![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fb1%2Fff%2Fb1ffea5c40a7fd6fa7c06024a281445003450693%2Fb1ffea5c40a7fd6fa7c06024a281445003450693.jpeg/full/!250,/0/default)
Kalkalohk Duwehte Dahme Sounkomouro Wia
Kitail anahne kasalehda atail kaping kalahngan oh poakehng Koht ni atail kin kalohk ni limpoak ong riatail lih oh ohl akan.
E wia kapai kesempwal ehu ni atail wie momour nan ansou me kaudial kan kin pwilipwildo sang Koht. Ni atail kaskasik oh alehier “mahkpen mehkoaros,”1 me wiawihier oh pahn pweida sang ni kokohpdahn mwekid kan en atail ansou me kaunop kitaildahngehr Ketdo Keriau en Sounkomouro.2
Sohte ehu wiepen kaunopada pwehn tuhong Ih likin atail pahn nantiong duwehla Ih ni atail kin kalohk ong emenemen ni limpoak! Ih duwen en Sises Krais ah ketin kasukuhli Sapwwellime kan ni tepdahn mwehi wet. “Ma kumwail poakohng ie kumwail pahn papah ie.”3 Atail papah meteikan wia kasansalepen atail mour en tohnpadahk oh atail kaping kalahngan oh limpoak ong Koht oh Sapwelllime Ieroso, Sises Krais.
Ekei ansou kitail kin medewe me kitail anahne wia mehkot laud oh kaselel me “wad” ni atail kin papah mehn mpatail kan. Ahpw sawaski mehkot mengei kan kin lipwalipw ong mehteikan oh pil ong kitail. Dahme Sounkomouro wia? Sapwellime kisakis sarawi kan en Tomwo oh Iasadao—me kitail kasarawi ni rahn kaselel en Ihster Sarawi wet—“sohte mehkot me kesempwal oh lipwan [ong] aramas koaros me momourehr oh me pil pahn kohdo pohn sampa wet.”4 Ahpw E pil kin sirei, mahsenieng, ketseli, rong, ketkihda sapwellime ansou, kangoange, kasukuhli, kamwenge, oh mahkehng. E ketin papah peneinei oh kempoakepah kan, mehn mpe kan oh me dohla kan duwepenehte, oh E ketin luke koaros me E mwahngi oh me kempoake kan ren ale kapai kan en Sapwellime rongamwahuo. Iren sawas “mengei’ pwukat en papah oh limpoak wiahier atail mehn kahlmengi ni atail kin kalkalohk,
Ni amwail ahneki ansou mwahu en welian Sounkomouro ni amwail kalkalohk, peidek rehmwail, “Ia mwomwen ei kak ehukihda marain en rongamwahuo ong aramas de peneinei wet? Dahme Ngehno kamarainihkinie en wia?
Kalohk kak wiawi ni songen mwohmw oh wiepe tohto. Eri mehnia mwohmw de wiepe me kitail kak alasang?
Ekei wiepen kalohk kan iei en presidensi kan en pwihn en elder kan oh Pwihn en Sawas en Lih arail kin kapakapki oh kaweidki pwukoa kan. E kak wiawi ni en kaun kan kin kaweidi ohl oh lih akan me pahn kalohk ong aramas oh peneinei kan ahpw kaidehn kaun kan en kihdahte doropwe. E kak wiawi ni ansoun alialu, pokonpene nipwong en mwadong kan, kihda sawas de sesewese emenemen. E kak wiawi sang ni pwarek aramas de koaskoasoi pohn delepwohn de pohn internet de sehlpwhon. E kak wiawi sang ni ehukihpene pwuhk sarawi de audepen padahk en kapokon lap me pahn kak kamwakid aramaso. E kak wiawi sang ni koaskoasoia duwen rongamwahuo oh ehukipene kadehde pwehn kamarain oh kameleilei. E kak wiawi sang ni nsenohki mehteikan. E kak wiawi sang ni koaskoasoipene me pid kalohk, anahn kan oh kehlail kan en kin wiawi ni keneinei. E kak wiawi ni en ward kaunsell kan kin pohnesehda anahn kan.
