Ane e kakannato riki Ibuakomi
Ana kanuanga te Atua aika korakora e nakoia naake a beku n aki kantaninga te kanuanga.
Tariu ao raou aika tangiraki, ai Kukureira ngai n raoni ngkami inanon boowin te Nakoanibonga n te aonaaba ae anainano. Beretitenti Monson, ko rabwa ibukin am rongorongo ao kakabwaia. Beretitenti Monson, tina ururinga n tainako am taeka ni kairiiri, reirei, ao ni wanawana. Ti tangiriko ao ti boutokaiko, ao ti tataro ibukim. Ngkoe bon ana burabeti ni koaua te Uea. Ngkoe bon ara Beretitenti. Ti kamatoako, ti tangiriko.
E kaniia uabwi te ririki n nako, te Tembora i Madrid Tibein e katabuaki ao e waaki kabonganaana bwa ana auti te Uea ae tabu. Harriet ao ngai ti uringnga raoi ibukina bwa I mwakuri i Europe bwa te Beretitentii n te Aono n te tai anne. Ma raou aika a mwaiti, ti kabanei aoa aika mwaiti n irii raoi baire ao karaoan waaki ake a kairiira nakon te katabu.
Ngke e waaki bongin te katabu, I nooria bwa I tuai karekea te kakao bwa N na iria. Aio kaanga te bwai ae aki kantaningaaki. Imwiina ni kabane, inanon au beku bwa te Beretitenti n te Aono, I a tia n rang korakora au ibuobuoki ni katiaan te tembora aei ao I namakina teutana mwaitin te bwaibwai iai.
I titirakina Harriet ngkana e a tia n noora te beeba ni kakao. E bon tuai.
E waaki nako te bong ao ingaingan nanou e a rikirake. I titiraki ngkana tao e bua ara beeba ni kakao—tao e rinnako imarenan bwaubwaun te kaintekateka. Tao e mangao ma maange n te meeri ao e a karenakoaki. Kaain rarikiu iai aia katamwa ae kume, ao I a moanna n tarataraia.
N tokina I a kairoroa ni butimwaea te koaua: I aki kaoaki.
Ma e aera e na kanga n riki anne? Iai te bwai ae I a tia ni karaoia ae tao e uruaki te nano iai? Tao iai ae e iangoia bwa e rang raroa ibukira bwa ti na kaea? Tao a mwaninga taekau?
N tokina, I ataia bwa rinanon iangoan aei e kairai nakon te tabo are I aki tangiria bwa N na maeka iai.
Ngai ma Harriet ti kauringiira bwa katabuan te tembora tiaki taekara. Tiaki ibukina bwa antai are e na kaoaki ke ae e na aki. Ao tiaki ibukin ara namakin ke iangoan te nakoa are ti mena iai.
Bon taekan katabuan te bwai ae tabu, ana tembora te Atua ae Moan te Rietata. Bon te bong ni kukurei ibukiia kain te Ekaretia i Tibein.
Ngke tao I bon kaoaki, N na bon kukurei n iria. Ma ngkana I aki kaoaki, kukureiu e na bon aki kerikaaki. Ngai ma Harriet ti kukurei ma raoraora, tarira ao mwanera aika tangiraki, aika a mwananga mai kiraroa. Ti neboa te Atua ibukin te kakabwaia are e a tia ni kakukureira man mweengara i Frankfrut ngke I a mena i Madrid.
Natin te Baa
Ibuakoia Tengaun ma uoman ake e weteia Iesu ao ni katabuia bon taari aika uoman, Iakobo ao Ioane. Ko uringii araia aika kinaki iai are E anganiira?
Natin te Baa (Boanerges).1
Ko aki karekea te ara anne ngkana akea rongorongom ae kakaongora. Te kananokawaki, bwa koroboki aika a tabu aki kabwarabwara bwa e nako maia te ara anne. E ngae n anne, ti kona n noori anuaia Iakobo ao Ioane. Bon taari naba aikai ake a tua bwa e na bwaka te ai mai karawa iaon te kaawa ae Tamaria ngke aki kaoaki bwa a na rin n te kaawa.2
Iakobo ao Ioane bon taan akawa—tao a bon tuai rang mwaatai—ma I taku bwa a bon ataa aron te karikibwai. Te koaua, bon mwane aika mwamwakuri.
