Nahunong ba ang Adlaw sa mga Milagro?
Ang atong kinatas-an nga pagtutok mao ang espirituhanong mga milagro nga anaa sa tanang mga anak sa Dios.
Sa milabayng tuig, sa usa ka assignment sa estado sa California, uban sa stake president ako mibisita kang Clark ug Holly Fales ug sa ilang pamilya sa ilang pinuy-anan. Gisultian ko nga bag-ohay lang sila nakasinati og milagro. Sa among pag-abut, nanlimbasug si Clark og barug tungod sa mga brace sa iyang likod, sa li-og, ug sa iyang mga bukton ug miabi-abi namo.
Mga duha ka buwan sayo niana, si Clark, ang iyang anak si Ty, ug ubang 30 ka mga young men ug mga lider nag-andam alang sa usa ka stake activity nga high-adventure hiking ngadto sa 14,180 ka pye (4,322 m) ang pinakatumoy sa Mount Shasta, usa sa mga kinatas-an nga bukid sa California. Sa ikaduhang adlaw sa malisud nga pag-hike, kasagaran sa mga mananaka miabut sa pinakatumoy—usa ka kulba-hinam nga katumanan nga nahimo tungod sa pila ka buwan nga pagpangandam.
Usa sa unang mga tawo nga miabut sa tumoy mao si Clark. Human sa kadiyot nga pahuway sa may kilid sa pinakatumoy, siya mibarug ug misugod sa paglakaw. Sa iyang paglakaw, natakilpo siya ug nahayang paingon sa daplin sa pangpang, miantus sa pagkahulog og mga 40 ka pye (12 m) ug unya wala ka pugngi mibalitok paingon sa dulhugon nga yelo sa laing 300 ka pye (91 m). Maayo gani, buhi si Clark, apan grabe ang kadaut ug dili na makalihok.
Ang mga milagro nga nasinati ni Clark atol niining makalilisang nga hitabo nagsugod pa lang. Ang unang nakaadto niya “maayo gani” mao ang grupo sa mga hikers nga naglakip og mga mountain rescue guides ug emergency medical nga mga propesyunal. Ila dayong gitabang si Clark sa pagka-shock ug mihatag kaniya og kupo aron dili siya tugnawon. Kini usab nga grupo “maayo gani” nag-testing og bag-ong himan sa komunikasyon ug mipadala og emerhensya nga hangyo alang sa tabang gikan sa lugar nga walay signal ang mga cell phone. Usa ka gamayng helicopter ang dali dayon nga gipadala paingon sa Mount Shasta usa ka oras ang gilay-on. Human sa duha ka makuyaw apan wala molampus nga pagsulay sa pagtugpa sa altitude nga dili sayon para sa aircraft, ug nanlimbasug sa dili kasaligan nga kondisyon sa hangin, ang piloto misugod sa ikatulo ug katapusang pagsulay. Sa pagpadulong sa helicopter gikan sa laing anggolo, ang hangin “maayo gani” mibali ug ang aircraft nakatugpa igo lang sa grupo nga makadali ug sakit kaayong makapasulod ni Clark sa gamayng lugar luyo sa piloto.
Sa dihang si Clark gieksamin na sa trauma center, ang mga test nagpakita nga daghan siya og mga bali sa iyang li-og, sa likod, sa mga gusok, ug mga pulso; natusok nga baga; ug daghang samad ug pangus. Usa ka inila nga neurotrauma surgeon “maayo gani” naka-duty anang adlawa; naa siya niini nga ospital panagsa lang sa usa ka tuig. Kini nga doktor pagkahuman miingon nga wala pa gyud siya makakita og tawo nga hilabihan ang nahiaguman nga kadaut sa spinal cord ug carotid arteries ug buhi. Si Clark wala lang gidahum nga mabuhi apan mahibalik sa hingpit nga paglihok. Naghulagway sa iyang kaugalingon nga usa ka dili motoo sa Dios, ang surgeon miingon nga ang kaso ni Clark nakalapas sa tanan niyang scientific nga nakat-unan kabahin sa neurological injuries ug mihulagway lamang nga usa ka milagro.
Samtang si Clark ug si Holly mitapos sa pagsulti niining hilabihan nga istorya, wala ko dayon makatingog. Dili lang tungod sa klaro kaayo nga mga milagro, apan tungod sa mas dako pa niini. Ako adunay lawom nga impresyon—usa ka espiritwal nga pagsaksi—nga si Holly ug ang matag usa sa lima ka gwapa nga mga anak nga naglingkod sa sala nagpalibot sa ilang mga ginikanan adunay igong pagtuo nga madawat ra unta nila ang bisan unsang sangputanan nianang adlawa ug sila mouswag lang gihapon sa pagkaespiritwal. Si Clark ug Holly ug ang duha nila ka mga anak, si Ty ug si Porter, ania karon sa Conference Center.
Sa pagpamalandong sa kasinatian sa pamilyang Fales, nakapahunahuna nako og maayo kabahin sa mga sirkumstansya sa uban. Unsa man ang dili maihap nga puno sa pagtuo, nadawat nga panalangin sa priesthood, walay katapusan nga pag-ampo, naghupot sa pakigsaad, puno sa paglaum nga mga Santos sa Ulahing mga Adlaw kansang mga milagro wala moabut? Bisan lang unta sa paagi sila nakasabut og milagro. Bisan lang unta sa paagi nga ang uban daw nakadawat og mga milagro.
Unsa man usab kadtong uban nga nag-antus sa hilabihang kasakit—sa pisikal, mental, emosyonal—sa mga katuigan o sa tibuok nilang kinabuhi? Unsa man usab kadtong nangamatay nga bata pa kaayo?
