iTukutuku ni Mataveiliutaki Taumada, June 2016

Na Tamada, Noda Daunivakasala

Mai vei Peresitedi Dieter F. Uchtdorf

Karua ni Daunivakasala ena Mataveiliutaki Taumada

O sa bau dolava oti mada e dua na kateni sinai ena veivakasala lalai, ka vakasamataka, “E sega saraga ni vakaibalebale na ka oqo”?

Ena so na gauna, veitalia sara na noda inaki cecere duadua kei na dei ni lomada, eda dau dre mai e dua na tikina ka se vakataroga ga, “E ka beka ni cava oqo?” se “Ena rauta beka vakacava oqo?”

Sa qai tubu ga na noda rarawa nida raica yani ena kena kateni na kena ivakasala ka tukuni kina, “Biutavata o ira na—yabaki 8 lako cake.” Baleta ni se sega ga ni da kila rawa, mai na veika e tiko, e sega saraga ni na vukea noda yalodei se nuidei na ka oqo.

Eso na gauna e vakatalega oya na veika eda sotava ena kosipeli. Ni da raica eso na tikina, eda na mila beka na uluda ka veinanuyaka se ka ni cava na tikina oya. Se eda vakadikeva e so tale na tikina, eda na vakila ni oti madaga na noda tovolea vakaukauwa meda kila vinaka, eda se sega tikoga ni cakacakataka rawa se cava e okati mai kina na tikina oya.

Sa Noda Daunivakasala na Tamada Vakalomalagi.

E kalougata sara, ni sa solia tu veikeda eso na idusidusi talei na Tamada Vakalomalagi meda vakaivakarautaka kina, ka tuva kina, ena ituvaki vinaka duadua na noda bula. Ena yaga vakaidina na idusidusi oqori veitalia na noda yabaki ni bula se keda ituvaki. Esa solia vei keda o Koya na kosipeli, kei na Lotu i Jisu Karisito. Sa solia tu veikeda o Koya na ituvatuva ni veivueti, ituvatuva ni veivakabulai, vakatalega kina na ituvatuva ni marau. A sega ni biuti keda taudua tu kei na veika veilecayaki se bolebole taucoko ni bula, ka qai kaya, “Sai koya oqori. Me nomu na kalougata. Cakacakataka yani vakaiiko.”

Kevaka walega meda dau vosota ka vaqaqara ena yalomalumu kei na vakasama rabailevu, eda na raica na levu ni iyaragi e solia tu veikeda na Kalou meda kila vinaka kina Nona veidusidusi cecere me baleta noda marau ena bula oqo:

Sa solia tu veikeda na isolisoli tawavoli rawa ni Yalo Tabu, ka rawa vua me noda qasenivuli vakalomalagi yadudua ena noda vulica na vosa ni Kalou ka segata me veidonui na noda vakasama kei na ivalavala me salavata kei na Nona vosa.
Sa vakatara tu veikeda ena 7 na siga dua na macawa kei na 24 na auwa dua na siga meda masuti koya yani ena yalodina ka tagici koya ena inaki dodonu.
Sa solia tu veikeda o Koya na iapositolo kei na parofita ni gauna oqo, ka ra vakatakila veikeda na vosa ni Kalou edaidai ka tu talega vei ira na lewa mera semata se vaucavata na ka e vuravura vakakina mai lomalagi.
Sa vakalesuya tale mai na Nona Lotu—e dua na isoqosoqo mata vakabauta ka ra cakacaka ka veivukevukei ka cakacakataka tiko nodra vakabulai ena rere, sautaninini, kei na reki sega ni vakatauvatani rawa.¹
Sa solia tu veikeda o Koya na ivolanikalou tabu—Nona vosa volai veikeda.
Sa solia tu na ibinibini yaragi vakatekinolaji ni gauna oqo me vukei keda ena noda salatu ni bula vakatisaipeli. E vuqa vei ira na idusidusi oqo era kunei ena LDS.org.

Na cava e sa solia vakalevu sara kina vei keda na veivukei na Tamada Vakalomalagi? Baleta ni lomani keda o Koya. Ka baleta, ni a kaya kina o Koya, “Raica oqo na inaki kei na lagilagi ni noqu cakacaka—io mera tucake tale mai na mate na tamata kecega, ka rawata na bula tawamudu.”²

E dua tale na kena itukutukuni, Sa noda Kalou na Tamada Vakalomalagi, ka sa noda daunivakasala na Kalou.