N te tai teuana, ngke e katauraoi te Tia Kamaiu ni karaoa Ana kabanea ni mwananga nako Ierutarem, Iakobo ao Ioane a nakoina ma te bubuti ae onoti—teuana are e bon tau ibukin araia.
“Ti tangiriko bwa ko na karaoa te bwai are ti tuangko,” a taku.
I iangoia n au iango bwa e moangare Iesu nakoia ngke e kaekaia, Tera ae kam tangiria?”
“Ko na katekatekaira, temanna i angataim, ao temanna i angamaingim, n neboakim.”
Ngkanne e kaewenakoia te Tia Kamaiu bwa a na iangoia riki te bwai are a bubuti man taku, “Ti aki au b’ai te katekateka te aba n angataiu ao i angamaingiu: ma bon aia bwai te tekateka iai ake a katauraoaki i bukia.”3
N taekana teuana, ko aki kona ni karekea te karineaki n abanuean karawa ngkana ko anga aram nako iai. Ko aki naba kona ni “karaka kanam” ni kawaim nakon mimitongin karawa.
Ngke a ongo Abotoro ake Tengaun te bubuti mai irouia Natin te Baa, a bon aki kukurei. Iesu e ataa Ana tai bwa e a kimototo, ao n nooria ibuakoia naake a na uota Ana mwakuri bwa e raraoma irouia.
E taetae nakoia Tengaun ma Uoman ibukin mwaakan ao aron korakorana nakoia ake a ukoukoria ao n taua. “Aomata ake a reke iai n te aonaaba,” E taku, “kabonganai nakoaia ni mwaakaia ni karaoi mwaaka i iaoia tabeman.”
I kona n noora te Tia Kamaiu, n taratara ma ana tangira ae akea tokina n noori mataia naake a kakaonimaki ao ana reirei ake a kakoaua. I kuri kona n ongo bwanaana ni bubuti, “Ma tiaki arom aei. Ma, ane e kani kakannato ibuakomi, ao ke e riki ba ami toro: Ao ane e kan riki ni moami, ao ke e riki ba aia kaunga aomata ni kabaneia.”4
N abanuean te Atua, te aro ni korakora ao ni kairiiri nanona norakiia tabeman n ni bon aroia—are e nooria iai te Atua—ao imwiina ni kawariia ni buokiia. E nanonaki ni kukurei ma naake a kukurei, tang ma naake a nanokawaki, ni kabebeteia naake a rawawata, ao n tangiriia raom n aron are e tangiriira Kristo. Te Tia Kamaiu e tangiriia ni kabane natin te Atua n aki tarai maiuraoia, aia reeti, aia aro, aia taetae, tein aia tautaeka, ke kaain ia, ke kaain te kurubu riki tabeua. Ao ti riai naba ni karaoia!
Ana kanuanga ae korakora te Atua e nakoia naake a beku n aki kantaninga kanuangaia. E nakoia naake a beku n aki kamoamoaki; nakoia naake a kawariia tabeman ni kakaea angan buokakiia; naake a tii buokiia tabeman ibukina bwa a tangira te Atua ao natin te Atua.5
Tai Ikerake
Teutana imwiin weteau bwa te Mataniwi ni Kabuta ae boou, e reke au tai n raona Beretitenti James E. Faust ni manga katea te titeiki. Ngke ti buti n te kaa ni kaea tabera i Utah Maiaki ae moan te kanikan, Beretitenti Faust e rang n akoi ni kabongana te tai ni kairai ao n reireinai. Teuana te reirei ae I aki kona ni mwaninga. E taku, “Kain te Ekaretia a rang akoi nakoia Mataniwi ni Kabuta. A na rang n akoi nakoim a na tuangko bwaai aika tamaroa nakoim.” Imwiina e toki ao e taku, “Dieter, n tainako kona rang kakaitau ibukin aei, ma tai karina te ang.”
Te reirei ae kakaawaki aei ibukin te mwakuri n te Ekaretia e kaineti nakoia ake iai irouia te Nakoanibonga ni kooram nako inanon te Ekaretia. E kaineti nakoira ni kabane n te Ekaretia aei.
