Lea Tukú
Fakatauange te tau fakatapui mo toe fakatapui ʻetau moʻuí ke tokoni ki he ʻOtuá mo ʻEne fānaú—ʻi he ongo tafaʻaki ʻo e veilí.
Siʻoku kāinga ʻofeina, ʻi heʻetau aʻusia e fakaʻosinga ʻo e konifelenisi fakahisitōliá ni, ʻoku tau fakafetaʻi ki he ʻEikí ʻi Heʻene tatakí mo e maluʻí. Kuo fakahinohinoʻi mo fakamāmaʻi kitautolu ʻe he ngaahi pōpoakí.
Naʻe ʻikai vahe e ngaahi tefitó ki he kau leá. Naʻa nau takitaha lotua ha fakahā fakataautaha ʻi he teuteu ʻo ʻenau pōpoakí. Kiate au, ʻoku fakaofo e founga ʻo e fenāpasi lelei ai ʻa e ngaahi kaveingá. ʻI hoʻomou ako kinautolú, feinga ke mou ʻilo e meʻa ʻoku feinga e ʻEikí ke akoʻi atu ʻo fakafou Heʻene kau tamaioʻeikí.
Kuo fakaʻofoʻofa moʻoni ʻa e hivá. ʻOku mau fakamālōʻia lahi e kau hiva tokolahi kuo tuifio honau ngaahi talēnití ke ʻomi e Laumālie ʻo e ʻEikí ki he fakataha takitaha. Pea kuó Ne tāpuakiʻi e ngaahi lotú mo e haʻofangá ʻi he fakataha kotoa. Kuo hoko moʻoni e konifelenisí ko ha keinangaʻanga fakalaumālie kiate kitautolu kotoa.
ʻOku mau fakatauange mo lotua ke hoko e ʻapi ʻo e mēmipa takitaha ko ha maluʻanga ʻo e tuí, ke lava ʻo nofoʻia ʻe he Laumālie ʻo e ʻEikí. Neongo e fekeʻikeʻi ʻokú ne ʻākilotoa kitautolú, ka ʻe lava e ʻapi ʻo ha taha ‘o hoko ko ha potu fakalangi, ʻe lava ke fakatahaʻi ai e akó, lotú, tuí pea mo e ʻofá. Te tau lava moʻoni ‘o hoko ko ha kau ākonga ʻa e ʻEikí, ʻo tuʻu mo taukaveʻi Ia ʻi ha feituʻu pē ʻoku tau ʻi ai.
ʻOku totonu ke hoko e kaveinga ngāue ʻa e ʻOtuá ko ʻetau kaveinga ngāué. ʻOkú Ne finangalo ke fili ʻEne fānaú ke foki ange kiate Ia, kuo nau mateuteu, taau, maʻu ʻenitaumeni, silaʻi, pea tauhi faivelenga ki he ngaahi fuakava ne nau fai ʻi he ngaahi temipale māʻoniʻoní.
ʻOku tau maʻu ʻeni ha temipale ʻe 162 kuo ʻosi fakatapui. ʻOku tuʻu e ngaahi fuofua temipalé ko e fakamanatu ki he tui mo e vīsone ʻa hotau kau paionia ʻofeiná. Ko e temipale kotoa naʻa nau langá ko e ola ia ʻo ʻenau feilaulau mo e ngāue fakataautaha lahi. ʻOku nau tuʻu takitaha ko e siueli fakaʻofoʻofa ʻi he kalauni ʻo e lavameʻa ʻa e paioniá.
Ko hotau fatongia toputapu ke tokangaʻi kinautolu. ʻI heʻene peheé, ʻe vavé ni ha taimi ʻe fakafoʻou mo fakaleleiʻi ai ʻa e ngaahi temipale paioniá ni, pea ko ha niʻihi, ko hano toe fakaleleiʻi lahi moʻoni. ʻE fai ha feinga ke tauhi e tuʻunga fakahisitōlia makehe ʻo e temipale takitaha ʻo ka lava, ke fakatolonga e fakaʻofoʻofa mo e nimameaʻa ʻo e ngaahi toʻu tangata kuo fuoloa ʻenau mamaʻo atú.
