Ko e Meʻa Kotoa Pē Te Ne Fekau Kiate Kimoutolú, Fai Ia
ʻI heʻetau fili ke fai “e meʻa kotoa pē ʻoku fekau [ʻe he ʻOtuá],” ke tau faí, ʻoku tau tukupā ai ke fakafenāpasi hotau ʻulungaanga fakaʻahó mo e finangalo ʻo e ʻOtuá.
Naʻe fakahoko ʻe he Fakamoʻuí ʻEne fuofua mana kuo hikí, ʻi ha katoanga kai ʻo ha taʻane ʻi Kana, ʻo Kālelí. Naʻe ʻi ai foki ʻEne faʻē ko Melé, pea mo ʻEne kau ākongá. Mahino pē naʻe ongoʻi haʻisia ʻa Mele ke ola lelei ʻa e kātoanga kaí. Ne hoko ha palopalema lolotonga e kātoangá—ne ʻosi e uainé. Naʻe hohaʻa ʻa Mele peá ne ʻalu kia Sīsū. Ne na talanoa nounou, pea tafoki ʻa Mele ki he kau tamaioʻeikí ʻo pehē ange:
“Ko e meʻa kotoa pē te ne fekau kiate kimoutolú, fai ia.
“Pea naʻe tuʻu ai ʻa e hina vai maka ʻe ono. … [Naʻe ʻikai fakaʻaongaʻi e ngaahi hiva vai ko ʻení ki he tānakiʻanga vai, ka naʻe fakaʻaongaʻi ia ki he ouau fakamaʻa ʻi he fono ʻa Mōsesé.]
“Pea pehē ʻe Sīsū [ki he kau tamaioʻeikí], Fakafonu ʻa e ngaahi hina vaí ʻi he vai. Pea naʻa nau [fakafonu] ia ki he ngutungutú.
“Pea fekau ʻe ia kiate kinautolu, Fakatafe leva ʻo ʻave ki he pule ʻo e kātoangá. Pea naʻa nau ʻatu ia.
“Pea kuo [inu leva] ʻe he pule ʻo e kātoangá ʻa e vai kuo liliu ko e uainé” peá ne fakahā ʻene ofo ʻi hono toki ʻoange ʻa e uaine lelei tahá he mei tuku e kātoangá.1
ʻOku tau faʻa manatuʻi e meʻa ko ʻeni ne hokó he ko e liliu ʻo e vaí ki he uainé, ko hano fakahaaʻi kāfakafa ia e mālohi ʻo e ʻOtuá—ko ha mana ia. Ko ha pōpoaki mahuʻinga ia, ka ʻoku ʻi ai ha pōpoaki mahuʻinga ʻe taha ʻi he fakamatala ʻa Sioné. Ko Melé ko ha “meʻangāue mahuʻinga kuo fili,”2 ʻa ia naʻe ui ʻe he ʻOtuá ke ne fāʻeleʻi, lehilehiʻi pea mo tauhi e ʻAlo tofu pē ʻo e ʻOtuá. Naʻá ne ʻilo lahi kia Sīsū, ʻo laka ia ʻi ha toe taha he māmaní. Naʻá ne ʻilo e moʻoni ki he mana ʻo Hono ʻaloʻí. Naʻe ʻilo ʻe Mele naʻe haohaoa ʻa Sīsū pea “naʻá ne lea ʻo ʻikai hangē ko e kakai kehé pea naʻe ʻikai faʻa akoʻi ia; he naʻe ʻikai fie maʻu ha tangata ke ne akoʻi ia.”3 Naʻe ʻiloʻi ʻe Mele ʻa Hono ivi makehe ke solova e ngaahi palopalemá, kau ai ha meʻa fakatāutaha, ko hono ʻoatu ha uaine ki ha kātoanga taʻane. Naʻá ne falala lahi kiate Ia pea mo Hono mālohi fakalangí. Naʻe faingofua mo fakapatonu e fakahinohino ʻa Mele ki he kau tamaioʻeikí, pea ʻikai ʻi ha toe ʻuhinga kehe pe makatuʻunga pe fakangatangata: “Ko e meʻa kotoa pē te ne fekau kiate kimoutolú, fai ia.”
