Onimakina te Uea ao Tai Onimakina Oin Wanawanam
Ti kona ni kabotoi maiura iaon te Tia Kamaiu man kinaakina riki, ao E na kaeti kawaira.
Inanon mwanangau nako Aatia, te aine ae tangiraki e kawarai. E rabwatai iaan baina, ao n titiraki, “Ko kakoaua raoi bwa e koaua te euangkerio aei?” Tariu ae tangiraki, I ataia bwa e koaua. I onimakina te Uea.
N Taekan Rabakau 3:5–6, ti wareka te reirei aei:
“Ko na onimakina Iehova n nanom ni kabanea; Ao tai mwiokoa oin am ataib’ai.
“Ko na ataia n nakonakom ni kabane, Ao E na kaeti kawaim.”
Te booki ae tabu aei e roko ma uoua reirei, te kauring, ao te berita ae mimitong. Reirei aika uoua: “Ko na onimakina Iehova n nanom ni kabanea” “Ko na ataia n nakonakom ni kabane.” Te kauring: “Ao tai mwiokoa oin am atab’ai.” Ao te berita ae mimitong: “E na kaeti kawaim.”
Ti na maroroakina moa te kauring. Te tamnei e anganiira riki ae mwaiti n iangoia raoi. Te kauring e roko n te taeka “tai onimakina”—“tai onimakina oin am ataib’ai.” N Imatang te taeka onimakina iai nanona n rinanna n rabwata, ke mwaingim nakon te iterana. Ngkana n rabwatara ti rara nakon te iterana ke are teuana, ti mwaing nako mai nuuka, ti aikoa baeranti, ao ti bwaka. Ngkana ti onimakina oin wanawanara n tamnei , ti kararoaira mairoun te Tia Kamaiu. Ngkana ti rara, ti aki mena inuuka, tiaki baeranti, ti aki boboto iaon Kristo.
Tariu, uringnga ni maiura n tamnei, ti tei ma te Tia Kamaiu. Ti onimakinna. Ti reita ara boutoka, ungannano, ao te kimwareirei ibukin te babaire ni kakukurei are e katauraoia Tamara are i Karawa. Ti aki kararoaira. Ti tei ibukin ara koaua ao “ni kabooraoira ma ana kairoro te Atua, ao kairoro akanne a bon tokanikai.”1 Te bobuaka imarenan te raoiroi ma te buakaka e a roko n te aonaaba. Teuana riki iai tabera ae tabu n tei bwa te tia kakoaua ao ni katuka ara onimaki iroun te Uea.
Ti riai n titiraki imarenara: N na kanga ni boboto ao n aki onimakina oin au ataib’ai? N na kanga ni kinaa ao n iriira bwanaan te Tia Kamaiu ngkana e a rangin anainano bwanaan te aonaaba? N na kanga n ribanaa te onimaki iroun te Tia Kamaiu?
I bia iangoi teniua kawai ni karikirakea rabakaura n onimakina te Tia Kamaiu. Ko na kunea bwa reirei aikai a aki boou, ma iai aaia. A aneneaki n te Buraimwari, e kabwarabwaraaki n te reirei n aia Bootaki Ataeinaine ao kaekaakin titiraki aika mwaiti n te Bootaki n Aine. A boboto iaon—ao n aki kararoai—taian reirei.
Te moan, ti kona n rangin kinaa te Uea ao n onimakinna ngkai ti “kakukurei ngkami n ana taeka Kristo; bwa taraia, a na tuangko ana taeka Kristo bwaai aika ko riai ni karaoi.”2
Tabeua namwakaina n nako, ti karaoa ara kamatebwai n utu. Tibu te mwaane ae uoua ana ririki e tekateka iaon rangau ngkai ti wareware. I kukurei n riki bwa te tibu te unaine, ni korakora kukureiu n rokon natin au utu te mwaane.
Ni bwaninin ara kamatebwai ni booki aika tabu, I kaina te boki. E ataia tibu te mwaane bwa e a boo tain te matu. E tararake ma matana aika buru ao n taekina te koaua ae akea tokina: “Booki riki aika tabu, Nana.”
Natiu te mwaane, kaaro aika tamaroa ao n teimatoa, a kauringai, “Tinau, tai anga ngkoe nakoina. E kataia n aki kan nako ni matu.”
