Mga Pangutana ug mga Tubag
“Duna koy usa ka higala kinsa mibati nga wala siyay laing mga higala sa simbahan gawas kanako. Unsay akong mabuhat sa pagtabang kaniya?”
Niining sitwasyona, siya tingali mibati nga gibalewala, nag-inusara, o huyang. Maayo gani, tungod sa imong pakighigala, adunay daghang mga butang nga imong mahimo sa pagdasig kaniya:
-
Tabangi siya nga makighigala sa ubang kabatan-onan. Ipaila-ila siya kanila, ilakip siya sa imong pakig-istoryahanay kanila, ug sugyot og mga kalihokan alang sa kabatan-onan sa imong ward nga mas magkaila ang usag usa. Usab, mahimo ka nga makigsulti sa imong presidente sa Young Women aron siya ug ang ubang mga lider makatabang.
-
Tabangi siya sa pag-ila sa iyang balaanong bili. Mahimo nimo siyang sultihan sa pipila sa mahinungdanon nga mga kinaiya nga imong nakita kaniya.
-
Tabangi siya sa paghinumdom sa gugma sa Manluluwas ug sa imong gugma. Ang Manluluwas miingon, “Ako mao ang maayong magbalantay sa mga karnero, ug ako nakaila sa mga ako, ug ang mga ako nakaila kanako” (Juan 10:14). Bisan kon mibati siya nga walay usa nga nakasabut, ang Ginoo nasayud gayud kon unsa ang iyang gibati. Pag-ampo alang kaniya, ug siyempre ipakita ang imong gugma alang kaniya pinaagi sa paglakip kaniya sa mga kalihokan ug pakig-istorya kaniya diha sa simbahan.
-
Isugyot nga modangup siya ngadto sa mga kasulatan ug mag-ampo aron sa paglig-on sa iyang relasyon sa Langitnong Amahan ug ni Jesukristo.
-
Labaw sa tanan, awhaga siya nga motambong kanunay sa simbahan, bisan kon kini lisud alang kaniya. Pahinumdumi siya sa kaimportante sa pag-ambit sa sakrament ug sa pagkat-on sa ebanghelyo diha sa mga miting sa Simbahan.
Kon ang imong mga ideya wala dayon moepekto, padayon nga anaa alang sa imong higala ug awhaga siya sa pagbuhat sa matarung nga mga butang.
Mahimong Mas Lig-on nga Mag-uban
Awhaga ug tabangi siya sa pagduol sa ubang kabatan-onan. Lig-on kita sa tagsa-tagsa, apan mas lig-on kita kon mag-uban. Sultihi ang imong mga higala nga mas maayo siya nga makatabang sa pagpalambo sa gingharian sa Dios kon aduna siyay mas daghang mga higala nga molig-on kaniya, magmahimong suporta sa iyang kinabuhi, ug motabang kaniya sa paghigugma ni Jesukristo ug sa Iyang ebanghelyo!
Scarlet M., edad 16, Cautín Province, Chile
Dapita Siya sa mga Kalihokan
Sa dihang namiyembro ko sa Simbahan, akong gibati nga nag-inusara, bisan og ang pipila sa mga kabatan-onan naningkamot nga makig-istorya kanako. Miadto ko sa mga kalihokan sa Mutual ug mas miapil sa ilang mga pag-istoryahanay. Naminaw ko kanila ug mihatag sa akong tampo. Mipahiyum ko kanila ug mipakita og tinuoray nga interes diha kanila. Ang akong tambag mao nga tabangi ang imong higala nga mopakigbahin sa iyang mga hunahuna ug pagbati. Tabangi siya sa pag-apil sa bisan unsang kalihokan sa Simbahan, ug siya mosugod sa pagtagamtam sa pakig-uban sa daghang mga higala.
Faith O., edad 17, Abia, Nigeria
Ilakip Siya
Maningkamot ko sa pagtabang nga ilakip ang imong higala sa mga pag-istoryahanay ug sa mga kalihokan uban sa ubang kabatan-onan sa simbahan. Ang pakig-istorya sa ubang maayong mga higala kabahin sa gibati niini nga higala makatabang. Ang pagpangayo sa ilang tabang sa paglakip kaniya mahimong makapaamgo sa ubang mga higala sa mga panginahanglan niining tawhana ug makatabang kanila sa paghinumdom nga mahimong mas mabination ug molakip kaniya sa mga pag-istoryahanay ug mga kalihokan.
Trevor C., edad 14, Idaho, USA
Sultihan Siya Kon Unsa Siya Kaimportante Diha Kanimo
Mao usab kana ang akong gibati sa dihang mibalhin ko og ward. Lisud kana nga sitwasyon. Importante nga sultihan ang imong higala kon unsa siya ka espesyal, unsa siya kaimportante diha kanimo, ug sa maayo niya nga mga kinaiya aron mobati siya nga masaligon ug nga dili siya kinahanglan nga mahadlok. Kitang tanan importante. Awhaga siya nga makigsulti sa usa ka lider, mag-ampo, ug mobasa sa mga kasulatan aron masayud nga siya wala mag-inusara.
Sharon G., edad 14, Yucatán, Mexico
Pangandam sa Pagtabang
Makatabang ka kaniya nga makasabut nga kitang tanan mga sakop sa pamilya sa Dios, mga kaigsoonan, ug nga siya kinahanglang mopakita og gugma ug makighinabi sa tanan. Usab, pahibaloa siya nga diha sa atong dako nga espirituhanong pamilya, kita kanunayng andam sa pagtabang ug paglig-on sa usag usa. Kitang tanan nag-ambit sa samang tumong nga atong gipaningkamutan. Diha sa ebanghelyo, kita wala gayud mag-inusara.
Sister Anna Kaigorodova, Russia Moscow Mission
Paminaw sa Giya sa Ginoo
Pag-ampo alang kaniya ug hangyoa ang Langitnong Amahan sa pagtabang kanimo nga mahibalo unsaon nimo sa pagtabang kaniya. Pakigsulti sa imong mga lider ug paningkamuti nga malakip siya sa mga pag-istoryahanay uban sa ubang mga babaye sa simbahan. Padayon sa pagkahimong iyang higala ug buhata ang labing maayo nimo nga mahimo, ug ang Ginoo motabang kanimo nga masayud unsaon sa pagtabang kaniya.
Anastasia B., edad 18, Utah, USA
Pagpasiugda og usa ka Party
Ikaw o siya mahimong mopasiugda og usa ka party uban sa pipila lang ka mga tawo gikan sa simbahan. Mas maayo ang pagpakig-ila-ila sa uban kon mas gamay ang grupo.
Trais H., edad 13, Idaho, USA
Sultihi Siya nga Wala Gayud Siya Mag-inusara
Una, mag-ampo kami alang nianang batan-ong babaye ug modapit kaniya sa matag kalihokan o proyekto sa pagserbisyo aron iyang bation nga kabahin sa grupo. Kita dili makatugot ni bisan kinsa nga mapakyas! Ikaduha, sultihan namo siya nga wala gayud siya mag-inusara, nga ang Langitnong Amahan kanunay nga uban kanato ug nahigugma kanato pag-ayo ug sa kahangturan. Pahinumduman namo siya sa kinutlo gikan sa atong propeta: “Usa ka adlaw kamo molingi ug motan-aw sa inyong kalisdanan, ug inyong mahibaloan nga Siya anaa kanunay uban kaninyo” (Thomas S. Monson, “Wala Kita Mag-inusara,” Liahona, Nob. 2013, 124).
Yenifer S., edad 18, ug Fernando P., edad 18, Tacuarembó, Uruguay