Panagtulnog iti Dios ken Panangtarimaan iti Giwang
Addaan ni Cristo iti bileg a mangyeg kadatayo iti managayat a pannakisinged iti Ama ken iti tunggal maysa.
Nasken nga agtultuloy a paunegentayo ti pannakaammotayo ken panagtungpal iti Nailangitan nga Ama. Agnanayon ti relasiontayo Kenkuana. Datayo dagiti maipatpateg nga annakna, ken saan nga agbalbaliwto dayta. Kasano a naimpusuan nga intayo awaten ti awisna nga umasideg Kenkuana ket iti kasta mangsagrap kadagiti bendision a tarigagayanna nga ited kadatayo iti daytoy a biag ken iti umay a lubong?
Kinuna ti Apo iti nagkauna nga Israel, ket kunana kadatayo, “Wen, inayatka iti agnanayon nga ayat: isu nga immasidegak kenka nga addaan iti manangngaasi nga ayat.” Agsasao a kas iti Ama, kunana pay kadatayo, “Agtalinaedkayo kaniak, ken siak kadakayo; ngarud makipagnakayo kaniak.” Agtalektayo kadi Kenkuana tapno agtalinaedtayo Kenkuana ken makipagna Kenkuana?
Addatayo iti daytoy a daga tapno agsursuro ken dumur-as, ken ti kapatgan a panagsursuro ken panagdur-as aggapunto iti natulagan a pagnaigantayo iti Nailangitan nga Ama ken ni Jesucristo. Manipud iti napudno a relasiontayo Kadakuada magun-odtayo ti nadiosan a pannakaammo, ayat, bileg, ken kabaelan nga agserbi.
“Pagrebbengantayo nga ammuen ti amin nga impalgak ti Dios a maipapan iti bagina.” Nasken a maawatantayo a binilin ti Dios Ama ti Anakna, ni Jesucristo, a mangparsua iti daga para iti panagdur-astayo, nga inted ti Nailangitan nga Ama ti Anakna tapno agbayad kadagiti dawdawaten ti hustisia para iti pannakaisalakantayo, ken naisublin ti bileg ti priesthood ti Ama ken ti pudno a Simbaan ti Anak nga addaan kadagiti kasapulan nga ordinansa para kadagiti paraburtayo. Mariknam kadi ti kauneg ti ayat nga agtartaray babaen kadagiti panagsaganada para iti rag-o ken panagdur-astayo? Nasken a maammuantayo a plano ti Nailangitan nga Ama iti pannakaisalakan nga agtungpaltayo kadagiti paglintegan ken ordinansa ti ebanghelio ken manggun-od iti agnanayon a biag ket iti kasta agbalintayo a kas iti Dios. Daytoy ti pudno ken manayon a ragsak nga idiaya kadatayo ti Nailangitan nga Ama. Awan ti sabali pay a pudno ken manayon a kinaragsak.
Mabalin a dagiti karittayo ti mangyadayo kadatayo iti daytoy a dalan ti kinaragsak. Mabalin a mapukawtayo ti managtalek a pagnaigantayo iti Dios no singaendatayo dagiti pannubok imbes a pagparintumengendatayo.
Ipakaasi kadatayo daytoy simple a daniw nga agaramidtayo iti sumagmamano nga ipangpangruna a panangamiris:
Kakabsat, ania ti napateg kadakayo? Ania ti manayon kadakayo? Maysa a banag a manayon ti pategna iti Ama isu ti panagsursuro maipapan Kenkuana, panangipakumbaba iti bagbagitayo, ken panagdur-as iti panagtungpal Kenkuana babaen kadagiti naindagaan a padas. Kayatna a sukatantayo iti panagserbi ti kinamanagimbubukodtayo, sukatantayo iti pammati dagiti butengtayo. Mabalin a narigat unay a pannubok kadatayo dagitoy manayon a banag.
Idawat kadatayo ita, ti Ama, nga iti baet dagiti limitasiontayo iti mortalidad, tapno agayat no nakarigrigat unay ti agayat, tapno agserbi no saan a nalaka ti agserbi, tapno mamakawan no marigatantayo a mamakawan. Kasano? Kasano nga aramidentayto daytoy? Sipapasnek a dawatentayo ti tulong ti Nailangitan nga Ama, iti nagan ti Anakna, ken aramidentayo ti wagasna imbes a sipapannakkeltayo a mangipapapilit iti bukodtayo a pagayatan.
