Ane E tuangkami Teuanne, ao Kam na Karaoia
Ngkana ti karaoa ara motinano “te bwai are E taekinna te [Atua] nakoira,” ti na moan taai ao ni katamaroai anuara ni katoa bong n ana kantaninga te Atua.
E karaoa ana moan kakai ae kamimi te Tia Kamaiu ae tauaki mwiina n te baka n amwarake i Kaana i Kariraia. Maria; are Tinana, ao Ana Reirei a bon mena naba ikekei. E namakinna Maria bwa iai tabena ibukin kanakoraoan te bootaki. Inanon tain te baka ao iai teuana te kaangaanga—bwa e aki tau te wain. Maria e rangi n raraoma ao e nakon Iesu. A maroro teutana, ao imwiina Maria e taraa ana tabonibai ao e taku:
“Ane E tuangkami Teuanne, ao Kam na Karaoia
“Ao iai te tiete ae onoua kaatibu aika nen te ran. ... [Kaatibu aikai a aki kamanenaaki ibukin kawakinan te ran ni mooi ma ibukin kaitiaki aika kakawaki i aan ana tua Moote.]
“E taku Iesu nakoia [tooro], Kaoni nen raan n te ran. Ao a kanoai ni kaoni nakon tiana.
“Ao E taku nakoia, Itiia ngkai ao angan te kowana n te baka. Ao a karaoia.
“[Ngkanne] te tia taua taekan te baka…e katonga te ran are karaoaki bwa te wain” ao e kaota mimiina bwa te wain ae te kabanea n tamaroa e a tibwa nimaki rimwi n te baka.1
Ti bon ururinga te tai aio ibukin onean te ran nakon te wain bon kaotan mwaakan te Atua—bon te kakai. Bon anne te rongorongo ae boongana, ma iai te rongorongo riki teuana n ana karaki Ioane. Maria bon “te bwai ni mwakuri ae kakawaki man rineaki,”2 ae weteaki iroun te Atua bwa e na bungia, e na tararuaia ao ni kaikawaa Natin te Atua. E ataa riki arona nakon te aomata nako n te aonaaba. E ataa koauan kamimin bungiakina. E ataia bwa E aki bure ao E aki taekiniia ao E “aki taetae n aekaia mwaane tabeman, E aki kona naba n reireinaki, bwa E aki kainnanoia bwa e na reireinna temanna te mwaane.”3 Maria e ataa rakan Ana konabwai ni katoki kaangaanga, n ikotaki ibukin katauraoan te wain ibukin te amwarake ni baka. Iai ana onimaki Irouna ao ataakin ao Mwaakana n Atua. Ana katei ao ana kaetieti aika bebete nakoia tooro aki matoatoa, akea tuaia, akea tiaia: “Ane E tuangkami teuanne, ao kam na karaoia.”
Bon te aine ae ataei Maria ngke e kaoti te anera are Kaberiera nakoina. Te moan bwai e “katabetabeaki” man weteana bwa “e karietataaki”ao e “kakabwaiaki … ibuakoia aine … ao neierei e maku n ana taeka ao e iango inanona ba te inga ra te inga arei. E tuanga Kaberiera bwa e na aki maaku—bwa te rongorongo are uotia e raoiroi. E na “karika inanon birotona … Natin Teuare moan te Rietata” ao ni “karika te nati te mwaane…[are] E na uea i aon te bata are Iakoba n aki toki.”
E taku Maria, “E na iranaki te baenne, ngkai akea buu?”
E kabwarabwaraa te anera, ma ti teutana, ni kamatoa nakoina “Ba akea te taeka teuana mairoun te Atua [ae] na aki m’aka.”
