiu, ae ti na karekea te aki mamate ao te maiu ae akea tokina n angan te Atua Tamara te neboaki ae riai nakon Arana. E bia maiura n riki bwa te karea ae tabu, bwa ti na tei imatan te Uea n tamaroan te raoiroi. N aran Iesu Kristo, amen.