Ma ngke e bubuti riki ibukin booki aika tabu tibu te mwaane, ti a wareki riki booki aika tabu! Mwaitin booki aika tabu a kaotai ara iango, kanuai tamneira, kaekai ara titiraki, karikirakea ara onimaki iroun te Uea, ao ni buokiira ni kabotoi maiura Irouna. “Kam na uringnga ni kakaonimaki ni ukoukori, bwa kam aonga ni kakabwaiaki iai.”3
Te kauoua, ti kona ni kinaa riki te Uea ao n onimakinna rinanon te tataro. Bon te kakabwaia ngkai ti kona n tataro nakon Atuara! “Tataro nakon te Tama ma korakoran nanomi.”4
Iai au ururing ae kakukurei ibukin te tataro are I kawakinna. Ibukin teuana au Motirawa n tain te tiamwa man te kuura, I butimwaea te mwakuri i Texas. I riai ni buti te bubua te maaire mai Idaho nako Texas n au kaa ae e a mane, te kaa are I tangiria n aranna bwa Vern. E kanoaaki te kaa ae Vern ni karokoa taubukina, ao I a tauraoi nakon te mwananga ae boou.
Iaoni kawaiu n otinako nakon te mataroa, I rabwata tinau ae tangiraki ao e taku, “Ti na tataro imwaain ae ko nako.”
Ti katorobubua ao e moana ana tataro tinau. E butiia te Tama are i Karawa ibukin kawakinau. E tataro ibukin au kaa ae akea ana bwai ni kamwaitoro, ni bubuti bwa e na butiraoi te kaa n aron ae I kainnanoia. E bubutiia taian anera bwa a na raonai ni kabanea te tiamwa. E a tataro ma e a tataro ma e a tataro.
Te rau are e roko man te tataro e anganai te ninikoria n onimakina te Uea ao n aki onimakina oin au ataibwai. Te Uea e kaira kawaiu ni babaire aika mwaiti ake I karaoi n te tiamwa anne.
Ngkai ti karaoa te anua ni karoko iroun te Tama are i Karawa inanon te tataro, ti na kinaa riki te Tia Kamaiu. Ti na onimakinna. Ara iango a na riki n aron Ana iango. Ti na kona ni kawakiniira riki i bon ibukira ao ibukin kakabwaiakiia tabeman bwa te Tama are i Karawa e tauraoi n anga ngkana ti bubuti inanon te onimaki.5
Te kateniua, ti kona ni kinaa riki te Uea ao n onimakinna ngkai ti beku ibukiia tabeman. I tibwaua te karaki ane imwiina man ana kariaia Amy Wright, are e ataa riki te reirei n ibuobuoki e ngae ngke ibuakon aorakina ae kakamaaku ao ni kamamate. E koroboki Amy:
“N Okitobwa 29, 2015, I a kunea bwa I kaentia. Bon tii te 17 te baetienti mwaitin maiu n reken te kaentia irou. Au tai ni marurung e aki rang tamaroa. I ataia bwa N na mwakuri n totokoi kataaki aika a kaoti inanon maiu. I baireia bwa N na anga nako bwaai ni kabane ake irou tiaki tii ibukiu ma ae kakawaki riki, ibukiia au utu. N Ritembwa, I moana au tutuo n te keemo. I moanna ni kinai korakoran mwiin taian bwatin ibukin te kaentia, ma I aki ataia bwa e kona temanna n rangin aoraki ao n teimatoa ni maiu.
“N te iango teuana, I kabwarabwara te keemoteraabi bwa uruakan inaomatan te aomata. I tuanga kaainabau bwa I a tia. I a rawa iai! N na aki manga okira te onaoraki. Ni wanawanana, e nanorinano raou ao n ongora ao ngkanne e kaekaai, ‘Ngaia, ngkanne ti riai ni kakaea riki temanna.’”
Terana? E kabua te koaua are buuna e kaentia ao n aki kona ni karekea maiuna ae uarereke n te mumumuta ke teuana riki te tai ni maraki n ae korakora.
E reitianako Amy ni kabwarabwara: “Au kanikina a rikirake ni buakaka nakon tebongina are I karekea ke ‘KEIAKINANA’ uabong n te namwakaina [ngke] I kona ni kanakoraoa aron maiu. te aomata ae ikeike. Bon boong akanne ngke ara utu a na kona ni kakaei kawai ni mwakuri.”