Ko ha finemui kei talavou ʻa Mele ʻi he hā ʻa Kepaleli kiate iá. Naʻá ne ʻuluaki “puputuʻu” ʻi hono ui ia ko e “ʻofeina lahi” mo e “monūʻia ʻi he fefine fulipē … mo he fifili i hono lotó pe ko e hā hono ʻuhinga ʻo e fetapa ko iá.” Naʻe fakapapauʻi ange ʻe Kepaleli ke ʻoua naʻá ne manavahē—he naʻe fakafiefia e ongoongo naʻe haʻu mo iá. Te ne “tuʻituʻia ʻi hono manavá … ʻa e ʻAlo ʻo e Fungani Māʻolungá” pea te ne “fāʻeleʻi ʻa e tama… [ʻa ia] ʻe pule ki he fale ʻo [Sēkopé] ʻo taʻengata.”
Pea pehē ʻe Mele, “ʻE [hoko] fēfē ʻa e meʻá ni he ʻoku ʻikai te u ʻiloa ha tangata?”
Naʻe fakamatalaʻi nounou ange ʻe he ʻāngeló “ʻoku ʻikai ha meʻa ʻe faingataʻa ki he ʻOtuá.”
Naʻe tali angavaivai ange ʻe Mele te ne fai ha meʻa pē ʻe kole ange ʻe he ʻOtuá, pea he ʻikai ke ne toe feinga ke ʻilo ki ha fakaikiiki, neongo ʻoku ʻikai ha toe veiveiua naʻe lahi fau haʻane ngaahi fehuʻi fekauʻaki mo ʻene moʻuí. Naʻá ne fakatukupaaʻi ia neongo naʻe ʻikai mahino kiate ia ʻa e ʻuhinga naʻá Ne kole ange ai kiate iá, pe ʻe founga fēfē e meʻa ʻe hokó. Naʻá ne tali e folofola ʻa e ʻOtuá, ʻo ʻikai ha toe makatuʻunga pea ʻi ha taimi lahi kimuʻa,4 taʻe te ne maʻu ha ʻilo feʻunga ki he kahaʻú. Naʻe pehē ʻe Mele ʻi he tui moʻoni ki he ʻOtuá, “Vakai ko e kaunanga au ʻa e ʻEikí; ke hoko mai kiate au ʻo hangē ko hoʻo leá.”5
ʻI heʻetau fili ke fai “e meʻa kotoa pē ʻoku fekau [ʻe he ʻOtuá],” ke tau faí, ʻoku tau tukupā ai ke fakafenāpasi hotau ʻulungaanga fakaʻahó mo e finangalo ʻo e ʻOtuá. ʻOku hanga ʻe he fanga kiʻi tōʻonga faingofua ʻo e tuí, hangē ko e ako folofolá, ʻaukai maʻu pē, mo e lotu fakamātoató, ʻo fakaloloto hotau tuʻunga fakalaumālie ke fehangahangai mo e ngaahi faingataʻa ʻo e matelié. Taimi lahi, ʻoku hanga ʻe he fanga kiʻi ʻulungaanga faingofua ʻo e tuí ʻo ʻomi ha mana lahi. ʻOku nau liliu ʻetau tuí mei heʻene kei tā huli haké, ke hoko ko ha mālohi kāfakafa ʻo e leleí ʻi heʻetau moʻuí. Pea ʻi he taimi ʻoku hoko mai ai e faingataʻá, ʻoku hanga leva ʻe heʻetau tanumaki fakaʻaho ʻetau moʻuí ʻia Kalaisí, ʻo fokotuʻu maʻu hotau laumālié. ʻOku tokoni mai ʻa e ʻOtuá ke fakamālohia hotau ngaahi vaivaí, fakalahi ʻetau fiefiá pea ʻai ke “fengāueʻaki fakataha ʻa e ngaahi meʻa kotoa pē koeʻuhí ko [ʻetau] leleí.”6
