Ang Nawala nga mga Kasulatan
Ang Dios maminaw gayud ug motubag sa atong mga pag-ampo kon atong gamiton ang atong pagtuo Kaniya ug sa Iyang Anak.
Mga paghulagway pinaagi ni Anna Sutor
Niadtong Hulyo 29, 1977, si Sister Cook ug ako bag-o lang nahuman sa among pagbisita sa Bolivia Santa Cruz Mission isip kabahin sa akong assignment sa akong pagkasakop sa Seventy dihang mihunong mi sa airport sa Cochabamba, Bolivia, sulod sa lima ka oras. Gipangkapoy kaayo mi, mao nga nalipay kami nga dunay pipila ka oras nga makapahulay. Sa dihang nakatulog na ko, duna koy kusog nga impresyon nga kinahanglan kong momata ug isulat ang pipila ka ideya nga misulod sa akong hunahuna.
Nagsulat ko sulod sa mga tulo ka oras, nagsulbad sa pipila ka mga problema sa organisayon nga akong giatubang sa kaugalingon nakong area sa mission sulod na sa mga katuigan. Gibati nako ang kusog kaayo nga pagbu-bu sa Espiritu ug mahinamong gisulat ang matag dinasig nga hunahuna.
Sa katapusan milarga na mi para sa La Paz, Bolivia. Mabination nga misugat namo si President ug Sister Chase Allred sa airport ug misakay sa ilang van padulong sa mission office. Among gi-lock ang van, gibilin ang among mga kargamento ug briefcase sa sulod, nagtugon si Sister Allred og usa ka elder nga motan-aw sa van.
Sa pagsulod namo sa office, ang presidente gisugat og usa ka babaye kansang bana himatyon. Ako ug ang presidente mitabang nga makalma siya ug matabangan sa iyang mga gikinahanglan. Sa samang higayon, si Sister Cook ug si Sister Allred miadto na sa mission home.
Dihang ang presidente ug ako mibalik sa van, ang tanan namong gamit wala na. Akong gihunahuna nga gidala na ni Sister Cook ang mga butang ngadto sa mission home. Apan samtang nagbiyahe mi pauli, akong namatikdan nga ang tuong bahin sa gamayng bintana guba na ug nagsugod ko og kabalaka nga basin gipangkawat ang among mga gamit.
Sa among pag-abut sa mission home, among nahibaloan nga ang tanan namong gamit nakawat. Ang pagkawala sa mga sinina nakamugan og temporaryo lamang nga problema. Ang makasubo kaayo mao nga ang akong mga kasulatan naa sulod sa gikawat nga briefcase dala ang dinasig nga mga ideya nga bag-o lang nakong nadawat didto sa Cochabamba. Gidaug ko sa kasagmuyo, kasuko, ug mga pagbati nga wala nay mahimo.
Human sa pag-ampo namong tanan aron makuha og balik ang among mga kabtangan, gipaningkamutan namong malingaw sa panihapon apan wala gayud. Ang akong mga kasulatan hinatag ngari nako sa akong mga ginikanan, nga dunay sagradong mensahe para nako gikan sa akong mama ug papa sa wala pa sila mamatay. Mga liboan na ka oras ang akong nagahin sa pagmarka, pag-cross reference, ug paghigugma sa bugtong kabtangan sa yuta nga sukad akong gikonsiderar nga dako kaayo’g bili.
Bisan og si Presidente Allred ug ako dunay daghang angay hisgutan, mibati ko og kusog nga impresyon nga kinahanglang buhaton namo ang tanan aron mauli ang akong mga kasulatan. Mao nga pagkahuman sa panihapon ang tanan nga didto nangluhod sa pag-ampo sa usa pa ka higayon. Nangaliyupo kami sa Ginoo nga ang mga kasulatan mauli, nga unta ang mga tawo nga mikuha niini makamatngon sa dili maayo nilang gihimo ug maghinulsol, ug unta ang pag-uli sa mga basahon mahimong paagi nga makadala og tawo sa tinuod nga Simbahan.
Among gihukman nga mangita sa duol nga dapit sa mission office ug sa duol nga luna, nanghinaot nga ang kawatan o mga kawatan mikuha ra sa mga item nga pwedeng mahalin ug gilabay ra ang English nga mga basahon.
Mga 10 kami ang nanakay sa van nga nagdala og mga flashlight ug sinina nga pagtugnaw. Miadto sa mga kadalanan, gisuhid ang bakanting mga lote ug nakig-istorya og mga tawo hangtud nga nahurot ang tanang posibling kahimoan. Walay tawo nga nakakita o nakadungog bahin niini. Sa katapusan namauli mi nga nanagsubo. Si Presidente Allred ug ako nahuman sa among buluhaton sa lawom nang gabii, ug sa pagkasunod adlaw si Sister Cook ug ako namauli sa among balay sa Quito, Ecuador.
Sulod sa misunod nga pipila ka semana, ang mga misyonaryo sa Bolivia padayon sa pagpangita. Sa labihang kasagmuyo, nakahukom sila nga magbutang og pahibalo sa duha ka inadlawng newspaper nagtanyag og ganti.