E nanorinano Maria ni kaeka bwa e na karaoa are tangiria te Atua, n akea nenerakin ataakin baika a kakaokoro ao ni kananououa n oneimwiin titiraki aika mwaiti ibukin baika a riki ni maiuna. E motinnanoia n akea ana ataibwai bwa bukin tera E titiraki ibukina ke a kanga n nakoraoi bwaai. E butimwaea anaa taeka te Atua Maria n akea totokoana ao ni waakirake,4 n akea raoi te ataibwai bwa tera ae wene imwaina. Ma taeka ake a kaota te raunnano ao te onimaki iroun te Atua, e taku Maria “Noora ana toro te Atua ae te toro te aine; e na karaoaki nakoiu n ai aron am taeka.”5
Ngkana ti bairea te bwai ae ti na karaoia, “tera baike e taekin te [Atua] “nakoira, ti kakorakoraira ni motinnanoia ni kabooraoi maiura ma ana kataninga te Atua. N aron mwakurin te onimaki ae bebete ni kamatebwaian booki aika tabu, te aki mamatam ni katoa tai, ao n tataro ma nanora e kakorakorai ara konabwai n te tamnei ni kaitaraa kainnano n te maiu ae mamate. N te tai ae okioki, katei aika bebete e kairiira nakon kakai aika iai mwiia. A onika ara onimaki man te mwaaka ae uarereke nakon ae bubura inanon maiura. Ngkanne, ngkana a roko kataaki ni maiura, te nene inanon Kristo e a tia n ribanaaki man mwakuri ni katoabong man te anganano are karekea te matoatoa nakon tamneira ma rabwatara. Te Atua e kakorakorai mamaarara, e karikirakei kimwareireira, ao ni karaoi “bwaai ni kabane bwa [a na] mwakuri ibukin [ara] raoiroi.”6
Tabeua ririki n nako, I taetae ma temanna te Bitiobi are e kabanei aoa ni katoa wiiki ni karaoa raoi weteakina, e reirei ma membwa n ana uoote. E katika te nano taraakina. Taian kaangaanga are a kaitarai kaain ana uoote, e taku bon aekan naba are irou—rongorongo n aron karekean te mare ae kakukurei; taian ikakorakora ma boraoin te mwakuri, utu, ma mwakurin te Ekaretia; kaangaanga n Tuan te Mauri, ma te mwakuri, ke ma tamnei aika bubuaka; ke kaangaanga ni karekean te rau man ana tua te Ekaretia ke titiraki are a aki kukurei iai.
Ana maroro nakoia kaain te uoote e kaineti ma karaoan nanon te onimaki, n aron kamatebwaian Ana Boki Moomon ni katoabong—n aron are e reireiaki iroun Beretitenti Thomas S. Monson ni karaoia—kabwakaan te kabuanibwai, ao te mwakuri n te Ekaretia ma te nano ni koaua. E ngae n anne, mwaitin aia kaeka nakoina bon teuana man taian kauntaba: “I aki boraoi n iango ma ngkoe, te Bitiobi. Ngaira n tatabemaniira ti atai baika raoiroi bwa ti na karaoi. Ti marooroakin bwaai aikannen taai nako n te Ekaretia. Ma I aki koaua bwa kam oota irou. Tera ae N na karaoia ma rongorongoakanne ma kaangaanga aika Ikaitarai?”
Bon te titiraki ae tamaroa. Mwaitin te tai, Ngai ma te bitiobi ane ataei anne ti a tia ni kamataua tarakiia ake a mwakuri korakora ni karaoi baika uarereke ao ni bebete7—te ongeaba ae uarereke—a kakabwaiaki n te onimaki ao te korakora n te ongeaba irouia ao, ni koaua, e na taraa n aki kaineti nakoia. E taraa ni matoatoa irouia te reitaki imarenan bebeten mwakurin te onimaki ao katokan te kamangaongao ae bubura ae ti kataraa. Ma a bon irekereke. N au tataneiai, reken te anua ke te katei n onimaki ni katoa bong, te taetae n tamnei, bon ti ngaia te kabanea n tamaroa ni kawai ni kamatoaira ni kaitaraa kaangaangan te maiu, are e na reke irouia. Mwakurin te onimaki ae uarereke, e aki tau ke e aki toma man te kaangaanga are kaitaraira, e kakabwaiaira ni bwaai ni kabane ake ti karaoi.
Iangoa ana namakin Naaman, “te kaaben n ana taanga ni buaka … Tiiria, … te rorobuaka ae kakannato i matan ana toka,” ma bon te rebera ngaia. Te ataeinaine ae te toro e tua nakon te burabeti mai Iteraera ngkana e kona ni katoka aorakin Naaman, ao e mwananga ma iriana aika tooro, tautia, ma taian bwaintangira ake a uotia nako Iteraera, n rokoia n ana auti Eritai. Ana toro Eritai, tiaki Eritai, e kaongoa Naaman te Uea ana taeka ae kangai “Naako Kaitiua tebotebom inanon [te karaanga] ae Ioretan.” Te bwai ae bebete. Tao te katoki aoraki aio e taraa n ae te tautia ae mwaakaroiroi e uotaki rikaki, e kamangoraki ke e mena iaan karineana ao te bwai are tuangaki arei e karika te un. N te tai naba anne ana taeka Eritai akea bongana nakon Naaman, “ao e rairaki ao e nako.”