Nabigbigko ti kinapannakkelko idi nagsarita ni Presidente Ezra Taft Benson maipapan iti panagdalus iti makin-uneg a pagkargaan. Pampanunotek ti bagik a kasla maysa a pitser. Kasano nga ikkatek iti panagbalinko a napannakkel manipud iti pitserko? Ti panangpilittayo nga agpakumbaba ken panangpadas nga agayattayo iti dadduma ket saan a mapagtalkan ken awan kaes-eskanna, ken talaga a saan nga umobra. Dagiti basoltayo ken kinapalangguadtayo ti mangparnuay iti maysa a giwang—wenno maysa a gap—iti nagbaetantayo ken ti pagtaudan ti amin nga ayat, ti Nailangitan nga Amatayo.
Ti laeng Pannubbot ti Mangisalakan ti mabalin a mangdalus kadatayo iti basbasoltayo ken mangiserra iti dayta a gap wenno giwang.
Kayattayo a maarakup kadagiti takiag ti ayat ken pannarabay ti Nailangitan nga Ama, ken iti kasta yun-unatayo ti pagayatanna ken addaan iti nasneban a puso agpakpakaasitayo nga ibuyatto ni Cristo ti pangdalus a danum iti pitsertayo. Iti un-unana mabalin a saggabassit ti panagtedtedna, ngem no agsapul, agdawat, ken agtungpaltayo, agibukbokto daytoy a siwawadwad. Mangruginto daytoy nabiag a danum a mangpunno kadatayo, ket agliplippias iti ayatna, mabalintayo nga itikwas ti pitser ti kararuatayo ken maibinglaytayo dagiti linaonna kadagiti dadduma a mawaw iti pannakapaimbag, namnama, ken pannakaibilang. No nadalusanen ti akin-uneg a pitsertayo, mangrugi a maimbagan dagiti pagnanaigantayo ditoy daga.
Kasapulan nga isakripisiotayo dagiti personal nga agendatayo tapno maaddaan iti lugar para kadagiti agnanayon a plano ti Dios. Ti Mangisalakan, nga agsasao para iti Ama, agpakaasi kadatayo, “Umasidegkayo kaniak ket umasidegakto kadakayo.” Mabalin a kaipapanan ti yaasideg iti Ama ti panagsursuro maipapan iti kinapudnona babaen kadagiti nasantuan a kasuratan, panangsurot iti balakad ti propeta, ken panagkagumaan nga ad-adda a naan-anay nga agaramid iti pagayatanna.
Maawatantayo kadi nga adda pannakabalin ni Cristo a mangyasideg kadatayo iti naayat a pannakisinged iti Ama ken iti tunggal maysa? Isu, babaen ti bileg ti Espiritu Santo, ti makaited kadatayo iti kasapulan a pannakammo ken pannakaawat maipapan kadagiti pagnanaigan.
Imbaga kaniak ti maysa a mannursuro iti Primary maipapan iti maysa a napintas a padasna iti klase dagiti ubbing a lallaki nga agtawen iti 11. Awagak iti Jimmy, ti maysa kadakuada a di mangayat a makikadua iti klase. Maysa nga aldaw ti Domingo naparegta ti mannursuro a mangipakni iti lessonna ket imbagana no apay nga inayatna ni Jimmy. Insaona maipapan iti panagyamanna ken ti pammatina iti daytoy nga agtutubo a lalaki. Kalpasanna indawat ti mannursuro kadagiti miembro ti klase a mangibaga ken ni Jimmy iti maysa a banag a dinayawda maipapan kenkuana. Bayat ti saggaysa a panangibaga dagiti miembro ti klase ken ni Jimmy no apay nga espesial isuna kadakuada, indumog ti ubing a lalaki ti ulona ket nangrugi a nagarubos dagiti lua iti rupana. Simminged daytoy a mannursuro ken klase iti naliday a puso ni Jimmy. Ti simple nga ayat, no sipupudno a maipeksa, mangted iti namnama ken pateg kadagiti dadduma. Awagak daytoy iti “panangtarimaan iti giwang wenno ti gap.”
Nalabit a ti biagtayo iti managayat a premortal a lubong ti gapu ti panaggagartayo iti pudno, manayon nga ayat ditoy daga. Datayo dagiti nadiosan a naisangrat a mangted iti ayat ken maayat, ken sumangbay ti kaunggan nga ayat no agkaykaysatayo iti Dios. Awisennatayo ti Libro ni Mormon a “makitunos iti [Dios] babaen ti pannubbot ni Cristo.”
Nagsao ni Isaias maipapan kadagiti sipupudno nga agtungpal iti linteg ti panagayuno ket iti kasta agbalin para iti bukodda a kaputotan nga agtartarimaan iti giwang. Isuda dagiti inkari ni Isaias, a “mangbangonto kadagiti daan a nadadael a lugar.” Iti kasta met la a wagas, tinarimaan ti Mangisalakan ti giwang, wenno distansia, iti nagbaetantayo ken iti Nailangitan nga Ama. Isu, babaen ti naindaklan a pangsubbot a sakripisiona, ti manglukat iti dalan para kadatayo tapno makiranud iti managayat a bileg ti Dios, ket kalpasanna kabaelantayo ti mangtarimaan kadagiti ‘nadadael a lugar” iti bukodtayo a biag. Ti panangpaimbag iti emosional a distansia ti nagbabaetan iti tunggal maysa ket agkasapulanto iti panangawattayo iti ayat ti Dios, a buyogan ti sakripisio ti kadawyan a managimbubukod ken nakaam-amak nga ugalitayo.
