Pagpakigbahin og Mahangturon nga Kalipay

Usa sa labing maayong mga butang mahitungod sa ebanghelyo mao ang kahibalo sa plano sa kaluwasan. Kita adunay talagsaong oportunidad nga makauban ang atong pamilya sa kahangturan. Kana nga kahibalo nagtabang kanato nga makabaton og paglaum kon kita mobati nga nasanapan sa kalibutan. Si Presidente Eyring nagtudlo, “Ang atong mahigugmaong Langitnong Amahan nasayud kon unsay anaa sa atong mga kasingkasing. Ang Iyang katuyoan mao ang paghatag kanato og kalipay (tan-awa sa 2 Nephi 2:25). Ug busa gihatag Niya ang gasa sa Iyang Anak aron mahimong posible ang hingpit nga kalipay sa pagbugkos sa pamilya nga magpadayon sa kahangturan. … Usa kini ka tanyag nga mahimong maangkon sa matag anak sa Dios nga moanhi sa kalibutan.”

Kana nga panalangin magamit nato kinsa buhi karon ug niadtong kinsa namatay na—apan pinaagi lamang sa atong tabang. Ang atong mga katigulangan anaa sa kalibutan sa espiritu karon, naghulat kanato nga andamon ang ilang mga ngalan aron ang mga ordinansa sa templo mapahigayon alang kanila. Apan usahay mahimong lisud ang paghimo sa buhat alang kanila. Tingali kita busy kaayo, o kita nagpuyo nga layo ra kaayo sa templo aron kanunay nga makaadto.

Swerte lang, adunay laing mga paagi nga makatabang kita sa atong mga katigulangan, sama sa paghimo sa buhat sa family history, pag-index, o sa pagbantay sa bata alang sa atong mga ginikanan samtang sila moadto sa templo. Pinaagi sa pagtabang, kita nagserbisyo sa Ginoo ug makahatag og paglaum sa mahangturong mga pamilya niadtong anaa sa pikas nga bahin sa tabil.