Pagdawat sa Kabubut-on ug Panahon sa Ginoo
Ni Elder David A. Bednar
Sa Korum sa Napulog Duha ka mga Apostoles
Gikan sa debosyonal sa Church Educational System, “That We Might ‘Not … Shrink,’” gihatag didto sa University of Texas sa Arlington niadtong Marso 3, 2013.
Ang lig-on nga pagtuo diha sa Manluluwas mao ang maaghup nga pagdawat sa Iyang kabubut-on ug tukmang panahon diha sa atong mga kinabuhi—bisan og ang sangputanan dili mao ang atong gilauman o gusto.
Detalye gikan sa Christ in Gethsemane, ni Harry Anderson
Si Elder Neal A. Maxwell (1926–2004) usa ka minahal nga disipulo ni Ginoong Jesukristo. Siya mialagad isip usa ka sakop sa Korum sa Napulog Duha ka mga Apostoles sulod sa 23 ka mga tuig, gikan sa 1981 hangtud sa 2004. Ang espirituhanong gahum sa iyang mga pagtulun-an ug sa iyang ehemplo sa matinud-anong pagkadisipulo nakapanalangin ug nagpadayon sa pagpanalangin sa talagsaong mga paagi sa mga miyembro sa gipahiuli nga Simbahan sa Manluluwas ug sa mga katawhan sa kalibutan.
Niadtong Oktubre 1997, si Sister Bednar ug ako miabi-abi nila ni Elder ug Sister Maxwell sa Brigham Young University–Idaho (kaniadto Ricks College). Si Elder Maxwell mamulong ngadto sa mga estudyante, kawani, ug magtutudlo sa usa ka debosyonal nga panagtapok.
Sayo nianang tuiga, si Elder Maxwell mipaubos sa 46 ka adlaw ug gabii sa makapaluya nga chemotherapy tungod sa leukemia. Ang iyang rehabilitasyon ug padayon nga therapy positibong naglambo sa mga bulan sa tingpamulak ug ting-init, apan ang pisikal nga kusog ug resistensya ni Elder Maxwell limitado sa dihang mibiyahe siya ngadto sa Rexburg. Human motimbaya nila ni Elder ug Sister Maxwell sa airport, si Susan ug ako midala nila sa among balay aron makapahulay ug makapaniudto sa dili pa ang debosyonal.
Nangutana ko ni Elder Maxwell unsa nga mga leksyon ang iyang nakat-unan tungod sa iyang sakit. Mahinumduman gyud nako kanunay ang eksakto ug makapatuhop niyang tubag. “Dave,” miingon siya, “Nakat-unan nako nga ang dili pag-atras mas importante pa kay sa pagpatunhay sa kinabuhi.”
Ang iyang tubag sa akong pangutana usa ka baruganan nga siya nakaangkon og halapad nga personal nga kasinatian panahon sa iyang chemotherapy. Niadtong Enero 1997, sa adlaw nga siya nakaiskedyul nga mosugod sa iyang unang hugna sa pagpatambal, si Elder Maxwell mitan-aw sa iyang asawa, mikab-ot sa iyang kamot, miginhawa og lawom, ug miingon, “Dili gayud nako gusto nga moatras.”
Sa iyang mensahe sa kinatibuk-ang komperensya sa Oktubre 1997, si Elder Maxwell nagtudlo uban sa dakong katinuod: “Samtang atong sagubangon ang atong kaugalingong … mga pagsulay ug kalisdanan, kita usab makahangyo ngadto sa Amahan, sama sa gibuhat ni Jesus, nga kita ‘unta dili … mobiya’— nagpasabut nga moatras o mosibug (D&P 19:18). Ang dili pag-atras mas importante kay sa pagpatunhay sa kinabuhi! Dugang pa, ang pag-ambit sa mapait nga kopa nga dili mahimong masuk-anon kabahin usab sa pagsunod sa ehemplo ni Jesus.”1
Ang mga kasulatan mahitungod sa pag-antus sa Manluluwas samtang Iyang gihalad ang walay katapusan ug mahangturong maulaong sakripisyo nahimong mas makatandog ug makahuluganon ngari kanako.