Ngke Beretitenti J. Reuben Clark Jr. e reireiniia naake e weteia nakon te nakoa ni kairiiri n te Ekaretia, e tuangiira bwa a na aki mwaninga te tua are nambwa onoua.
Ae ataaki, aomata a titiraki, “Tera te tua ae nambwa onoua?”
“Tai rangin n taua ma nanom,” e na bae n taekinna.
O eng, aio are e na kaira te titiraki n taorimwiia: “Tera tuua ake nimaua?”
Ma te rubenimata, Beretitenti Clark e na bae ni kangai, “Akea iai.”6
N riki bwa te tia kairiiri n te Ekaretia, ti riai n reiakina te reirei ae kakaawaki aei: te nakoa ni kairiiri n te Ekaretia bon tiaki kairaia tabeman ma bon taekan ara anganano ni kairaki iroun te Atua.
Wewete a riki bwa Taai n Ibuobuoki
Ngkai ti riki bwa Ana Aomata te Atua ae moan te Rietata, ti na “uringa bwaai ni kabane kainnano ao rarikin, aoraki ao ake a rootaki, bwa ane e aki karaoi bwaai aikai, ao bon tiaki au reirei.”7 Taai ni karaoi bwaai aika a raraoi ao ni buokiia tabeman a rangi ni mwaiti. Ti kona ni kunei inanon ara kaomiuniti, n ara uoote ao mwananga, ao ni bon mweengara.
N reitia, kain nako te Ekaretia a anganaki oin aia tai ni beku. Ti aran taai aikai bwa “wewete”—te taeka are e na kauringiira bwa antai ae weteira bwa ti na beku. Ngkana ti karaoi tibwangara bwa ara tai ni beku ibukin te Atua ao ni buokiia tabeman ma te onimaki ao te nanorinano, n ara mwakuri ni kabane ao e na riki bwa te mwaneka iaon te kawai n riki bwa ana reirei. N te aro aei, te Atua e tii katea Ana Ekaretia ma e kamatoaia Ana toro. Te Ekaretia e karaoaki bwa e na buokiira n riki bwa ana reirei Kristo ae kakaonimaki, nati mwane ao aine iroun te Atua aika raoiroi ao ni karineaki. Aio e riki tiaki ti ngkana ti nako ni Bootaki ao n ongora marooro ma ngkana ti otinako naba ni beku. Aio arora n riki ni ‘korakora” n abanuean te Atua.
Ti butimwaea te wewete ma te kukurei, nanorinano, ao te kakaitau. Ngkana ti motirawa man weteara aikai, ti butimwaea te bitaki ma te kukurei naba anne, nanorinano, ao te kakaitau.
I matan te Atua, akea te wewete n abanueana ae kakaawaki riki nakon teuana. Ara beku—ngkana e bubura ke uarereke—kaitiaki tamneira, kauki mataroan karawa, ao e urakin ana kakabwaia te Atua tiaki ti iaoia naake ti buokiia ma bon iaora naba. Ngkana ti buokiia tabeman, ti kona n ataia ma te nanorinano ao te mwengaraoia bwa te Atua e atai ara ibuobuoki ma te kariaia ao te kakaitau. E moangare iaora ngkai ti anga ara mwakuri aika a riinga te nano n nanoanga, riki mwakuri ake a aki nooraki ke n ataaki irouia tabeman.8
Ni katoa tai are ti anga ngaira iai nakoia tabeman, ti toua te mwaneka ni kaniira riki n raoiroi ao n riki bwa ana reirei teuare are e anga ngaia ni kabane ibukira: ara Tia Kamaiu.
Man te Tararua nakon te Mwaati
N tain te 150 ni kauring irouia bwaeoniia ake a roko n te Mwanono i Salt Lake, te Tari Myron Richins e beku bwa te titeiki Beretitenti i Henefer, Utah. Te bukamaru e kairaki ma manga katean kawaia bwaeoniia rinanon ana kaawa.
Beretitenti Richins e rang n irekereke ma te baire ibukin te bukamaru, ao e irii Bootaki aika a mwaiti ma te Mataniwi ni Kabuta ao tabeman ake a maroroakina te waaki are e na karaoaki. E bon rangin n tabetabe.
