Mga Tingog sa mga Santos sa Ulahing mga Adlaw
Pagpangandam alang sa Emerhensya: Mga Linog ug mga Botelya
Ricardo Sosa, Santa Lucia, Argentina
Paghulagway pinaagi ni Allen Garns
Sa siyam pa lang ka bulan ang akong edad, ang akong mga ginikanan—bag-o lang nga magtiayon, nga may tulo ka anak ug may gimabdos pa—naigo sa usa ka linog nga may gikusgon nga 7.5 sa Argentina. Dihang nagsugod og katumpag ang among balay, gipangkuha dayon mi ni papa ug mama ug midagan. Human sa pagsiguro nga OK na mi, ilang gisusi ang palibut sa mga nangaguba. Diha dayon gisubay sa akong papa ang mga kadaot, ug nahibaloan nga wala mi limpyong tubig nga makuha gikan sa suplay sa gobyerno. Wala gani igong tubig nga ihugas sa mga abug gikan sa nangalumpag nga balay!
Sa paghunong sa linog, gikuha ni papa ang iyang bisikleta ug gisusi ang iyang mama, nga nagpuyo pila lang ka eskina ang gilay-on. Sa iyang pag-abut sa nalumpag nga balay sa iyang mama, ningliput siya sa luyo ug didto ang iyang mama naglingkod nga dunay gamay rang mga pangos.
Mihangyo ang akong lola kang papa nga panguhaon ang ubang mga butang, ug samtang gihimo niya kini, nakakita siya og duha ka botelya (dagkong botelya nga sudlan sa baligya nga ilimnon nga mosulod og 5 hangtud 15 ka galon [20 ngadto sa 60 litros]) nga puno sa mainom nga tubig. Wala kini maunsa.
Pipila ka bulan sa wala pa ang linog, si Presidente Spencer W. Kimball (1895–1985) mitudlo nga ang mga Santos sa tibuok kalibutan magtipig og pagkaon ug tubig. Ang akong lola, bag-o nga nakabig ug gipaminaw kini. Gumikan niadtong duha ka Botelya, nahatagan namo ang among pamilya sa duha ka adlaw namong kinahanglanon sa wala pa moabut ang tabang sa emerhensya.
Kini nga ehemplo sa kamasulundon sa akong lola usa ka pagpamatuod sa akong papa, nga sa wala madugay nakabig siya sa ebanghelyo. Ang among pamilya sukad niadto na-seal sa templo. Mapasalamaton kaayo ko sa hugot nga pagtuo sa akong lola ug sa iyang pagsunod sa panawagan nga mangandam.