Pagtabang sa mga Kabatan-onan nga Makatudlo

Ni Brian K. Ashton

Ikaduhang Magtatambag, Kinatibuk-ang Kapangulohan sa Sunday School

Ang mga kabatan-onan kinahanglan nga makatudlo, ug uban sa pipila ka tabang, makatudlo sila og maayo.

Ang mga kabatan-onan kinahanglan nga makatudlo. Giklaro kini sa Ginoo dihang gilista Niya ang mga katungdanan sa usa ka priest:

“Ang katungdanan sa [priest] mao ang pagpamulong, pagtudlo, pagpatin-aw, pag-awhag, ug pagbunyag, ug pagpangalagad sa sakramento.” (D&P 20:46; emphasis gidugang).

Mga pipila lang ka bersikulo human niana gihatag sa Ginoo ang katungdanan ngadto sa mga [teacher] ug mga [deacon] ang pagtudlo ug pagpatin-aw (tan-awa sa D&P 20:58–59). Ang tinuod mao nga tanan sa atong mga batan-ong lalaki ug batan-ong mga babaye nagkinahanglan sa oportunidad nga makatudlo panagsa.

Ang mga Benipisyo para sa Kabatan-onan nga Makatudlo og Laing Batan-on

Si Jesukristo mao ang hingpit nga magtutudlo. Ang pagtudlo makatabang sa mga kabatan-onan nga makasunod sa ehemplo sa Manluluwas ug mamahimong labaw nga sama Kaniya. Ang pagtudlo mag-andam usab nila nga mahimong mga misyonaryo, mga ginikanan, ug mga lider sa Simbahan. Kon magtudllo ang mga batan-on, kinahanglan silang magtuon sa ebanghelyo ug mobuhat niini. Kinahanglan usab nga anaa kanila ang Espiritu aron makatudlo (tan-awa sa D&P 42:14). Agig resulta, ang mga magtutudlo sa mga kabatan-onan kasagaran mas makakat-on og daghan ug makabaton og mas lig-ong pagpamatuod sa hilisgutan kay sa mga sakop sa klase.

Agig dugang, ang mga kabatan-onan nga magtudlo makabaton og pagsalig, makakat-on og mga kahanas sa pagtudlo, ug magsugod sa pagkahibalo unsay wala nila mahibaloi. Ang mga kabatan-onan nga adunay oportunidad nga mahimong mga magtutudlo makakat-on usab nga mahimong mas maayong mga estudyante ug mga sakop sa klase.

Ang labaw niini, ang mga kabatan-onan nga gitudloan mapanalanginan usab. Ang mga kabatan-onan sagad nga mas maminaw ug moapil kon ang ilang kaedad ang magtudlo. Ang panaghigalaay malig-on kon ang kabatan-onan maghisgot sa mga hilisgutan sa ebanghelyo uban sa Espiritu nga anaa. Ug ang mga kabatan-onan kanunay mas maayong motabang sa usag usa sa pagsulbad sa kasagarang mga problema.

Sa unsang paagi ang Hingkod nga mga Lider Makatabang sa mga Kabatan-onan nga Molampus?

Kon motudlo ang kabatan-onan, ang mga hingkod nga lider mao ang responsable nga masiguro kon unsay angay nga pamatasan og espirituhanong kahimtang.

Ang hingkod nga mga lider mosunod sa Espiritu kon magdapit og mga kabatan-onan nga magtudlo.¹ Ang ubang mga kabatan-onan dili andam nga motudlo, ug kinahanglang tinguhaon sa mga lider nga komportable ang pagbati niining mga batan-on. Ang ubang mga kabatan-onan mahimong andam nga motudlo og kabahin lamang sa leksyon, samtang ang uban mahimong motudlo sa tibuok nga leksyon. Samtang ang kabatan-onan kinahanglan motudlo sa ka bahin sa kadaghanan sa mga leksyon, kinahanglang dili sila motudlo sa matag leksyon. Sa ginagmayng klase, siguroon sa mga lider nga ang mga kabatan-onan dili hangyoon nga kanunayng maoy motudlo. Dugang pa, ang ubang leksyon, ilabi na niadtong dunay lisud nga mga hilisgutan, mas maayo nga itudlo sa mga hingkod na. Labaw pa, nga ang mga kabatan-onan kinahanglang makakita sa mga hingkod nga lider nga mopakita sa saktong mga prinsipyo sa pagtudlo.