“Kay tan-awa, Ako, ang Dios, nag-antus niini nga mga butang alang sa tanan, nga sila unta dili mag-antus kon sila maghinulsol;
“Apan kon dili sila maghinulsol sila kinahanglan gayud nga mag-antus sama kanako;
“Kansang pag-antus nakapahimo sa akong kaugalingon, gani ang Dios, ang labing halangdon sa tanan sa pagkurog tungod sa kasakit, ug sa pag-agas sa dugo sa matag lungag sa panit, ug sa pag-antus sa lawas ug sa espiritu—ug buot nga Ako unta dili moinom sa mapait nga kopa, ug mobiya—
“Bisan pa niana, himaya ngadto sa Amahan, ug Ako nakaambit ug nakahuman sa akong mga pagpangandam alang sa mga katawhan.” (D&P 19:16–19).
Ang Manluluwas wala mobiya didto sa Gethsemani o sa Golgotha.
Si Elder Maxwell usab wala mobiya. Kining bantugang Apostol mipadayon sa unahan nga nagmakanunayon ug napanalanginan og dugang nga panahon sa pagka-mortal sa paghigugma, sa pagserbisyo, sa pagtudlo, ug sa pagpamatuod. Kadtong hinapos nga mga tuig sa iyang kinabuhi mao ang dugang nga mga ehemplo sa mahalaron nga pagkadisipulo—pinaagi sa iyang mga pulong ug mga binuhatan.
Nagtuo ko nga kadaghanan nato tingali maghandom sa usa ka tawo nga dunay espirituhanong kapasidad, kasinatian, ug pagkatawo ni Elder Maxwell nga moatubang og seryoso nga sakit ug kamatayon uban sa pagsabut sa plano sa Dios sa kalipay, uban sa kasiguroan ug grasya, ug uban sa dignidad. Apan magpamatuod ko nga ang ingon nga mga panalangin wala ireserba nga alang lamang sa mga General Authority o alang sa pipila ka pinili nga mga miyembro sa Simbahan.
Sukad sa pagkatawag nako ngadto sa Korum sa Napulog Duha ka mga Apostoles, ang akong mga buluhaton ug mga pagbiyahe nagtugot kanako nga makaila sa matinud-anon ug maisugon nga mga Santos sa Ulahing mga Adlaw sa tibuok kalibutan. Gusto kong mosulti ninyo kabahin sa usa ka batan-ong lalaki ug babaye kinsa nakapanalangin sa akong kinabuhi ug diin ako nakat-on og espirituhanong mga leksyon kabahin sa dili pag-atras ug kabahin sa pagtugot sa atong indibidwal nga kabubut-on nga “[ma]tuhop ngadto sa kabubut-on sa Amahan” (Mosiah 15:7).
Ang istorya tinuod, ug ang mga karakter tinuod. Hinoon, dili ko mogamit sa mga ngalan sa mga tawo nga nalambigit. Mogamit ko nga adunay pagtugot sa pinili nga mga pamahayag gikan sa ilang personal nga mga journal.
“Dili ang Akong Pagbuot Maoy Matuman kondili ang Imo”
Si John usa ka takus nga tighupot sa priesthood ug matinud-anong nagserbisyo isip full-time nga misyonaryo. Pagpauli niya gikan sa iyang misyon, nakig-date siya ug nakigminyo sa usa ka matarung ug talagsaong batan-ong babaye, si Heather. Si John nag-edad og 23 ug si Heather 20 sa adlaw nga sila nabugkos alang karon ug sa kahangturan sa balay sa Ginoo.
Mga tulo ka semana human sa ilang kaminyoon sa templo, nadayagnos si John nga may kanser sa bukog. Tungod kay ang mga bugon sa kanser nakit-an usab sa iyang mga baga, ang iyang tsansa nga maulian dili maayo.
Si John misulat sa iyang journal, “Mao kini ang labing makahahadlok nga adlaw sa akong kinabuhi. Dili lamang tungod kay gisultihan ko nga duna koy kanser, apan tungod usab kay bag-o ko nga naminyo ug ingon og mibati nga pakyas ko isip usa ka bana. Ako ang tigsangkap ug tigpanalipod sa among bag-ong pamilya, ug karon—tulo ka semana niana nga tahas—gibati nako nga napakyas ko.”
