Na Ligana Veidusimaki e Veisiga
E kila vinaka cake na Tamada Vakalomalagi mai vua e dua tale na veika e daru gadreva.
Dua vei ira na iyaya ni cakacaka na Tamada Vakalomalagi me ra dusimaki na Luvena sai ira na tukadra budra ivalavala dodonu. E dua vei ira na marama vakaoqo o tinai tamaqu. E dua na gauna niu se lailai sara meu nanuma rawa, a vunauci au tiko o tamaqu. Ni raica tiko na veivakadodonutaki oqo, a kaya mai o buqu, “Monte au vakabauta ni sa kaukauwa sara na nomu veivakadodonutaki.”
A sauma o tamaqu, “Tinaqu, au na vakadodonutaki ira na luvequ ena ivakarau au vinakata ga.”
A qai tukuna mai vakamalua ena vuku o buqu, “E vakakina o au.”
Au vakabauta dina ni a rogoca o tamaqu na ivakasala vuku nei tinana ena siga o ya.
Ni da vakasamataka na veidusimaki, eda na nanuma beka na serenilotu eda kila ka taleitaka taucoko—“Au Luve ni Kalou.” Ena italetale eda raica kina na qaqana “Meu tuberi, ka liutaki, tiko tiko ga.”
Me yacova mai oqo, au kila na italetale o ya sa veidusimaki vakalou vei ira na itubutubu. Niu vakasamataka tiko na veivosa oqori, au raica ni sa tiko kina na veidusimaki o ya, sa tiko kina e dua na kena ibalebale e cecere cake. O keda na tamata yadua, eda sa dui masuta e veisiga na Tamada Vakalomalagi me liutaki keda, dusimaki keda, ka lako e yasada.
E vakamacalataka o Peresitedi Dieter F. Uchtdorf: “E kila vinaka cake, na Tamada Vakalomalagi, mai vei ira na tani, na Nodra gagadre na Luvena. Sa Nona cakacaka kei na lagilagi me vukei keda ena veika kece sara, solia vei keda na veiyaragi vakasakiti vakayalo ka vakayago me vukei keda ena noda salatu ni lesu ki Vua.”
Rogoca na vosa o ya: E kila vinaka cake na Tamada Vakalomalagi mai vua e dua tale na veika e daru gadreva. Sa yaco kina, me tauyavutaka o Koya e dua na iyaya ni veimaroroi me rauti keda yadua. E levu tu na kena gacagaca. E oka kina na Luvena kei na Veisorovaki, na Yalo Tabu, ivakaro, ivolanikalou, masu, parofita, iapositolo, itubutubu, tukadra budra na gone, noda iliuliu ni Lotu, kei na vuqa tale eso—me ra vukei keda kece meda lesu ka laki bula vata kei Koya ena dua na siga.
Meu wasea mada nikua e vica na gacagaca ni iyaya ni veimaroroi sa vakavuna meu kila ni Tamada dauloloma sa veiliutaki, veidusimaki, ka lako vata tiko kei au kei na noqu matavuvale? Sa noqu masu ni o ni na kila na veika o sotava na Tamada Vakalomalagi sa veiliutaki, veidusimaki, ka lako vata kei iko, kei na kila o ya, o na toso yani ena yalonuidei, ka kila ni ko sega vakadua ni tiko duadua.
Na ivakaro nei Tamada Vakalomalagi sa gacagaca bibi ni iyaya ni veimaroroi o ya. A vakaraitaka o Alama ni “sega vakadua ni vu ni marau na caka ca.” Na vagalui tiko ni itovo vakatani ka sega na veivakadodonutaki ena loloma sa loloma lasutaki ka vaqaqacotaka na nanuma sa kilai tu ni valavala ca sa rairai bula marau dina. A saqata o Samuela na Lemanaiti na vakasama oqo: “Ko ni sa vakasaqara na marau ena nomuni caka cala, io na ka sa sega ni salavata kei na ivalavala dodonu i koya na noda iLiuliu Tawamudu.”
Mai vei ira na Nona parofita, sa dau vakavotuya tiko vei keda na Kalou ni ivalavala dodonu sa bula marau. Me vakataka na Tui o Penijamini, a vakavulica ni o Tamada Vakalomalagi “sa vakaroti kemuni kina, ia kevaka ko ni sa kitaka vakakina, ena vakalougatataki kemuni kusarawa kina ko Koya.” E vakavotui tale mai oqo ena dua na serenilotu:
Niu sa qai yabaki 14, au a vulica eso na veivakalougatataki oqo. Au raica ni sa veisau na nodrau itovo vakaitavi na noqu itubutubu. Niu raica na veika au sa dikeva, au a taroga, “Eda sa gole beka ki na dua na ilesilesi vakaulotu?” A donu na noqu vakataroga niu raica na kidrowa ni matai tinaqu. E muri, ena matabose ni matavuvale, keitou a qai kila kina na veitacini ni rau sa kacivi me rau liutaka na neitou itubutubu e dua na tabana ni kaulotu.
