Unsa ang Atong Gituohan
Mituo Kita sa Pagtuman sa Napulo ka Sugo
Ang Napulo ka mga Sugo makita diha sa Daang Tugon (tan-awa sa Exodo 20:1–17), apan ang mga Santos sa Ulahing mga Adlaw nasayud nga kadto nga mga sugo magamit sa tanang kapanahonan, dili lamang sa panahon sa Daang Tugon. Si Abinadi mitudlo sa Napulo ka mga Sugo diha sa Basahon ni Mormon (tan-awa sa Mosiah 12:33–36; 13:13–24), ug ang Ginoo mipadayag niini pag-usab ngadto ni Propetang Joseph Smith alang sa atong panahon (tan-awa sa D&P 42:18–29; 59:5–13).
Bisan tuod ang mga katawhan sa daghang mga katilingban karon mibaliwala niini nga mga sugo, kita nagtuo nga kini gipatuman gihapon. Si Presidente Thomas S. Monson mipasabut:
“Ang mga kinaiya nga kaniadto gikonsiderar nga dili angayan ug imoral sa pagkakaron wala lamang itugot apan gitan-aw na sa kadaghanan gayud nga madawat ra. …
“Bisan tuod ang kalibutan nausab, ang mga balaod sa Dios nagpabiling mao lang gihapon. Wala kini mausab; kini dili mausab. Ang Napulo ka mga Sugo mao gayud kana—mga sugo. Kini dili mga sugyot. Kini sa matag tipik mga gikinahanglan gihapon karon sama sa paghatag niini sa Dios kaniadto sa mga anak sa Israel.”1
Dili kita mosulti og bati sa uban tungod sa dili pagsunod sa mga sugo. Hinoon, kita motan-aw sa atong kaugalingong mga kinabuhi ug modeterminar kon unsa ka maayo natong gisunod ang balaan nga mga instruksyon nga gihatag kanato.
Ang Napulo ka mga Sugo nagrepresentar sa sukaranan nga mga sumbanan sa kinaiya nga mahimong bahinon sa duha ka grupo: giunsa nato pagtratar ang Dios ug giunsa nato pagtratar ang uban. Aron sa pagtabang kanato nga mapabilin ang Dios diha sa sentro sa atong mga kinabuhi, Siya nagsugo kanato nga dili mosimba og laing mga dios, nga mobalaan sa adlaw nga Igpapahulay, ug molikay sa pagpasipala ug pag-ampo sa mga dios-dios. Aron sa pagtabang kanato nga mohigugma sa mga anak sa Dios, Siya nagsugo kanato nga motahud sa atong mga ginikanan ug nga dili mangawat, mopatay, mamakak, maibug, o manapaw.
Tungod sa nagpadayon nga pagpadayag sa Dios ngadto sa Iyang mga propeta, nakakat-on pa kita og dugang mahitungod sa unsay Iyang gilauman gikan kanato, apan ang Napulo ka mga Sugo nagpabilin nga maayong sinugdanan sa atong paningkamot nga magmasulundon. “Ang mga sugo [sa Dios] mao ang pagpakita sa Iyang gugma alang kanato, ug ang pagkamasulundon ngadto sa Iyang mga sugo usa ka pahayag sa atong gugma alang Kaniya.”2
Mga paghulagway pinaagi ni J. Beth Jepson