ʻI he ngaahi taʻu siʻi kuohilí, ne u talanoa ai mo ha pīsope kei talavou naʻá ne fakamoleki ha taimi lahi he uike takitaha, ke talatalaifale mo e kāingalotu hono uōtí. Naʻá ne fai e lau mālie ko ʻení. Naʻá ne pehē ko e ngaahi palopalema ʻoku fekuki mo e kāingalotu hono uōtí, ʻoku tatau pē ia mo e meʻa ʻoku fekuki mo e kāingalotu ʻo e Siasí he funga ʻo e māmaní—hangē ko e founga ke faʻu ai ha nofo mali fiefiá, faifeinga ke fakapalanisi e ngāué, fāmilí mo e ngaahi fatongia faka-Siasí; faingataʻaʻia he Lea ʻo e Potó, maʻu ha ngāué, ponokālafí; pe faingataʻa ke ongoʻi fiemālie ki ha tuʻutuʻuni ʻa e Siasí pe fehuʻi he hisitōliá ʻoku ʻikai mahino kiate kinautolu.
ʻOku faʻa kau heʻene akonaki ki he kāingalotú ke nau toe foki pē ki he tefitoʻi ngāue faingofua ʻoku tau fai ke fakahaaʻi ʻaki ʻetau tuí, hangē ko e ako fakaʻaho e Tohi ʻa Molomoná—ʻo hangē ko ia kuo naʻinaʻi mai ʻe Palesiteni Tōmasi S. Monisoni ke tau faí—totongi e vahehongofulú, pea ngāue mateaki ʻi he Siasí. Ka neongo iá, naʻe fakaʻohovale ʻenau tali kiate iá: “Pīsope, ʻoku ʻikai ke u tui pehē. ʻOku tau ʻilo kotoa ʻoku lelei ke fai e ngaahi meʻá ni. ʻOku tau talanoa ki he ngaahi meʻá ni he taimi kotoa ʻi he Siasí. Ka ʻoku ʻikai ke u tui ʻoku mahino kiate koe. Ko e hā ha kaunga e meʻa ko ʻená ki he palopalema ʻoku ou fekuki mo iá?
Ko ha fehuʻi lelei ia. ʻI he fakalau atu e taimí, kuó u fakatokangaʻi mo e pīsope kei talavou ko iá, ko e niʻihi ko ia ʻoku nau fai pau ki he “fanga kiʻi meʻa iiki mo faingofuá”7—ʻo talangofua ʻi he fanga kiʻi founga ngali īkí—ʻoku tāpuekina kinautolu ʻaki e tuí mo ha ivi ʻoku mahulu hake ʻi he talangofuá pē, pea mahalo ʻoku hangē he taimi ʻe niʻihi ʻoku ʻikai ke nau fekauʻakí. ʻE ngali faingataʻa ke tau fakafehokotaki e fanga kiʻi ngāue fakaʻaho ʻo e talangofuá pea mo e founga fakaleleiʻi ʻo e ngaahi palopalema faingataʻa lalahi ʻoku tau fehangahangai mo iá. Ka ʻoku nau fekauʻaki. Mei he aʻusia kuó u maʻú, ko hono tōʻonga moʻui ʻaki ko ia e fanga kiʻi ngāue pe ʻulungāanga fakaʻaho ʻo e tuí, ko e founga lelei taha ia ke fakamālohia ai kitautolu mei ha faʻahinga haʻahaʻa pē ʻo e moʻuí. Ko e fanga kiʻi ngāue ʻo e tuí, neongo ʻenau hā ngali meʻanoa pē pe ʻikai fehokotaki mo ʻetau ngaahi palopalemá, ka ʻokú ne tāpuekina kitautolu ʻi he meʻa kotoa ʻoku tau faí.
