Vakararavi vua na Turaga ka Kakua ni Vakararavi Tani
E rawa ni da tudonutaka na noda bula vua na iVakabula ena noda kilai Koya, ka na dusimaka o Koya na noda sala.
Ena dua na noqu gole ki Esia, a lako mai vei au e dua na marama. A mokoti au mai ka taroga, “O vakabauta dina sara ni sa dina na kosipeli oqo?” iTaciqu lomani, au kila ni sa dina. Au sa vakararavi vua na Turaga.
Ena Vakaibalebale 3:5-6, eda wilika kina na ivakasala oqo:
“Mo vakararavi vei Jiova ena vu ni yalomu; ka mo kakua ni vakararavi ki na nomu yalomatua.
“Mo vakarogotaka vua na nomu sala kecega, Ia ena vakadodonutaka na nomu ilakolako ko koya.”
Na ivolanikalou oqo e salavata mai e rua na ivunau, dua na ivakaro, kei na dua na iyalayala lagilagi. Na rua na ivunau oqo: “Mo vakararavi vei Jiova ena vu ni yalomu” ka “vakarogotaka vua na nomu sala kecega.” Na ivakaro: “Ka mo kakua ni vakararavi ki na nomu yalomatua.” Kei na iyalayala lagilagi: “Ia ena vakadodonutaka na nomui lakolako ko koya.”
Meda veivosakitaka mada na imatai ni ivakaro. Ni da raitayaloyalotaka eda na uqeti meda vakasamataka vakatitobu. Na ivakaro e voqa mai ena vosa “kakua ni vakararavi”—“kakua ni vakararavi ki na nomu yalomatua.” Ena vosa vaka-Valagi na vosa vakararavi e kena ibalebale na vakalakala se toso ki na dua na yasana. Na gauna eda ravi kina vakayago ki na dua na yasana, eda sa vakatikitiki tani mai lomadonu, eda sa vakarau bale, ka da tarabe. Na gauna eda ravi kina vakayagoki na noda yalomatua, eda sa ravi tani mai vua na noda iVakabula. Kevaka eda sa ravi, eda sa sega ni tiko e loma; eda sa vakarau bale, eda sa sega ni raicamatua na Karisito.
Kemuni na marama, ena noda bula taumada, eda a tu vata kei na iVakabula. Eda a vakararavi Vua. Eda a voqataka na noda veitokoni, marau, kei na reki ena ituvatuva ni bula marau sa tuvanaka mai na Tamada Vakalomalagi. Eda sega ni vakararavi tani. Eda vala vakairagi ena noda ivakadinadina ka “vakaduavatataki keda ki na kaukauwa ni Kalou, ka yaco me ra qaqa na kaukauwa oqori.” Na ivalu oqo e baleta na vinaka kei na ca sa tete mai ki vuravura. Vakadua tale sa noda na ilesilesi tabu me da tucake ka ivakadinadina ka vakararavi vua na Turaga.
Me da sa qai dui taroga: Meu na tudonu tu vakacava ka kakua ni vakararavi ki na noqu yalomatua? Meu na kila ka muria vakacava na domo ni iVakabula ena gauna sa veivakauqeti cake kina na domoi vuravura? Meu na teivaka vakacava noqu vakararavi vua na iVakabula?
Meu vakatura mada e tolu na sala me vakalevutaki kina na noda kila ka vakararavi vua na iVakabula. O na raica ni ivakavuvuli oqo e sega ni ka vou, ia era sa yavu vinaka. Era lagati ena Lalai, voqataki ena lesoni ni Goneyalewa, ka isau ni vakatataro ena iSoqosoqo ni Veivukei. Era sa ivakavuvuli ni—veivakatudonutaki—ka sega ni vakararavi tani.
iMatai, eda rawa ni kila na Turaga ka vakararavi Vua ni da “kana magiti ena vosa i Karisito; ia raica, na vosa i Karisito sa tukuna vei kemudou na veika kece mo dou kitaka.”
Vica na vula sa oti, keitou a vuli ivolanikalou tiko vakamatavuvale. A tene tiko vei au o makubuqu tagane yabaki rua ni keitou wiliwili tiko. Sa taucoko tiko noqu itavi vaka-budra na gone, ka marautaka na nodratou veisiko mai na matavuvale i luvequ tagane.
Ni sa tini na neitou vuli ivolanikalou, au sa sogota na noqu ivola. Sa kila tu o makubuqu tagane ni sa voleka na gauna ni moce. A rai cake mai na matana ka kaya mai e dua na dina tawamudu: “So tale na tikina, Bu.”