Bon imwain karaoan raoi te bukamaru, ana titeiki Beretitenti Richins e manga moan karaoaki, ao e a kamotirawaaki man nakoana ni Beretitenti. Bon te Tabati are imwiina, e ira te boowi n te Nakoanibonga ngke taan kairiiri a butiia bwa e na anganano n ibuobuoki ma te bukamaru. Beretitenti Riching, n ikotaki ma tabeman, a kateibaia ao a korei kaetieti bwa a na bwainiia n aia bwai ni mwakuri ao ni uota aia kaa ao aia tiabora.
N tokina, n ingabongin te Bootaki ae bubura e a roko, ao Beretitenti Richins e ribootini mwakuri n anganano.
Bon tabeua wiiki imwaina, e a tia n riki bwa te tia anganano n te baire ao te tararua n te Bootaki ae bubura aei. N te bong anne, e ngae n anne, ana mwakuri bwa e na irii aoti n te mwaati ao ni kaitiaki imwiia.
Beretitenti Richins e karaoia ma te kukurei ao ni kimwareirei.
E ataia bwa teuana te ibuobuoki n akoi bon tiaki iaon riki teuana.
E ataia ao e karaoa nanon ana taeka te Tia Kamaiu: “Ane e kakannato riki i buakomi ao e na riki bwa ami tia mwakuri.”9
Karaoan ana Mwakuri n Reirei ae Eti
N tabetai, n aron Natin te Baa, ti tangira nnera ao ara tabo. Ti kataia bwa ti na kinaki. Ti kakaai aro ni kairi ao ni karaoi anganano aika a na ururingaki.
Akea buren tangiran te beku ibukin te Uea, ma ngkana ti ukoukora karekean arora n te Ekaretia ibukin kabwaiara—bwa ti aonga ni karekea te kamoamoaaki ao te mataiakinaki irouia aomata—ti karekea kanuangara. Ngkana ti “ike rake” aia kamoamoa tabeman, te kamoa anne e na kaboaki mwiina.
Tera te nakoa ae kakaawaki riki n te Ekaretia? Bon teuana are ko karekea n te tai aei. N aki taraia bwa mangorira ke buburara tarakina, te nakoa are ko karekea n te tai aei bon teuana are e na karekea nakoim tiaki ti kabebeteaia tabeman ma n riki bwa ana aomata te Atua are ko karikaki bwa ko na karekea.
Raou aika kam tangiraki ao taari n te Nakoanibonga, tabekakirake n taabo ake kam tei iai!
Bauro e reireiniia i-Biribi, “Tai karaoa te bwai teuana ni kakarabakau ma ni kainikatonga, ma kam na nanorinano, n atongiia raomi ba aongkoa a raoiroi riki nako imi.”10
Mwakuri ma te Karinerine
Ukoukora te karineaki ao te kinaaki n te Ekaretia ibukin te beku ae koaua ao n nanorinano nakoia tabeman bon ana iokinibwai Etau.11 Ti kona ni karekea te kanuanga iaon te aba, ma e roko man karaoan ae mwaiti—kabuaan ana kamoamoa karawa.
Ti na ira ana banna ni katooto ara Tia Kamaiu, are e nimamannei ao e nanorinano, are e aki ukoukora kamoamoakina irouia aomata ma e karaoa ana kantaninga Tamana.12
Ti na buokiia tabeman ma te nanorinano—m te korakora, kakaitau, ao te karinerine. Riki rinanon ara mwakuri n ibuobuoki e kona n taraa ni mangori, Tamaroa, ke n aki rang kakaawaki, naake a ibuobuoki ma te akoi ao te tangira nakoia tabeman n te bong teuana a na ata kakawakin aia beku man ana kakabwaia te Atua ae Moan te mwaaka. 13
My dear brethren, dear friends, may Ti na iangoia, atai, ao ni maiuakina te reirei aei n te kairiiri n te Ekaretia ao ni mwaakan te Nakoanibonga: “Ane e kakannato riki ibuakomi ao e na riki bwa ami tia mwakuri.” Aio au tataro ao kakabwaia n aran ara Mwatita ae tabu, te tia Kabooira, n aran Iesu Kristo, amen.