Songen kalohk wet me kakehlailiada emen lih me keseula wasa me dohsang nimweho ansou me ah pwoudo kohla sukuhl. Pwehki sohte nah delepwohn oh mie nah kisin seri men kahrehda liho sonsuwedda, salongala mehlel oh kelkelehpw nan wasa kapwo. Ni sohte pakair, emen lih sang Pwihn en Sawas en Lih kohla rehn liho wahla nein nah serio ehu suht, wa irahda nan were sidohsa, kolahng nan sidowa. Liho wie kalkalahngan nda, “Liho seweseiehda ansou me I keieu anahne sawas!”
Kalohk mehlel me wiawi sang rehn emen lih mah nan Afrika me kepwukoahieng en pwarek emen lih me solahr iang sarawi ki ansou reirei. Ni en liho lella ni imwen lih teio, e diar me liho kamakamehr, pirapalahr ah dipwisou, kerenieng nekla kene mwenge oh sohte ahneki likou me e pepehm pahn mwahueng en likauwih oh iang sarawi. Lih me kepwukoahieng en kalohkehng liho onopada en rong, wahla wahn tuhke sang nan ah mwetuwelo, pwuhk sarawi oh limpoak. Lih me solahr sarawio mwadangete pwurala sarawi oh met alehier ehu malipilip pwehki e ese me mie me poakepoake oh kesempwaliki.
Kapatpenehn doadoahk kan en Pwihn en Sawas en Lih oh pwihn en elder kan me wekdeklahr pahn elehda miniminpene me kak kapwarehda pweida laud. Kalohk pahn wiahla doadoahk en minimin ehu me pahn kapwaiada en prihsduhd pwukoa en pwarek imwen emenemen towehkan oh mwasmwasahn mwomwohdiso ansou koaros oh ieiang oh kakehlaka irail.”5 oh pil kapwaiada en Pwihn en Sawas en Lih pwukoahn sewese emenemen kaunopada ong kapai kan en mour soutuk.6 Doadoahkpene pahn kaweid pisop oh presidensi en elder kan oh Pwihn en Sawas en Lih en kak wiahla mehn kamarain ni arail rapahki wiepe keieu mwahu en mwasahn oh apwalih emenemen oh peneinei.
I men ehukihda ehu mehn kahlmengi. Nohno men kadierekda me e ahneki kanser, Mwurinte ah tepda ale wini, Pwihn en Sawas en Lih tepda pilahne wiepe me pahn keiou sewese liho ki kisin mwenge, peidaid ong imwen wini, oh sawas teikan. Irail kin pwarek liho, oh kin kapkapereni liho. Ni ansou ohte, pwihn en Melkisedek Prihsduhd pil tepda sawas. Irail sawaskihda doadoahk oh onesapahliada ehu perehn meir oh wasahn duhdu pwehn kamangaiala epwelpen liho. Mwahnakapw kan pil toukihda pehrail kan oh paliwararail kan pwehn iang kihda arail sawas, Oh peinakapw akan pil iang sawas: ni arail koasonehdi irail en kin kahlua nein liho kidio rahn koaros. Ni ah doudoula, tohn wardo pepeusehla arail sawas oh kin kapatahiong de wekid dahme konehng. E wia doadoahk en limpoak sansal ehu ni en emenemen towehkan arail miniminpene oh kasalehda nseno nan ehuehu wiepen sawas me kapaidahr kaidehn lih soumwahu ohte ahpw tohn eh peneineio pwon.