Si Heather mitimaan: “Makapakugang kadto nga balita, ug nahinumdom ko kon sa unsang paagi nga nakapausab kadto sa among panglantaw. Diha ko sa hulatanan nga kwarto sa ospital nagsulat og mga sulat-pasalamat sa mga regalo sa among kasal samtang naghulat mi sa mga resulta sa mga pagtesting ni John. Apan human mahibalo sa kanser ni John, ang mga gamit sa kusina nga among nadawat sa among kasal ingon og dili na kaayo importante. Mao kini ang pinakagrabe nga adlaw sa akong kinabuhi, apan nahinumdom ko nga mihigda sa katre nianang gabhiona nga mapasalamaton sa among pagkabugkos sa templo. Bisan og ang mga doktor mihatag ni John og 30 porsyento lang nga tsansa nga maluwas, nasayud ko nga kon kami magpabilin nga matinud-anon ako dunay 100 ka porsyento nga tsansa nga makig-uban kaniya sa kahangturan.”
Mga paghulagway pinaagi ni Ben Sowards
Paglabay sa mga usa ka bulan nagsugod na si John sa chemotherapy. Iyang gihulagway ang iyang kasinatian: “Ang mga pagtambal mas nakapasakit hinoon nako sukad sa akong kinabuhi. Naupaw ko, miubos og 41 ka libra, ug ang akong lawas ingon og mabungkag. Ang chemotherapy nakaapektar usab nako sa emosyonal, mental, ug espiritwal nga paagi. Ang kinabuhi sa mga bulan sa chemo sama sa usa ka rollercoaster nga adunay nindot kaayo nga mga panahon, bati kaayo nga mga panahon, ug bisan unsa diha sa tunga-tunga. Apan bisan niining tanan, si Heather ug ako mipadayon sa hugot nga pagtuo nga ang Dios moayo nako. Nakahibalo gyud mi niini.”
Si Heather misulat sa iyang mga hunahuna ug mga pagbati: “Dili ko makabuhat nga pasagdan si John nga mag-inusara sa gabii diha sa ospital, mao nga matulog ako kada gabii sa gamay nga sofa sa iyang kwarto. Daghan kami og mga higala ug pamilya nga mobisita sa adlawan, apan ang mga gabii mao ang pinakalisud. Motutok ako sa kisame ug maghunahuna unsay plano sa Langitnong Amahan alang namo. Usahay ang akong hunahuna maglatagaw sa mangitngit nga mga dapit, ug ang akong kahadlok nga mawala si John hapit na makabuntog nako. Apan nasayud ako nga kini nga mga hunahuna dili gikan sa Langitnong Amahan. Ang akong mga pag-ampo alang sa kahupayan nagpirme na, ug ang Ginoo mihatag nako sa kalig-on sa pagpadayon.”
Paglabay sa tulo ka bulan, gioperahan si John aron sa pagkuha sa dako nga tumor sa iyang tiil. Duha ka adlaw human sa operasyon, gibisitahan nako si John ug Heather sa ospital. Naghisgot kami sa unang higayon nga akong nahimamat si John didto sa misyon, sa ilang kasal, sa kanser, ug sa mahangturong mga importanting leksyon nga among nakat-unan tungod sa mga pagsulay sa pagka-mortal. Sa among pagtapos sa panahon sa panag-uban, mihangyo si John kon makahatag ba ko niya og panalangin sa priesthood. Mitubag ko nga akong ikalipay nga mohatag sa mao nga panalangin, apan kinahanglan usa nakong mangutana.
Dayon akong gipangutana ang mga pangutana nga wala nako planoha nga ipangutana ug wala gikonsiderar sa sayo pa: “John, aduna ka bay hugot nga pagtuo nga dili mamaayo? Kon kabubut-on sa atong Langitnong Amahan nga ikaw mabalhin pinaagi sa kamatayon sa imong pagkabatan-on ngadto sa kalibutan sa espiritu aron sa pagpadayon sa imong pangalagad, ikaw ba adunay hugot nga pagtuo nga modawat sa Iyang kabubut-on ug nga dili maayo?”