E itubutubu vinaka ka vakaivakarau o luvequ tagane, ka vakaroti au, “Na, kua ni vakamalumalumu. E saga tiko oqori me kua ni laki moce.”
Ia ni kerea o makubuqu eso tale na tiki ni ivolanikalou, keitou a wiliwili tale! Ni levu na ivolanikalou ena rarama na noda vakasama, vakabulabulataka na yaloda, sauma noda taro, vakalevutaka noda vakararavi vua na Turaga, ka vukei keda meda tudonutaka noda bula Vua. “Mo dou na dau vakasaqara vagumatua sara kina, mo dou na rawa ka mai kina.”
iKarua, sa rawa meda kila na Turaga ka vakararavi Vua ena masu. Sa dua dina na veivakalougatataki me da rawa ni masu vua na noda Kalou! “Mo dou masuta na Tamada ena yalomudou taucoko.”
E kamica niu dau vakananuma e dua na masu vakamareqeti. Dua na gauna ni noqu sereki mai na koliji, au a laki cakacaka sara i Texas. Meu sa na draiva yani ena drau na maile mai Idaho ki Texas ena noqu motoka makawa, au vakamenemenea ena yaca Vern. Sa vutucoqa tu o Vern, kau sa vakarau yani ki na ilakolako vou.
Niu sa curu yani i tuba, au a laki mokoti tinaqu ka kaya mai o koya, “Daru masu mada ni ko vakarau lako.”
Keirau a tekiduru ka tekivu masu o tinaqu. A kerea vua na Tamada Vakalomalagi meu na taqomaki. A masulaka talega na noqu motoka katakata, ka kerea me tu vinaka na motoka niu sa gadreva vakakina. A kerea me ra tomani au na agilosi ena gauna taucoko ni vula ikatakata. A masu ka masu ka masu.
Na vakacegu e lako mai na masu o ya a vakayaloqaqataki au meu vakararavi ga vua na Turaga ka kakua ni vakararavi ki na noqu yalomatua. A dusimaka na Turaga na noqu sala ki na vuqa na noqu vakatulewa ena vula ikatakata o ya.
Ni da vakamatautaki keda meda gole vua na Tamada Vakalomalagi ena masu, ena yaco meda kila na iVakabula. Ena yaco meda na vakararavi Vua. Na noda gagadre ena yaco me vakataka na Nona. Sa na rawa meda rawata vei keda kei ira eso na veivakalougatataki sa vakarautaka tu na Tamada Vakalomalagi me solia kevaka eda na kerea ena vakabauta.
iKatolu, sa rawa meda kila na Turaga ka vakararavi Vua ni da qaravi ira na tamata. Au mai wasea na italanoa oqo ena veivakadonui nei Amy Wright, sa mai kila vinaka na ivakavuvuli ni veiqaravi ena loma ni tauvimate rerevaki ka veivakamatei. A vola oqo o Amy:
“Enai ka 29 ni Okotova, 2015, au sa mai kila niu sa tauvi kenisa. Na noqu kenisa e 17 ga na pasede na itagede meu na rawa ni bula mai kina. E sega ni vinaka oqo. Au kila niu sa na valu vakaukauwa meu bula tiko. Au sa vakadeitaka meu solibula kina sega ni baleti au ga ia vakabibi ga, ki na noqu matavuvale. Ena Tiseba, au sa tekivu qaravi vakavuniwai. Au sa kila vinaka tu na revurevu ca ni wanimate ni kenisa, ia au sega ni kila ni rawa vua e dua e tauvimate bibi tu ka bula tiko ga.
“Dua na gauna, au a kaya ni kemocerapi e saqata tiko na dodonu vakatamata. Au a kaya vei watiqu ni sa rauti au. Au sa soro! Au sa sega tale ni via lesu i valenibula. A vakarorogo matua o noqu daulomani ka qai kaya mai, ena yalo ni vuku ‘Ia, me sa na gadrevi e dua me mai veiqaravi.”
Na cava? Sa guilecava beka o koya ni kenisa tiko o watina ka sega tale ni rawa meu lomaloma ca se meu baci rarawa ena mosi?
A vakamacalataka tale o Amy: “Sa tekivu vakamalua me ca vakalevu na yagoqu ka dua se rua ga na siga au ‘VINAKA’ kina ena dua na vula [ena gauna] e dodonu meu bulabula vinaka vaka-tamata. O ya na veisiga e dau vakasaqara kina na noqu matavuvale me veiqaravi.”