Mwurin sawas mwuledeko, en liho kansero doarala oh liho eri kapelsalehdala. Da tohn wardo esingekda oh medewe me arail doadoahk en sawaso pweida oh nekier? Soh, peinakapwko kahkahlua kidio rahn koaros, pwihn en prihsduhd ko wie kalkalohk ong en liho pwoud ohlo oh ah peneinei, oh Pwihn en Sawas en Lih pepeusehlahte arail limpoak pwehn kadierekda kehlail oh anahn. Riei ohl oh lih akan, met iei kalohk—met iei limpoak duwehte me Sounkomouro ketin wia!
Pilehu kapai nan pakair kaselel ko iei ansou mwahu en peinakapw akan me sounpar 14 lel 18en kin patehng iengarail nan Pwihn en Sawas en Lih oh kalohk, duwehte en mwahnkapw soangen sounpar kohte arail kin pateng iengarail nan Melkisedek Prihsduhd oh kalohk. Me pwulepwul kan kak ehukihda arail kisakis kan oh kekeirda ni palingehn ni arail iang me mah kan papah nan doadoahk en komour wet. Kepwukoahki me pwulepwul kan nan doadoahk en kalohk kak pil katohtola uwen towehkan arail pahn iang Pwihn en Sawas en Lih oh pwihn en elder kan nan doadoahk en kalohk.
Ni ai kin medewe peinakapw pwulepwul pwersisek kan me I ese, I kin kapaiahki irail tohn Pwihn en Sawas en Lih me pahn ahneki ansou mwahu oh kapai en patehng peinakapw pwerisek, koahiehk oh kehlail ni palingehn ni arail pahn wie kalkalohk ong mehteikan de kalohk pene.Ni mwohmw ohte I pil perenkihda ansou mwahu me peinakapw kan pahn ahneki ni arail pahn ale kasukuhl oh kaiahn oh kakehlail sang tohn Pwihn en Sawas en Lih. Ansou mwahu wet en iang kauwada wehin Koht pahn wia katep laud ehu ohng peinakapw kan sewese kaunopirailda pwehn kapwaiada arail pwukoah ni arail wia sounkaweid nan Mwomwohdiso, nan wehi oh arail pali nan peneinei. Ihme Sister Bonnie L Oscarson kasalehda aio me peinakapw kan “men sawas. Irail anahne ese me mie kateparail oh irail kesempwal nan doadoahk en komour.”7
Pwe ni mehlel, peinakapw akan tepier wie kalkalohk ong mehteikan ni ah sohte kepwukoa de kapehse. Ehu peneinei me I ese keseukihla mwail epwiki ong wasa ehu me irail sehse towehkan. Nan irair en keioun wihkohte, emen serepein sounpar 14 sang ni ward en arail wasahn kouson kapwo lella ni imwarail weuwa pleit en cookies ehu pwehn kasamwo irail lahng wasao. En serepeino nohnou kesihnen mwuri sinsirei ki ah sewese serepeino wahla wasao.
Emen nohno tohrohr pwunodada ehu rahno me nah serepein sounpar 16 pwurala nihmwo pand. Ni an serepeino ah lella, ah nohnou ahpw lingeringer peidek reh ia wasa e mihmi ie. Me sounpar 16 o mwomwen pweipweiek sapengki me e wahla wahn rohs ehu ong liohdi men me kouson kerendo. Serepeino kilang me liho mwomwen laloid ihme e pwarengki liho. Ni an ah nohnou ah pwungkihla, peinakapwo eri kin wie mwemweiti liohdiho. Ira wiahla ehu perien, oh ara ehupene kaselelo wiewiawihki sounpar kei.
Emenemen peinakapwko, oh pil ekei me duwehte ira, kasawiada en emen tohrohr ah anahn oh nantiong apwali. Peinakapw akan kin ipwikihdi arail men apwalih oh ehupene me kin kak inenla mwahu sang ni arail kalohk oh ehuohng lih mah kan.