Kasagaran diha sa mga kasulatan, ang Manluluwas o ang Iyang mga sulugoon migamit sa espirituhanong gasa sa pag-ayo (tan-awa sa 1 Mga Taga-Corinto 12:9; D&P 35:9; 46:20) ug nakabantay nga ang usa ka indibidwal adunay hugot nga pagtuo aron mamaayo (tan-awa sa Mga Buhat 14:9; 3 Nephi 17:8; D&P 46:19). Apan samtang si John ug Heather ug ako nagtinambagay ug naghunahuna niini nga mga pangutana, nag-anam kami pagkasabut nga kon kabubut-on sa Dios nga mamaayo kining buotan nga batan-ong lalaki, nan kana nga panalangin madawat lamang kon kining maisugong magtiayon aduna unay hugot nga pagtuo nga dili mamaayo. Sa laing pagkasulti, kinahanglang buntugon nila ni John ug Heather, pinaagi sa Pag-ula ni Ginoong Jesukristo, ang kalagmitan sa “kinaiyanhon nga tawo” (Mosiah 3:19) nga anaa natong tanan sa pagpangayo nga walay pasensya ug pagpamugos kanunay sa mga panalangin nga gusto nato ug gituohan nga angay nato.
Atong giila ang usa ka baruganan nga magamit sa matag mapahinungurong disipulo: ang lig-on nga pagtuo diha sa Manluluwas mao ang manunuton nga pagdawat sa Iyang kabubut-on ug tukmang panahon diha sa atong mga kinabuhi—bisan kon ang sangputanan dili mao ang atong gilauman o gusto. Siyempre, si John ug Heather magtinguha, mangandoy, ug mangamuyo aron mamaayo sa tanan nilang gahum, hunahuna, ug kusog. Apan mas importante, sila kinahanglang “mauyunon sa pagdawat sa tanan nga mga butang diin ang Ginoo makakita nga angay ipahamtang nganha [kanila], bisan ingon sa usa ka bata nga motugyan sa iyang kaugalingon ngadto sa iyang amahan” (Mosiah 3:19). Sa pagkatinuod, sila kinahanglang andam nga “ihalad ang [ilang] tibuok nga mga kalag ingon nga usa ka paghalad ngadto kaniya” (Omni 1:26) ug mapainubsanong mag-ampo, “Amahan, kon buot ka, kuhaa kining kopa gikan kanako: hinoon, dili ang akong pagbuot maoy matuman, kondili ang imo” (Lucas 22:42).
Ang unsay daw makalibug nga mga pangutana sa sinugdanan ngadto ni John, Heather, ug kanako nahimong kabahin sa usa ka hugpong sa daw nagkasumpaki nga mga baruganan sa ebanghelyo. Ikonsiderar ang pahimangno sa Manluluwas: “Ang makakaplag sa iyang kinabuhi kawagtangan hinoon niini: apan ang magawagtang sa iyang kinabuhi tungod kanako makakaplag ra niini” (Mateo 10:39). Mipahayag usab Siya, “Apan daghan ang nagauna karon nga unya mangulahi, ug ang nangulahi karon nga unya manag-una” (Mateo 19:30). Ug ang Ginoo mitambag sa Iyang mga disipulo sa ulahing mga adlaw, “Pinaagi sa imong pulong daghan nga mga mapahitas-on pagadad-on sa ubos, ug pinaagi sa imong pulong daghan nga anaa sa ubos pagabayawon” (D&P 112:8). Busa, ang pagbaton og hugot nga pagtuo nga dili mamaayo ingon og mihaum ngadto sa usa ka gamhanang hugpong sa daw nagkasumpaki nga mga baruganan sa ebanghelyo nga nagkinahanglan kanato nga mangutana, mangita, ug manuktok aron makadawat kita og kahibalo ug salabutan (tan-awa sa 3 Nephi 14:7).
Human mogahin sa gikinahanglang panahon sa pagpamalandong sa akong mga pangutana ug sa pagpakigsulti sa iyang asawa, si John miingon nako: “Elder Bednar, dili ko gustong mamatay. Dili nako gustong biyaan si Heather. Apan kon ang kabubut-on sa Ginoo mao ang pagbalhin nako ngadto sa kalibutan sa espiritu, nan ok ra ko niana.”
Nalipay ko uban sa pasalamat ug pagdayeg samtang akong nasaksihan kining batan-ong magtiayon nga miatubang sa pinakagrabe sa tanang espirituhanong pakigbisog—ang manunutong pagtugyan sa ilang kabubut-on ngadto sa kabubut-on sa Dios. Ang akong pagtuo nalig-on samtang akong nasaksihan kini nga magtiayon nga mitugot sa ilang kusganon ug masabut nga mga tinguha nga “[ma]tuhop ngadto sa kabubut-on sa Amahan” (Mosiah 15:7).
