Pisikal nga Kahimsog: Pagpakunhod sa Timbang ug ang Pulong sa Kaalam

Carol E. Wolf, Utah, USA

Sa akong 60 kapin nga edad, maglisud na ko sa akong paglihok-lihok. Nagtimbang ko og hapit 300 ka libras (136 kg). Minos ang akong kalagsik ug kusog ug mikuha pa gani og parking permit alang sa handicapped aron maka-park ko nga duol sa mga tindahan kutob sa mahimo.

Nakahukom ko nga panahon na nga magpakunhod og timbang. Midangup ko sa Doktrina ug mga Pakigsaad 89 ug nag-ampo sa Langitnong Amahan, “Tabangi ko nga makasabut kon unsa gayud ang gisulti niini kanako.” Sa kadugayan ang matag bersikulo, matag pulong adunay bag-ong kahulugan. Bisan tuod dili ko moinom og alkohol, tsa, o kape, ug dili ko manigarilyo, wala gayud nako masabti ang kinatibuk-ang mensahe. Nasayud ko nga ang Pulong sa Kaalam usa ka giya sa maayong panglawas, apan wala gayud nako sukad mahunahuna kini nga usa ka paagi sa pagpakabuhi.

Sa unang higayon ako tinud-anay nga mibati nga akong mausab ang akong kinabuhi. Naghimo ko og makab-ut nga tumong nga mokunhod og 50 ka libras (23 kg) sulod sa 50 ka semana.

Akong girekord ang calories ug mga sustansya sa akong mga gikaon. Akong gisiksik ang mga benepisyo sa panglawas sa tanan nga akong gikaon. Samtang nagkaon ko og mas makahimsog nga mga pagkaon, mibati ko og katagbawan. Wala koy mga kahidlaw. Ang akong lawas ingon og nasayud unsay gikinahanglan niini. Dili na ko ganahan sa dili makahimsog nga mga pagkaon nga ganahan nako kaniadto. Mihunong na ko sa pagkaon og mga pagkaon nga adunay asukar. Paglabay sa panahon, mihunong ko sa pag-ihap sa mga calories ug mikaon og mga pagkaon nga gikan sa mga tanom, sama sa gisulti sa Pulong sa Kaalam: “kana nga namunga, bisan diha sa yuta o sa ibabaw sa yuta” (D&P 89:16). Akong nakab-ot ang akong tumong ug sobra pa. Lapas lang gamay sa 23 ka bulan nakapakunhod ko og sobra sa katunga sa timbang sa akong lawas. 12 kana ka mga gidak-on sa sinina [dress sizes] nga mas gamay! Namintinar nako kana nga timbang sa sobra na sa tulo ka tuig karon.

Mibati ko og kahimsog. Wala na koy problema sa pagmintinar sa akong blood sugar kon gutumon ko, ug dili na ko makahinumdom sa katapusang higayon nga gilabdan ko sa ulo. Dili na ko kinahanglang motumar og mga tambal. Samtang ang pagkunhod sa timbang nakatampo sa akong kinatibuk-ang pagbati sa kahimsog, ang akong bag-ong estilo sa pagpakabuhi nakatampo usab.

Ang pagkontrolar sa mga butang nga akong kan-on usa ka bahin sa pagbuntog sa kinaiyanhon nga tawo (tan-awa sa Mosiah 3:19). Isip resulta, nagpalambo kini sa akong espirituhanong pag-ila, nga nagtugot kanako nga madawat ang saad nga ako “makakita og kaalam ug dako nga mga bahandi sa kahibalo, gani ang mga tinago nga mga bahandi” (D&P 89:19). Ang pag-undang sa pagkaon og fastfood alang sa kaalam usa ka maayo nga pagbaylo.

Mapasalamaton kaayo ko sa usa ka mahigugmaong Langitnong Amahan nga midungog sa akong yano nga hangyo ug mihatag kanako og panabut sa Pulong sa Kaalam. Nasayud ko nga ang Pulong sa Kaalam pinadayag. Nasayud ko nga makausab kini og mga kinabuhi.