Kamo mga Harianon
Gikan sa mga pakigpulong sa Church Educational System, “Like a Watered Garden” ug “A Regal Identity,” gihatag didto sa New York, USA, niadtong Septyembre 13, 2015.
Pagpakabuhi nga takus sa inyong mahangturong kapasidad.
Tulo ka mga imahe © iStock/Thinkstock
Samtang ang among pamilya anaa sa Argentina tungod sa buluhaton sa Simbahan, ang among anak nga lalaki ug ako kanunayng mobisita og makapaikag nga mga dapit sa among libreng panahon. Usa kanila mao ang zoo nga lahi sa bisan unsang zoo nga among nakit-an sukad.
Imbis nga maglabay-labay sa mga tangkal sa katulugon nga mga hayop, ang mga bisita gidapit sa pagsulod sa mga tangkal ug ihapuhap ang mga hayop. Nagsunod sa tigbansay, misulod kami sa usa ka tangkal nga giandam alang sa dagkong mga leon ug mihapuhap kanila samtang sila daw mibaliwala lang kanamo.
Nangutana ko sa mga tigbansay kon giunsa nila pagkombinser niadtong dagkong mga hayop nga dili mokaon kanamo. Gitudlo nila kanako ang pipila ka gagmay nga mga iro nga nagpuyo usab sa mga tangkal. Sa dihang gagmay pa ang mga leon, kadtong banhaan nga mga iro walay kalooy nga migukod sa mga leon ug mipaak sa ilang mga tiil. Ang nati nga mga leon naanad na nga mouk-ok sa suok, nahadlok sa mga iro.
Sa pagdako sa mga leon, mipadayon sila nga mouk-ok sa kahadlok. Sa usa ka witik sa tiil, sayon ra kaayo niining mapalagpot kadto nga mga iro, apan ang mga leon wala makakita sa ilang mga kaugalingon kon unsa gayud kini. Wala sila makaamgo sa ilang harianong kaugalingon ug potensyal.
Kitang tanan nag-atubang og samukan nga gagmay nga mga iro nga mokuha sa atong pagsalig ug mopauk-ok kanato sa masambingayong mga suok. Akong hinganlan ang tulo.
Kakulang sa Pagsalig
Daghan kanato mas mohulagway sa atong mga binuhatan pinaagi sa atong mga kapakyasan kay sa atong mga kalampusan. Kon makakuha ta og 80 ka saktong mga tubag sa 100 ka mga pangutana, magul-anon kitang moangkon nga nasayop kita sa 20 ka mga pangutana kay sa mapasigarbuhong mosulti nga nakakuha kita og 80 ka sakto. Ang kakulang sa pagsalig sa atong potensyal ug sa atong kaugalingon makapabuta kanato sa atong tinuod nga bili ug kapasidad.
Kakulang sa Kahibalo
Si Nephi nakakita og panan-awon kabahin sa inahan sa Manluluwas, apan sa dihang gipangutana kon nakasabut ba siya sa pagpakig-angay sa Dios, miangkon siya nga wala siya masayud sa kahulugan sa tanang mga butang. Apan una gideklarar niya ang unsay iyang nasayran: “[Ang Dios] nahigugma sa iyang mga anak” (tan-awa sa 1 Nephi 11:12–17). Kana ang labing mahinungdanong butang nga angayng masayran. Kini nagpugong kanato nga matugotan ang samukan nga mga iro sa kulang nga kahibalo nga makompromiso ang atong pagkasiguro sa katinuod sa Simbahan ug sa atong relasyon sa Dios ug sa Iyang dili mapakyas ug makahatag og gahum nga gugma alang kanato.
Kawalay Pag-amping o Kawalay Pagtagad
Ang dili maayo nga mga pagpili o pagbaliwala sa maayong mga pagpili modaut sa atong panan-aw sa reyalidad. Adunay simbolikanhong rason nga ang mga anak sa Israel kinahanglang manguha og mana matag adlaw (tan-awa sa Exodo 16:4). Ang inadlaw nga obligasyon sa pagpanguha og makaon nakatabang kanila sa paghinumdom sa Dios. Karon, ang pagbasa sa kasulatan, pag-ampo, pagsimba, ug pagserbisyo sa usag usa mao ang atong inadlaw-adlaw nga mana isip mga anak sa Dios aron sa pagtabang kanato sa paghinumdom sa Ginoo.
Nagsubay sa atong mga kaugatan ang espirituhanong mga kinaiya nga napanunod gikan sa Dios. Kita Iyang mga anak ug Iyang mga manununod. Wagtanga ang bisan unsang makalimbong nga mga mensahe, tinuohan, o mga batasan nga maoy hinungdan nga mouk-ok kamo sa mga suok sa inyong kinabuhi. Ayaw tugoti nga kini mosamok kaninyo ug makapahimo ninyo nga mobati nga mahadlukon o masakitan. Pagpakabuhi nga takus sa inyong mahangturong kapasidad. Kamo mga harianon.