Ang hingkod nga mga lider o mga ginikanan mahimong makigtrabaho sa tinagsa ka batan-on aron matabangan sila sa pag-andam sa ilang mga leksyon. Kini nga tabang maglakip sa paghangyo sa mga kabatan-onan sa pagbasa sa leksyon pinakaminos usa ka semana sa dili pa ang klase,² magsugyot nga mag-ampo sila aron mahibalo unsay gusto sa Langitnong Amahan nga ilang itudlo, maghimo og lesson plan, ug praktisan nilang duha ang pagtudlo sa leksyon. Samtang makadawat og pagpadayag ang mga kabatan-onan atol niining proseso sa pagpangandam, ang mga lider makatabang nila sa pag-ila niini.

Ang hingkod nga mga lider makatabang sa mga magtutudlo sa kabatan-onan sa paghimo og mga pangutana nga makamugna og diskusyon, makadapit og inspirasyon sa Espiritu Santo, ug makatabang sa mga estudyante nga madiskubrihan nila mismo ang kamatuoran. Ang mga lider makatabang usab sa mga kabatan-onan nga makat-on sa paghilum human makapangutana aron mahatagan ang mga sakop sa klase og panahon nga makadawat og pagpadayag.

Atol sa leksyon, ang hingkod nga mga lider mahimong mopakigbahin og personal nga mga kasinatian ug mga pagpamatuod nga makatabang sa mga kabatan-onan sa pagkakita nga sila wala mag-inusara sa ilang mga hagit ug mahatagan sila og paglaum sa pagbuntog niini. Gikinahanglan sa mga kabatan-onan ang kaalam ug kasinatian nga gitanyag sa hingkod nga mga lider. Ang mga lider kinahanglan usab nga moklaro sa doktrina kon gikinahanglan.

Likayan sa hingkod nga mga lider nga dili sila mopuli sa leksyon bisan og nanglimbasug ang batan-on nga magtutudlo. Hinoon, ang mga lider mahimong mangandam sa pagsuporta pinaagi sa pagtuon daan sa mga materyal sa leksyon ug pag-ampo kon unsaon nga mas matabangan nila ang batan-ong magtutudlo.

Ang mga Kabatan-onan Makatudlo, ug Maayong Motudlo

Bag-o lang gihangyo ko nga mopuli og tudlo sa nag-edad og 12 ngadto sa 13 nga klase sa Sunday School sa akong ward. Gihangyo nako ang 13 anyos nakong anak, si Jacob, nga tabangan ko niya sa pagtudlo. Kaming duha ang naghimo sa lesson plan. Si Jacob ang mihatag sa unang katunga sa leksyon, mipakita og mubo nga video, mipakigbahin og mga kasulatan nga may kalabutan sa among hilisgutan, ug nangutana og makapahunahuna nga mga pangutana. Gipangutana sab ni Jacob ang mga sakop sa klase unsay ilang gibati ug nakatabang sa ilang pag-ila sa Espiritu Santo.

Sa katunga nga bahin sa klase, ang mga sakop sa klase maoy akong gipatudlo sa Unang Panan-awon. Dayon gidapit namo sila nga ilang itudlo ang Unang Panan-awon ngadto sa family home evening sa ilang mga pamilya. Human sa klase among gipadala ang email ngadto sa mga ginikanan nga nagpahibalo kanila sa among imbitasyon.

Dihang gipangutana nako si Jacob unsay iyang gibati mahitungod sa leksyon, miingon siya, “Maayo kaayo. Nasayud ko nga didto ang Espiritu tungod kay wa ko magtuo nga makatubag ang akong mga classmate sa atong mga pangutana, apan nakatubag sila.”

Kinahanglan ang mga kabatan-onan motudlo, ug kamo makatabang nila sa paglampus. Kon buhaton nila kini, molambo ang ilang pagpamatuod, ug mas maandam sila nga mahimong mga misyonaryo, mga ginikanan, ug mga lider sa Simbahan. Labaw sa tanan, mahimo silang mas mahisama sa Manluluwas.