Keitou a vakaitikotiko ena dua na qele totoka mai Wyoming. Na noqu nanuma, sa totoka dina na bula. Au dau lesu mai na vuli ka gole i vale, cakava noqu itavi e vale, ka laki vakasasa, siwa, se gade kei noqu koli.
Ni oti ga noqu kila na veikacivi, au kila niu sa na biuta na noqu koli, o Blue. Au a laki tarogi tamaqu, se cava meu na cakava vei Blue. Au a gadreva meu vakamatatataka ni sega ni vinaka na ka sa vinakata na Kalou. Au na sega ni guilecava rawa na kena isau. Kaya mai o koya, “Au sega mada ni vakadeitaka. Ena sega beka ni lako vata kei kedatou, mo qai taroga ga na Tamada Vakalomalagi.” Au a sega ni namaka na isaunitaro o ya.
Au sa tekivu wilika na iVola i Momani. Au a masulaka vakaidina meu kila ke meu sa biuta na noqu koli. A sega ni yaco mai na isau ni noqu masu ena gauna o ya, ia, a vakauqeta tikoga na noqu vakasama e dua na ka: “Kakua ni vakaogai rau na nomu itubutubu. Kakua ni veivakaogai. Au sa kacivi rau na nomu itubutubu.”
Au sa kila na ka e vinakata na Tamada Vakalomalagi. Na kila o ya a sega ni vakalailaitaka na mosi meu sa na biuta na noqu koli. Ia, mai na solibula lailai o ya, sa malumalumu na yaloqu kau sa kune vakacegu niu vakasaqara na nona lewa na Tamada Vakalomalagi.
Au vakavinavinaka vei Tamaqu Vakalomalagi baleta na veivakalougatataki kei na marau au kunea ena ivolanikalou, masu, ena Yalo Tabu, kei na dua na tama e vuravura a maroroya na nona ilesilesi vakaqasenivuli liu ni kosipeli vei ira na luvena. Rau a liutaki au, dusimaki au, ka lako vata tu kei au meu vukei meu kunea na sala—vakabibi ena gauna au na cakava kina e dua na ka dredre.
Me ikuri ni kena tiko na gacagaca ni iyaya ni veimaroroi au sa vakamacalataka oti, eda sa vakalougatataki vakayadua ena dua na iliuliu ni matabete me veiliutaki ka dusimaki keda.
E kaya kina o Peresitedi Boyd K. Packer: “Era sa vakauqeti vakayalo na bisopi! Sa tu vei keda yadua na galala meda ciqoma se kua na nodra ivakasala na iliuliu, ia kakua ni vakawalena na ivakasala nei bisopi, e vunautaka mai se vosa vei kemuni yadua.”
O ira oqo era sasaga tiko me ra matataka na Turaga. Se da gone se qase, ni gauna e vinakata kina o Setani meda vakasamataka ni sa yali na ka kecega, era sa tiko na bisopi me ra dusimaki keda. Niu veivosaki kei ira na bisopi tale eso, au raica kina e dua na i ulutaga kilai levu me baleta na vakatusai ni ivalavala ca se ira na tawacala ni sotava na cala bibi. Era dau vinakata na bisopi me ra vakaraitaka na loloma nei Tamada Vakalomalagi ki na tamata yadua ka gadreva me lako vata kei koya me kunea rawa na sala i vale.
E rairai vakamacalataki tiko na gacagaca ni iyaya ni veimaroroi ni Tamada Vakalomalagi ena vosa oqo: “Ni sa lomani ira na kai vuravura vakaoqo na Kalou, me solia kina na Luvena e duabau ga sa vakatubura.”
Me vakavulici keda ena veika kece meda cakava, a liutaka na sala o Jisu Karisito ena nona ivakaraitaki uasivi meda na saga meda na vakatotomuria. E vakamasuti keda ni dedeka mai na ligana meda lako mai, ka muri Koya. Ni da sega ni cakava, ka yaco vei keda kece, sa dau kaya tikoga mai “Ia raica, koi Au na Kalou, au sa vakararawataki oti ena veika oqo ena vukudra kece, me ra kakua kina ni sotava na rarawa kevaka era sa veivutuni.”
Sa qai dua na isolisoli totoka! Na veivutuni e sega ni totogi; sa dua na madigi. Sa madigi me liutaki keda ka dusimaki keda. Sega ni kurabuitaki ni sa vakaraitaka na ivolanikalou me da sa na vakavulica ga na veivutuni.
Sa vuqa tu na ivurevure nei Tamada Vakalomalagi, ia e vakavuqa Nona dau vakayagataka e dua tale na tamata me vukei Koya. E veisiga Nona dau solia na madigi meda liutaka, dusimaka, ka lako vata kei na dua e tiko vakaleqai. E dodonu meda muria na ivakaraitaki ni iVakabula. E dodonu talega meda cakava na cakacaka nei Tamada vakalomalagi.
