iVaqa ni Veisiko, June 2016
Cakacakavakalotu kei na Veiyalayalati ni Valetabu
Vulica ena masumasu na itukutuku oqo ka vakasaqara mo kila na ka me wasei. Ena rawa vakacava kina ki na kilai vinaka ni, “Ai Vakaro ki Vuravura Raraba” me vakalevutaka na nomu vakabauta na Kalou ka vakalougatataki ira o vakaraica voli ena gauna ni veisiko? Me ikuri ni itukutuku, lako ki na reliefsociety.lds.org.
Vakabauta, Matavuvale, Veivukei
Na cakacakavakalotu kece e gadrevi me baleta na vakabulai kei na vakacerecerei era salavata kei na veiyalayalati kei koya na Kalou. E kaya o Linda K. Burton, peresitedi raraba ni iSoqosoqo ni Veivukei, “Na caka kei na muri ni veiyalayalati e kena ibalebale noda digitaka me da vauci keda vei Tamada Vakalomalagi kei Jisu Karisito,”1
A kaya o Elder Neil L. Andersen ena Kuoramu ni iApositolo Le Tinikarua, “Sa kaya na Turaga ni, ‘Ena ilesilesi oqo … sa vakatakilai mai kina na kaukauwa ni Kalou.’
“Sa dau tu ga na veivakalougatataki uasivi mai vua na Kalou me baleti ira na buladodonu ka ra sa papitaiso, ciqoma na Yalo Tabu, ka laki vakayagataka wasoma na sakaramede.”2
A kaya o Elder M. Russell Ballard ena Kuoramu ni iApositolo Le Tinikarua, “Ni rau gole yani ki valetabu e dua na tagane kei na dua na yalewa,” “erau vakaedaumeni vata ena dua vata ga na kaukauwa, sa ikoya na kaukauwa ni matabete …
“…E rawa ni taura na tagane kei na yalewa taucoko na kaukauwa oqo me vukei ira ena nodra dui bula vakaiira. O ira kece era sa cakava na veiyalayalati tabu kei na Turaga ka ra rokova na veiyalayalati oqori sa rawa ni ra ciqoma na ivakatakila yadua, me ra vakalougatataki ena veiqaravi ni agilosi, me ra veitaratara kei na Kalou, me ra rawata na taucoko ni kosipeli, ka me kena ilutua, me ra vakaivotavota vata kei Jisu Karisito ena veika kecega e tu vei Tamana.”3
iKuri ni iVolanikalou
1 Nifai 14:14; Vunau kei na Veiyalayalati 25:13; 97:8; 109:22
Veitalanoa Bula
Ena 2007, ni oti ga e va na siga mai na uneune levu e Peru, a sota kei peresitedi ni tabana o Wenceslao Conde kei watina o, Pamela o, Elder Marcus B. Nash ena Vitusagavulu. A tarogi Sisita Conde o Elder Nash se sa vakaevei tiko o iratou na luvena. E sauma ena matadredredre ka kaya, ena vinaka ni Kalou eratou sa maroroi ka bula vinaka kece tiko. E vakataroga talega me baleta nodratou itikotiko na Conde.
“Sa yali,” e tukuna yani vakatotolo.
“Ia,” e raica rawa o Elder Nash, “o matadredredre tu ga ni tou veitalanoa tiko oqo.”
“Io,” e kaya o koya, “Au sa masu oti kau sa vakacegu tu. Na veika kecega keitou gadreva sa tu. Keirau bula vinaka, era tiko na luvei keirau, keitou sa vauci oti ena valetabu, sa tu vei keitou na Lotu vakasakiti oqo, ka tu vei keitou na Turaga. Keitou rawa ni tara cake tale ena veivuke ni Turaga.” …
“Na cava e tiko ena vakayacori kei na muri ni veiyalayalati kei Koya na Kalou ka solia veikeda na kaukauwa meda matadredre ena maliwa ni dredre, ka veisautaka na gauna ni rarawa levu ki na gauna ni reki … ?”
“Sa vu mai vua na Kalou. Na noda rawa ni yacova na kaukauwa oqori sa ikoya na noda veiyalayalati kei Koya.”4
© 2016 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/15. Vakadonui me vakadewa: 6/15. Vakadewa ni Visiting Teaching Message, June 2016. Fijian. 12866 858
Vakasamataka oqo
Era vakaukauwataki keda vakacava na cakacaka kei na veiyalayalati ni valetabu?