Pagserbisyo diha sa Simbahan
Usa ka Gasa nga Mas Labaw pa Gayud
Ang tagsulat nagpuyo sa California, USA.
Si Brother Reynolds dili lang basta nagtudlo kanamo—siya nahigugma kanamo.
Paghulagway pinaagi ni Janice Kun
Atol sa akong katapusang tuig sa Primary aduna mi bag-ong magtutudlo: si Brother Reynolds. Ubanon na ang iyang buhok ug naa nay mga kunot, ug siya nag-istorya mahitungod sa Depresyon ug sa iyang pagserbisyo sa militar sa U.S. atol sa Ikaduhang Gubat sa Kalibutan. Sa sinugdanan wala nako masabti ang iyang giistorya—makalaay ug dugay na kining nahitabo.
Makausa ang akong mga higala ug ako nagpabadlong sa klase. Gikuha ko ni Brother Reynods ug direkta nga miistorya nako. Yano siyang mihangyo nako nga buhaton ang mas maayo ug misulti nako nga gusto niya ang labing maayo alang nako. Kaniadto, akong mga higala ug ako wala naghatag og dakong pagtagad. Apan sa wala madugay among nahibaloan ang usa ka espesyal nga butang kabahin ni Brother Reynolds—siya nagpakabana og maayo mahitungod kanamo, ug ang iyang bugtong tumong mao ang paghigugma kanamo.
Si Brother Reynolds kanunayng mipakigbahin sa iyang pagpamatuod sa Manluluwas nga si Jesukristo. Siya adunay malipayon nga panagway samtang siya nagtudlo kanamo mahitungod sa gahum nga naggikan sa pagpuyo og kinabuhi nga nakasentro kang Kristo. Ang iyang mga istorya nahimong tinuod nga panghitabo nga midasig sa among mga hunahuna ug mihimo kanamo nga gustong moserbisyo sa Ginoo.
Mahinumdom pa gihapon ko sa leksyon nga iyang gitudlo mahitungod kang Propeta Joseph Smith ug sa unsang paagi siya mipamatuod nga si Joseph kausa usa ka batang lalaki sama kanamo. Inubanan sa iyang mga luha, misulti siya kanamo nga ang Ginoo milaum og dako kanamo, sama nga Siya milaum kang Joseph. Si Brother Reynolds miingon nga ang matag usa namo makahimo og talagsaon nga mga butang sa among mga kinabuhi, gani mousab sa kalibutan, kon kami mahimong sama ni Joseph ug magpaduol sa Manluluwas.
Sa pipila ka tuig ang milabay sa dihang ang akong mga higala ug ako diha pa sa high school, among nahibaloan nga si Brother Reynolds nagkinahanglan nga mapul-ongan ang iyang punoan sa apricot. Malipayon kami nga mipul-ong sa mga kahoy, nga midangat og pipila ka oras sa pagsaka sa hagdan ug mamul-ong. Lisud kadto nga trabaho, apan kami nasayud nga importante kadto ni Brother Reynolds.
Nianang tuiga amo usab nahibaloan nga si Brother Reynolds nagkinahanglan og bag-ong mga kasulatan. Iyaha daan na, lum-it, ug katangtangon na. Gitipon namo ang among kwarta ug gipalitan siya og usa ka leather quad nga naa ang iyang pangalan niini. Gihatag namo kini ngadto niya atol sa among ward Christmas party. Dili gayud nako makalimtan ang iyang panagway nga misanag ug ang iyang mga mata mikidlap-kidlap nga naghilak ug kahinam nga nagtan-aw namong mga lalaki mihimo og butang nga makahuluganon kaayo niya.
Paghuman nako sa kolehiyo pipila ka tuig ang milabay, akong nahibaloan nga si Brother Reynolds namatay na. Mibisita ko sa iyang asawa ug pamilya aron mopakigbahin sa akong lawom nga pagtahud ug pagpasalamat kaniya. Sa dihang akong nakita ang iyang malipayon nga mga anak ug mga apo, ako nakaamgo nga pagkabulahan kanako nga masayud niining talagsaon nga tawo.
“Siya naghigugma kaninyo mga bata” miingon si Sister Reynolds pinaagi sa mga luha ug uban sa pahiyom. “Siya gayud nahigugma kaninyo.”
Sa kalibutan diin lisud ang mag-fucos sa husto nga mga butang, si Brother Reynolds mipakita kanamo nga among relasyon uban sa Langitnong Amahan ug sa Iyang Anak importante kaayo. Mahimong napul-ungan namo ang punoan sa kahoy ni Brother Reynolds ug mihatag niya og usa ka set sa kasulatan, apan siya mihatag kanamo og usa ka gasa nga mas labaw pa gayud: ang pagsunod sa gugma alang sa Manluluwas, si Jesukristo.