Mga duha pa lang ka buwan, duha ka magtiayon nga may temple recommend, nga adunay tulo ka full-time nga misyonary nga mga anak ug laing lima ka anak taliwala nila, misakay sa gamay nga eroplano alang sa mubo nga biyahe. Ako masaligon nga nag-ampo sila alang sa kasigurohan sa wala pa ang biyahe ug nag-ampo pag-ayo sa dihang ang ilang eroplano nakaengkwentro og seryoso nga problema sa mekanikal sa wala pa ma-krash. Walay naluwas. Unsa man usab sila?
Ang maayong mga tawo ug ilang mga hinigugma may rason ba sa pagpangutana nga giingon ni Mormon: “Nahunong ba ang adlaw sa mga milagro?”
Ang akong limitado nga kahibalo dili makapatin-aw nganong usahay adunay balaang pagpataliwala ug usahay wala. Apan tingali nagkulang kita og pagsabut kon unsa ang milagro.
Kasagaran atong gihulagway ang milagro nga usa ka pagkaayo nga walay hingpit nga pagpasabut sa siyensya medikal o ang paglikay og kuyaw nga katalagman pinaagi sa pagsunod og klaro nga pag-aghat. Bisan pa man, sa pagpatin-aw og milagro isip “usa ka makatabang nga hitabo pinaagi sa balaang gahum nga wala hisabti sa mga mortal” naghatag og dako nga talan-awon sa mga butang nga mas mahangturon. Kini nga pagpasabut nagtugot usab kanato sa pagpamalandong sa importanteng tahas sa pagtuo sa pagdawat og milagro.
Si Moroni mitudlo, “Ni sa bisan unsa nga panahon adunay nakahimo og mga milagro hangtud human sa ilang hugot nga pagtuo.” Si Ammon mipahayag, “Ang Dios mihimo og usa ka paagi nga ang tawo, pinaagi sa hugot nga pagtuo, unta makabuhat og kahibulongan nga mga milagro.” Ang Ginoo mipadayag ngadto kang Joseph Smith, “Kay Ako ang Dios, … ug Ako mopakita og mga milagro … ngadto sa tanan kinsa motuo sa akong ngalan.”
Si Haring Nebuchadnezzar misugo nga si Shadrach, Meshach, ug Abed-nego mosimba sa bulawan nga imahe nga iyang giandam nga usa ka dios, mihulga, “Kong kamo dili mosimba, sa maong takna igatambog kamo … sa taliwala sa hudno nga nagadilaab sa kalayo.” Dayon nangasaba siya nila og ingon “Kinsa ba kana nga dios nga makaluwas kaninyo gikan sa akong mga kamot?”
Kining tulo ka relihiyoso nga mga tinun-an miingon: “Kong mao kana, ang among Dios nga among gialagaran makahimo sa pagluwas kanamo gikan sa hudno nga nagadilaab sa kalayo. … Apan kong dili ugaling, angay mo nga hisayran, Oh hari, nga kami dili gayud moalagad sa imong mga dios.”
Sila adunay hingpit nga pagsalig nga ang Dios makaluwas kanila, “apan kong dili ugaling,” sila adunay hingpit nga pagtuo sa Iyang plano.
Sa samang paagi, si Elder David A. Bednar sa makausa nangutana sa usa ka batan-ong lalaki nga nanghangyo og usa ka panalangin sa priesthood, “Kon kabubut-on sa atong Langitnong Amahan nga ikaw mabalhin pinaagi sa kamatayon sa imong pagkabatan-on ngadto sa kalibutan sa espiritu aron sa pagpadayon sa imong pangalagad, ikaw ba adunay hugot nga pagtuo nga modawat sa Iyang kabubut-on ug nga dili maayo?” Kita ba adunay pagtuo “[nga] dili maayo” gikan sa atong kalibutanong mga kasakit aron mamaayo kita sa kahangturan?
Usa ka kritikal nga pangutana nga pamalandongan mao ang “Asa man nato ibutang ang atong pagtuo?” Ang ato bang pagtuo nakatutok lang nga gustong mahupay ang kasakit ug pag-antus, o lig-on kining nakasentro sa Dios Amahan ug sa Iyang balaang plano ug ni Jesus ang Kristo ug sa Iyang Pag-ula? Ang hugot nga pagtuo diha sa Amahan ug sa Anak nagtugot kanato sa pagsabut ug pagdawat sa Ilang kabubut-on samtang mangandam ta sa kahangturan.
Karong adlawa mopamatuod ko og mga milagro. Ang atong pagkaanak sa Dios usa ka milagro. Ang pagdawat og lawas sa Iyang hitsura ug panagway usa ka milagro. Ang gasa sa usa ka Manluluwas usa ka milagro. Ang Pag-ula ni Jesukristo usa ka milagro. Ang potensyal alang sa mahangturong kinabuhi usa ka milagro.
Samtang maayo ang mag-ampo ug maningkamot alang sa pisikal nga proteksyon ug pagkaayo panahon sa atong mortal nga pagkaanaa, ang atong dakong pagtutok kinahanglan diha sa espirituhanong mga milagro nga anaa sa tanang mga anak sa Dios. Bisan unsa ang atong kaliwat, atong nasyonalidad, atong nabuhat kon maghinulsol kita, ang nabuhat diri kanato—kitang tanan pareha nga makadawat niini nga mga milagro. Nagpuyo kita sa milagro, ug aduna pay mga milagro nga umaabot. Sa pangalan ni Jesukristo, amen.