Gihulagway ni John ang iyang reaksyon sa among panagsultihanay ug sa panalangin nga iyang nadawat: “Si Elder Bednar mipakigbahin kanamo sa hunahuna ni Elder Maxwell nga mas maayo pa nga dili moatras kay sa magpatunhay sa kinabuhi. Si Elder Bednar dayon nangutana kanamo, ‘Nasayud ko nga kamo adunay hugot nga pagtuo nga mamaayo, apan kamo ba adunay hugot nga pagtuo nga dili mamaayo?’ Lahi kini nga konsepto alang nako. Sa sukaranong paagi nangutana siya nako kon duna ba koy hugot nga pagtuo nga modawat sa kabubut-on sa Dios kon Iyang kabubut-on nga ako dili mamaayo? Kon hapit na ang panahon alang nako sa pagsulod sa kalibutan sa espiritu pinaagi sa kamatayon, andam ba ako sa pagtugyan ug pagdawat?
Si John mipadayon: “Ang pagbaton og hugot nga pagtuo nga dili mamaayo ingon og wala mahiuyon sa unsay sagad nga mahunahuna, apan kana nga panglantaw miusab sa paagi sa paghunahuna sa akong asawa ug kanako ug nagtugot kanamo nga hingpit nga mosalig sa plano sa Amahan alang kanamo. Among nakat-unan nga kinahanglan namong makabaton og hugot nga pagtuo nga ang Ginoo ang nagdumala bisan unsa pay sangputanan, ug mogiya Siya kanamo kon asa kami karon ngadto sa kon asa kami angay. Samtang kami nag-ampo, ang among pangamuyo nausab gikan sa ‘Palihug ayoha ko’ ngadto sa ‘Palihug hatagi ako og hugot nga pagtuo sa pagdawat sa bisan unsa nga sangputanan nga imong giplano alang nako.’
“Nakasiguro ako nga tungod kay si Elder Bednar usa ka Apostol, iyang panalanginan ang mga elemento sa akong lawas nga mahan-ay og maayo, ug nga ako molukso gikan sa akong higdaanan ug mosugod sa pagsayaw o mobuhat og makaikag nga butang nga sama niana! Apan sa iyang pagpanalangin nako nianang adlawa, nahingangha ko nga ang mga pulong nga iyang gisulti hapit magkapareha sa pulong sa akong amahan, sa akong ugangan nga lalaki, ug sa akong presidente sa misyon. Nakaamgo ko nga dili na importante kang kinsa nga mga kamot ang gipandong sa akong ulo. Ang gahum sa Dios dili mausab, ug ang Iyang kabubut-on ipahibalo kanato sa tinagsa ug pinaagi sa Iyang gitugutan nga mga sulugoon.”
Si Heather misulat: “Kining adlawa napuno sa nagkasagol nga mga emosyon alang kanako. Nakombinser ako nga si Elder Bednar mopandong sa iyang mga kamot sa ulo ni John ug hingpit nga moayo kaniya sa kanser. Nasayud ako nga pinaagi sa gahum sa priesthood mamaayo siya, ug gusto gyud kaayo nako nga mahitabo kana. Human kami tudloi niya bahin sa hugot nga pagtuo nga dili mamaayo, nahadlok ako. Hangtud nianang puntoha, wala pa gayud nako hunahunaa ang kamatuoran nga ang plano sa Ginoo mahimong maglakip sa pagkawala sa akong bag-ong bana. Ang akong hugot nga pagtuo nagdepende sa mga sangputanan nga akong gusto. Sa laing pagkasulti, kini walay gilawumon. Bisan og makahahadlok sa sinugdanan, ang paghunahuna nga makabaton og hugot nga pagtuo nga dili mamaayo sa katapusan nakapawala sa akong kahadlok. Nakahatag kini nako og hingpit nga pagsalig nga ang akong Langitnong Amahan mas nakaila nako kay sa akong pag-ila sa akong kaugalingon, ug Iyang buhaton ang labing maayo alang kanako ug ni John.”
Gihatagan nako si John og priesthood blessing, ug ang mga semana, mga bulan, ug mga tuig milabay. Ang kanser ni John milagrosong nagkaanam pagkawala. Nakompleto niya ang iyang pag-eskwela sa unibersidad ug nakakuha og maayong trabaho. Gipadayon ni John ug Heather ang pagpalig-on sa ilang relasyon ug pagtagamtam sa kinabuhi nga magkauban.