Ma ana toro Naaman a karaurau ni kawaria ao man taraia bwa e na riai ni karaoa te “bwai ae e korakora” bwa e a tia Eritai ni bubutia ibukina. A kabwarabwaraa bwa ngkai e butiaki bwa e na tii karaoa te mwakuri ae uarereke, e na bon aki karaoia e ngae ngkana e aki ataia bwa bukin tera? Naaman e a manga iangoa are karaoia ao tao e aki kakoaua, ma e ongeaba, “Ao e ruo … ao e kaitiua tebona i Ioretan” ao e a rina naba ni kamaiuaki.8
Kanuangan te ongeaba a roko ni waetata; tabeua a kona n tii roko imwiin kataakira. N te Pearl of Great Price, ti wareka aron Atam n aki kua ni kawakina te tua are te angakarea. Ngke te anera e tuangnga Atam bwa bukin tera e anga karea, e taku, “I aki ataia, ma e tuangai te Uea. E kabwarabwara te anera bwa taian karea bon oneanmwiin te karea are te Rikitemanna iroun te Atua te Tama. Ma te kabwarabwara anne e roko imwiin ongeaban Atam n te tai ae rangi ni maan nakon tuan te anga. Imwiin kabanean nanona nakon tuan te angakarea nakon te Uea inanon “boong aika mwaiti” n akea ataakina bwa bukin tera e bon riai n anga taian karea akanne.9
E aki toki ni kakabwaiaira te Atua ibukin nanomatoara n ongeaba nakon Ana Euangkerio ao ni kokoaua nakon Ana Ekaretia, ma E kaota raoi nakoira tauan mwiin ana tai ibukin karaoana ni moantaai. E aki kaota nakoira te tamnei ae tabwanin mai moana. Anne are te onimaki, te kantaninga, ao kakoauan te Uea inanona.
E tuangira te Atua ni karaoia ma Ngaia—ni kakoaua ao n Rimwiina. E tuangira bwa “ti na aki kauntaeka bukina bwa akea ae kam noria.” E kauringiira bwa ti na aki kantaningai kaeka aika waetata ke karaoan bwaai mai karawa aika waetata. A na mwakuri bwaai ngkana ti nanomatoa n tain “kataakin [ara] onimaki,” e ngae n anne kaangaanga are a kataitai tao n reitinako ke ni iremwe e na bae n roko te kaeka.10 I aki taekina te “onimaki ae mataki”11ma I onrake n te mwioko inanon ana tangira ae kororaoi ma ana tai ae kororaoi te Uea.
Kataakin ara onimaki n taainako e na irekereke ma te tiku ma te koaua nako iai, karaoan te onimaki ni katoa tai. Ngkanne, ao manga tii ngkanne, E berita bwa ti na karekea te kaeka ae mimitong are ti a ukoukoria. Ti man te tai are ti kakoaua motinnanora ni karaoa are E tuangira n akea te kairoro ke n tataninga ni kan ataia bwa nningai, ni kangaa, ao bukin tera bwa ti kariaiakaki n “taia kanuangan [ara] onimaki, ao [ara]wanawana, ara taotaonaki n nano, ao banebuakan ara tai.”12Te ongeaba ni koaua butimwaean ana tua te Atua n akea aana ao ni kanenei.13
Ni katoa bong, ataakina ke tiaki, ti bane n rineia “antai ae [ti] na beku ibukina”14 Ti kaota motin nanora ni beku ibukin te Uea man te teimatoa, ni kakaonimaki n ara mwakuri ni katoa bong ma nanora ni koaua. E berita te Uea bwa E na kaeti kawaira,15 ma bon anne ibukina bwa e na karaoia, ti na nakonako, ni kakoaua bwa E ataa te kawai bwa bon Ngaia “te kawai”16 Ti riai n onrake n te onimaki ibukin te tauraoi. Ngkana ti kakoaua ao n Iriiria n aekakin te ran nakon te wain, a na bitaki maiura. Ti riki n raka nakon are mai mwaaina. Kakoaua te Uea, ao “ane e tuangkami teuanne, ao kam na karaoia.” N aran Iesu Kristo amen.