Fakakaukau kia Neamani, naʻá ne hoko ko e “[ʻeikitau] ʻo e kau tau … ʻa Sīliá” pea ko ha tangata “[toʻa] ʻaupito,” ka naʻe kilia. Naʻe fakamatala ha kaunanga ʻo kau ki ha palōfita ʻi ʻIsileli te ne lava ʻo fakamoʻui ʻa Neamani, ko ia naʻá ne ʻalu ai mo hono kaungā fononga ko ha kau tamaioʻeiki, kau sōtia pea mo ha ngaahi meʻaʻofa ki ʻIsileli, ki he fale ʻo ʻIlaisá. Naʻe fakahā ʻe he tamaioʻeiki ʻa ʻIlaisá, kae ʻikai ko ʻIlaisa, kia Neamani ko e fekau ʻa e ʻEikí ke ʻalu pē ʻo “kaukau ʻi [he Vaitafe] Soataní ke liunga fitu.” Ko ha meʻa faingofua. Mahalo naʻe ongo ngali kehe, fuʻu faingofua pea maʻulalo e foʻi fekau ko ʻení ia ki he ngeia ʻo e ʻeikitau toʻá ni, ko ia naʻe fakatupu ʻita e fokotuʻú ni kiate ia. Pea ʻikai mahino kia Neamani e fekau ʻa ʻIlaisá ko ia naʻe tafoki ʻa Neamani “ʻo ʻalu ʻi he ʻita lahi.”
Ka naʻe fakaofi mai e kau tamaioʻeiki ʻa Neamaní ʻo fakahā ange naʻá ne mei fai ha “meʻa lahi” naʻe kole ange ʻe ʻIlaisa. Ne nau pehē ange foki ko e kiʻi meʻa siʻi mo faingofua pē naʻe kole ange ke ne faí, ʻikai ʻoku totonu ke ne fai ia neongo kapau ʻoku ʻikai mahino hono ʻuhingá? Naʻe toe fakakaukau ʻa Neamani ki heʻene tōʻongá pea mahalo naʻá ne talangofua pē mo ʻalu ʻo “kaukau ʻo liunga fitu ʻi Soatani” pea naʻe fakamoʻui fakaofo ia.8
ʻOku ʻi ai ha ngaahi pale ʻo e talangofuá ʻoku vave ʻene hoko maí; ʻoku hoko mai ha niʻihi hili pē hono siviʻi kitautolú. ʻOku tau lau ʻi he Mataʻitofe Mahuʻingá ki he feinga taʻetūkua ʻa ʻĀtama ke tauhi e fekau ke fai ha ngaahi feilaulaú. ʻI he taimi ne ʻeke ange ai ʻe he ʻāngeló kia ʻĀtama pe ko e hā naʻá ne fai ai ʻa e feilaulaú, naʻá ne tali ange, “ʻOku ʻikai te u ʻilo, tuku kehe pē hono fekau ʻe he ʻEikí kiate au.” Naʻe fakamatalaʻi ʻe he ʻāngeló ko ʻene ngaahi feilaulaú ko e “tatau ia ʻo e feilaulau ʻo e ʻAlo Pē Taha naʻe Fakatupu ʻo e Tamaí.” Ka naʻe toki maʻu ʻa e fakamatalá hili hono fakahaaʻi ʻe ʻĀtama ʻene tukupā ke talangofua ki he ʻEikí ʻi he “ngaahi ʻaho lahi” neongo naʻe ʻikai ke ne ʻilo e ʻuhinga naʻe fie maʻu ai ke ne fakahoko ʻa e ngaahi feilaulau ko iá.9
ʻE tāpuakiʻi maʻu pē kitautolu ʻe he ʻOtuá ʻi heʻetau talangofua faivelenga ki Heʻene ongoongoleleí mo faimāteaki ʻi Hono Siasí, ka ʻoku tātātaha ke Ne fakahaaʻi mai kimuʻa ʻEne fokotuʻutuʻu ki hono fai iá. ʻOku ʻikai ke ne fakahaaʻi kakato mai he kamataʻangá e meʻa ʻe hokó. Ko e taimi ia ʻoku fie maʻu ai e tuí, ʻamanaki leleí pea mo e falala ki he ʻEikí.