Wala madugay nakadawat ko og sulat gikan ni John ug Heather nga nagpahibalo kanako nga ang kanser mibalik. Gibalik ang chemotherapy ug gi-iskedyul ang operasyon. Mipasabut si John: “Wala lamang makapasagmuyo kini nga balita ngadto ni Heather ug kanako, apan napalibog kini kanamo. Aduna bay wala namo makat-uni sa sinugdanan? Nagdahum ba ang Ginoo og lain pa gikan kanamo?
“Mao nga misugod ko sa pag-ampo alang sa katin-awan ug aron ang Ginoo motabang nako nga makasabut ngano nga mibalik ang kanser. Usa ka adlaw niana samtang nagbasa ko sa Bag-ong Tugon nakadawat ko sa akong tubag. Nagbasa ko sa istorya ni Kristo ug sa Iyang mga Apostoles nga didto sa dagat sa dihang miabut ang bagyo. Nahadlok nga malunod ang barko, ang mga disipulo miduol sa Manluluwas ug mihangyo, ‘Magtutudlo, wala ka ba lang magkabana nga mangalumos kita?’ Mao gyud kini ang akong gibati! Wala ka ba magpakabana nga ako adunay kanser? Wala ka ba magpakabana nga kami gusto nga magsugod og pamilya? Apan sa akong pagpadayon sa pagbasa sa istorya, akong nakaplagan ang akong tubag. Ang Ginoo mitan-aw nila ug miingon, ‘O mga tawong diyutayg pagsalig,’ ug Iyang gituyhad ang Iyang mga kamot ug gipakalma ang dagat.
“Nianang gutloa kinahanglang mangutana ko sa akong kaugalingon, ‘Mituo ba gayud ako niini? Mituo ba gayud ako nga Iyang gipakalma ang dagat nianang adlawa? O usa lang kini ka nindot nga istorya nga basahon?’ Ang tubag mao: Mituo ako, ug tungod kay ako nasayud nga iyang gipakalma ang dagat, diha-diha nasayud ako nga Siya makaayo kanako. Hangtud niining puntoha, naglisud ako sa pagpahaum sa panginahanglan sa akong hugot nga pagtuo diha ni Kristo uban sa dili kapugngan Niyang kabubut-on. Nakita nako sila nga duha ka managlahi nga mga butang, ug usahay akong gibati nga ang usa misumpaki sa usa. ‘Nganong magbaton man ako og hugot nga pagtuo kon ang Iyang kabubut-on mao ang matuman,’ nangutana ko? Human niini nga kasinatian, nasayud ko nga ang pagbaton og hugot nga pagtuo—diha sa akong kahimtang—dili mao ang pagkahibalo nga siya moayo kanako, apan nga Siya makaayo kanako. Kinahanglang kong motuo nga Siya makaayo, ug dayon kon kini mahitabo man anaa ra Kaniya.
“Samtang akong gitugutan kadtong duha ka mga ideya nga dungan nga maanaa sa akong kinabuhi, ang nakatumong nga hugot nga pagtuo diha kang Jesukristo ug hingpit nga pagtugyan ngadto sa Iyang kabubut-on, nakakaplag ako og mas dakong kahupayan ug kalinaw. Talagsaon kaayo nga makakita sa kamot sa Ginoo sa among mga kinabuhi. Ang mga butang napahimutang ra sa iyang lugar, ang mga milagro nahitabo, ug padayon kaming napaubos aron makakita sa plano sa Dios nga gipakita alang namo.”
Ang pagkamatarung ug hugot nga pagtuo sa tinud-anay gikinahanglan aron sa pagtangtang sa mga kalisdanan—kon ang pagtangtang sa mga kalisdanan makatuman sa mga katuyoan sa Dios ug sumala sa Iyang kabubut-on. Ang pagkamatarung ug hugot nga pagtuo sa tinud-anay gikinahanglan sa pag-ayo sa masakiton, bungol, o bakol—kon ang ingon nga pag-ayo nagtuman sa mga katuyoan sa Dios ug sumala sa Iyang kabubut-on. Busa, bisan kon kita adunay lig-on nga pagtuo, daghang mga kalisdanan ang dili tangtangon. Ug dili tanan nga masakiton ang mamaayo. Kon ang tanang oposisyon gipugngan, kon ang tanang balatian gikuha, niana ang unang mga katuyoan sa plano sa Amahan mapakyas.