Ena dua vei ira na siga oqori, eratou a veisoliyaka na matavuvale nei Amy e dua na solisoli lailai vei ira na tauvimate era na qaravi ena chemo, me vakamarautaki ira ka veivuke ena kena vakaseavutaki na mosi ena gauna ni veiqaravi oqo. Ni sega ni moce rawa o Amy, a dau vakasamataka na sala eso me vakamarautaka na nona bula e dua tale. Eso na sala e ka levu, ia e vuqa era ivola lalai wale se itukutuku vakau ena talevoni ni veivakayaloqaqataki kei na loloma. Ena vei bogi oqori ni dau mosi rarawa mai ka sega ni moce, e dau davo toka ena loga vata kei na nona iPad ka vakasaqara na cakacaka vakalotu e gadrevi me vakacavari me baleti ira na nona qase e liu. E veivakurabuitaki ni dau yali yani na mosi, ka rawa me vosota tiko.
“Na veiqaravi,”e vakadinata o Amy, “e vakabulai au. Na gauna au dau kaukauwa kina meu toso yani ki liu sai koya na marau au kunea niu dau saga meu vakacegui ira era rarawa tu era toka voliti au. Au sa namaka tiko na neitou veivakatorocaketaki ena reki kei na kakavaki levu. Me yacova mai nikua sa vaka me dua na vakasama duatani. O na nanuma kina ni dua sa tasi na uluna, vagagai tu, ka sasaga bula tiko me sa donu tu na nona vakasamataka ‘gauna oqo sa baleti au ga.’ Ia, niu sa vakasamataki au, na kequ ituvaki, na noqu rarawa kei na mosi, sa butobuto sara mai ko vuravura ka veivakaogai. Niu vakasamataki ira na tamata, sa yaco mai na rarama, inuinui, kaukauwa, yaloqaqa, kei na reki. Au kila ni rawa oqo baleta ga na veitokoni, veivakabulai, kei na kaukauwa veirawai ni Veisorovaki i Jisu Karisito.”
Sa yaco kina me vakararavi o Amy vua na Turaga ni sa mai kilai Koya. Kevaka beka me a vakararavi vakalailai ga ki na nona yalomatua, a rairai biu vakatikitiki beka na vakasama ni a veiqaravi. Na veiqaravi a rawa kina vua me vosota na nona mosi kei na rarawa ka bulataka na ivolanikalou oqo: “Ko ni sa qarava tiko na nomuni Kalou ena gauna ko ni qaravi ira tiko kina na wekamuni.”
Sa mai vakamalumalumutaka na vuravura o Jisu Karisito. Ena Vukuna ga, ena vuku ni Nona Veisorovaki tawayalani, sa noda na inaki cecere meda vakararavi ga, ka kila tu ni na vinaka mai na veika kecega.
Kemuni na marama, sa rawa vei keda yadua meda vakararavi ga vua na Turaga ena noda kilai Koya yani ka kakua ni vakararavi tani. Eda rawa ni da tudonutaka na noda bula vua na iVakabula ena noda kilai Koya, ka na dusimaka o Koya na noda sala.
Eda tiko e vuravura meda vakaraitaka ni da sa vakararavi tikoga Vua ka a rawa kina meda tu vata kei Jisu Karisito ena Nona kaya, “Koi Au oqo, mo ni talai au.”
Kemuni na marama, a kaya o Peresitedi Thomas S. Monson ni “noda kalougata yalataki se tawayalani sara. E dina ni na kumukumuni mai na o ni cava, ka tau mai na uca, na noda kila na kosipeli kei na noda lomana na Tamada Vakalomalagi kei na noda iVakabula ena vakacegui keda ka tokoni keda … ni da tudei tu. … Ena sega ni dua na ka e vuravura oqo me na valuti keda rawa.”
Au kuria na noqu ivakadinadina me baleti noda parofita lomani. Kevaka meda vakararavi ga vua na Tamada Vakalomalagi kei na noda iVakabula ka sega ni vakararavi ki na noda yalomatua, Rau na dusimaka na noda sala ka dodoka mai na liga ni loloma veivueti kivei keda. Ena yacai Jisu Karisito, emeni.
Me kilai: Ena 1 ni Epereli, 2017, a vagalalataki o Sister Cardon ena ilesilesi vaka iKarua ni Daunivakasala ena Mataveiliutaki Raraba ni Lalai ka kacivi me iMatai ni Daunivakasala.