ʻOku kole mai ʻe he ʻOtuá ke tau kātaki—ʻo falala pea muimui kiate Ia. ʻOkú Ne kōlenga mai ke ʻoua naʻa tau “fakakikihiʻi ha meʻa ko e ʻikai te mou mamata ki aí.” ʻOkú Ne fakatokanga mai ʻoku ʻikai totonu ke tau ʻamanaki atu ke maʻu ha tali pe founga faingofua leva mei he langí. ʻE ola lelei e meʻa kotoa he taimi ʻoku tau tuʻu taʻeueʻia ai lolotonga hono “ʻahiʻahiʻi [ʻetau] tuí,” neongo e ngali faingataʻa ke kātekina hono siviʻi kitautolú pe tuai hono ʻomi e talí.10 ʻOku ʻikai ko ʻeku ʻuhingá ki he “talangofua kuí”11 ka ki he falala moʻoni ki he ʻofa haohaoa mo e taimi ʻa e ʻEikí.
Ko hono siviʻi ko ia ʻo ʻetau tuí, ʻe kau maʻu pē ai e muimui pau ki he fanga kiʻi ngāue faingofua mo fakaʻaho ʻo e tuí. Pea ʻokú Ne toki talaʻofa mai leva te tau maʻu e tali fakalangi ʻoku tau fakaʻamuá. Ko ʻetau toki fakamoʻoniʻi pē ʻetau loto fiemālie ke fai e meʻa ʻokú Ne kole maí, kae ʻikai ke tau holi ke ʻiloʻi e taimí mo e foungá pea mo e ʻuhingá, ko ʻetau toki lava ia ʻo “utu e fakapale ʻo [ʻetau] tuí, mo [ʻetau] faivelengá, faʻa kātakí mo [ʻetau] kātaki fuoloá.”12 Ko e talangofua moʻoní ko hono tali taʻefakangatangata kimuʻa ia e ngaahi fekau ʻa e ʻOtuá.13
Neongo pe ʻoku tau ʻiloʻi pau pe ʻikai, ka ʻoku tau “fili ʻa ia ʻoku [tau] tauhi” ki aí he ʻaho kotoa pē.14 ʻOku tau fakahaaʻi ʻetau loto ʻaki ke tauhi ki he ʻEikí, ʻi heʻetau fakahoko pau mo faivelenga e fanga kiʻi ngāue mateakí he ʻaho kotoa pē. Kuo talaʻofa mai e ʻEikí te Ne tataki hotau halá,15 ka ke Ne fai iá, kuo pau ke tau ʻaʻeva, mo falala ʻokú Ne ʻafioʻi e halá, he ko Ia “ʻa e halá.”16 Kuo pau ke tau fakafonu ʻetau ngaahi hina vaí ke aʻu ki he ngutungutú. ʻI he taimi ʻoku tau falala ai mo muimui kiate Iá, ʻoku liliu ʻetau moʻuí, ʻo hangē ko hono liliu ʻo e vaí ki he uainé. ʻOku tau hoko ko ha meʻa ʻoku mahulu hake mo lelei ange he tuʻunga ne tau mei aʻusiá. Falala ki he ʻEikí “pea ko e meʻa kotoa pē te Ne fekau atu kiate kimoutolú, fai ia.” ʻI he huafa ʻo Sīsū Kalaisí, ʻēmeni.