Kadaghanan sa mga leksyon nga atong makat-unan sa mortalidad madawat lamang pinaagi sa mga butang nga atong masinati ug usahay maantus. Ug ang Dios nagpaabut ug nagsalig nato nga moatubang sa temporaryong mortal nga kalisdanan uban sa Iyang tabang aron kita makat-on unsay atong kinahanglang makat-unan ug sa katapusan mamahimo sa unsay angay nato nga mamahimo sa kahangturan.
Ang Kahulugan sa Tanang mga Butang
Kini nga istorya mahitungod ni John ug Heather ordinaryo ug dili ordinaryo. Kining batan-ong magtiayon nagrepresentar sa minilyon nga matinud-anon, nagtuman sa pakigsaad nga mga Santos sa Ulahing mga Adlaw sa tibuok kalibutan kinsa nagpadayon subay sa higpit ug pig-ot nga dalan uban sa makanunayong hugot nga pagtuo diha kang Kristo ug hingpit nga kahayag sa paglaum (tan-awa sa 2 Nephi 31:19–20). Si John ug Heather wala magserbisyo og tag-as nga mga katungdanan sa Simbahan, sila walay kabanay nga mga General Authority, ug usahay sila adunay mga pagduha-duha ug kahadlok. Sa daghan niini nga mga aspeto, ang ilang istorya ordinaryo.
Apan kining batan-ong lalaki ug babaye gipanalanginan sa dili ordinaryong mga paagi sa pagkat-on sa importante nga mga leksyon alang sa kahangturan pinaagi sa kasakit ug kalisud. Akong gipakigbahin kini nga istorya kaninyo tungod kay si John ug Heather, kinsa sama sa kadaghanan ninyo, nakasabut nga ang dili pag-atras mas importante kay sa pagpatunhay sa kinabuhi. Sa ingon, ang ilang kasinatian dili mahitungod sa pagpakabuhi ug pagkamatay; hinoon, mahitungod kini sa pagkat-on, pagpakabuhi, ug pagkahimo.
Alang sa kadaghanan kaninyo, ang ilang istorya mao o mahimong maoy inyong istorya. Kamo nag-atubang, nakaatubang, o mag-atubang og susama nga mga hagit sa inyong mga kinabuhi uban sa sama nga kaisug ug espirituhanong panglantaw sama ni John ug Heather. Wala ko kahibalo ngano nga ang ubang mga tawo makat-on sa mga leksyon sa kahangturan pinaagi sa pagsulay ug pag-antus—samtang ang uban makat-on sa susamang mga leksyon pinaagi sa pagluwas ug pagkaayo. Wala ko kahibalo sa tanang mga rason, sa tanang mga katuyoan, ug wala ko kahibalo sa tanan kabahin sa panahon sa Ginoo. Uban ni Nephi, kamo ug ako makaingon nga kita “wala masayud sa kahulugan sa tanan nga mga butang” (1 Nephi 11:17).
Apan ang ubang mga butang nakahibalo gyud ko. Nasayud ko nga kita espiritung anak nga mga lalaki ug mga babaye sa atong Langitnong Amahan. Nasayud ko nga ang Amahan sa Kahangturan mao ang tigpasiugda sa plano sa kalipay. Nasayud ko nga si Jesukristo mao ang atong Manluluwas ug Manunubos. Nasayud ko nga si Jesus mipatuman sa plano sa Amahan pinaagi sa Iyang walay katapusan ug mahangturon nga Pag-ula. Ako nasayud nga ang Ginoo, kinsa “gibun-og, gibalian, [ug] gisakit alang kanato”,2 makatabang ug makalig-on sa “iyang mga katawhan sumala sa ilang mga kahuyang” (Alma 7:12). Ug ako nasayud nga usa sa labing dako nga mga panalangin sa pagka-mortal mao ang dili pag-atras ug sa pagtugot sa atong indibidwal nga kabubut-on nga “[ma]tuhop ngadto sa kabubut-on sa Amahan” (Mosiah 15:7).
Bisan og wala ko masayud sa tanang mga butang kabahin kon unsaon ug kanus-a ug asa ug ngano nga kini nga mga panalangin mahitabo, nasayud ko nga kini tinuod. Ug ako nasayud nga sa inyong pagpadayon sa inyong mga kinabuhi uban sa makanunayon nga hugot nga pagtuo diha kang Kristo, kamo makabaton sa kapasidad nga dili moatras.