N teuana ibuakon boong akanne, ana utu Amy a tibwai bwaai ibukin te keemo nakoia tabeman aoraki, bwaoki aika kanoaaki ma bwaai ni kakukureia ao ni buoka ni katoki kanikina aika riki. Ngke e aki kona ni matu Amy, e iangoi kawai ni kakukureia ana bong temanna. Tabeua kawai a bubura, ma angiina bon rongorongo aika uarereke ke te tekiti ni kaunganano ao n tangira. Inanon tairiki akanne ngke e korakora marakina nakon te matu, e na bae ni wene ma ana iPad ao ni kakaei otenanti ake a riai ni katiaaki n tei ibukiia ana bakatibu ake a tia ni mate. N ae kamiimi e na bae ni keerikaaki te maraki, ao e a kona ni keiakinna.
“Ibuobuoki,” e kaotia Amy, “e katana maiu. Te tabo ike I kunea iai korakorau ni kateimatoa kakamwakuriu bon te kukurei are I kunea ni kataakin tuukan korakaia naake irarikiu. I kakantaninga ara mwakuri n ibuobuoki ma te kimwareirei ae korakora ao te ingainga n nano. N teimatoa ni karokoa te tai aei e taraa n ae kanga e kaangaanga rikina. Ko na bae n iangoia bwa temanna are e mara atuuna, e boitin, ao ni keiakina maiuna e butimwaea n iangoia bwa ‘I riai n tabeaianga ibukiu.’ E ngae n anne, ngke I iangoai, au kaangaanga, karawawatau ao marakiu, e a moanna n roo ao kananokawaki. Ngke e a bitaki au taratara nakoia tabeman, iai te oota, kantaninga, ninikoria, ao te kimwareirei. I ataia bwa e kona n riki aei ibukin kamatoaakin, ana kamaiu, ao mwaakan ana Mwakuri ni Kamaiu Iesu Kristo. ”
E roko Amy bwa e onimakina te Uea ngkai e a rang kinaa. Ngke e teimatoa teutana n onimakina oin wanawanana, e na bae n aki butimwaea te iango are e mwakuria. Te mwakuri n ibuobuoki e anganna te konaa ni keiakina marakina ao karawawatakina ao ni maiuakina te boki ae tabu aei: “Ngkana kam beku ibukiia raomi ao kam bon beku naba ibukin Atuami.”6
Iesu Kristo e a tia n tokanikai iaon te aonaaba. Ao ibukina, ibukina Ana Mwakuri ni Kamaiu ae akea tiana, iai ara mwakuri n onimakina, n ataia bwa n te kabane ti na bane n nakoraoi.
Tariu, ngaira ni kabane ti kona n onimakina te Uea ao n akikararoaira. Ti kona ni kabotoi maiura iaon te Tia Kamaiu man kinaakina riki, ao E na kaeti kawaira.
Ti mena iaon te aba ni kaota te onimaki naba anne Irouna are e kariaira n tei ma Iesu Kristo ngke E kabwarabwara bwa te Tama are i Karawa e kona ni kanakoa (n riki bwa ara Tia Kamaiu.7
Tariu aika tangiraki, Beretitenti Thomas S. Monson e kaotia bwa “ara kakabwaia aika beritanaki a riao baireaia. E ngae ngke e kakamaaku te bwai are ti mena inanona, kakatai ao kaangaanga a kabotauaki ma te buaka ni karau, rabakaura n te euangkerio ao ara tangira ibukin te Tama are i Karawa e na karau nanora ao ni boutokaira … ngkai ti nakonako ma te eti. … A na akea te bwai teuana n te aonaaba aei are e kona ni konaira.”8
I reita au koaua nakon ara burabeti ae tangiraki. Ngkana ti onimakina Tamara are i Karawa ao ara Tia Kamaiu ao n aki onimakin oin wanawanara, A na kaeti kawaira ao a na karababa aia nanoanga nakoira. N aran Iesu Kristo, amen.
Bwaai aika a na taraaki: N Eberi 1, 2017, E kamotirawaaki Titita Cordon ngkai te Kauoman ni Kauntira n te Beretitenti ni Kabuta n te Buraimwari ao ni weteaki bwa te Moan Kauntira.