Ang Paglaum nga adunay Gugma sa Mahangturong Pamilya

Ni Presidente Henry B. Eyring

Unang Magtatambag sa Unang Kapangulohan

Sa tanang mga gasa nga nahatag sa atong mahigugmaong Langitnong Amahan ngadto sa Iyang mga anak, ang labing mahinungdanon mao ang kinabuhing dayon (tan-awa sa D&P 14:7). Kana nga gasa mao ang pagpuyo sa presensya sa Dios nga Amahan ug sa Iyang Pinalanggang Anak hangtud sa kahangturan diha sa mga pamilya. Diha lamang sa kinatas-an nga gingharian sa Dios, ang celestial, nga ang mahigugmaong mga pagbugkos sa kinabuhi sa pamilya magpadayon.

Kitang tanan naglaum alang sa kalipay sa pagpuyo diha sa mahigugmaong mga pamilya. Para sa pipila kanato, mao kini ang pagbati nga wala pa nato nasinati—usa ka pagbati nga nasayud kita nga posible apan wala pa maamguhi. Mahimong makita kini diha sa kinabuhi sa uban. Alang sa uban nato, ang gugma sa pamilya nga ingon og mas tinuod ug bililhon kon ang kamatayon mobulag kanato gikan sa usa ka anak, inahan, amahan, igsoon nga lalaki, igsoon nga babaye, o usa ka mahigugmaon ug mapinanggaon nga apohan.

Kitang tanan mibati sa paglaum nga ugma damlag kita mobati pag-usab sa mainiton nga pagbati nianang sakop sa pamilya nga atong gihigugma pag-ayo ug nangandoy karon nga pag-angkon pag-usab.

Ang atong mapinanggaon nga Langitnong Amahan nasayud sa atong mga kasingkasing. Ang Iyang katuyoan mao ang paghatag kanato og kalipay (tan-awa sa 2 Nephi 2:25). Ug busa gihatag Niya ang gasa sa Iyang Anak aron mahimong posible ang hingpit nga kalipay sa pagbugkos sa pamilya nga magpadayon sa kahangturan. Tungod kay gibugto sa Manluluwas ang higot sa kamatayon, kita mabanhaw. Tungod kay Siya miula sa atong mga sala, mahimo kitang takus sa celestial nga gingharian, pinaagi sa atong hugot nga pagtuo ug paghinulsol, diin ang mga pamilya pagabugkoson diha sa paghigugma hangtud sa kahangturan.

Ang Manluluwas mipadala ni Propeta Elijah ngadto ni Joseph Smith sa pagpahiuli sa mga yawe sa priesthood (tan-awa sa D&P 110). Uban niadto nga mga yawe miabut ang gahum sa pagbugkos, paghatag og labing nindot nga gasa sa Dios sa Iyang mga anak—kinabuhing dayon sa mga pamilya mahiusa hangtud sa kahangturan.

Usa kini ka tanyag nga maangkon sa matag anak sa Dios nga moabut sa kalibutan. Ang ikatulong bahin sa Iyang espiritung mga anak misalikway sa Iyang tanyag didto sa kalibutan sa espiritu. Gumikan sa kakulang sa igong hugot nga pagtuo ug dayon dayag nga pagsukol, sila mipili nga dili gayud masayud sa hingpit nga kalipay sa gasa nga mahangturon nga pamilya sa Langitnong Amahan.

Kanato kinsa mipasar sa importanting pagsulay didto sa premortal nga kalibutan sa espiritu ug sa ingon mikwalipay sa pagdawat sa gasa sa mortal nga mga lawas, ang mahinungdanong mga pagpili sa kinabuhing dayon kita gihapon ang maghimo. Kon kita napanalanginan nga makaplagan ang gipahiuli nga ebanghelyo, makapili kita sa paghimo ug paghupot sa mga pakigsaad uban sa Dios nga mokwalipay sa kinabuhing dayon. Sa atong paglahutay diha sa kamatinud-anon, ang Espiritu Santo mokumpirmar sa atong paglaum ug pagsalig nga kita anaa sa dalan sa kinabuhing dayon, aron makapuyo diha sa mga pamilya sa kahangturan sa celestial nga gingharian.

Alang sa uban, kana nga walay katapusan nga kalipay ingon og huyang o gani nagkaawop nga paglaum. Mga ginikanan, mga anak, mga igsoong lalaki ug babaye naghimo og mga pagpili aron dili mokwalipay sa kinabuhi nga dayon. Mahimo gani kamong maghunahuna kon kawalipikado ba kamo pinaagi sa Pag-ula ni Jesukristo.

Ang propeta sa Dios sa makausa mitanyag kanako og tambag nga naghatag kanako og kalinaw. Nabalaka ko nga ang pagpili sa uban makahimo niining imposible alang sa among pamilya aron magkauban sa kahangturan. Siya miingon, “Imong gikabalak-an ang sayop nga problema. Kinahanglan lang nga magpuyo nga takus sa celestial nga gingharian, ug mas monindot pa ang kahimtang sa imong pamilya kay sa imong mahunahunaan.”

Sa tanan niadtong kansang personal nga kasinatian o kaminyoon ug mga anak—o ang pagkawala niana—mikunhod ang ilang mga paglaum, motanyag ko sa akong pagsaksi: Ang Langitnong Amahan nakaila ug nahigugma kaninyo isip Iyang espiritu nga anak. Samtang kamo uban Kaniya ug sa Iyang Pinalangga nga Anak sa wala pa niining kinabuhia, Ilang gibutang diha sa inyong kasingkasing ang paglaum sa kinabuhing dayon. Uban sa gahum sa Pag-ula ni Jesukristo sa pakigtambayayong sa Espiritu Santo nga naggiya, inyong mabati karon ug mabati sa umaabut nga kalibutan ang gugma sa pamilya nga gusto kaayo sa inyong Langitnong Amahan ug sa Iyang Pinalanggang Anak nga inyong madawat.

Ako mopamatuod nga samtang kamo magpuyo nga takus sa celestial nga gingharian, sa propetikanhon nga saad nga “mas monindot pa ang kahimtang sa imong pamilya kay sa imong mahunahunaan” mahimong mainyo.