Sa samang higayon, didto sa Quito, naglisud ko. Wala ko katuon sa mga kasulatan sukad gikawatan ko. Naningkamot ko sa pagtuon, apan sa matag basa nako og usa ka bersikulo, gamay ra ang akong mahinumduman sa daghang gi-cross reference nga akong gihimo sulod sa kapin nga 20 ka tuig. Nasubo ko, naluya, ug wala nay tinguha sa pagbasa. Nag-ampo ko sa daghang higayon nga makit-an ang akong mga kasulatan. Ang akong asawa ug gagmay pang mga anak padayon usab nga nag-ampo matag adlaw sulod sa tulo ka semana, nag-ingon nga, “Langitnong Amahan, palihug iuli ang mga kasulatan ni Papa.”
Human sa mga tulo ka semana mibati ko kusog nga espirituhanong impresyon: “Elder Cook, hangtud kanus-a ka dili magbasa ug dili magtuon?” Nakatandog kaayo ang mga pulong, ug akong gidesisyunan nga kinahanglan kong magmapainubsanon ug matugyanon sa pagsugod og balik. Gamit ang mga kasulatan sa akong asawa, nagsugod ko sa pagbasa gikan sa Genesis sa Daang Tugon, ug uban sa iyang pagtugot, nagmarka ug nag-cross reference na usab.
Niadtong Agosto 18, usa ka empleyado sa Simbahan, si Brother Eb Davis, miabut sa Ecuador gikan sa Bolivia nga may dalang package gikan sa mission president sa La Paz. Iyang gibutang sa akong lamesa ang akong mga kasulatan kauban sa akong mga gisulat atol sa akong espirituhanong mga impresyon.
Ang kalipay nga akong nasinati dili mahulagway. Ang kahibalo nga ang Ginoo, sa pipila ka milagrusong paagi, misapnay sa basahon gikan sa La Paz, usa ka siyudad nga may 700,000–800,000 ka mga tawo, gikan sa kamot sa mga kawatan ug giuli kini nga mao ra gihapon—walay natangtang bisan usa ka pahina, walay gisi, o buling—lisud gihapon nakong mahunahuna. Nianang adlawa misaad ko sa Ginoo nga gamiton nako sa mas maayong paagi ang akong panahon ug akong mga kasulatan kay sa akong gihimo sa una.
Sa wala madugay akong nahibaloan nga usa ka babaye ang didto sa taboan—usa sa gatusan sa La Paz—nakakita sa hubog nga tawo nga nagwara-wara og usa ka itom nga basahon. Miyembro siya sa protestante nga simbahan ug mibati og kusog nga espirituhanong impresyon nga dunay balaang butang nga napasipad-an. Giduol niya ang tawo ug gipangutana kon unsa kana. Wala siya masayud unsa apan gipakita ra ngadto niya ang basahon. Nangutana siya kon duna pa bay lain. Mikuha siya og laing itom nga basahon. Nangutana siya kon duna pa bay lain. Mikuha siya og usa ka folder nga puno sa papel nga iya kunong sunugon. Mihangyo ang babaye nga iyang paliton, diin miuyon siya, sa kantidad nga 50 pesos (mga U.S. $2.50).
Pagkahuman, wala siya kasiguro nganong gipalit niya ang mga basahon. Iningles kini, apan di man siya kahibalo og Iningles. Ug mahal pa gyud—hapit 10 porsyento sa binulan niyang kinitaan. Walay laing rason nganong gipalit niya ang mga basahon gawas lang sa espirituhanong impresyon. Diha dayon gisugdan niya ang pagpangita sa simbahan nga ang ngalan naa sa atubangan sa mga basahon: Ang Simbahan ni Jesukristo sa mga Santos sa Ulahing mga Adlaw.
Human maadto ang pipila ka mga simbahan, sa katapusan miabut ra siya sa mission office sa Simbahan sa La Paz. Wala siya mahibalo mahitungod sa ganti o wala siya makakita nga duna diay kini gipahibalo sa newspaper, nga mogawas na nianang adlawa. Wala siya mangayo og bayad, bisan uli lang sa 50 pesos nga iyang gibayad. Gidawat sa mga elder ang mga basahon uban sa kalipay ug sa gihapon ilang gihatag ang ganti.
Giingnan sa babaye ang mga misyonaryo nga sakop siya sa Pentecostal nga sekta apan naminaw siya og maayo samtang gisultihan siya sa mga misyonaryo mahitungod sa ebanghelyo. Nahinumdom siya nga nabasa niya ang mahitungod ni Joseph Smith gikan sa usa ka pamphlet nga iyang napunitan sa karsada mga duha o tulo ka tuig nang milabay. Gidawat niya ang mga leksyon sa misyonaryo, ug pagkahuman sa ikaduhang leksyon, mipasalig siya nga magpabunyag. Mga duha ka semana human niadto, pagka-Septyembre 11, 1977, Dominggo sa hapon sa usa ka branch sa La Paz, Bolivia, si Maria Cloefe Cardenas Terrazas ug ang iyang anak nga lalaki si Marco Fernando Miranda Cardenas, nga 12 anyos, nabunyagan.
Ang Ginoo miusab sa mga pagbati nga midat-og kanako nga ako wala nay mahimo dihang nawala ang mga kasulatan ngadto sa mga pagbati sa kalipay nga makita ang pagpadayag sa Iyang gahum. Miingon ang Ginoo, “Busa sultihan ko kamo, nga bisan unsay inyong pangayoon pinaagi sa pag-ampo, tuohi nga inyo na kini nga nadawat, ug kamo magadawat niini” (Marcos 11:24).
Ang Dios maminaw gayud ug motubag sa atong mga pag-ampo kon atong gamiton ang atong pagtuo Kaniya ug sa Iyang Anak.