Kuo ʻosi tuku atu e ngaahi fakaikiiki ki he Temipale Senisiaosi ʻIutaá. ʻE toki fanongonongo atu e palani ki hono fakaleleiʻi ʻo e Temipale Sōlekí, Temipale Sikueá, pea mo e ngaahi falekoloa ofi ki he ʻŌfisi ʻo e Siasí ʻi he ʻaho Falaite, 19 ʻo ʻEpeleli 2019.
ʻE fakaleleiʻi foki mo e Temipale Manitaí mo e Temipale Lōkaní he ngaahi taʻu ka hoko maí. Ko ʻene maau pē ʻa e ngaahi palani ko iá, ʻe fanongonongo atu foki mo ia.
ʻE fie maʻu ʻe he ngāué ni ke tāpuni fakataimi ʻa e ngaahi temipale takitaha ko iá. ʻE lava ke hoko atu e moihū mo e ngāue ʻa e Kāingalotu ʻo e Siasí ʻi ha ngaahi temipale kehe ofi atú. Ko ʻene ʻosi pē e ngāue takitaha, ʻe toe fakatapui leva e temipale fakahisitōlia takitaha.
Kāinga, ʻoku tau lau ha temipale ko e fale toputapu taha ia ʻi he Siasí. ʻI heʻemau fanongonongo ko ia ha palani ke langa ha temipale foʻoú, ʻoku hoko ia ko ha konga hotau hisitōlia toputapú. Mou kātaki ʻo fakafanongo lelei mo ʻapasia. Kapau te u fakahoko atu ha temipale ʻi ha feituʻu ʻoku mahuʻinga kiate koe, tuku muʻa ke u fokotuʻu atu ke punou pē ho ʻulú ʻo lotu fakalongolongo, ʻi he loto houngaʻia. ʻOku ʻikai fie maʻu ha kaikaila ke ne toʻo e tokangá mei he natula toputapu ʻo e konifelenisí ni pea mo e ngaahi temipale māʻoniʻoni ʻo e ʻEikí.
ʻOku mau fiefia he ʻahó ni ke fakahā ha palani ke langa ha ngaahi temipale lahi ange, ʻa ia ʻe langa ʻi he ngaahi feituʻu ko ʻení:
Pago Pago, American Samoa; Okinawa City, Okinawa; Neiafu, Tonga; Tooele Valley, Utah; Moses Lake, Washington; San Pedro Sula, Honduras; Antofagasta, Chile; Budapest, Hungary.
Fakamālō atu kāinga.
ʻI heʻemau lave ki hotau ngaahi temipalé, tatau pē motuʻa mo e foʻou, ʻofa ke tau takitaha fakahaaʻi ʻi heʻetau tōʻongá ko e kau ākonga moʻoni kitautolu ʻa e ʻEiki ko Sīsū Kalaisí. Fakatauange ke tau fakaleleiʻi ʻetau moʻuí ʻi heʻetau tui mo e falala kiate Iá. Fakatauange te tau maʻu e mālohi ʻo ʻEne Fakaleleí ʻaki haʻatau fakatomala fakaʻaho. Pea fakatauange te tau fakatapui mo toe fakatapui ʻetau moʻuí ke tokoni ki he ʻOtuá mo ʻEne fānaú—ʻi he ongo tafaʻaki ʻo e veilí.
ʻOku fakahoko atu ʻeku ʻofa mo e tāpuaki kiate kimoutolu, mo fakapapauʻi atu ʻoku kei hoko pē ʻa e fakahaá ʻi he Siasi ko ʻeni ʻo e ʻEikí. Te u kei hokohoko atu pē kae ʻoua “kuo kakato e ngaahi taumuʻa ʻa e ʻOtuá, pea folofoloa ʻa Sihova Maʻongoʻonga kuo lava e ngāué.”1
ʻOku pehē ʻeku tāpuakiʻi kimoutolu mo fakamoʻoni ʻoku moʻui e ʻOtuá! Ko Sīsū ʻa e Kalaisí! Ko Hono Siasí ‘eni. Ko Hono kakaí ʻa kitautolu. ʻI he huafa toputapu ʻo Sīsū Kalaisí, ʻēmeni.