E kila vinaka cake, na Tamada Vakalomalagi, mai vei ira na tani, na Nodra gagadre na Luvena. Sa Nona cakacaka kei na lagilagi me vukei keda ena noda veigolegole kece sara, solia veikeda na veiyaragi vakasakiti vakayalo ka vakayago me vukei keda ena noda salatu ni lesu ki Vua.

Na Tama Era Daunivakasala kece

Ena so na yasai vuravura, era dau rokovi mai vei ira na nodra matavuvale kei na itikotiko na tama ena vula o June. E sa dau ka vinaka dina na rokovi ira na noda itubutubu. Era dau vakayacora vei ira na nodra matavuvale na tama e vuqa sara na veika vinaka ka ra dau divi vakalevu kina. E rua na itavi bibi ni tama vei ira na luvedra sa ikoya mera dau ivakaraitaki vinaka ka daunivakasala talega. Era sega walega ni dau tukuna vei ira na gone na tama na ka dodonu se cala; e levu cake mai na nodra kolotaka ga yani vei ira e dua na ivolavakarau ka namaki ira mera cakacakataki ira vakaiira ena bula oqo.

Era dau vakasalataki ira na luvedra talei na tama ka vakaraitaka ena nodra ivakaraitaki vinaka na sala me bulataki kina e dua na bula dodonu. Era sega ni dau biuti ira taudua tu ga na gone na tama ia era dau vakusakusa yani mera vukei, vukei ira mera tucake tale ena veigauna era lutu kina. Kei na so na gauna ke gadrevi vakalevu kina, era dau vakatara na tama mera sotava na dredre o ira na luvedra, ena nodra kila ni sai koya oqo na sala vinaka duadua ni nodra vuli.

Eda Daunivakasala Kece Talega

Ena gauna vata era vakayacora kina na ka oqo vei ira na luvedra vakayago na tama, na yalo ni dauveivakasalataki sa dua na ka e gadrevi veikeda kece meda wasea kece vei ira na luve ni Kalou, veitalia noda yabaki ni bula, vanua eda tiko kina, se keda ituvaki. Nanuma tiko, ni o ira na luve ni Kalou era tacida ka ganeda; eda sa lewe kece ni dua na matavuvale tawamudu.

Ena vakasama oqori, meda daunivakasala kece sara kina—tu vakarau mera dolele yani ka veivukevukei meda yacova na keda ituvaki cecere sara. Me vaka ni da luvena dina na Kalou, sa rawa kina veikeda meda vakataki Koya. Lomana na Kalou kei ira na tamata kece, muria na ivakaro ni Kalou, kei na muria na ivakaraitaki nei Karisito sa ikoya na sala dodonu, qiqo, ka sala rekitaki lesu kina kedrau iserau na noda itubutubu vakalomalagi.

Kevaka me o koya na Kalou ni vuravura oqo e kauwaitaki keda vakalevu dina sara ka yaco kina me noda daunivakasala, sa rairai na rawa talega kina veikeda meda dolele yani vei ira na tamata kece sara, veitalia na kedra roka, kawatamata cava, ituvaki ni rawa ka, ivosavosa se lotu cava. Meda sa daunivakasala vakauqeti ka vakalougatataka na nodra bula kece tale eso—sega ni o ira walega na luveda ia o ira kece talega na luve ni Kalou e veiyasai vuravura kece sara.

© 2016 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/15. Vakadonui me vakadewa: 6/15. Vakadewa ni First Presidency Message, June 2016. Fijian. 12866 858

Veivakavulici mai na iTukutuku Oqo

O na via tekivu beka ena nomu tarogi ira o vakavulici ira me baleta e dua na gauna ka yaco me vakasalataki ira kina na Tamada Vakalomalagi. Sa rawa mo qai tarogi ira talega mera vakasamataka mada na kena tautauvata na gauna oqori kei na dua na gauna ka ra vakila kina na veivakasalataki mai vei tamadra vakayago. Sureti ira mera vola na veika e tautauvata kina na nodra vakasalataki. Sa rawa mo na bolei ira mera vakatotomuria na veika era sa vola ena nodra sasaga mera dauniivakaraitaki vinaka cake vei ira e so tale.