Keitou kila na Mataveiliutaki Raraba ni Cauravou, ni ra na vakalougatataki na itabagone ni o nodra itubutubu kei na iliuliu era matataka na Tamada Vakalomalagi era liutaka, dusimaka, ka lako vata kei ira. Oqo e tolu na ivakavuvuli ena vukei keda meda tiki ni iyaya ni veimaroroi nei Tamada Vakalomalagi:
iMatai, mo tiko vata kei ira na itabagone. A vakamatatataka o Peresitedi Henry B. Eyring na tikina oqo: “Era tu eso na ka eda rawa ni cakava ena vakaibalebale vakalevu. Ena mana vakalevu cake mai na vosa ena noda vakavuvulitaka na ivunau na noda ivakaraitaki ni kena bulataki na ivunau.” Na nodra liutaki na itabagone o ya meda tiko kei ira. Nomu soli gauna sa ivakaraitaki ni loloma e vakatara meda veivakavulici ena vosa kei na ivakaraitaki.
Karua, me ra dusimaki vakaidina na itabagone, e dodonu meda vukea me ra sema i lomalagi. Sa dau yaco mai na gauna meda dui tu duadua. Ena rawa me veidusimaki kina na Tamada Vakalomalagi ena veigauna kei na veivanua kece. Dodonu me ra kila na noda itabagone na sala me ra vakasaqara kina na veidusimaki nei Tamada Vakalomalagi.
iKatolu, vakatara me ra veiliutaki na itabagone. Me vakataki itubutubu dauloloma e tubera tiko na ligai luvena lailai ni vuli lako tiko, meda biuti ira na itabagone me ra toso ki liu. Me ra veiliutaki na itabagone e gadrevi na vosota kei na loloma. E dredre ka kana gauna ni da cakava ga o keda. Era na sikalutu beka ena ilakolako, ia eda lako vata tiko kei ira.
Taciqu kei na ganequ, ena tiko na gauna ni noda bula ena vaka me yawa se luluqa na veivakalougatataki ni veidusimaki. Ena veigauna ni lomaocaoca, e yalataka kina o Elder D. Todd Christofferson: “Me vakaliuci na nomu veiyalayalati ka laiva me tudonu na nomu talairawarawa. Sa na qai rawa kina mo kerekere ena vakabauta, ka sega ni veivukiyaki, me vaka na nomu gagadre, ka na sauma na Kalou. Ena tokoni iko ena nomu cakacaka ka wanonova. Ena Nona gauna ga vakataki Koya kei na Nona sala ga ena dodoka mai na ligana ka kaya ‘Sai au oqo.’”
Dua na gauna vakaoqo, au a kerea nona ivakasala na Tamada Vakalomalagi ena noqu masu vakavuqa ena yalodina me dua na yabaki vakacaca meu raica kina na iwali ni dua na leqa dredre. Au kila dina tu ni Tamada Vakalomalagi e dau sauma na masu kece ena yalodina. Ia a yaco ena dua na siga meu maqusa yani ki valetabu meu laki taroga: “Tamaqu Vakalomalagi, o ni kauwai dina tiko beka?”
Au a dabe voleka toka e muri ni rumu ni wawa ni Valetabu e Logan Utah, kau kurabui, ni sa curu mai ki na rumu o peresitedi ni valetabu o Vaughn J. Featherstone, dua na itokani voleka ni matavuvale. A tucake tu e matadra na ivavakoso ka kidavaki keimami kece. Ni sa raici au niu maliwai ira na lewe ni valetabu, a muduka nona vosa, raica mai na mataqu, ka kaya, “Brother Brough, totoka niu raici iko e valetabu nikua.”
Au na sega ni guilecava vakadua na ituvaki ni yaloqu ni gauna vinaka o ya. Sa vaka me yaco—ena veikidavaki oya—nona sa dodoka mai na Tamada Vakalomalagi na Ligana ka kaya, “Oi Au oqo.”
E kauwai dina tiko na Tamada Vakalomalagi ka rogoca ka sauma mai na nodra masu na luvena yadua. Niu dua na Luvena, au kila ni isau ni noqu masu ena lako mai ena gauna ni Turaga. Ena veika sotavi oqo, au sa kila deivaki tawamudu kina ni da sa luvena na Kalou ka sa talai keda mai eke me rawa ni da vakilai Koya ena gauna oqo ka lesu meda laki bula vata kei Koya ena dua na siga.
Au vakadinadinataka ni Tamada Vakalomalagi sa liutaki keda, dusimaki keda, ka lako e yasada. Ni da muria na Luvena ka talairawarawa vei ira na Nona italai, ira na iapositolo kei na parofita, eda na kunea na sala ki na bula tawamudu. Ena yacai Jisu Karisito, emeni.