Iti maysa a di malipatan a rabii, nagsinnuppiatkami iti maysa a kabagian maipapan iti maysa nga isyu a mainaig iti politika. Alisto ken naan-anay nga inuyawna dagiti komentok, tapno paneknekan a nagbiddutak a nakadanon kadagiti miembro ti pamilia. Kaslaak la maag ken awan ammona—ket nalabit a kastaak. Iti dayta a rabii bayat ti panagparintumengko nga agkararag, nagdardarasak a nangilawlawag iti Nailangitan nga Ama no kasano ti kinadagullit daytoy a kabagian! Nagsaritaak nga awan sardayna. Nalabit a nagsardengak iti panagreklamok ket adda gundaway ti Espiritu Santo a nangawis iti atensionko, agsipud ta, iti siddaawko, nangngegak ti bagik nga agkuna, “Nalabit a kayatmo nga ayatek isuna.” Ayatek isuna? Intuloyko ti nagkararag, a kastoy ti ibagbagak, “Kasano a maayatko isuna? Panagkunak diak magustuan isuna. Natangken ti pusok; nasaktan ti riknak. Diak maaramid daytoy.”
Kalpasanna, sigurado a babaen iti tulong ti Espiritu, adda baro a napanunotko idi kinunak, “Ngem ay-ayatenyo isuna, Nailangitan nga Ama. Maibinglayandak kadi iti ayatyo para kenkuana—tapno maayatko met isuna?” Limmukneng dagiti natangken a riknak, nangrugi nga agbalbaliw ti pusok, ken nangrugi a nagsabali ti panagkitak iti daytoy a tao. Nangrugi a nariknak ti pudno a pateg a nakita ti Nailangitan nga Ama. Insurat ni Isaias, “Bedbedan ti Apo ti sugat dagiti taona, ket paimbagenna ti sugatda.”
Iti panaglabas ti panawen makaay-ayo a nagawan ti giwang iti nagbaetanmi. Ngem uray no dina inawat ti nagbalbaliw a pusok, naammuak a tulongannatayto ti Nailangitan nga Ama a mangipateg uray pay dagiti ipagaruptayo a saan a maikari nga ayaten, no agdawattayo iti tulongna. Ti Pannubbot ti Mangisalakan ti pagayusan ti agtultuloy a panagayat iti pada a tao wenno panangngaasi manipud iti Amatayo iti Langit. Nasken a pilientayo ti agtungpal iti daytoy nga ayat tapno addaantayo iti daytoy a panangngaasi iti amin.
No itedtayo ti pusotayo iti Ama ken ti Anak, mabalbaliwantayo ti lubongtayo—uray no saan nga agbalbaliw dagiti kasasaad iti aglawlawtayo. Ad-adda a mayasidegtayo iti Nailangitan nga Ama ket mariknatayo ti manangngaasi a panangawatna kadagiti panagkagumaantayo nga agbalin a pudno a disipulo ni Cristo. Dumakkel ti pannakaawat, panagtalek, ken pammatitayo.
Ibaga ni Mormon nga agkararagtayo iti amin a kabaelan ti puso para iti daytoy nga ayat ket maitedto daytoy kadatayo manipud iti pagtaudanna—ti Nailangitan nga Ama. Iti dayta laeng a makapagbalintayo nga agtartarimaan iti giwang kadagiti pagnanaigan iti daga.
Tumultulong ti awan patinggana nga ayat ti Amatayo, tapno isublinatayo iti gloria ken rag-ona. Intedna ti Bugbugtong nga Anakna, ni Jesucristo, tapno mangtarimaan iti dakkel a giwang iti nagbaetantayo ken Isuna. Ti pannakikaysa iti Ama iti Langit ti kaipapanan ti manayon nga ayat ken agnanayon a panggep. Nasken nga aramidentayo ti pagnaigan Kenkuana ita tapno masursuro no ania ti talaga a napateg, nga agayattayo kas iti panagayatna, ken dumur-astayo nga agbalin a kas Kenkuana. Paneknekak a ti napudno a pannakinaigtayo iti Nailangitan nga Ama ken iti Mangisalakan ket agnanayon ti kinapategna Kadakuada ken kadatayo. Iti nagan ni Jesucristo, amen.