Sohte lipilipil atail sounpar, ni atail kin medewe mwomwen kalohk keiou katapan, kitail kin peidek, “Dahme liho [de ohlo] anahne? Kapatahieng peideko atail anahn mehlel en papah, Ngehno pahn kahluwai kitail en wia dahme pahn pwekada oh kakehlaili aramaso. I rongehr koasoi pen riei ohl oh lih akan me alehier kapai sang ni ehu kisin wiewia de koasoamw nan sarawi, lamalam mwahu en email de nting, pein tuhong aramas me mih nan kahpwal, luk ong nan mwekid en ehu pwihn, de sawas nan irair en kahpwal. Nohno/pahpa kiripw kan, souleng kapw kan, me sohla iang sarawi kan, me ahr pwoud kan melahr, de me pwulepwul me nannantih kan ele anahne ohl oh lih akan me kalkalohk en pohnese irail. Doadoahkpenehn nan pwungen presidensi kan en pwihn en elder kan oh Pwihn en Sawas en Lih me pahn koasonehdi kepwukoa.
Ni imwin mehkoaros, kalohk mehlel kin pweida wad ehu ni ah kin pahsonkihda limpoak. Katep oh kamwahu oh lingan en kalohk mehlel kin wekidala mehlel mour kan! Ni ansou me atail mohngiong kan kin sawa peseng oh men poakehng, ale, kangoange oh kaloalamwahuwi, manaman en kalohk pahn kehlaila, Ma limpoak me kin pahsone, manaman pahn mie, oh kitail pahn diar wiepehkan en wahdo riatail lih oh ohl me “salongalahr kan” ong nan rongamwahu en Sises Krais.
Sounkomouro iei atail mehn kahlmengi nan mehkoaros—kaidehnte ong dahme anahne wiawi, ahpw kahrepen atail wia met.8 “Sapwellime doadoahk pohn sampa wia [ehu] luhk ong kitail—en kilengwei doh oh ekis ile, pwehn manokehla atail kahpwal kan oh [pwehn] sewese mehteikan.”9 Ni atail alehda ansou mwahuo pwehn kalohk mehlel ong riatail lih oh ohl akan, kitail kapaidahr pwehn kawekala palingenatail en peipeian kupwur en Koht, oh wehwehki mwahu Sapwellime koasondi en sewese emenemen pwehn pwurodo Reh. Kitail pahn kak kasawiada mwadang Sapwellime kapai kan oh pereniki peuse kapai pwukat ong mehteikan. Atail mohngiong kan pahn koulki ni pahrek oh ngihl ehute:
Sounkomour, I pahn poakehng rieio
Ni ahi ese me komw poakehng ie,
I diar rehmwi ahi kehl, kaweid pei,
I pahn wia sapwellimomwi ladu.
Sounkomour, I pahn poakehng rieio—
Kaun, I pahn idawehn komwi.10
Kitail anahne kaping kalahngan oh poakehng Koht ni atail kin kalohk ni limpoak ong riatail lih oh ohl akan.11 Dahme pahn pweida iei minimin en pepehm me duehte aramas kan en mahs nan Amerika me pereperen sounpar 100 mwurin Sounkomouro ah pwarada nan sapwerailo.
“Eri e wiawi me sohte akipwung … pwehki ar poakehng Koht me kousoan nan arail mohngiong kan.
“… sohte noahrok, de koadoahkih en ale mehkot, … oh udahn sohte aramas peren duehte aramas me kepikipikda sang limen Koht.”12
I kadehdeh ni peren pein ahi kilang wekideklahn kasansal me sohte me eseh kan kohsang rehn Koht oh ma kitail pahn onopada aleirailda nan atail mohngiong kan, kitail pahn kaunopada mwahu pwehn tuheng Sapwellime Iehros, Sises Krais, ni Ah pahn ketdo. Kitail pahn karanih en wiahla aramas en Saion oh pahn pehm peren laud iangahki irailko me kitail sewesehda nan ahl en mour en tohnpadahk. Me kitail pahn wia ni kapakap ngoang oh karakarahk ni mwaren Sises Krais, amen.